৩. নিস্সগ্গিযকণ্ডং (ভিক্খুনীৱিভঙ্গো)

১. পত্তৱগ্গো

১. পঠমসিক্খাপদং

ইমে খো পনায্যাযো তিংস নিস্সগ্গিযা পাচিত্তিযা

ধম্মা উদ্দেসং আগচ্ছন্তি.

৭৩৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খুনিযো বহূ পত্তে সন্নিচযং কৰোন্তি. মনুস্সা ৱিহাৰচাৰিকং আহিণ্ডন্তা পস্সিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো বহূ পত্তে সন্নিচযং কৰিস্সন্তি, পত্তৱাণিজ্জং ৱা ভিক্খুনিযো কৰিস্সন্তি, আমত্তিকাপণং ৱা পসাৰেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খুনিযো পত্তসন্নিচযং কৰিস্সন্তী’’তি…পে… সচ্চং কিৰ, ভিক্খৱে, ছব্বগ্গিযা ভিক্খুনিযো পত্তসন্নিচযং কৰোন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ছব্বগ্গিযা ভিক্খুনিযো পত্তসন্নিচযং কৰিস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৩৪. ‘‘যা পন ভিক্খুনী পত্তসন্নিচযং কৰেয্য, নিস্সগ্গিযং পাচিত্তিয’’ন্তি.

৭৩৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

পত্তো নাম দ্ৱে পত্তা – অযোপত্তো, মত্তিকাপত্তো. তযো পত্তস্স ৱণ্ণা – উক্কট্ঠো পত্তো, মজ্ঝিমো পত্তো, ওমকো পত্তো. উক্কট্ঠোনামপত্তো অড্ঢাড়্হকোদনং গণ্হাতি চতুভাগং খাদনং তদুপিযং ব্যঞ্জনং. মজ্ঝিমো নামপত্তো নাড়িকোদনং গণ্হাতি চতুভাগং খাদনং তদুপিযং ব্যঞ্জনং. ওমকো নামপত্তো পত্থোদনং গণ্হাতি চতুভাগং খাদনং তদুপিযং ব্যঞ্জনং. ততো উক্কট্ঠো অপত্তো ওমকো অপত্তো.

সন্নিচযং কৰেয্যাতি অনধিট্ঠিতো অৱিকপ্পিতো.

নিস্সগ্গিযো হোতীতি সহ অৰুণুগ্গমনা নিস্সগ্গিযো হোতি. নিস্সজ্জিতব্বো সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বো. তায ভিক্খুনিযা সঙ্ঘং উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযো – ‘‘অযং মে, অয্যে, পত্তো ৰত্তাতিক্কন্তো নিস্সগ্গিযো, ইমাহং সঙ্ঘস্স নিস্সজ্জামী’’তি. নিস্সজ্জিত্ৱা আপত্তি দেসেতব্বা. ব্যত্তায ভিক্খুনিযা পটিবলায আপত্তি পটিগ্গহেতব্বা. নিস্সট্ঠপত্তো দাতব্বো –

‘‘সুণাতু মে, অয্যে, সঙ্ঘো. অযং পত্তো ইত্থন্নামায ভিক্খুনিযা নিস্সগ্গিযো সঙ্ঘস্স নিস্সট্ঠো. যদি সঙ্ঘস্স পত্তকল্লং, সঙ্ঘো ইমং পত্তং ইত্থন্নামায ভিক্খুনিযা দদেয্যা’’তি.

তায ভিক্খুনিযা সম্বহুলা ভিক্খুনিযো উপসঙ্কমিত্ৱা একংসং উত্তৰাসঙ্গং কৰিত্ৱা ৱুড্ঢানং ভিক্খুনীনং পাদে ৱন্দিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্সু ৱচনীযা – ‘‘অযং মে, অয্যাযো, পত্তো ৰত্তাতিক্কন্তো নিস্সগ্গিযো, ইমাহং অয্যানং নিস্সজ্জামী’’তি. নিস্সজ্জিত্ৱা আপত্তি দেসেতব্বা. ব্যত্তায ভিক্খুনিযা পটিবলায আপত্তি পটিগ্গহেতব্বা. নিস্সট্ঠপত্তো দাতব্বো –

‘‘সুণন্তু মে অয্যাযো. অযং পত্তো ইত্থন্নামায ভিক্খুনিযা নিস্সগ্গিযো অয্যানং নিস্সট্ঠো. যদি অয্যানং পত্তকল্লং, অয্যাযো ইমং পত্তং ইত্থন্নামায ভিক্খুনিযা দদেয্যু’’ন্তি.

তায ভিক্খুনিযা একং ভিক্খুনিং উপসঙ্কমিত্ৱা একংসং উত্তৰাসঙ্গং কৰিত্ৱা উক্কুটিকং নিসীদিত্ৱা অঞ্জলিং পগ্গহেত্ৱা এৱমস্স ৱচনীযা – ‘‘অযং মে, অয্যে, পত্তো ৰত্তাতিক্কন্তো নিস্সগ্গিযো. ইমাহং অয্যায নিস্সজ্জামী’’তি. নিস্সজ্জিত্ৱা আপত্তি দেসেতব্বা. তায ভিক্খুনিযা আপত্তি পটিগ্গহেতব্বা. নিস্সট্ঠপত্তো দাতব্বো – ‘‘ইমং পত্তং অয্যায দম্মী’’তি.

