৫. চিত্তাগাৰৱগ্গো
১. পঠমসিক্খাপদং
৯৭৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ৰঞ্ঞো পসেনদিস্স কোসলস্স উয্যানে চিত্তাগাৰে পটিভানচিত্তং কতং হোতি. বহূ মনুস্সা চিত্তাগাৰং দস্সনায গচ্ছন্তি. ছব্বগ্গিযাপি ভিক্খুনিযো চিত্তাগাৰং দস্সনায অগমংসু. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো চিত্তাগাৰং দস্সনায গচ্ছিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো চিত্তাগাৰং দস্সনায গচ্ছিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো চিত্তাগাৰং দস্সনায গচ্ছন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো চিত্তাগাৰং দস্সনায গচ্ছিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
৯৭৮. ‘‘যা পন ভিক্খুনী ৰাজাগাৰং ৱা চিত্তাগাৰং ৱা আৰামং ৱা উয্যানং ৱা পোক্খৰণিং ৱা দস্সনায গচ্ছেয্য, পাচিত্তিয’’ন্তি.
৯৭৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
ৰাজাগাৰং নাম যত্থ কত্থচি ৰঞ্ঞো কীড়িতুং ৰমিতুং কতং হোতি.
চিত্তাগাৰং নাম যত্থ কত্থচি মনুস্সানং কীড়িতুং ৰমিতুং কতং হোতি.
আৰামো নাম যত্থ কত্থচি মনুস্সানং কীড়িতুং ৰমিতুং কতো হোতি.
উয্যানং নাম যত্থ কত্থচি মনুস্সানং কীড়িতুং ৰমিতুং কতং হোতি.
পোক্খৰণী নাম যত্থ কত্থচি মনুস্সানং কীড়িতুং ৰমিতুং কতা হোতি.
৯৮০. দস্সনায গচ্ছতি, আপত্তি দুক্কটস্স. যত্থ ঠিতা পস্সতি, আপত্তি পাচিত্তিযস্স. দস্সনূপচাৰং ৱিজহিত্ৱা পুনপ্পুনং পস্সতি, আপত্তি পাচিত্তিযস্স. একমেকং দস্সনায গচ্ছতি, আপত্তি দুক্কটস্স. যত্থ ঠিতা পস্সতি, আপত্তি পচিত্তিযস্স. দস্সনূপচাৰং ৱিজহিত্ৱা পুনপ্পুনং পস্সতি, আপত্তি পাচিত্তিযস্স.
৯৮১. অনাপত্তি আৰামে ঠিতা পস্সতি, গচ্ছন্তী ৱা আগচ্ছন্তী ৱা পস্সতি, সতি কৰণীযে গন্ত্ৱা পস্সতি, আপদাসু, উম্মত্তিকায, আদিকম্মিকাযাতি.
পঠমসিক্খাপদং নিট্ঠিতং.
২. দুতিযসিক্খাপদং
৯৮২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো আসন্দিম্পি পল্লঙ্কম্পি পৰিভুঞ্জন্তি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো আসন্দিম্পি পল্লঙ্কম্পি পৰিভুঞ্জিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো আসন্দিম্পি পল্লঙ্কম্পি পৰিভুঞ্জিস্সন্তী’’তি…পে… সচ্চং কিৰ, ভিক্খৱে, ভিক্খুনিযো আসন্দিম্পি পল্লঙ্কম্পি পৰিভুঞ্জন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো আসন্দিম্পি পল্লঙ্কম্পি পৰিভুঞ্জিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
৯৮৩. ‘‘যা পন ভিক্খুনী আসন্দিং ৱা পল্লঙ্কং ৱা পৰিভুঞ্জেয্য, পাচিত্তিয’’ন্তি.
৯৮৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
আসন্দী নাম অতিক্কন্তপ্পমাণা ৱুচ্চতি.
