৪. তুৱট্টৱগ্গো

১. পঠমসিক্খাপদং

৯৩২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো দ্ৱে একমঞ্চে তুৱট্টেন্তি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দ্ৱে একমঞ্চে তুৱট্টেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দ্ৱে একমঞ্চে তুৱট্টেস্সন্তী’’তি…পে… সচ্চং কিৰ, ভিক্খৱে, ভিক্খুনিযো দ্ৱে একমঞ্চে তুৱট্টেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো দ্ৱে একমঞ্চে তুৱট্টেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৩৩. ‘‘যা পন ভিক্খুনিযো দ্ৱে একমঞ্চে তুৱট্টেয্যুং, পাচিত্তিয’’ন্তি.

৯৩৪. যা পনাতি যা যাদিসা…পে… ভিক্খুনিযোতি উপসম্পন্নাযো ৱুচ্চন্তি.

দ্ৱে একমঞ্চে তুৱট্টেয্যুন্তি একায নিপন্নায অপৰা নিপজ্জতি, আপত্তি পাচিত্তিযস্স. উভো ৱা নিপজ্জন্তি, আপত্তি পাচিত্তিযস্স. উট্ঠহিত্ৱা পুনপ্পুনং নিপজ্জন্তি, আপত্তি পাচিত্তিযস্স.

৯৩৫. অনাপত্তি একায নিপন্নায অপৰা নিসীদতি, উভো ৱা নিসীদন্তি, উম্মত্তিকানং, আদিকম্মিকানন্তি.

পঠমসিক্খাপদং নিট্ঠিতং.

২. দুতিযসিক্খাপদং

৯৩৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো দ্ৱে একত্থৰণপাৱুৰণা তুৱট্টেন্তি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দ্ৱে একত্থৰণপাৱুৰণা তুৱট্টেস্সন্তি, সেয্যথাপি গিহিনিযো কামভোগিনিযো’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো দ্ৱে একত্থৰণপাৱুৰণা তুৱট্টেস্সন্তী’’তি…পে… সচ্চং কিৰ, ভিক্খৱে, ভিক্খুনিযো দ্ৱে একত্থৰণপাৱুৰণা তুৱট্টেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো দ্ৱে একত্থৰণপাৱুৰণা তুৱট্টেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৩৭. ‘‘যা পন ভিক্খুনিযো দ্ৱে একত্থৰণপাৱুৰণা তুৱট্টেয্যুং, পাচিত্তিয’’ন্তি.

৯৩৮. যা পনাতি যা যাদিসা…পে… ভিক্খুনিযোতি উপসম্পন্নাযো ৱুচ্চন্তি.

দ্ৱে একত্থৰণপাৱুৰণা তুৱট্টেয্যুন্তি তঞ্ঞেৱ অত্থৰিত্ৱা তঞ্ঞেৱ পাৰুপন্তি, আপত্তি পাচিত্তিযস্স.

৯৩৯. একত্থৰণপাৱুৰণে একত্থৰণপাৱুৰণসঞ্ঞা তুৱট্টেন্তি, আপত্তি পাচিত্তিযস্স. একত্থৰণপাৱুৰণে ৱেমতিকা তুৱট্টেন্তি, আপত্তি পাচিত্তিযস্স. একত্থৰণপাৱুৰণে নানত্থৰণপাৱুৰণসঞ্ঞা তুৱট্টেন্তি, আপত্তি পাচিত্তিযস্স.

একত্থৰণে নানাপাৱুৰণে [নানাপাৱুৰণসঞ্ঞা (ক.)], আপত্তি দুক্কটস্স. নানত্থৰণে একপাৱুৰণে [একপাৱুৰণসঞ্ঞা (ক.)], আপত্তি দুক্কটস্স. নানত্থৰণপাৱুৰণে একত্থৰণপাৱুৰণসঞ্ঞা, আপত্তি দুক্কটস্স. নানত্থৰণপাৱুৰণে ৱেমতিকা, আপত্তি দুক্কটস্স. নানত্থৰণপাৱুৰণে নানত্থৰণপাৱুৰণসঞ্ঞা, অনাপত্তি.

৯৪০. অনাপত্তি ৱৱত্থানং দস্সেত্ৱা নিপজ্জন্তি, উম্মত্তিকানং, আদিকম্মিকানন্তি.

দুতিযসিক্খাপদং নিট্ঠিতং.