৭৩৬. ৰত্তাতিক্কন্তে অতিক্কন্তসঞ্ঞা, নিস্সগ্গিযং পাচিত্তিযং. ৰত্তাতিক্কন্তে ৱেমতিকা, নিস্সগ্গিযং পাচিত্তিযং. ৰত্তাতিক্কন্তে অনতিক্কন্তসঞ্ঞা, নিস্সগ্গিযং পাচিত্তিযং. অনধিট্ঠিতে অধিট্ঠিতসঞ্ঞা, নিস্সগ্গিযং পাচিত্তিযং. অৱিকপ্পিতে ৱিকপ্পিতসঞ্ঞা, নিস্সগ্গিযং পাচিত্তিযং. অৱিস্সজ্জিতে ৱিস্সজ্জিতসঞ্ঞা, নিস্সগ্গিযং পাচিত্তিযং. অনট্ঠে নট্ঠসঞ্ঞা… অৱিনট্ঠে ৱিনট্ঠসঞ্ঞা… অভিন্নে ভিন্নসঞ্ঞা… অৱিলুত্তে ৱিলুত্তসঞ্ঞা, নিস্সগ্গিযং পাচিত্তিযং.

নিস্সগ্গিযং পত্তং অনিস্সজ্জিত্ৱা পৰিভুঞ্জতি, আপত্তি দুক্কটস্স. ৰত্তানতিক্কন্তে অতিক্কন্তসঞ্ঞা, আপত্তি দুক্কটস্স. ৰত্তানতিক্কন্তে ৱেমতিকা, আপত্তি দুক্কটস্স. ৰত্তানতিক্কন্তে অনতিক্কন্তসঞ্ঞা অনাপত্তি.

৭৩৭. অনাপত্তি অন্তোঅৰুণে অধিট্ঠেতি, ৱিকপ্পেতি, ৱিস্সজ্জেতি, নস্সতি, ৱিনস্সতি, ভিজ্জতি, অচ্ছিন্দিত্ৱা গণ্হন্তি, ৱিস্সাসং গণ্হন্তি, উম্মত্তিকায, আদিকম্মিকাযাতি.

তেন খো পন সমযেন ছব্বগ্গিযা ভিক্খুনিযো নিস্সট্ঠপত্তং ন দেন্তি. ভগৱতো এতমত্থং আৰোচেসুং. ন, ভিক্খৱে, নিস্সট্ঠপত্তো ন দাতব্বো. যা ন দদেয্য, আপত্তি দুক্কটস্সাতি.

পঠমসিক্খাপদং নিট্ঠিতং.

২. দুতিযসিক্খাপদং

৭৩৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সম্বহুলা ভিক্খুনিযো গামকাৱাসে ৱস্সংৱুট্ঠা [ৱস্সংৱুত্থা (সী. স্যা.)] সাৱত্থিং অগমংসু ৱত্তসম্পন্না ইৰিযাপথসম্পন্না দুচ্চোড়া লূখচীৱৰা. উপাসকা তা ভিক্খুনিযো পস্সিত্ৱা – ‘‘ইমা ভিক্খুনিযো ৱত্তসম্পন্না ইৰিযাপথসম্পন্না দুচ্চোড়া লূখচীৱৰা, ইমা ভিক্খুনিযো অচ্ছিন্না ভৱিস্সন্তী’’তি ভিক্খুনিসঙ্ঘস্স অকালচীৱৰং অদংসু. থুল্লনন্দা ভিক্খুনী – ‘‘অম্হাকং কথিনং অত্থতং কালচীৱৰ’’ন্তি অধিট্ঠহিত্ৱা ভাজাপেসি. উপাসকা তা ভিক্খুনিযো পস্সিত্ৱা এতদৱোচুং – ‘‘অপয্যাহি চীৱৰং লদ্ধ’’ন্তি? ‘‘ন মযং, আৱুসো, চীৱৰং লভাম. অয্যা থুল্লনন্দা – ‘অম্হাকং কথিনং অত্থতং কালচীৱৰ’ন্তি অধিট্ঠহিত্ৱা ভাজাপেসী’’তি. উপাসকা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অকালচীৱৰং ‘কালচীৱৰ’ন্তি অধিট্ঠহিত্ৱা ভাজাপেস্সতী’’তি! অস্সোসুং খো ভিক্খুনিযো তেসং উপাসকানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অকালচীৱৰং ‘কালচীৱৰ’ন্তি অধিট্ঠহিত্ৱা ভাজাপেস্সতী’’তি! অথ খো তা ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং …পে… সচ্চং কিৰ, ভিক্খৱে, থুল্লনন্দা ভিক্খুনী অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেতীতি [ভাজাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৩৯. ‘‘যা পন ভিক্খুনী অকালচীৱৰং ‘কালচীৱৰ’ন্তি অধিট্ঠহিত্ৱা ভাজাপেয্য, নিস্সগ্গিযং পাচিত্তিয’’ন্তি.

৭৪০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অকালচীৱৰং নাম অনত্থতে কথিনে একাদসমাসে উপ্পন্নং, অত্থতে কথিনে সত্তমাসে উপ্পন্নং, কালেপি আদিস্স দিন্নং, এতং অকালচীৱৰং নাম.

অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, অয্যে, অকালচীৱৰং ‘‘কালচীৱৰ’ন্তি অধিট্ঠহিত্ৱা ভাজাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৪১. অকালচীৱৰে অকালচীৱৰসঞ্ঞা ‘‘কালচীৱৰ’’ন্তি অধিট্ঠহিত্ৱা ভাজাপেতি, নিস্সগ্গিযং পাচিত্তিযং. অকালচীৱৰে ৱেমতিকা ‘‘কালচীৱৰ’’ন্তি অধিট্ঠহিত্ৱা ভাজাপেতি, আপত্তি দুক্কটস্স. অকালচীৱৰে কালচীৱৰসঞ্ঞা ‘‘কালচীৱৰ’’ন্তি অধিট্ঠহিত্ৱা ভাজাপেতি, অনাপত্তি. কালচীৱৰে অকালচীৱৰসঞ্ঞা, আপত্তি দুক্কটস্স. কালচীৱৰে ৱেমতিকা, আপত্তি দুক্কটস্স. কালচীৱৰে কালচীৱৰসঞ্ঞা, অনাপত্তি.