পল্লঙ্কো নাম আহৰিমেহি [‘‘অসংহাৰিমেহি’’ ইতি কঙ্খাৱিতৰণিযা সমেতি] ৱাড়েহি কতো হোতি.
পৰিভুঞ্জেয্যাতি তস্মিং অভিনিসীদতি ৱা অভিনিপজ্জতি ৱা, আপত্তি পাচিত্তিযস্স.
৯৮৫. অনাপত্তি আসন্দিযা পাদে ছিন্দিত্ৱা পৰিভুঞ্জতি, পল্লঙ্কস্স ৱাড়ে ভিন্দিত্ৱা পৰিভুঞ্জতি, উম্মত্তিকায, আদিকম্মিকাযাতি.
দুতিযসিক্খাপদং নিট্ঠিতং.
৩. ততিযসিক্খাপদং
৯৮৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো সুত্তং কন্তন্তি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো সুত্তং কন্তিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা …পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো সুত্তং কন্তিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো সুত্তং কন্তন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো সুত্তং কন্তিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
৯৮৭. ‘‘যা পন ভিক্খুনী সুত্তং কন্তেয্য, পাচিত্তিয’’ন্তি.
৯৮৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
সুত্তং নাম ছ সুত্তানি – খোমং, কপ্পাসিকং, কোসেয্যং, কম্বলং, সাণং, ভঙ্গং.
কন্তেয্যাতি সযং কন্ততি, পযোগে দুক্কটং. উজ্জৱুজ্জৱে আপত্তি পাচিত্তিযস্স.
৯৮৯. অনাপত্তি কন্তিতসুত্তং কন্ততি, উম্মত্তিকায, আদিকম্মিকাযাতি.
ততিযসিক্খাপদং নিট্ঠিতং.
৪. চতুত্থসিক্খাপদং
৯৯০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো গিহিৱেয্যাৱচ্চং কৰোন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো গিহিৱেয্যাৱচ্চং কৰিস্সন্তী’’তি…পে… সচ্চং কিৰ, ভিক্খৱে, ভিক্খুনিযো গিহিৱেয্যাৱচ্চং কৰোন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো গিহিৱেয্যাৱচ্চং কৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
৯৯১. ‘‘যা পন ভিক্খুনী গিহিৱেয্যাৱচ্চং কৰেয্য, পাচিত্তিয’’ন্তি.
৯৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
গিহিৱেয্যাৱচ্চং নাম অগাৰিকস্স যাগুং ৱা ভত্তং ৱা খাদনীযং ৱা পচতি, সাটকং ৱা ৱেঠনং ৱা ধোৱতি, আপত্তি পাচিত্তিযস্স.
৯৯৩. অনাপত্তি যাগুপানে, সঙ্ঘভত্তে, চেতিযপূজায, অত্তনো ৱেয্যাৱচ্চকৰস্স যাগুং ৱা ভত্তং ৱা খাদনীযং ৱা পচতি, সাটকং ৱা ৱেঠনং ৱা ধোৱতি, উম্মত্তিকায, আদিকম্মিকাযাতি.
চতুত্থসিক্খাপদং নিট্ঠিতং.