৩. ততিযসিক্খাপদং

৯৪১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৱিসাৰদা পট্টা ধম্মিং কথং কাতুং. ভদ্দাপি কাপিলানী বহুস্সুতা হোতি ভাণিকা ৱিসাৰদা পট্টা ধম্মিং কথং কাতুং উড়াৰসম্ভাৱিতা. মনুস্সা – ‘‘অয্যা ভদ্দা কাপিলানী বহুস্সুতা ভাণিকা ৱিসাৰদা পট্টা ধম্মিং কথং কাতুং উড়াৰসম্ভাৱিতা’’তি ভদ্দং কাপিলানিং পঠমং পযিৰুপাসিত্ৱা, পচ্ছা থুল্লনন্দং ভিক্খুনিং পযিৰুপাসন্তি. থুল্লনন্দা ভিক্খুনী ইস্সাপকতা – ‘‘ইমা কিৰ অপ্পিচ্ছা সন্তুট্ঠা পৱিৱিত্তা অসংসট্ঠা যা ইমা সঞ্ঞত্তিবহুলা ৱিঞ্ঞত্তিবহুলা ৱিহৰন্তী’’তি ভদ্দায কাপিলানিযা পুৰতো চঙ্কমতিপি তিট্ঠতিপি নিসীদতিপি সেয্যম্পি কপ্পেতি উদ্দিসতিপি উদ্দিসাপেতিপি সজ্ঝাযম্পি কৰোতি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অয্যায ভদ্দায কাপিলানিযা সঞ্চিচ্চ অফাসুং কৰিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী ভদ্দায কাপিলানিযা সঞ্চিচ্চ অফাসুং কৰোতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ভদ্দায কাপিলানিযা সঞ্চিচ্চ অফাসুং কৰিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৪২. ‘‘যা পন ভিক্খুনী ভিক্খুনিযা সঞ্চিচ্চ অফাসুং কৰেয্য, পাচিত্তিয’’ন্তি.

৯৪৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুনিযাতি অঞ্ঞায ভিক্খুনিযা.

সঞ্চিচ্চাতি জানন্তী সঞ্জানন্তী চেচ্চ অভিৱিতৰিত্ৱা ৱীতিক্কমো.

অফাসুং কৰেয্যাতি – ‘‘ইমিনা ইমিস্সা অফাসু ভৱিস্সতী’’তি অনাপুচ্ছা পুৰতো চঙ্কমতি ৱা তিট্ঠতি ৱা নিসীদতি ৱা সেয্যং ৱা কপ্পেতি উদ্দিসতি ৱা উদ্দিসাপেতি ৱা সজ্ঝাযং ৱা কৰোতি, আপত্তি পাচিত্তিযস্স.

৯৪৪. উপসম্পন্নায উপসম্পন্নসঞ্ঞা সঞ্চিচ্চ অফাসুং কৰোতি, আপত্তি পাচিত্তিযস্স. উপসম্পন্নায ৱেমতিকা সঞ্চিচ্চ অফাসুং কৰোতি, আপত্তি পাচিত্তিযস্স. উপসম্পন্নায অনুপসম্পন্নসঞ্ঞা সঞ্চিচ্চ অফাসুং কৰোতি, আপত্তি পাচিত্তিযস্স.

অনুপসম্পন্নায সঞ্চিচ্চ অফাসুং কৰোতি, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৱেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.

৯৪৫. অনাপত্তি ন অফাসুং কত্তুকামা আপুচ্ছা পুৰতো চঙ্কমতি ৱা তিট্ঠতি ৱা নিসীদতি ৱা সেয্যং ৱা কপ্পেতি উদ্দিসতি ৱা উদ্দিসাপেতি ৱা সজ্ঝাযং ৱা কৰোতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

৯৪৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী দুক্খিতং সহজীৱিনিং নেৱ উপট্ঠেতি ন উপট্ঠাপনায উস্সুক্কং কৰোতি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা দুক্খিতং সহজীৱিনিং নেৱ উপট্ঠেস্সতি ন উপট্ঠাপনায উস্সুক্কং কৰিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী দুক্খিতং সহজীৱিনিং নেৱ উপট্ঠেতি ন উপট্ঠাপনায উস্সুক্কং কৰোতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী দুক্খিতং সহজীৱিনিং নেৱ উপট্ঠেস্সতি ন উপট্ঠাপনায উস্সুক্কং কৰিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৪৭. ‘‘যা পন ভিক্খুনী দুক্খিতং সহজীৱিনিং নেৱ উপট্ঠেয্য ন উপট্ঠাপনায উস্সুক্কং কৰেয্য, পাচিত্তিয’’ন্তি.