৭৪২. অনাপত্তি অকালচীৱৰং কালচীৱৰসঞ্ঞা ভাজাপেতি, কালচীৱৰং কালচীৱৰসঞ্ঞা ভাজাপেতি, উম্মত্তিকায, আদিকম্মিকাযাতি.

দুতিযসিক্খাপদং নিট্ঠিতং.

৩. ততিযসিক্খাপদং

৭৪৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী অঞ্ঞতৰায ভিক্খুনিযা সদ্ধিং চীৱৰং পৰিৱত্তেত্ৱা পৰিভুঞ্জি. অথ খো সা ভিক্খুনী তং চীৱৰং সঙ্ঘৰিত্ৱা [সংহৰিত্ৱা (ক.)] নিক্খিপি. থুল্লনন্দা ভিক্খুনী তং ভিক্খুনিং এতদৱোচ – ‘‘যং তে, অয্যে, মযা সদ্ধিং চীৱৰং পৰিৱত্তিতং, কহং তং চীৱৰ’’ন্তি? অথ খো সা ভিক্খুনী তং চীৱৰং নীহৰিত্ৱা থুল্লনন্দায ভিক্খুনিযা দস্সেসি. থুল্লনন্দা ভিক্খুনী তং ভিক্খুনিং এতদৱোচ – ‘‘হন্দায্যে, তুয্হং চীৱৰং, আহৰ মে’তং চীৱৰং, যং তুয্হং তুয্হমেৱেতং, যং ময্হং ময্হমেৱেতং, আহৰ মে’তং, সকং পচ্চাহৰা’’তি অচ্ছিন্দি. অথ খো সা ভিক্খুনী ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা ভিক্খুনিযা সদ্ধিং চীৱৰং পৰিৱত্তেত্ৱা অচ্ছিন্দিস্সতী’’তি! অথ খো তা ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰাচেসুং…পে… সচ্চং কিৰ, ভিক্খৱে, থুল্লনন্দা ভিক্খুনী ভিক্খুনিযা সদ্ধিং চীৱৰং পৰিৱত্তেত্ৱা অচ্ছিন্দতীতি [অচ্ছিন্দীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ভিক্খুনিযা সদ্ধিং চীৱৰং পৰিৱত্তেত্ৱা অচ্ছিন্দিস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৪৪. ‘‘যা পন ভিক্খুনী ভিক্খুনিযা সদ্ধিং চীৱৰং পৰিৱত্তেত্ৱা সা পচ্ছা এৱং ৱদেয্য – ‘হন্দায্যে, তুয্হং চীৱৰং আহৰ, মেতং চীৱৰং, যং তুয্হং তুয্হমেৱেতং, যং ময্হং ময্হমেৱেতং, আহৰ মেতং, সকং পচ্চাহৰা’তি অচ্ছিন্দেয্য ৱা অচ্ছিন্দাপেয্য ৱা, নিস্সগ্গিযং পাচিত্তিয’’ন্তি.

৭৪৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

ভিক্খুনিযা সদ্ধিন্তি অঞ্ঞায ভিক্খুনিযা সদ্ধিং.

চীৱৰং নাম ছন্নং চীৱৰানং অঞ্ঞতৰং চীৱৰং ৱিকপ্পনুপগং পচ্ছিমং.

পৰিৱত্তেত্ৱাতি পৰিত্তেন ৱা ৱিপুলং, ৱিপুলেন ৱা পৰিত্তং.

অচ্ছিন্দেয্যাতি সযং অচ্ছিন্দতি নিস্সগ্গিযং পাচিত্তিযং.

অচ্ছিন্দাপেয্যাতি অঞ্ঞং আণাপেতি, আপত্তি দুক্কটস্স. সকিং আণত্তা বহুকম্পি অচ্ছিন্দতি, নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে অয্যে চীৱৰং ভিক্খুনিযা সদ্ধিং পৰিৱত্তেত্ৱা অচ্ছিন্নং নিস্সগ্গিযং, ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৪৬. উপসম্পন্নায উপসম্পন্নসঞ্ঞা চীৱৰং পৰিৱত্তেত্ৱা অচ্ছিন্দতি ৱা অচ্ছিন্দাপেতি ৱা, নিস্সগ্গিযং পাচিত্তিযং. উপসম্পন্নায ৱেমতিকা চীৱৰং পৰিৱত্তেত্ৱা অচ্ছিন্দতি ৱা অচ্ছিন্দাপেতি ৱা, নিস্সগ্গিযং পাচিত্তিযং. উপসম্পন্নায অনুপসম্পন্নসঞ্ঞা চীৱৰং পৰিৱত্তেত্ৱা অচ্ছিন্দতি ৱা অচ্ছিন্দাপেতি ৱা, নিস্সগ্গিযং পাচিত্তিযং.

অঞ্ঞং পৰিক্খাৰং পৰিৱত্তেত্ৱা অচ্ছিন্দতি ৱা অচ্ছিন্দাপেতি ৱা, আপত্তি দুক্কটস্স. অনুপসম্পন্নায সদ্ধিং চীৱৰং ৱা অঞ্ঞং ৱা পৰিক্খাৰং পৰিৱত্তেত্ৱা অচ্ছিন্দতি ৱা অচ্ছিন্দাপেতি ৱা, আপত্তি দুক্কটস্স. অনুপসম্পন্নায উপসম্পন্নসঞ্ঞা, আপত্তি দুক্কটস্স. অনুপসম্পন্নায ৱেমতিকা, আপত্তি দুক্কটস্স. অনুপসম্পন্নায অনুপসম্পন্নসঞ্ঞা, আপত্তি দুক্কটস্স.

৭৪৭. অনাপত্তি সা ৱা দেতি, তস্সা ৱা ৱিস্সসন্তী গণ্হাতি, উম্মত্তিকায, আদিকম্মিকাযাতি.

ততিযসিক্খাপদং নিট্ঠিতং.

