২. দুতিযসঙ্ঘাদিসেসসিক্খাপদং

৬৮২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ৱেসালিযং অঞ্ঞতৰস্স লিচ্ছৱিস্স পজাপতি অতিচাৰিনী হোতি. অথ খো সো লিচ্ছৱি তং ইত্থিং এতদৱোচ – ‘‘সাধু ৱিৰমাহি, অনত্থং খো তে কৰিস্সামী’’তি. এৱম্পি সা ৱুচ্চমানা নাদিযি. তেন খো পন সমযেন ৱেসালিযং লিচ্ছৱিগণো সন্নিপতিতো হোতি কেনচিদেৱ কৰণীযেন. অথ খো সো লিচ্ছৱি তে লিচ্ছৱযো এতদৱোচ – ‘‘একং মে, অয্যো, ইত্থিং অনুজানাথা’’তি. ‘‘কা নাম সা’’তি? ‘‘ময্হং পজাপতি অতিচৰতি, তং ঘাতেস্সামী’’তি. ‘‘জানাহী’’তি. অস্সোসি খো সা ইত্থী – ‘‘সামিকো কিৰ মং ঘাতেতুকামো’’তি. ৱৰভণ্ডং আদায সাৱত্থিং গন্ত্ৱা তিত্থিযে উপসঙ্কমিত্ৱা পব্বজ্জং যাচি. তিত্থিযা ন ইচ্ছিংসু পব্বাজেতুং. ভিক্খুনিযো উপসঙ্কমিত্ৱা পব্বজ্জং যাচি. ভিক্খুনিযোপি ন ইচ্ছিংসু পব্বাজেতুং. থুল্লনন্দং ভিক্খুনিং উপসঙ্কমিত্ৱা ভণ্ডকং দস্সেত্ৱা পব্বজ্জং যাচি. থুল্লনন্দা ভিক্খুনী ভণ্ডকং গহেত্ৱা পব্বাজেসি.

অথ খো সো লিচ্ছৱি তং ইত্থিং গৱেসন্তো সাৱত্থিং গন্ত্ৱা ভিক্খুনীসু পব্বজিতং দিস্ৱান যেন ৰাজা পসেনদি কোসলো তেনুপসঙ্কমি; উপসঙ্কমিত্ৱা ৰাজানং পসেনদিং কোসলং এতদৱোচ – ‘‘পজাপতি মে, দেৱ, ৱৰভণ্ডং আদায সাৱত্থিং অনুপ্পত্তা. তং দেৱো অনুজানাতূ’’তি. ‘‘তেন হি, ভণে, ৱিচিনিত্ৱা আচিক্খা’’তি. ‘‘দিট্ঠা, দেৱ, ভিক্খুনীসু পব্বজিতা’’তি. ‘‘সচে, ভণে, ভিক্খুনীসু পব্বজিতা, ন সা লব্ভা কিঞ্চি কাতুং. স্ৱাক্খাতো ভগৱতা ধম্মো, চৰতু ব্ৰহ্মচৰিযং সম্মা দুক্খস্স অন্তকিৰিযাযা’’তি. অথ খো সো লিচ্ছৱি উজ্ঝাযতি খিয্যতি ৱিপাচেতি – ‘‘কথঞ্হি নাম ভিক্খুনিযো চোৰিং পব্বাজেস্সন্তী’’তি! অস্সোসুং খো ভিক্খুনিযো তস্স লিচ্ছৱিস্স উজ্ঝাযন্তস্স খিয্যন্তস্স ৱিপাচেন্তস্স. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা থুল্লনন্দা চোৰিং পব্বাজেস্সতী’’তি! অথ খো তা ভিক্খুনিযো ভিক্খূনং এতমত্থং আৰোচেসুং…পে… সচ্চং কিৰ, ভিক্খৱে, থুল্লনন্দা ভিক্খুনী চোৰিং পব্বাজেতীতি [পব্বাজেসীতি (ক.)]? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম, ভিক্খৱে, থুল্লনন্দা ভিক্খুনী চোৰিং পব্বাজেস্সতি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ভিক্খুনিযো ইমং সিক্খাপদং উদ্দিসন্তু –

৬৮৩. ‘‘যা পন ভিক্খুনী জানং চোৰিং ৱজ্ঝং ৱিদিতং অনপলোকেত্ৱা ৰাজানং ৱা সঙ্ঘং ৱা গণং ৱা পূগং ৱা সেণিং ৱা অঞ্ঞত্ৰ কপ্পা ৱুট্ঠাপেয্য, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেস’’ন্তি.

