৯. নৱমসিক্খাপদং

১০১৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো তিৰচ্ছানৱিজ্জং পৰিযাপুণিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

১০১৪. ‘‘যা পন ভিক্খুনী তিৰচ্ছানৱিজ্জং পৰিযাপুণেয্য, পাচিত্তিয’’ন্তি.

১০১৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

তিৰচ্ছানৱিজ্জা [তিৰচ্ছানৱিজ্জং (ক.)] নাম যং কিঞ্চি বাহিৰকং অনত্থসংহিতং.

পৰিযাপুণেয্যাতি পদেন পৰিযাপুণাতি, পদে পদে আপত্তি পাচিত্তিযস্স. অক্খৰায পৰিযাপুণাতি, অক্খৰক্খৰায আপত্তি পাচিত্তিযস্স.

১০১৬. অনাপত্তি লেখং পৰিযাপুণাতি, ধাৰণং পৰিযাপুণাতি, গুত্তত্থায পৰিত্তং পৰিযাপুণাতি, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.