৪. চতুত্থসিক্খাপদং

৭৪৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী গিলানা হোতি. অথ খো অঞ্ঞতৰো উপাসকো যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৱা থুল্লনন্দং ভিক্খুনিং এতদৱোচ – ‘‘কিং তে, অয্যে, অফাসু, কিং আহৰীযতূ’’তি? ‘‘সপ্পিনা মে, আৱুসো, অত্থো’’তি. অথ খো সো উপাসকো অঞ্ঞতৰস্স আপণিকস্স ঘৰা কহাপণস্স সপ্পিং আহৰিত্ৱা থুল্লনন্দায ভিক্খুনিযা অদাসি. থুল্লনন্দা ভিক্খুনী এৱমাহ – ‘‘ন মে, আৱুসো, সপ্পিনা অত্থো; তেলেন মে অত্থো’’তি. অথ খো সো উপাসকো যেন সো আপণিকো তেনুপসঙ্কমি; উপসঙ্কমিত্ৱা তং আপণিকং এতদৱোচ – ‘‘ন কিৰায্যো অয্যায সপ্পিনা অত্থো, তেলেন অত্থো. হন্দ তে সপ্পিং, তেলং মে দেহী’’তি. ‘‘সচে মযং অয্যো ৱিক্কীতং ভণ্ডং পুন আদিযিস্সাম [আহৰিস্সাম (ক.)], কদা অম্হাকং ভণ্ডং ৱিক্কাযিস্সতি [ৱিক্কীযিস্সতি (?)]; সপ্পিস্স কযেন সপ্পি হটং, তেলস্স কযং আহৰ, তেলং হৰিস্সসী’’তি. অথ খো সো উপাসকো উজ্ঝাযতি খিয্যতি ৱিপাচেতি – ‘‘কথঞ্হি নাম অয্যা থুল্লনন্দা অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপেস্সতী’’তি! অস্সোসুং খো ভিক্খুনিযো তস্স উপাসকস্স উজ্ঝাযন্তস্স খিয্যন্তস্স ৱিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি…পে… অথ খো তা ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং…পে… সচ্চং কিৰ, ভিক্খৱে, থুল্লনন্দা ভিক্খুনী অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপেতীতি [ৱিঞ্ঞাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা …পে… কথঞ্হি নাম, ভিক্খৱে, থুল্লনন্দা ভিক্খুনী অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৪৯. ‘‘যা পন ভিক্খুনী অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপেয্য, নিস্সগ্গিযং পাচিত্তিয’’ন্তি.

৭৫০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞং ৱিঞ্ঞাপেত্ৱাতি যং কিঞ্চি ৱিঞ্ঞাপেত্ৱা.

অঞ্ঞং ৱিঞ্ঞাপেয্যাতি তং ঠপেত্ৱা অঞ্ঞং ৱিঞ্ঞাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে অয্যে অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপিতং নিস্সগ্গিযং, ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… অয্যায দম্মী’’তি.

৭৫১. অঞ্ঞে অঞ্ঞসঞ্ঞা অঞ্ঞং ৱিঞ্ঞাপেতি, নিস্সগ্গিযং পাচিত্তিযং. অঞ্ঞে ৱেমতিকা অঞ্ঞং ৱিঞ্ঞাপেতি, নিস্সগ্গিযং পাচিত্তিযং. অঞ্ঞে অনঞ্ঞসঞ্ঞা অঞ্ঞং ৱিঞ্ঞাপেতি, নিস্সগ্গিযং পাচিত্তিযং.

অনঞ্ঞে অঞ্ঞসঞ্ঞা অনঞ্ঞং ৱিঞ্ঞাপেতি, আপত্তি দুক্কটস্স. অনঞ্ঞে ৱেমতিকা অনঞ্ঞং ৱিঞ্ঞাপেতি, আপত্তি দুক্কটস্স. অনঞ্ঞে অনঞ্ঞসঞ্ঞা, অনাপত্তি.

৭৫২. অনাপত্তি তঞ্ঞেৱ [তঞ্চেৱ (স্যা.)] ৱিঞ্ঞাপেতি, অঞ্ঞঞ্চ ৱিঞ্ঞাপেতি, আনিসংসং দস্সেত্ৱা ৱিঞ্ঞাপেতি, উম্মত্তিকায, আদিকম্মিকাযাতি.

চতুত্থসিক্খাপদং নিট্ঠিতং.

৫. পঞ্চমসিক্খাপদং

৭৫৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী গিলানা হোতি. অথ খো অঞ্ঞতৰো উপাসকো যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৱা থুল্লনন্দং ভিক্খুনিং এতদৱোচ – ‘‘কচ্চি, অয্যে, খমনীযং কচ্চি যাপনীয’’ন্তি? ‘‘ন মে, আৱুসো, খমনীযং, ন যাপনীয’’ন্তি. ‘‘অমুকস্স, অয্যে, আপণিকস্স ঘৰে কহাপণং নিক্খিপিস্সামি, ততো যং ইচ্ছেয্যাসি তং আহৰাপেয্যাসী’’তি. থুল্লনন্দা ভিক্খুনী অঞ্ঞতৰং সিক্খমানং আণাপেসি – ‘‘গচ্ছ, সিক্খমানে, অমুকস্স আপণিকস্স ঘৰা কহাপণস্স তেলং আহৰা’’তি. অথ খো সা সিক্খমানা তস্স আপণিকস্স ঘৰা কহাপণস্স তেলং আহৰিত্ৱা থুল্লনন্দায ভিক্খুনিযা অদাসি. থুল্লনন্দা ভিক্খুনী এৱমাহ – ‘‘ন মে, সিক্খমানে, তেলেন অত্থো, সপ্পিনা মে অত্থো’’তি. অথ খো সা সিক্খমানা যেন সো আপণিকো তেনুপসঙ্কমি; উপসঙ্কমিত্ৱা তং আপণিকং এতদৱোচ – ‘‘ন কিৰ, আৱুসো, অয্যায তেলেন অত্থো, সপ্পিনা অত্থো, হন্দ তে তেলং, সপ্পিং মে দেহী’’তি. ‘‘সচে মযং, অয্যে, ৱিক্কীতং ভণ্ডং পুন আদিযিস্সাম, কদা অম্হাকং ভণ্ডং ৱিক্কাযিস্সতি! তেলস্স কযেন তেলং হটং, সপ্পিস্স কযং আহৰ, সপ্পিং হৰিস্সসী’’তি. অথ খো সা সিক্খমানা ৰোদন্তী অট্ঠাসি. ভিক্খুনিযো তং সিক্খমানং এতদৱোচুং – ‘‘কিস্স ত্ৱং, সিক্খমানে, ৰোদসী’’তি? অথ খো সা সিক্খমানা ভিক্খুনীনং এতমত্থং আৰোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অঞ্ঞং চেতাপেত্ৱা অঞ্ঞং চেতাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী অঞ্ঞং চেতাপেত্ৱা অঞ্ঞং চেতাপেতীতি [চেতাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী অঞ্ঞং চেতাপেত্ৱা অঞ্ঞং চেতাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৫৪. ‘‘যা পন ভিক্খুনী অঞ্ঞং চেতাপেত্ৱা অঞ্ঞং চেতাপেয্য, নিস্সগ্গিযং পাচিত্তিয’’ন্তি.