৫. পঞ্চমসিক্খাপদং
৯৯৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰা ভিক্খুনী থুল্লনন্দং ভিক্খুনিং উপসঙ্কমিত্ৱা এতদৱোচ – ‘‘এহায্যে, ইমং অধিকৰণং ৱূপসমেহী’’তি. থুল্লনন্দা ভিক্খুনী ‘সাধূ’তি পটিস্সুণিত্ৱা নেৱ ৱূপসমেতি ন ৱূপসমায উস্সুক্কং কৰোতি. অথ খো সা ভিক্খুনী ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা ভিক্খুনিযা – ‘এহায্যে’, ইমং অধিকৰণং ৱূপসমেহী’তি ৱুচ্চমানা – ‘সাধূ’তি পটিস্সুণিত্ৱা, নেৱ ৱূপসমেস্সতি ন ৱূপসমায উস্সুক্কং কৰিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী ভিক্খুনিযা – ‘‘এহায্যে, ইমং অধিকৰণং ৱূপসমেহী’’তি ৱুচ্চমানা – ‘‘সাধূ’’তি পটিস্সুণিত্ৱা, নেৱ ৱূপসমেতি ন ৱূপসমায উস্সুক্কং কৰোতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ভিক্খুনিযা – ‘‘এহায্যে, ইমং অধিকৰণং ৱূপসমেহী’’তি ৱুচ্চমানা – ‘‘সাধূ’’তি পটিস্সুণিত্ৱা, নেৱ ৱূপসমেস্সতি ন ৱূপসমায উস্সুক্কং কৰিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
৯৯৫. ‘‘যা পন ভিক্খুনী ভিক্খুনিযা – ‘এহায্যে, ইমং অধিকৰণং ৱূপসমেহী’তি ৱুচ্চমানা – ‘সাধূ’তি পটিস্সুণিত্ৱা সা পচ্ছা অনন্তৰাযিকিনী নেৱ ৱূপসমেয্য ন ৱূপসমায উস্সুক্কং কৰেয্য, পাচিত্তিয’’ন্তি.
৯৯৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
ভিক্খুনিযাতি অঞ্ঞায ভিক্খুনিযা.
অধিকৰণং নাম চত্তাৰি অধিকৰণানি – ৱিৱাদাধিকৰণং, অনুৱাদাধিকৰণং, আপত্তাধিকৰণং, কিচ্চাধিকৰণং.
এহায্যে ইমং অধিকৰণং ৱূপসমেহীতি এহায্যে ইমং অধিকৰণং ৱিনিচ্ছেহি.
সা পচ্ছা অনন্তৰাযিকিনীতি অসতি অন্তৰাযে.
নেৱ ৱূপসমেয্যাতি ন সযং ৱূপসমেয্য.
ন ৱূপসমায উস্সুক্কং কৰেয্যাতি ন অঞ্ঞং আণাপেয্য. ‘‘নেৱ ৱূপসমেস্সামি ন ৱূপসমায উস্সুক্কং কৰিস্সামী’’তি ধুৰং নিক্খিত্তমত্তে, আপত্তি পাচিত্তিযস্স.
৯৯৭. উপসম্পন্নায উপসম্পন্নসঞ্ঞা অধিকৰণং নেৱ ৱূপসমেতি ন ৱূপসমায উস্সুক্কং কৰোতি, আপত্তি পাচিত্তিযস্স. উপসম্পন্নায ৱেমতিকা অধিকৰণং নেৱ ৱূপসমেতি, ন ৱূপসমায উস্সুক্কং কৰোতি, আপত্তি পাচিত্তিযস্স. উপসম্পন্নায অনুপসম্পন্নসঞ্ঞা অধিকৰণং নেৱ ৱূপসমেতি, ন ৱূপসমায উস্সুক্কং কৰোতি, আপত্তি পাচিত্তিযস্স.
অনুপসম্পন্নায অধিকৰণং নেৱ ৱূপসমেতি, ন ৱূপসমায উস্সুক্কং কৰোতি, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৱেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.
৯৯৮. অনাপত্তি সতি অন্তৰাযে, পৰিযেসিত্ৱা ন লভতি, গিলানায, আপদাসু, উম্মত্তিকায, আদিকম্মিকাযাতি.
পঞ্চমসিক্খাপদং নিট্ঠিতং.