৬৮৪. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

জানাতি নাম সামং ৱা জানাতি অঞ্ঞে ৱা তস্সা আৰোচেন্তি, সা ৱা আৰোচেতি.

চোৰী নাম যা পঞ্চমাসকং ৱা অতিৰেকপঞ্চমাসকং ৱা অগ্ঘনকং অদিন্নং থেয্যসঙ্খাতং আদিযতি, এসা চোৰী নাম.

ৱজ্ঝা নাম যং কত্ৱা ৱজ্ঝপ্পত্তা হোতি.

ৱিদিতা নাম অঞ্ঞেহি মনুস্সেহি ঞাতা হোতি ‘‘ৱজ্ঝা এসা’’তি.

অনপলোকেত্ৱাতি অনাপুচ্ছা.

ৰাজা নাম যত্থ ৰাজা অনুসাসতি, ৰাজা অপলোকেতব্বো.

সঙ্ঘো নাম ভিক্খুনিসঙ্ঘো ৱুচ্চতি, ভিক্খুনিসঙ্ঘো অপলোকেতব্বো.

গণো নাম যত্থ গণো অনুসাসতি, গণো অপলোকেতব্বো.

পূগো নাম যত্থ পূগো অনুসাসতি, পূগো অপলোকেতব্বো.

সেণি নাম যত্থ সেণি অনুসাসতি, সেণি অপলোকেতব্বো.

অঞ্ঞত্ৰ কপ্পাতি ঠপেত্ৱা কপ্পং. কপ্পং নাম দ্ৱে কপ্পানি – তিত্থিযেসু ৱা পব্বজিতা হোতি অঞ্ঞাসু ৱা ভিক্খুনীসু পব্বজিতা. অঞ্ঞত্ৰ কপ্পা ‘‘ৱুট্ঠাপেস্সামী’’তি গণং ৱা আচৰিনিং ৱা পত্তং ৱা চীৱৰং ৱা পৰিযেসতি, সীমং ৱা সম্মন্নতি, আপত্তি দুক্কটস্স. ঞত্তিযা দুক্কটং. দ্ৱীহি কম্মৱাচাহি থুল্লচ্চযা. কম্মৱাচাপৰিযোসানে উপজ্ঝাযায আপত্তি সঙ্ঘাদিসেসস্স. গণস্স চ আচৰিনিযা চ আপত্তি দুক্কটস্স.

অযম্পীতি পুৰিমং উপাদায ৱুচ্চতি.

পঠমাপত্তিকন্তি সহ ৱত্থুজ্ঝাচাৰা আপজ্জতি অসমনুভাসনায.

নিস্সাৰণীযন্তি সঙ্ঘম্হা নিস্সাৰীযতি.

সঙ্ঘাদিসেসন্তি…পে… তেনপি ৱুচ্চতি সঙ্ঘাদিসেসোতি.

৬৮৫. চোৰিযা চোৰিসঞ্ঞা অঞ্ঞত্ৰ কপ্পা ৱুট্ঠাপেতি, আপত্তি সঙ্ঘাদিসেসস্স. চোৰিযা ৱেমতিকা অঞ্ঞত্ৰ কপ্পা ৱুট্ঠাপেতি, আপত্তি দুক্কটস্স. চোৰিযা অচোৰিসঞ্ঞা অঞ্ঞত্ৰ কপ্পা ৱুট্ঠাপেতি, অনাপত্তি. অচোৰিযা চোৰিসঞ্ঞা, আপত্তি দুক্কটস্স. অচোৰিযা ৱেমতিকা, আপত্তি দুক্কটস্স. অচোৰিযা অচোৰিসঞ্ঞা, অনাপত্তি.

৬৮৬. অনাপত্তি অজানন্তী ৱুট্ঠাপেতি, অপলোকেত্ৱা ৱুট্ঠাপেতি, কপ্পকতং ৱুট্ঠাপেতি, উম্মত্তিকায, আদিকম্মিকাযাতি.

দুতিযসঙ্ঘাদিসেসসিক্খাপদং নিট্ঠিতং.