৭৫৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞং চেতাপেত্ৱাতি যং কিঞ্চি চেতাপেত্ৱা.

অঞ্ঞং চেতাপেয্যাতি তং ঠপেত্ৱা অঞ্ঞং চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, অঞ্ঞং চেতাপেত্ৱা অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৫৬. অঞ্ঞে অঞ্ঞসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞে ৱেমতিকা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞে অনঞ্ঞসঞ্ঞা অঞ্ঞং চেতাপেতি, নিস্সগ্গিযং পাচিত্তিযং.

অনঞ্ঞে অঞ্ঞসঞ্ঞা অনঞ্ঞং চেতাপেতি, আপত্তি দুক্কটস্স. অনঞ্ঞে ৱেমতিকা অনঞ্ঞং চেতাপেতি, আপত্তি দুক্কটস্স. অনঞ্ঞে অনঞ্ঞসঞ্ঞা অনাপত্তি.

৭৫৭. অনাপত্তি তঞ্ঞেৱ [তঞ্চেৱ (স্যা.)] চেতাপেতি, অঞ্ঞঞ্চ চেতাপেতি, আনিসংসং দস্সেত্ৱা চেতাপেতি, উম্মত্তিকায, আদিকম্মিকাযাতি.

পঞ্চমসিক্খাপদং নিট্ঠিতং.

৬. ছট্ঠসিক্খাপদং

৭৫৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন উপাসকা ভিক্খুনিসঙ্ঘস্স চীৱৰত্থায ছন্দকং সঙ্ঘৰিত্ৱা অঞ্ঞতৰস্স পাৱাৰিকস্স ঘৰে পৰিক্খাৰং নিক্খিপিত্ৱা ভিক্খুনিযো উপসঙ্কমিত্ৱা এতদৱোচুং – ‘‘অমুকস্স, অয্যে, পাৱাৰিকস্স ঘৰে চীৱৰত্থায পৰিক্খাৰো নিক্খিত্তো, ততো চীৱৰং আহৰাপেত্ৱা ভাজেথা’’তি. ভিক্খুনিযো তেন পৰিক্খাৰেন ভেসজ্জং চেতাপেত্ৱা পৰিভুঞ্জিংসু. উপাসকা জানিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেস্সন্তী’’তি! অস্সোসুং খো ভিক্খুনিযো তেসং উপাসকানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা …পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৫৯. ‘‘যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি.

৭৬০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞদত্থিকেন পৰিক্খাৰেন অঞ্ঞুদ্দিসিকেনাতি অঞ্ঞস্সত্থায দিন্নেন.

সঙ্ঘিকেনাতি সঙ্ঘস্স, ন গণস্স, ন একভিক্খুনিযা.

অঞ্ঞং চেতাপেয্যাতি যংঅত্থায দিন্নং, তং ঠপেত্ৱা অঞ্ঞং চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি.…পে… দদেয্যাতি…পে… দদেয্যুন্তি…পে… অয্যায দম্মীতি.

৭৬১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে ৱেমতিকা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. নিস্সট্ঠং পটিলভিত্ৱা যথাদানে উপনেতব্বং.

অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স. অনঞ্ঞদত্থিকে ৱেমতিকা, আপত্তি দুক্কটস্স. অনঞ্ঞদত্থিকে অনঞ্ঞদত্থিকসঞ্ঞা, অনাপত্তি.

৭৬২. অনাপত্তি সেসকং উপনেতি, সামিকে অপলোকেত্ৱা উপনেতি, আপদাসু, উম্মত্তিকায, আদিকম্মিকাযাতি.

ছট্ঠসিক্খাপদং নিট্ঠিতং.

৭. সত্তমসিক্খাপদং

৭৬৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন উপাসকা ভিক্খুনিসঙ্ঘস্স চীৱৰত্থায ছন্দকং সঙ্ঘৰিত্ৱা অঞ্ঞতৰস্স পাৱাৰিকস্স ঘৰে পৰিক্খাৰং নিক্খিপিত্ৱা ভিক্খুনিযো উপসঙ্কমিত্ৱা এতদৱোচুং – ‘‘অমুকস্স, অয্যে, পাৱাৰিকস্স ঘৰে চীৱৰত্থায পৰিক্খাৰো নিক্খিত্তো, ততো চীৱৰং আহৰাপেত্ৱা ভাজেথা’’তি. ভিক্খুনিযো তেন চ পৰিক্খাৰেন সযম্পি যাচিত্ৱা ভেসজ্জং চেতাপেত্ৱা পৰিভুঞ্জিংসু. উপাসকা জানিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৬৪. ‘‘যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি.