৯৪৮. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

দুক্খিতা নাম গিলানা ৱুচ্চতি.

সহজীৱিনী নাম সদ্ধিৱিহাৰিনী ৱুচ্চতি.

নেৱ উপট্ঠেয্যাতি ন সযং উপট্ঠেয্য.

ন উপট্ঠাপনায উস্সুক্কং কৰেয্যাতি ন অঞ্ঞং আণাপেয্য.

‘‘নেৱ উপট্ঠেস্সামি, ন উপট্ঠাপনায উস্সুক্কং কৰিস্সামী’’তি ধুৰং নিক্খিত্তমত্তে আপত্তি পাচিত্তিযস্স. অন্তেৱাসিনিং ৱা অনুপসম্পন্নং ৱা নেৱ উপট্ঠেতি, ন উপট্ঠাপনায উস্সুক্কং কৰোতি, আপত্তি দুক্কটস্স.

৯৪৯. অনাপত্তি সতি অন্তৰাযে, পৰিযেসিত্ৱা ন লভতি, গিলানায, আপদাসু, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

৯৫০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভদ্দা কাপিলানী সাকেতে ৱস্সং উপগতা হোতি. সা কেনচিদেৱ কৰণীযেন উব্বাড়্হা থুল্লনন্দায ভিক্খুনিযা সন্তিকে দূতং পাহেসি – ‘‘সচে মে অয্যা থুল্লনন্দা উপস্সযং দদেয্য আগচ্ছেয্যামহং সাৱত্থি’’ন্তি. থুল্লনন্দা ভিক্খুনী এৱমাহ – ‘‘আগচ্ছতু, দস্সামী’’তি. অথ খো ভদ্দা কাপিলানী সাকেতা সাৱত্থিং অগমাসি. থুল্লনন্দা ভিক্খুনী ভদ্দায কাপিলানিযা উপস্সযং অদাসি. তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৱিসাৰদা পট্টা ধম্মিং কথং কাতুং. ভদ্দাপি কাপিলানী বহুস্সুতা [বহুস্সুতাযেৱ (ক.)] হোতি ভাণিকা ৱিসাৰদা পট্টা ধম্মিং কথং কাতুং উড়াৰসম্ভাৱিতা. মনুস্সা – ‘‘অয্যা ভদ্দা কাপিলানী বহুস্সুতা ভাণিকা ৱিসাৰদা পট্টা ধম্মিং কথং কাতুং উড়াৰসম্ভাৱিতা’’তি ভদ্দং কাপিলানিং পঠমং পযিৰুপাসিত্ৱা পচ্ছা থুল্লনন্দং ভিক্খুনিং পযিৰুপাসন্তি. থুল্লনন্দা ভিক্খুনী ইস্সাপকতা – ‘‘ইমা কিৰ অপ্পিচ্ছা সন্তুট্ঠা পৱিৱিত্তা অসংসট্ঠা যা ইমা সঞ্ঞত্তিবহুলা ৱিঞ্ঞত্তিবহুলা ৱিহৰন্তী’’তি কুপিতা অনত্তমনা ভদ্দং কাপিলানিং উপস্সযা নিক্কড্ঢি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অয্যায ভদ্দায কাপিলানিযা উপস্সযং দত্ৱা কুপিতা অনত্তমনা নিক্কড্ঢিস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী ভদ্দায কাপিলানিযা উপস্সযং দত্ৱা কুপিতা অনত্তমনা নিক্কড্ঢতীতি [নিক্কড্ঢীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ভদ্দায কাপিলানিযা উপস্সযং দত্ৱা কুপিতা অনত্তমনা নিক্কড্ঢিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৫১. ‘‘যা পন ভিক্খুনী ভিক্খুনিযা উপস্সযং দত্ৱা কুপিতা অনত্তমনা নিক্কড্ঢেয্য ৱা নিক্কড্ঢাপেয্য ৱা, পাচিত্তিয’’ন্তি.

৯৫২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুনিযাতি অঞ্ঞায ভিক্খুনিযা. উপস্সযো নাম কৱাটবদ্ধো ৱুচ্চতি. দত্ৱাতি সযং দত্ৱা. কুপিতা অনত্তমনাতি অনভিৰদ্ধা আহতচিত্তা খিলজাতা.

নিক্কড্ঢেয্যাতি গব্ভে গহেত্ৱা পমুখং নিক্কড্ঢতি, আপত্তি পাচিত্তিযস্স. পমুখে গহেত্ৱা বহি নিক্কড্ঢতি, আপত্তি পাচিত্তিযস্স. একেন পযোগেন বহুকেপি দ্ৱাৰে অতিক্কামেতি, আপত্তি পাচিত্তিযস্স.