৬. ছট্ঠসিক্খাপদং
৯৯৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী নটানম্পি নটকানম্পি লঙ্ঘকানম্পি সোকজ্ঝাযিকানম্পি কুম্ভথূণিকানম্পি সহত্থা খাদনীযং ভোজনীযং দেতি – ‘‘ময্হং পৰিসতি ৱণ্ণং ভাসথা’’তি. নটাপি নটকাপি লঙ্ঘকাপি সোকজ্ঝাযিকাপি কুম্ভথূণিকাপি থুল্লনন্দায ভিক্খুনিযা পৰিসতি ৱণ্ণং ভাসন্তি – ‘‘অয্যা থুল্লনন্দা বহুস্সুতা ভাণিকা ৱিসাৰদা পট্টা ধম্মিং কথং কাতুং; দেথ অয্যায, কৰোথ অয্যাযা’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – কথঞ্হি নাম অয্যা থুল্লনন্দা অগাৰিকস্স সহত্থা খাদনীযং ভোজনীযং দস্সতীতি…পে… সচ্চং কিৰ, ভিক্খৱে, থুল্লনন্দা ভিক্খুনী অগাৰিকস্স সহত্থা খাদনীযং ভোজনীযং দেতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী অগাৰিকস্স সহত্থা খাদনীযং ভোজনীযং দস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
১০০০. ‘‘যা পন ভিক্খুনী অগাৰিকস্স ৱা পৰিব্বাজকস্স ৱা পৰিব্বাজিকায ৱা সহত্থা খাদনীযং ৱা ভোজনীযং ৱা দদেয্য, পাচিত্তিয’’ন্তি.
১০০১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
অগাৰিকো নাম যো কোচি অগাৰং অজ্ঝাৱসতি.
পৰিব্বাজকো নাম ভিক্খুঞ্চ সামণেৰঞ্চ ঠপেত্ৱা যো কোচি পৰিব্বাজকসমাপন্নো.
পৰিব্বাজিকা নাম ভিক্খুনিঞ্চ সিক্খমানঞ্চ সামণেৰিঞ্চ ঠপেত্ৱা যা কাচি পৰিব্বাজিকসমাপন্না.
খাদনীযং নাম পঞ্চ ভোজনানি – উদকদন্তপোনং ঠপেত্ৱা অৱসেসং খাদনীযং নাম.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং.
দদেয্যাতি কাযেন ৱা কাযপটিবদ্ধেন ৱা নিস্সগ্গিযেন ৱা দেতি, আপত্তি পাচিত্তিযস্স. উদকদন্তপোনং দেতি, আপত্তি দুক্কটস্স.
১০০২. অনাপত্তি দাপেতি ন দেতি, উপনিক্খিপিত্ৱা দেতি, বাহিৰালেপং দেতি, উম্মত্তিকায, আদিকম্মিকাযাতি.
ছট্ঠসিক্খাপদং নিট্ঠিতং.
৭. সত্তমসিক্খাপদং
১০০৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী আৱসথচীৱৰং অনিস্সজ্জিত্ৱা পৰিভুঞ্জতি. অঞ্ঞা উতুনিযো ভিক্খুনিযো ন লভন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা আৱসথচীৱৰং অনিস্সজ্জিত্ৱা পৰিভুঞ্জিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী আৱসথচীৱৰং অনিস্সজ্জিত্ৱা পৰিভুঞ্জতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী আৱসথচীৱৰং অনিস্সজ্জিত্ৱা পৰিভুঞ্জিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
১০০৪. ‘‘যা পন ভিক্খুনী আৱসথচীৱৰং অনিস্সজ্জিত্ৱা পৰিভুঞ্জেয্য, পাচিত্তিয’’ন্তি.
১০০৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
আৱসথচীৱৰং নাম ‘‘উতুনিযো ভিক্খুনিযো পৰিভুঞ্জন্তূ’’তি দিন্নং হোতি.
অনিস্সজ্জিত্ৱা পৰিভুঞ্জেয্যাতি দ্ৱেতিস্সো ৰত্তিযো পৰিভুঞ্জিত্ৱা চতুত্থদিৱসে ধোৱিত্ৱা ভিক্খুনিযা ৱা সিক্খমানায ৱা সামণেৰিযা ৱা অনিস্সজ্জিত্ৱা পৰিভুঞ্জতি, আপত্তি পাচিত্তিযস্স.