৭৬৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞদত্থিকেন পৰিক্খাৰেন অঞ্ঞুদ্দিসিকেনাতি অঞ্ঞস্সত্থায দিন্নেন.

সঙ্ঘিকেনাতি সঙ্ঘস্স, ন গণস্স, ন একভিক্খুনিযা.

সঞ্ঞাচিকেনাতি সযং যাচিত্ৱা.

অঞ্ঞং চেতাপেয্যাতি যংঅত্থায দিন্নং তং ঠপেত্ৱা অঞ্ঞং চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৬৬. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে ৱেমতিকা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. নিস্সট্ঠং পটিলভিত্ৱা যথাদানে উপনেতব্বং.

৭৬৭. অনাপত্তি সেসকং উপনেতি, সামিকে অপলোকেত্ৱা উপনেতি, আপদাসু, উম্মত্তিকায, আদিকম্মিকাযাতি.

সত্তমসিক্খাপদং নিট্ঠিতং.

৮. অট্ঠমসিক্খাপদং

৭৬৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰস্স পূগস্স পৰিৱেণৱাসিকা ভিক্খুনিযো যাগুযা কিলমন্তি. অথ খো সো পূগো ভিক্খুনীনং যাগুঅত্থায ছন্দকং সঙ্ঘৰিত্ৱা অঞ্ঞতৰস্স আপণিকস্স ঘৰে পৰিক্খাৰং নিক্খিপিত্ৱা ভিক্খুনিযো উপসঙ্কমিত্ৱা এতদৱোচ – ‘‘অমুকস্স, অয্যে, আপণিকস্স ঘৰে যাগুঅত্থায পৰিক্খাৰো নিক্খিত্তো, ততো তণ্ডুলং আহৰাপেত্ৱা যাগুং পচাপেত্ৱা পৰিভুঞ্জথা’’তি. ভিক্খুনিযো তেন পৰিক্খাৰেন ভেসজ্জং চেতাপেত্ৱা পৰিভুঞ্জিংসু. সো পূগো জানিত্ৱা উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৬৯. ‘‘যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি.

৭৭০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞদত্থিকেন পৰিক্খাৰেন অঞ্ঞুদ্দিসিকেনাতি অঞ্ঞস্সত্থায দিন্নেন.

মহাজনিকেনাতি গণস্স, ন সঙ্ঘস্স, ন একভিক্খুনিযা.

অঞ্ঞং চেতাপেয্যাতি যংঅত্থায দিন্নং তং ঠপেত্ৱা অঞ্ঞং চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপিতং নিস্সগ্গিযং ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৭১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে ৱেমতিকা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. নিস্সট্ঠং পটিলভিত্ৱা যথাদানে উপনেতব্বং.

৭৭২. অনাপত্তি সেসকং উপনেতি, সামিকে অপলোকেত্ৱা উপনেতি, আপদাসু, উম্মত্তিকায, আদিকম্মিকাযাতি.

অট্ঠমসিক্খাপদং নিট্ঠিতং.

৯. নৱমসিক্খাপদং

৭৭৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰস্স পূগস্স পৰিৱেণৱাসিকা ভিক্খুনিযো যাগুযা কিলমন্তি. অথ খো সো পূগো ভিক্খুনীনং যাগুঅত্থায ছন্দকং সঙ্ঘৰিত্ৱা অঞ্ঞতৰস্স আপণিকস্স ঘৰে পৰিক্খাৰং নিক্খিপিত্ৱা ভিক্খুনিযো উপসঙ্কমিত্ৱা এতদৱোচ – ‘‘অমুকস্স, অয্যে, আপণিকস্স ঘৰে যাগুঅত্থায পৰিক্খাৰো নিক্খিত্তো. ততো তণ্ডুলে আহৰাপেত্ৱা যাগুং পচাপেত্ৱা পৰিভুঞ্জথা’’তি. ভিক্খুনিযো তেন চ পৰিক্খাৰেন সযম্পি যাচিত্ৱা ভেসজ্জং চেতাপেত্ৱা পৰিভুঞ্জিংসু. সো পূগো জানিত্ৱা উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেস্সন্তী’’তি…পে… সচ্চং কিৰ, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, ভিক্খুনিযো অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৭৪. ‘‘যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি.

৭৭৫. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞদত্থিকেন পৰিক্খাৰেন অঞ্ঞুদ্দিসিকেনাতি অঞ্ঞস্সত্থায দিন্নেন.

মহাজনিকেনাতি গণস্স, ন সঙ্ঘস্স, ন একভিক্খুনিযা.

সঞ্ঞাচিকেনাতি সযং যাচিত্ৱা.

অঞ্ঞং চেতাপেয্যাতি যংঅত্থায দিন্নং তং ঠপেত্ৱা অঞ্ঞং চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপিতং নিস্সগ্গিযং. ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৭৬. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে ৱেমতিকা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. নিস্সট্ঠং পটিলভিত্ৱা যথাদানে উপনেতব্বং.

অনঞ্ঞদত্থিকে অঞ্ঞদত্থিকসঞ্ঞা, আপত্তি দুক্কটস্স. অনঞ্ঞদত্থিকে ৱেমতিকা, আপত্তি দুক্কটস্স. অনঞ্ঞদত্থিকে অনঞ্ঞদত্থিকসঞ্ঞা অনাপত্তি.

৭৭৭. অনাপত্তি সেসকং উপনেতি, সামিকে অপলোকেত্ৱা উপনেতি, আপদাসু, উম্মত্তিকায, আদিকম্মিকাযাতি.

নৱমসিক্খাপদং নিট্ঠিতং.