নিক্কড্ঢাপেয্যাতি অঞ্ঞং আণাপেতি, আপত্তি পাচিত্তিযস্স [এত্থ ‘‘আপত্তি দুক্কটস্সা’’তি সব্বত্থ দিস্সতি, ভিক্খুৱিভঙ্গে পন ইদিসেসু আণত্তিসহগতসিক্খাপদেসু ‘‘অঞ্ঞং আণাপেতি আপত্তি পাচিত্তিযস্সা’’তি আগতত্তা তমনুৱত্তিত্ৱা ৱিসোধিতমিদং]. সকিং আণত্তা বহুকেপি দ্ৱাৰে অতিক্কামেতি, আপত্তি পাচিত্তিযস্স.

৯৫৩. উপসম্পন্নায উপসম্পন্নসঞ্ঞা উপস্সযং দত্ৱা কুপিতা অনত্তমনা নিক্কড্ঢতি ৱা নিক্কড্ঢাপেতি ৱা, আপত্তি পাচিত্তিযস্স. উপসম্পন্নায ৱেমতিকা উপস্সযং দত্ৱা কুপিতা অনত্তমনা নিক্কড্ঢতি ৱা নিক্কড্ঢাপেতি ৱা, আপত্তি পাচিত্তিযস্স. উপসম্পন্নায অনুপসম্পন্নসঞ্ঞা উপস্সযং দত্ৱা কুপিতা অনত্তমনা নিক্কড্ঢতি ৱা নিক্কড্ঢাপেতি ৱা, আপত্তি পাচিত্তিযস্স.

তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, আপত্তি দুক্কটস্স. অকৱাটবদ্ধা নিক্কড্ঢতি ৱা নিক্কড্ঢাপেতি ৱা, আপত্তি দুক্কটস্স. তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, আপত্তি দুক্কটস্স. অনুপসম্পন্নং কৱাটবদ্ধা ৱা অকৱাটবদ্ধা ৱা নিক্কড্ঢতি ৱা নিক্কড্ঢাপেতি ৱা, আপত্তি দুক্কটস্স. তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৱেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.

৯৫৪. অনাপত্তি অলজ্জিনিং নিক্কড্ঢতি ৱা নিক্কড্ঢাপেতি ৱা, তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, উম্মত্তিকং নিক্কড্ঢতি ৱা নিক্কড্ঢাপেতি ৱা, তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, ভণ্ডনকাৰিকং কলহকাৰিকং ৱিৱাদকাৰিকং ভস্সকাৰিকং সঙ্ঘে অধিকৰণকাৰিকং নিক্কড্ঢতি ৱা নিক্কড্ঢাপেতি ৱা, তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, অন্তেৱাসিনিং ৱা সদ্ধিৱিহাৰিনিং ৱা ন সম্মা ৱত্তন্তিং নিক্কড্ঢতি ৱা নিক্কড্ঢাপেতি ৱা, তস্সা পৰিক্খাৰং নিক্কড্ঢতি ৱা নিক্কড্ঢাপেতি ৱা, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

৯৫৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন চণ্ডকাড়ী ভিক্খুনী সংসট্ঠা ৱিহৰতি গহপতিনাপি গহপতিপুত্তেনপি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা চণ্ডকাড়ী সংসট্ঠা ৱিহৰিস্সতি গহপতিনাপি গহপতিপুত্তেনপী’’তি…পে… সচ্চং কিৰ, ভিক্খৱে, চণ্ডকাড়ী ভিক্খুনী সংসট্ঠা ৱিহৰতি গহপতিনাপি গহপতিপুত্তেনপীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, চণ্ডকাড়ী ভিক্খুনী সংসট্ঠা ৱিহৰিস্সতি গহপতিনাপি গহপতিপুত্তেনপি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৫৬. ‘‘যা পন ভিক্খুনী সংসট্ঠা ৱিহৰেয্য গহপতিনা ৱা গহপতিপুত্তেন ৱা সা ভিক্খুনী ভিক্খুনীহি এৱমস্স ৱচনীযা – ‘মায্যে, সংসট্ঠা ৱিহৰি গহপতিনাপি গহপতিপুত্তেনপি. ৱিৱিচ্চায্যে; ৱিৱেকঞ্ঞেৱ ভগিনিযা সঙ্ঘো ৱণ্ণেতী’তি. এৱঞ্চ [এৱঞ্চ পন (ক.)] সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায. যাৱততিযঞ্চে সমনুভাসীযমানা তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, পাচিত্তিয’’ন্তি.