১০০৬. অনিস্সজ্জিতে অনিস্সজ্জিতসঞ্ঞা পৰিভুঞ্জতি, আপত্তি পাচিত্তিযস্স. অনিস্সজ্জিতে ৱেমতিকা পৰিভুঞ্জতি, আপত্তি পাচিত্তিযস্স. অনিস্সজ্জিতে নিস্সজ্জিতসঞ্ঞা পৰিভুঞ্জতি, আপত্তি পাচিত্তিযস্স.
নিস্সজ্জিতে অনিস্সজ্জিতসঞ্ঞা, আপত্তি দুক্কটস্স. নিস্সজ্জিতে ৱেমতিকা, আপত্তি দুক্কটস্স. নিস্সজ্জিতে নিস্সজ্জিতসঞ্ঞা অনাপত্তি.
১০০৭. অনাপত্তি নিস্সজ্জিত্ৱা পৰিভুঞ্জতি, পুন পৰিযাযেন পৰিভুঞ্জতি, অঞ্ঞা উতুনিযো ভিক্খুনিযো ন হোন্তি, অচ্ছিন্নচীৱৰিকায, নট্ঠচীৱৰিকায, আপদাসু, উম্মত্তিকায, আদিকম্মিকাযাতি.
সত্তমসিক্খাপদং নিট্ঠিতং.
৮. অট্ঠমসিক্খাপদং
১০০৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী আৱসথং অনিস্সজ্জিত্ৱা চাৰিকং পক্কামি. তেন খো পন সমযেন থুল্লনন্দায ভিক্খুনিযা আৱসথো ডয্হতি. ভিক্খুনিযো এৱমাহংসু – ‘‘হন্দায্যে, ভণ্ডকং নীহৰামা’’তি. একচ্চা এৱমাহংসু – ‘‘ন মযং, অয্যে, নীহৰিস্সাম. যং কিঞ্চি নট্ঠং সব্বং অম্হে অভিযুঞ্জিস্সতী’’তি. থুল্লনন্দা ভিক্খুনী পুনদেৱ তং আৱসথং পচ্চাগন্ত্ৱা ভিক্খুনিযো পুচ্ছি – ‘‘অপায্যে, ভণ্ডকং নীহৰিত্থা’’তি? ‘‘ন মযং, অয্যে, নীহৰিম্হা’’তি. থুল্লনন্দা ভিক্খুনী উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খুনিযো আৱসথে ডয্হমানে ভণ্ডকং ন নীহৰিস্সন্তী’’তি! যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা আৱসথং অনিস্সজ্জিত্ৱা চাৰিকং পক্কমিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী আৱসথং অনিস্সজ্জিত্ৱা চাৰিকং পক্কমতীতি [পক্কমীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী আৱসথং অনিস্সজ্জিত্ৱা চাৰিকং পক্কমিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
১০০৯. ‘‘যা পন ভিক্খুনী আৱসথং অনিস্সজ্জিত্ৱা চাৰিকং পক্কমেয্য, পাচিত্তিয’’ন্তি.
১০১০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
আৱসথো নাম কৱাটবদ্ধো ৱুচ্চতি.
অনিস্সজ্জিত্ৱা চাৰিকং পক্কমেয্যাতি ভিক্খুনিযা ৱা সিক্খমানায ৱা সামণেৰিযা ৱা অনিস্সজ্জিত্ৱা পৰিক্খিত্তস্স আৱসথস্স পৰিক্খেপং অতিক্কামেন্তিযা আপত্তি পাচিত্তিযস্স. অপৰিক্খিত্তস্স আৱসথস্স উপচাৰং অতিক্কামেন্তিযা আপত্তি পাচিত্তিযস্স.