১০. দসমসিক্খাপদং

৭৭৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৱিসাৰদা পট্টা ধম্মিং কথং কাতুং. বহূ মনুস্সা থুল্লনন্দং ভিক্খুনিং পযিৰুপাসন্তি. তেন খো পন সমযেন থুল্লনন্দায ভিক্খুনিযা পৰিৱেণং উন্দ্ৰিযতি [উদ্ৰীযতি (স্যা.)]. মনুস্সা থুল্লনন্দং ভিক্খুনিং এতদৱোচুং – ‘‘কিস্সিদং তে, অয্যে, পৰিৱেণং উন্দ্ৰিযতী’’তি? ‘‘নত্থাৱুসো, দাযকা, নত্থি কাৰকা’’তি. অথ খো তে মনুস্সা থুল্লনন্দায ভিক্খুনিযা পৰিৱেণত্থায ছন্দকং সঙ্ঘৰিত্ৱা থুল্লনন্দায ভিক্খুনিযা পৰিক্খাৰং অদংসু. থুল্লনন্দা ভিক্খুনী তেন চ পৰিক্খাৰেন সযম্পি যাচিত্ৱা ভেসজ্জং চেতাপেত্ৱা পৰিভুঞ্জি. মনুস্সা জানিত্ৱা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা অঞ্ঞদত্থিকেন পৰিক্খাৰেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেতীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৭৯. ‘‘যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিয’’ন্তি.

৭৮০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অঞ্ঞদত্থিকেন পৰিক্খাৰেন অঞ্ঞুদ্দিসিকেনাতি অঞ্ঞস্সত্থায দিন্নেন.

পুগ্গলিকেনাতি একায ভিক্খুনিযা, ন সঙ্ঘস্স, ন গণস্স.

সঞ্ঞাচিকেনাতি সযং যাচিত্ৱা.

অঞ্ঞং চেতাপেয্যাতি যংঅত্থায দিন্নং তং ঠপেত্ৱা অঞ্ঞং চেতাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, অঞ্ঞদত্থিকেন পৰিক্খাৰেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৮১. অঞ্ঞদত্থিকে অঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে ৱেমতিকা অঞ্ঞং চেতাপেতি, নিস্সগ্গিযং পাচিত্তিযং. অঞ্ঞদত্থিকে অনঞ্ঞদত্থিকসঞ্ঞা অঞ্ঞং চেতাপেতি, নিস্সগ্গিযং পাচিত্তিযং. নিস্সট্ঠং পটিলভিত্ৱা যথাদানে উপনেতব্বং.

৭৮২. অনাপত্তি সেসকং উপনেতি, সামিকে অপলোকেত্ৱা উপনেতি, আপদাসু, উম্মত্তিকায, আদিকম্মিকাযাতি.

দসমসিক্খাপদং নিট্ঠিতং.

১১. একাদসমসিক্খাপদং

৭৮৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৱিসাৰদা পট্টা ধম্মিং কথং কাতুং. অথ খো ৰাজা পসেনদি কোসলো সীতকালে মহগ্ঘং কম্বলং পাৰুপিত্ৱা যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৱা থুল্লনন্দং ভিক্খুনিং অভিৱাদেত্ৱা একমন্তং নিসীদি. একমন্তং নিসিন্নং খো ৰাজানং পসেনদিং কোসলং থুল্লনন্দা ভিক্খুনী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো ৰাজা পসেনদি কোসলো থুল্লনন্দায ভিক্খুনিযা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থুল্লনন্দং ভিক্খুনিং এতদৱোচ – ‘‘ৱদেয্যাসি, অয্যে, যেন অত্থো’’তি? ‘‘সচে মে ত্ৱং, মহাৰাজ, দাতুকামোসি, ইমং কম্বলং দেহী’’তি. অথ খো ৰাজা পসেনদি কোসলো থুল্লনন্দায ভিক্খুনিযা কম্বলং দত্ৱা উট্ঠাযাসনা থুল্লনন্দং ভিক্খুনিং অভিৱাদেত্ৱা পদক্খিণং কত্ৱা পক্কামি. মনুস্সা উজ্ঝাযন্তি খিয্যন্তি ৱিপাচেন্তি – ‘‘মহিচ্ছা ইমা ভিক্খুনিযো অসন্তুট্ঠা. কথঞ্হি নাম ৰাজানং কম্বলং ৱিঞ্ঞাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা ৰাজানং কম্বলং ৱিঞ্ঞাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী ৰাজানং কম্বলং ৱিঞ্ঞাপেতীতি [ৱিঞ্ঞাপেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ৰাজানং কম্বলং ৱিঞ্ঞাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৮৪. ‘‘গৰুপাৱুৰণং [পাপুৰণং (সী. স্যা.)] পন ভিক্খুনিযা চেতাপেন্তিযা চতুক্কংসপৰমং চেতাপেতব্বং. ততো চে উত্তৰি চেতাপেয্য, নিস্সগ্গিযং পাচিত্তিয’’ন্তি.

৭৮৫. গৰুপাৱুৰণং নাম যং কিঞ্চি সীতকালে পাৱুৰণং.

চেতাপেন্তিযাতি ৱিঞ্ঞাপেন্তিযা.

চতুক্কংসপৰমং চেতাপেতব্বন্তি সোড়সকহাপণগ্ঘনকং চেতাপেতব্বং.

ততো চে উত্তৰি চেতাপেয্যাতি ততুত্তৰি ৱিঞ্ঞাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ‘‘ইদং মে, অয্যে, গৰুপাৱুৰণং অতিৰেকচতুক্কংসপৰমং চেতাপিতং নিস্সগ্গিযং, ইমাহং সঙ্ঘস্স নিস্সজ্জামী’’তি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৮৬. অতিৰেকচতুক্কংসে অতিৰেকসঞ্ঞা চেতাপেতি, নিস্সগ্গিযং পাচিত্তিযং. অতিৰেকচতুক্কংসে ৱেমতিকা চেতাপেতি, নিস্সগ্গিযং পাচিত্তিযং. অতিৰেকচতুক্কংসে ঊনকসঞ্ঞা চেতাপেতি, নিস্সগ্গিযং পাচিত্তিযং.

