১০. দসমসঙ্ঘাদিসেসসিক্খাপদং

৭২৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনীসঙ্ঘেন সমনুভট্ঠা ভিক্খুনিযো এৱং ৱদেতি – ‘‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ. তুম্হঞ্ঞেৱ [তুম্হেযেৱ (স্যা.)] সঙ্ঘো উঞ্ঞায পৰিভৱেন অক্খন্তিযা ৱেভস্সিযা [ৱেভস্সা (সী. স্যা.)] দুব্বল্যা এৱমাহ – ‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – কথঞ্হি নাম অয্যা থুল্লনন্দা ভিক্খুনী সঙ্ঘেন সমনুভট্ঠা ভিক্খুনিযো এৱং ৱক্খতি – সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো…পে… ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতীতি…পে… সচ্চং কিৰ, ভিক্খৱে, থুল্লনন্দা ভিক্খুনী সঙ্ঘেন সমনুভট্ঠা ভিক্খুনিযো এৱং ৱদেতি – সংসট্ঠাৱ অয্যে তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ. তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতীতি? ‘‘সচ্চং ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী সঙ্ঘেন সমনুভট্ঠা ভিক্খুনিযো এৱং ৱক্খতি – সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো…পে… ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতীতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন ভিক্খৱে, ভিক্খুনিযো ইমং সিক্খাপদং উদ্দিসন্তু –

৭২৮. ‘‘যা পন ভিক্খুনী এৱং ৱদেয্য – ‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ. তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’তি. সা ভিক্খুনী ভিক্খুনীহি এৱমস্স ৱচনীযা – ‘মা, অয্যে, এৱং অৱচ – সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ. তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায. যাৱততিযঞ্চে সমনুভাসীযমানা তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেস’’ন্তি.

৭২৯. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

এৱং ৱদেয্যাতি – ‘‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ’’.

তুম্হঞ্ঞেৱ সঙ্ঘো উঞ্ঞাযাতি অৱঞ্ঞায.

পৰিভৱেনাতি পাৰিভব্যতা.

অক্খন্তিযাতি কোপেন.

ৱেভস্সিযাতি ৱিভস্সীকতা [ৱিভস্সিকতায (সী.)].

দুব্বল্যাতি অপক্খতা.

এৱমাহ – ‘‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিচিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’’তি.

সা ভিক্খুনীতি যা সা এৱংৱাদিনী ভিক্খুনী.

ভিক্খুনীহীতি অঞ্ঞাহি ভিক্খুনীহি.

যা পস্সন্তি যা সুণন্তি তাহি ৱত্তব্বা – ‘‘মায্যে, এৱং অৱচ – ‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো…পে… ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. সা ভিক্খুনী সঙ্ঘমজ্ঝম্পি আকড্ঢিত্ৱা ৱত্তব্বা – ‘‘মায্যে, এৱং অৱচ – ‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো…পে… ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সা ভিক্খুনী সমনুভাসিতব্বা. এৱঞ্চ পন, ভিক্খৱে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৭৩০. ‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী সঙ্ঘেন সমনুভট্ঠা ভিক্খুনিযো এৱং ৱদেতি – ‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ. তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’তি. সা তং ৱত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী সঙ্ঘেন সমনুভট্ঠা ভিক্খুনিযো এৱং ৱদেতি – ‘সংসট্ঠাৱ অয্যে, তুম্হে ৱিহৰথ. মা তুম্হে নানা ৱিহৰিত্থ. সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. তা সঙ্ঘো ন কিঞ্চি আহ. তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা, ভিক্খুনিসঙ্ঘস্স ৱিহেসিকা, অঞ্ঞমঞ্ঞিস্সা ৱজ্জপ্পটিচ্ছাদিকা. ৱিৱিচ্চথায্যে. ৱিৱেকঞ্ঞেৱ ভগিনীনং সঙ্ঘো ৱণ্ণেতী’তি. সা তং ৱত্থুং ন পটিনিস্সজ্জতি. সঙ্ঘো ইত্থন্নামং ভিক্খুনিং সমনুভাসতি তস্স ৱত্থুস্স পটিনিস্সগ্গায. যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৱত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৱত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

ঞত্তিযা দুক্কটং, দ্ৱীহি কম্মৱাচাহি থুল্লচ্চযা, কম্মৱাচাপৰিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তিযা ঞত্তিযা দুক্কটং, দ্ৱীহি কম্মৱাচাহি থুল্লচ্চযা পটিপ্পস্সম্ভন্তি.

অযম্পীতি পুৰিমাযো উপাদায ৱুচ্চতি.

যাৱততিযকন্তি যাৱততিযং সমনুভাসনায আপজ্জতি, ন সহৱত্থুজ্ঝাচাৰা.

নিস্সাৰণীযন্তি সঙ্ঘম্হা নিস্সাৰীযতি.

সঙ্ঘাদিসেসোতি সঙ্ঘোৱ তস্সা আপত্তিযা মানত্তং দেতি, মূলায পটিকস্সতি, অব্ভেতি, ন সম্বহুলা ন একা ভিক্খুনী. তেন ৱুচ্চতি ‘‘সঙ্ঘাদিসেসো’’তি. তস্সেৱ আপত্তিনিকাযস্স নামকম্মং অধিৱচনং, তেনপি ৱুচ্চতি ‘‘সঙ্ঘাদিসেসো’’তি.

৭৩১. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেসস্স. ধম্মকম্মে ৱেমতিকা ন পটিনিস্সজ্জতি, আপত্তি সঙ্ঘাদিসেসস্স. ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

৭৩২. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায, আদিকম্মিকাযাতি.

দসমসঙ্ঘাদিসেসসিক্খাপদং নিট্ঠিতং.

উদ্দিট্ঠা খো, অয্যাযো, সত্তৰস সঙ্ঘাদিসেসা ধম্মা – নৱ পঠমাপত্তিকা, অট্ঠ যাৱততিযকা. যেসং ভিক্খুনী অঞ্ঞতৰং ৱা অঞ্ঞতৰং ৱা আপজ্জতি, তায ভিক্খুনিযা উভতোসঙ্ঘে পক্খমানত্তং চৰিতব্বং. চিণ্ণমানত্তা ভিক্খুনী যত্থ সিযা ৱীসতিগণো ভিক্খুনিসঙ্ঘো তত্থ (সা ভিক্খুনী) [( ) (কত্থপি নত্থি)] অব্ভেতব্বা. একাযপি চে ঊনো ৱীসতিগণো ভিক্খুনিসঙ্ঘো তং ভিক্খুনিং অব্ভেয্য. সা চ ভিক্খুনী অনব্ভিতা, তা চ ভিক্খুনিযো গাৰয্হা, অযং তত্থ সামীচি.

তত্থায্যাযো পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

সত্তৰসকং নিট্ঠিতং.

ভিক্খুনিৱিভঙ্গে সঙ্ঘাদিসেসকণ্ডং নিট্ঠিতং.