৯. নৱমসঙ্ঘাদিসেসসিক্খাপদং

৭২১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দায ভিক্খুনিযা অন্তেৱাসিকা ভিক্খুনিযো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো সংসট্ঠা ৱিহৰিস্সন্তি পাপাচাৰা পাপসদ্দা পাপসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা’’তি…পে… সচ্চং কিৰ, ভিক্খৱে, ভিক্খুনিযো সংসট্ঠা ৱিহৰন্তি পাপাচাৰা পাপসদ্দা পাপসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো সংসট্ঠা ৱিহৰিস্সন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭২২. ‘‘ভিক্খুনিযো পনেৱ সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা ভিক্খুনিযো ভিক্খুনীহি এৱমস্সু ৱচনীযা – ‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’তি. এৱঞ্চ তা ভিক্খুনিযো ভিক্খুনীহি ৱুচ্চমানা তথেৱ পগ্গণ্হেয্যুং, তা ভিক্খুনিযো ভিক্খুনীহি যাৱততিযং সমনুভাসিতব্বা তস্স পটিনিস্সগ্গায. যাৱততিযঞ্চে সমনুভাসীযমানা তং পটিনিস্সজ্জেয্যুং, ইচ্চেতং কুসলং; নো চে পটিনিস্সজ্জেয্যুং, ইমাপি ভিক্খুনিযো যাৱততিযকং ধম্মং আপন্না নিস্সাৰণীযং সঙ্ঘাদিসেস’’ন্তি.

৭২৩. ভিক্খুনিযো পনেৱাতি উপসম্পন্নাযো ৱুচ্চন্তি.

সংসট্ঠা ৱিহৰন্তীতি সংসট্ঠা নাম অননুলোমিকেন কাযিকৱাচসিকেন সংসট্ঠা ৱিহৰন্তি.

পাপাচাৰাতি পাপকেন আচাৰেন সমন্নাগতা.

পাপসদ্দাতি পাপকেন কিত্তিসদ্দেন অব্ভুগ্গতা.

পাপসিলোকাতি পাপকেন মিচ্ছাজীৱেন জীৱিতং কপ্পেন্তি.

ভিক্খুনিসঙ্ঘস্স ৱিহেসিকাতি অঞ্ঞমঞ্ঞিস্সা কম্মে কৰীযমানে পটিক্কোসন্তি.

অঞ্ঞমঞ্ঞিস্সা ৱজ্জপ্পটিচ্ছাদিকাতি অঞ্ঞমঞ্ঞং ৱজ্জং পটিচ্ছাদেন্তি.

তা ভিক্খুনিযোতি যা তা সংসট্ঠা ভিক্খুনিযো.

ভিক্খুনীহীতি অঞ্ঞাহি ভিক্খুনীহি.

যা পস্সন্তি যা সুণন্তি তাহি ৱত্তব্বা – ‘‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. তা ভিক্খুনিযো সঙ্ঘমজ্ঝম্পি আকড্ঢিত্ৱা ৱত্তব্বা – ‘‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স. তা ভিক্খুনিযো সমনুভাসিতব্বা. এৱঞ্চ পন, ভিক্খৱে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৭২৪. ‘‘সুণাতু মে, অয্যে, সঙ্ঘো. ইত্থন্নামা চ ইত্থন্নামা চ ভিক্খুনিযো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা তং ৱত্থুং ন পটিনিস্সজ্জন্তি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খুনিযো সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. ইত্থন্নামা চ ইত্থন্নামা চ ভিক্খুনিযো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা তং ৱত্থুং ন পটিনিস্সজ্জন্তি. সঙ্ঘো ইত্থন্নামঞ্চ ইত্থন্নামঞ্চ ভিক্খুনিযো সমনুভাসতি তস্স ৱত্থুস্স পটিনিস্সগ্গায. যস্সা অয্যায খমতি ইত্থন্নামায চ ইত্থন্নামায চ ভিক্খুনীনং সমনুভাসনা তস্স ৱত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘সমনুভট্ঠা সঙ্ঘেন, ইত্থন্নামা চ ইত্থন্নামা চ ভিক্খুনিযো তস্স ৱত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

ঞত্তিযা দুক্কটং, দ্ৱীহি কম্মৱাচাহি থুল্লচ্চযা, কম্মৱাচাপৰিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তীনং ঞত্তিযা দুক্কটং দ্ৱীহি কম্মৱাচাহি থুল্লচ্চযা পটিপ্পস্সম্ভন্তি. দ্ৱে তিস্সো একতো সমনুভাসিতব্বা. ততুত্তৰি ন সমনুভাসিতব্বা.

ইমাপি ভিক্খুনিযোতি পুৰিমাযো উপাদায ৱুচ্চন্তি.

যাৱততিযকন্তি যাৱততিযং সমনুভাসনায আপজ্জন্তি, ন সহ ৱত্থুজ্ঝাচাৰা.

নিস্সাৰণীযন্তি সঙ্ঘম্হা নিস্সাৰীযতি.

সঙ্ঘাদিসেসোতি…পে… তেনপি ৱুচ্চতি সঙ্ঘাদিসেসোতি.

৭২৫. ধম্মকম্মে ধম্মকম্মসঞ্ঞা ন পটিনিস্সজ্জন্তি, আপত্তি সঙ্ঘাদিসেসস্স. ধম্মকম্মে ৱেমতিকা ন পটিনিস্সজ্জন্তি, আপত্তি সঙ্ঘাদিসেসস্স. ধম্মকম্মে অধম্মকম্মসঞ্ঞা ন পটিনিস্সজ্জন্তি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

৭২৬. অনাপত্তি অসমনুভাসন্তীনং, পটিনিস্সজ্জন্তীনং, উম্মত্তিকানং, আদিকম্মিকানন্তি.

নৱমসঙ্ঘাদিসেসসিক্খাপদং নিট্ঠিতং.