ঊনকচতুক্কংসে অতিৰেকসঞ্ঞা, আপত্তি দুক্কটস্স. ঊনকচতুক্কংসে ৱেমতিকা, আপত্তি দুক্কটস্স. ঊনকচতুক্কংসে ঊনকসঞ্ঞা, অনাপত্তি.

৭৮৭. অনাপত্তি চতুক্কংসপৰমং চেতাপেতি, ঊনকচতুক্কংসপৰমং চেতাপেতি, ঞাতকানং, পৱাৰিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তিকায, আদিকম্মিকাযাতি.

একাদসমসিক্খাপদং নিট্ঠিতং.

১২. দ্ৱাদসমসিক্খাপদং

৭৮৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থুল্লনন্দা ভিক্খুনী বহুস্সুতা হোতি ভাণিকা ৱিসাৰদা পট্টা ধম্মিং কথং কাতুং. অথ খো ৰাজা পসেনদি কোসলো উণ্হকালে মহগ্ঘং খোমং পাৰুপিত্ৱা যেন থুল্লনন্দা ভিক্খুনী তেনুপসঙ্কমি; উপসঙ্কমিত্ৱা থুল্লনন্দং ভিক্খুনিং অভিৱাদেত্ৱা একমন্তং নিসীদি. একমন্তং নিসিন্নং খো ৰাজানং পসেনদিং কোসলং থুল্লনন্দা ভিক্খুনী ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো ৰাজা পসেনদি কোসলো থুল্লনন্দায ভিক্খুনিযা ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো থুল্লনন্দং ভিক্খুনিং এতদৱোচ – ‘‘ৱদেয্যাসি, অয্যে, যেন অত্থো’’তি. ‘‘সচে মে ত্ৱং, মহাৰাজ, দাতুকামোসি, ইমং খোমং দেহী’’তি. অথ খো ৰাজা পসেনদি কোসলো থুল্লনন্দায ভিক্খুনিযা খোমং দত্ৱা উট্ঠাযাসনা থুল্লনন্দং ভিক্খুনিং অভিৱাদেত্ৱা পদক্খিণং কত্ৱা পক্কামি. মনুস্সা উজ্ঝাযন্তি খিয্যন্তি ৱিপাচেন্তি – ‘‘মহিচ্ছা ইমা ভিক্খুনিযো অসন্তুট্ঠা. কথঞ্হি নাম ৰাজানং খোমং ৱিঞ্ঞাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা ৰাজানং খোমং ৱিঞ্ঞাপেস্সতী’’তি…পে… সচ্চং কিৰ, ভিক্খৱে, থুল্লনন্দা ভিক্খুনী ৰাজানং খোমং ৱিঞ্ঞাপেতীতি [ৱিঞ্ঞাপেসীতি (ক.)]? ‘‘সচ্চং, ভগৱাতি’’. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী ৰাজানং খোমং ৱিঞ্ঞাপেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭৮৯. ‘‘লহুপাৱুৰণং পন ভিক্খুনিযা চেতাপেন্তিযা অড্ঢতেয্যকংসপৰমং চেতাপেতব্বং. ততো চে উত্তৰি চেতাপেয্য, নিস্সগ্গিযং পাচিত্তিয’’ন্তি.

৭৯০. লহুপাৱুৰণং নাম যং কিঞ্চি উণ্হকালে পাৱুৰণং.

চেতাপেন্তিযাতি ৱিঞ্ঞাপেন্তিযা.

অড্ঢতেয্যকংসপৰমং চেতাপেতব্বন্তি দসকহাপণগ্ঘনকং চেতাপেতব্বং.

ততো চে উত্তৰি চেতাপেয্যাতি ততুত্তৰি ৱিঞ্ঞাপেতি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৱা গণস্স ৱা একভিক্খুনিযা ৱা. এৱঞ্চ পন, ভিক্খৱে, নিস্সজ্জিতব্বং…পে… ইদং মে, অয্যে, লহুপাৱুৰণং অতিৰেকঅড্ঢতেয্যকংসপৰমং চেতাপিতং নিস্সগ্গিযং, ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… অয্যায দম্মীতি.

৭৯১. অতিৰেকঅড্ঢতেয্যকংসে অতিৰেকসঞ্ঞা চেতাপেতি, নিস্সগ্গিযং পাচিত্তিযং. অতিৰেকঅড্ঢতেয্যকংসে ৱেমতিকা চেতাপেতি, নিস্সগ্গিযং পাচিত্তিযং. অতিৰেকঅড্ঢতেয্যকংসে ঊনকসঞ্ঞা চেতাপেতি, নিস্সগ্গিযং পাচিত্তিযং.

ঊনকঅড্ঢতেয্যকংসে অতিৰেকসঞ্ঞা, আপত্তি দুক্কটস্স. ঊনকঅড্ঢতেয্যকংসে ৱেমতিকা, আপত্তি দুক্কটস্স. ঊনকঅড্ঢতেয্যকংসে ঊনকসঞ্ঞা, অনাপত্তি.

৭৯২. অনাপত্তি অড্ঢতেয্যকংসপৰমং চেতাপেতি, ঊনকঅড্ঢতেয্যকংসপৰমং চেতাপেতি, ঞাতকানং, পৱাৰিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামস্স অপ্পগ্ঘং চেতাপেতি, উম্মত্তিকায, আদিকম্মিকাযাতি.

দ্ৱাদসমসিক্খাপদং নিট্ঠিতং.

উদ্দিট্ঠা খো, অয্যাযো, তিংস নিস্সগ্গিযা পাচিত্তিযা ধম্মা. তত্থায্যাযো পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

ভিক্খুনিৱিভঙ্গে নিস্সগ্গিযকণ্ডং নিট্ঠিতং.