৯. নৱমসিক্খাপদং

১১১১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধন্তি. তা বালা হোন্তি অব্যত্তা; ন জানন্তি কপ্পিযং ৱা অকপ্পিযং ৱা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধিস্সন্তী’’তি…পে… সচ্চং কিৰ, ভিক্খৱে, ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো ৱুট্ঠাপিতং পৱত্তিনিং দ্ৱে ৱস্সানি নানুবন্ধিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১১১২. ‘‘যা পন ভিক্খুনী ৱুট্ঠাপিতং পৱত্তিনিং দ্ৱে ৱস্সানি নানুবন্ধেয্য, পাচিত্তিয’’ন্তি.

১১১৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৱুট্ঠাপিতন্তি উপসম্পাদিতং. পৱত্তিনী নাম উপজ্ঝাযা ৱুচ্চতি. দ্ৱে ৱস্সানীতি দ্ৱে সংৱচ্ছৰানি. নানুবন্ধেয্যাতি ন সযং উপট্ঠহেয্য. দ্ৱে ৱস্সানি নানুবন্ধিস্সামীতি ধুৰং নিক্খিত্তমত্তে আপত্তি পাচিত্তিযস্স.

১১১৪. অনাপত্তি উপজ্ঝাযা বালা ৱা হোতি অলজ্জিনী ৱা, গিলানায, আপদাসু, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.