৯৫৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সংসট্ঠা নাম অননুলোমিকেন কাযিকৱাচসিকেন সংসট্ঠা.

গহপতি নাম যো কোচি অগাৰং অজ্ঝাৱসতি.

গহপতিপুত্তো নাম যে কেচি [যো কোচি (ক.)] পুত্তভাতৰো.

সা ভিক্খুনীতি যা সা সংসট্ঠা ভিক্খুনী.

ভিক্খুনীহীতি অঞ্ঞাহি ভিক্খুনীহি. যা পস্সন্তি যা সুণন্তি তাহি ৱত্তব্বা – ‘‘মায্যে, সংসট্ঠা ৱিহৰি গহপতিনাপি গহপতিপুত্তেনপি. ৱিৱিচ্চায্যে; ৱিৱেকঞ্ঞেৱ ভগিনিযা সঙ্ঘো ৱণ্ণেতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. সা ভিক্খুনী সঙ্ঘমজ্ঝম্পি আকড্ঢিত্ৱা ৱত্তব্বা – ‘‘মায্যে, সংসট্ঠা ৱিহৰি গহপতিনাপি গহপতিপুত্তেনপি. ৱিৱিচ্চায্যে; ৱিৱেকঞ্ঞেৱভগিনিযা সঙ্ঘো ৱণ্ণেতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সা ভিক্খুনী সমনুভাসিতব্বা. এৱঞ্চ পন, ভিক্খৱে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৯৫৮. ‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী সংসট্ঠা ৱিহৰতি গহপতিনাপি গহপতিপুত্তেনপি. সা তং ৱত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী সংসট্ঠা ৱিহৰতি গহপতিনাপি গহপতিপুত্তেনপি. সা তং ৱত্থুং ন পটিনিস্সজ্জতি. সঙ্ঘো ইত্থন্নামং ভিক্খুনিং সমনুভাসতি তস্স ৱত্থুস্স পটিনিস্সগ্গায. যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৱত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৱত্থুস্স পটিনিস্সগ্গায; খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

ঞত্তিযা দুক্কটং. দ্ৱীহি কম্মৱাচাহি দুক্কটা. কম্মৱাচাপৰিযোসানে আপত্তি পাচিত্তিযস্স.

৯৫৯. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি পাচিত্তিযস্স. ধম্মকম্মে ৱেমতিকা ন পটিনিস্সজ্জতি, আপত্তি পাচিত্তিযস্স. ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

৯৬০. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

৯৬১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো অন্তোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰন্তি. ধুত্তা দূসেন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অন্তোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰিস্সন্তী’’তি…পে… সচ্চং কিৰ, ভিক্খৱে, ভিক্খুনিযো অন্তোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অন্তোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৬২. ‘‘যা পন ভিক্খুনী অন্তোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰেয্য, পাচিত্তিয’’ন্তি.

৯৬৩. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অন্তোৰট্ঠেতি যস্স ৱিজিতে ৱিহৰতি, তস্স ৰট্ঠে.

সাসঙ্কং নাম তস্মিং মগ্গে চোৰানং নিৱিট্ঠোকাসো দিস্সতি, ভুত্তোকাসো দিস্সতি, ঠিতোকাসো দিস্সতি, নিসিন্নোকাসো দিস্সতি, নিপন্নোকাসো দিস্সতি.

সপ্পটিভযং নাম তস্মিং মগ্গে চোৰেহি মনুস্সা হতা দিস্সন্তি, ৱিলুত্তা দিস্সন্তি, আকোটিতা দিস্সন্তি.

অসত্থিকা নাম ৱিনা সত্থেন.

চাৰিকং চৰেয্যাতি কুক্কুটসম্পাতে গামে গামন্তৰে গামন্তৰে আপত্তি পাচিত্তিযস্স. অগামকে অৰঞ্ঞে অদ্ধযোজনে অদ্ধযোজনে আপত্তি পাচিত্তিযস্স.

