৮. অট্ঠমসঙ্ঘাদিসেসসিক্খাপদং

৭১৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন চণ্ডকাড়ী ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱদেতি – ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা চণ্ডকাড়ী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱক্খতি – ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি…পে… সচ্চং কিৰ, ভিক্খৱে, চণ্ডকাড়ী ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱদেতি – ‘‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, চণ্ডকাড়ী ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱক্খতি – ‘‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৭১৬. ‘‘যা পন ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱদেয্য – ‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’তি, সা ভিক্খুনী ভিক্খুনীহি এৱমস্স ৱচনীযা – ‘মায্যে, কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং অৱচ – ছন্দগামিনিযো চ ভিক্খুনিযো দোসগামিনিযো চ ভিক্খুনিযো মোহগামিনিযো চ ভিক্খুনিযো ভযগামিনিযো চ ভিক্খুনিযোতি. অয্যা খো ছন্দাপি গচ্ছেয্য, দোসাপি গচ্ছেয্য, মোহাপি গচ্ছেয্য, ভযাপি গচ্ছেয্যা’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায. যাৱততিযঞ্চে সমনুভাসীযমানা তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেস’’ন্তি.

৭১৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

কিস্মিঞ্চিদেৱ অধিকৰণেতি অধিকৰণং নাম চত্তাৰি অধিকৰণানি – ৱিৱাদাধিকৰণং, অনুৱাদাধিকৰণং, আপত্তাধিকৰণং, কিচ্চাধিকৰণং.

পচ্চাকতা নাম পৰাজিতা ৱুচ্চতি.

কুপিতা অনত্তমনাতি অনভিৰদ্ধা আহতচিত্তা খিলজাতা.

এৱং ৱদেয্যাতি – ‘‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি.

সা ভিক্খুনীতি যা সা এৱংৱাদিনী ভিক্খুনী.

ভিক্খুনীহীতি অঞ্ঞাহি ভিক্খুনীহি.

যা পস্সন্তি যা সুণন্তি তাহি ৱত্তব্বা – ‘‘মায্যে, কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং অৱচ – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. অয্যা খো ছন্দাপি গচ্ছেয্য…পে… ভযাপি গচ্ছেয্যা’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৱা ন ৱদন্তি, আপত্তি দুক্কটস্স. সা ভিক্খুনী সঙ্ঘমজ্ঝম্পি আকড্ঢিত্ৱা ৱত্তব্বা – ‘‘মায্যে, কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং অৱচ – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. অয্যা খো ছন্দাপি গচ্ছেয্য…পে… ভযাপি গচ্ছেয্যা’’তি. দুতিযম্পি ৱত্তব্বা. ততিযম্পি ৱত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সা ভিক্খুনী সমনুভাসিতব্বা. এৱঞ্চ পন, ভিক্খৱে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৭১৮. ‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱদেতি – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. সা তং ৱত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৱত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱদেতি – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. সা তং ৱত্থুং ন পটিনিস্সজ্জতি. সঙ্ঘো ইত্থন্নামং ভিক্খুনিং সমনুভাসতি তস্স ৱত্থুস্স পটিনিস্সগ্গায. যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৱত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৱত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

ঞত্তিযা দুক্কটং. দ্ৱীহি কম্মৱাচাহি থুল্লচ্চযা. কম্মৱাচাপৰিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তিযা ঞত্তিযা দুক্কটং. দ্ৱীহি কম্মৱাচাহি থুল্লচ্চযা পটিপ্পস্সম্ভন্তি.

অযম্পীতি পুৰিমাযো উপাদায ৱুচ্চতি.

যাৱততিযকন্তি যাৱততিযং সমনুভাসনায আপজ্জতি, ন সহ ৱত্থুজ্ঝাচাৰা.

নিস্সাৰণীযন্তি সঙ্ঘম্হা নিস্সাৰীযতি.

সঙ্ঘাদিসেসোতি…পে… তেনপি ৱুচ্চতি সঙ্ঘাদিসেসোতি.

৭১৯. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেস্স. ধম্মকম্মে ৱেমতিকা ন পটিনিস্সজ্জতি, আপত্তি সঙ্ঘাদিসেসস্স. ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৱেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা আপত্তি দুক্কটস্স.

৭২০. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায, আদিকম্মিকাযাতি.

অট্ঠমসঙ্ঘাদিসেসসিক্খাপদং নিট্ঠিতং.