১০১১. অনিস্সজ্জিতে অনিস্সজ্জিতসঞ্ঞা পক্কমতি, আপত্তি পাচিত্তিযস্স. অনিস্সজ্জিতে ৱেমতিকা পক্কমতি, আপত্তি পাচিত্তিযস্স. অনিস্সজ্জিতে নিস্সজ্জিতসঞ্ঞা পক্কমতি, আপত্তি পাচিত্তিযস্স.
অকৱাটবদ্ধং অনিস্সজ্জিত্ৱা পক্কমতি, আপত্তি দুক্কটস্স. নিস্সজ্জিতে অনিস্সজ্জিতসঞ্ঞা, আপত্তি দুক্কটস্স. নিস্সজ্জিতে ৱেমতিকা, আপত্তি দুক্কটস্স. নিস্সজ্জিতে নিস্সজ্জিতসঞ্ঞা, অনাপত্তি.
১০১২. অনাপত্তি নিস্সজ্জিত্ৱা পক্কমতি, সতি অন্তৰাযে, পৰিযেসিত্ৱা ন লভতি, গিলানায, আপদাসু, উম্মত্তিকায, আদিকম্মিকাযাতি.
অট্ঠমসিক্খাপদং নিট্ঠিতং.
৯. নৱমসিক্খাপদং
১০১৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো তিৰচ্ছানৱিজ্জং পৰিযাপুণিস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো তিৰচ্ছানৱিজ্জং পৰিযাপুণিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
১০১৪. ‘‘যা পন ভিক্খুনী তিৰচ্ছানৱিজ্জং পৰিযাপুণেয্য, পাচিত্তিয’’ন্তি.
১০১৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
তিৰচ্ছানৱিজ্জা [তিৰচ্ছানৱিজ্জং (ক.)] নাম যং কিঞ্চি বাহিৰকং অনত্থসংহিতং.
পৰিযাপুণেয্যাতি পদেন পৰিযাপুণাতি, পদে পদে আপত্তি পাচিত্তিযস্স. অক্খৰায পৰিযাপুণাতি, অক্খৰক্খৰায আপত্তি পাচিত্তিযস্স.
১০১৬. অনাপত্তি লেখং পৰিযাপুণাতি, ধাৰণং পৰিযাপুণাতি, গুত্তত্থায পৰিত্তং পৰিযাপুণাতি, উম্মত্তিকায, আদিকম্মিকাযাতি.
নৱমসিক্খাপদং নিট্ঠিতং.
১০. দসমসিক্খাপদং
১০১৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো তিৰচ্ছানৱিজ্জং ৱাচেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো তিৰচ্ছানৱিজ্জং ৱাচেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো তিৰচ্ছানৱিজ্জং ৱাচেস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো তিৰচ্ছানৱিজ্জং ৱাচেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো তিৰচ্ছানৱিজ্জং ৱাচেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –
১০১৮. ‘‘যা পন ভিক্খুনী তিৰচ্ছানৱিজ্জং ৱাচেয্য, পাচিত্তিয’’ন্তি.
১০১৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.
তিৰচ্ছানৱিজ্জা [তিৰচ্ছানৱিজ্জং (ক.)] নাম যং কিঞ্চি বাহিৰকং অনত্থসংহিতং.
ৱাচেয্যাতি পদেন ৱাচেতি, পদে পদে আপত্তি পাচিত্তিযস্স. অক্খৰায ৱাচেতি, অক্খৰক্খৰায আপত্তি পাচিত্তিযস্স.
১০২০. অনাপত্তি লেখং ৱাচেতি, ধাৰণং ৱাচেতি, গুত্তত্থায পৰিত্তং ৱাচেতি, উম্মত্তিকায, আদিকম্মিকাযাতি.
দসমসিক্খাপদং নিট্ঠিতং.
চিত্তাগাৰৱগ্গো পঞ্চমো.