৯৬৪. অনাপত্তি সত্থেন সহ গচ্ছতি, খেমে অপ্পটিভযে গচ্ছতি, আপদাসু, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

৯৬৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ভিক্খুনিযো তিৰোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰন্তি. ধুত্তা দূসেন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো তিৰোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰিস্সন্তী’’তি…পে… সচ্চং কিৰ, ভিক্খৱে, ভিক্খুনিযো তিৰোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো তিৰোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৬৬. ‘‘যা পন ভিক্খুনী তিৰোৰট্ঠে সাসঙ্কসম্মতে সপ্পটিভযে অসত্থিকা চাৰিকং চৰেয্য, পাচত্তিয’’ন্তি.

৯৬৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

তিৰোৰট্ঠেতি যস্স ৱিজিতে ৱিহৰতি, তং ঠপেত্ৱা অঞ্ঞস্স ৰট্ঠে.

অসত্থিকা নাম ৱিনা সত্থেন.

চাৰিকং চৰেয্যাতি কুক্কুটসম্পাতে গামে গামন্তৰে গামন্তৰে, আপত্তি পাচিত্তিযস্স. অগামকে অৰঞ্ঞে অদ্ধযোজনে অদ্ধযোজনে আপত্তি পাচিত্তিযস্স.

৯৬৮. অনাপত্তি সত্থেন সহ গচ্ছতি, খেমে অপ্পটিভযে গচ্ছতি, আপদাসু, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৱমসিক্খাপদং

৯৬৯. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন ভিক্খুনিযো অন্তোৱস্সং চাৰিকং চৰন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অন্তোৱস্সং চাৰিকং চৰিস্সন্তি হৰিতানি তিণানি চ সম্মদ্দন্তা, একিন্দ্ৰিযং জীৱং ৱিহেঠেন্তা, বহূ খুদ্দকে পাণে সঙ্ঘাতং আপাদেন্তা’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অন্তোৱস্সং চাৰিকং চৰিস্সন্তী’’তি…পে… সচ্চং কিৰ, ভিক্খৱে, ভিক্খুনিযো অন্তোৱস্সং চাৰিকং চৰন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অন্তোৱস্সং চাৰিকং চৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৭০. ‘‘যা পন ভিক্খুনী অন্তোৱস্সং চাৰিকং চৰেয্য, পাচিত্তিয’’ন্তি.

৯৭১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অন্তোৱস্সন্তি পুৰিমং ৱা তেমাসং পচ্ছিমং ৱা তেমাসং অৱসিত্ৱা.

চাৰিকং চৰেয্যাতি কুক্কুটসম্পাতে গামে গামন্তৰে গামন্তৰে আপত্তি পাচিত্তিযস্স. অগামকে অৰঞ্ঞে অদ্ধযোজনে অদ্ধযোজনে আপত্তি পাচিত্তিযস্স.

৯৭২. অনাপত্তি সত্তাহকৰণীযেন গচ্ছতি, কেনচি উব্বাড়্হা গচ্ছতি, আপদাসু, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.

১০. দসমসিক্খাপদং

৯৭৩. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন ভিক্খুনিযো তত্থেৱ ৰাজগহে ৱস্সং ৱসন্তি, তত্থ হেমন্তং, তত্থ গিম্হং. মনুস্সা উজ্ঝাযন্তি খিয্যন্তি ৱিপাচেন্তি – ‘‘আহুন্দৰিকা ভিক্খুনীনং দিসা অন্ধকাৰা, ন ইমাসং দিসা পক্খাযন্তী’’তি. অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. অথ খো তা ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘তেন হি, ভিক্খৱে, ভিক্খুনীনং সিক্খাপদং পঞ্ঞপেস্সামি দস অত্থৱসে পটিচ্চ – সঙ্ঘসুট্ঠুতায…পে… সদ্ধম্মট্ঠিতিযা ৱিনযানুগ্গহায. এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৯৭৪. ‘‘যা পন ভিক্খুনী ৱস্সংৱুট্ঠা চাৰিকং ন পক্কমেয্য অন্তমসো ছপ্পঞ্চযোজনানিপি, পাচিত্তিয’’ন্তি.

৯৭৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ৱস্সংৱুট্ঠা নাম পুৰিমং ৱা তেমাসং পচ্ছিমং ৱা তেমাসং ৱুট্ঠা.

‘‘চাৰিকং ন পক্কমিস্সামি অন্তমসো ছপ্পঞ্চযোজনানিপী’’তি ধুৰং নিক্খিত্তমত্তে আপত্তি পাচিত্তিযস্স.

৯৭৬. অনাপত্তি সতি অন্তৰাযে, পৰিযেসিত্ৱা দুতিযিকং ভিক্খুনিং ন লভতি, গিলানায, আপদাসু, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

তুৱট্টৱগ্গো চতুত্থো.