৬. সুৰুসুৰুৱগ্গো

৬২৭. তেন সমযেন বুদ্ধো ভগৱা কোসম্বিযং ৱিহৰতি ঘোসিতাৰামে. তেন খো পন সমযেন অঞ্ঞতৰেন ব্ৰাহ্মণেন সঙ্ঘস্স পযোপানং পটিযত্তং হোতি. ভিক্খূ সুৰুসুৰুকাৰকং খীৰং পিৱন্তি. অঞ্ঞতৰো নটপুব্বকো ভিক্খু এৱমাহ – ‘‘সব্বোযং মঞ্ঞে সঙ্ঘো সীতীকতো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খু সঙ্ঘং আৰব্ভ দৱং কৰিস্সতী’’তি…পে… সচ্চং কিৰ ত্ৱং, ভিক্খু, সঙ্ঘং আৰব্ভ দৱং অকাসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, সঙ্ঘং আৰব্ভ দৱং কৰিস্সসি! নেতং, মোঘপুৰিস, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, বুদ্ধং ৱা ধম্মং ৱা সঙ্ঘং ৱা আৰব্ভ দৱো কাতব্বো. যো কৰেয্য, আপত্তি দুক্কটস্সা’’তি. অথ খো ভগৱা তং ভিক্খুং অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন সুৰুসুৰুকাৰকং ভুঞ্জিস্সামীতি সিক্খা কৰণীযা’’তি.

ন সুৰুসুৰুকাৰকং ভুঞ্জিতব্বং. যো অনাদৰিযং পটিচ্চ সুৰুসুৰুকাৰকং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

পঠমসিক্খাপদং নিট্ঠিতং.

৬২৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ হত্থনিল্লেহকং ভুঞ্জন্তি…পে….

‘‘ন হত্থনিল্লেহকং ভুঞ্জিস্সামীতি সিক্খা কৰণীযা’’তি.

ন হত্থনিল্লেহকং ভুঞ্জিতব্বং. যো অনাদৰিযং পটিচ্চ হত্থনিল্লেহকং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দুতিযসিক্খাপদং নিট্ঠিতং.

৬২৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পত্তনিল্লেহকং ভুঞ্জন্তি…পে….

‘‘ন পত্তনিল্লেহকং ভুঞ্জিস্সামীতি সিক্খা কৰণীযা’’তি.

ন পত্তনিল্লেহকং ভুঞ্জিতব্বং. যো অনাদৰিযং পটিচ্চ পত্তনিল্লেহকং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, পৰিত্তকে সেসে একতো সঙ্কড্ঢিত্ৱা নিল্লেহিত্ৱা ভুঞ্জতি, আপদাসু, উম্মত্তকস্স, আদিকম্মিকস্সাতি.

ততিযসিক্খাপদং নিট্ঠিতং.

৬৩০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ওট্ঠনিল্লেহকং ভুঞ্জন্তি…পে….

‘‘ন ওট্ঠনিল্লেহকং ভুঞ্জিস্সামীতি সিক্খা কৰণীযা’’তি.

ন ওট্ঠনিল্লেহকং ভুঞ্জিতব্বং. যো অনাদৰিযং পটিচ্চ ওট্ঠনিল্লেহকং ভুঞ্জতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

চতুত্থসিক্খাপদং নিট্ঠিতং.

৬৩১. তেন সমযেন বুদ্ধো ভগৱা ভগ্গেসু ৱিহৰতি সুসুমাৰগিৰে [সুংসুমাৰগিৰে (সী. স্যা.), সংসুমাৰগিৰে (ক.)] ভেসকড়াৱনে মিগদাযে. তেন খো পন সমযেন ভিক্খূ কোকনদে [কোকনুদে (ক.)] পাসাদে সামিসেন হত্থেন পানীযথালকং পটিগ্গণ্হন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা সামিসেন হত্থেন পানীযথালকং পটিগ্গহেস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ সামিসেন হত্থেন পানীযথালকং পটিগ্গহেস্সন্তী’’তি…পে… সচ্চং কিৰ, ভিক্খৱে, ভিক্খূ সামিসেন হত্থেন পানীযথালকং পটিগ্গণ্হন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা সামিসেন হত্থেন পানীযথালকং পটিগ্গহেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন সামিসেন হত্থেন পানীযথালকং পটিগ্গহেস্সামীতি সিক্খা কৰণীযা’’তি.

ন সামিসেন হত্থেন পানীযথালকো পটিগ্গহেতব্বো. যো অনাদৰিযং পটিচ্চ সামিসেন হত্থেন পানীযথালকং পটিগ্গণ্হাতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ‘‘ধোৱিস্সামী’’তি ৱা ‘‘ধোৱাপেস্সামী’’তি ৱা পটিগ্গণ্হাতি, আপদাসু, উম্মত্তকস্স, আদিকম্মিকস্সাতি.

পঞ্চমসিক্খাপদং নিট্ঠিতং.

৬৩২. তেন সমযেন বুদ্ধো ভগৱা ভগ্গেসু ৱিহৰতি সুসুমাৰগিৰে ভেসকড়াৱনে মিগদাযে. তেন খো পন সমযেন ভিক্খূ কোকনদে পাসাদে সসিত্থকং পত্তধোৱনং অন্তৰঘৰে ছড্ডেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা সসিত্থকং পত্তধোৱনং অন্তৰঘৰে ছড্ডেস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খূ সসিত্থকং পত্তধোৱনং অন্তৰঘৰে ছড্ডেস্সন্তী’’তি…পে… সচ্চং কিৰ, ভিক্খৱে, ভিক্খূ সসিত্থকং পত্তধোৱনং অন্তৰঘৰে ছড্ডেন্তীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তে, ভিক্খৱে, মোঘপুৰিসা সসিত্থকং পত্তধোৱনং অন্তৰঘৰে ছড্ডেস্সন্তি! নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন সসিত্থকং পত্তধোৱনং অন্তৰঘৰে ছড্ডেস্সামীতি সিক্খা কৰণীযা’’তি.

ন সসিত্থকং পত্তধোৱনং অন্তৰঘৰে ছড্ডেতব্বং. যো অনাদৰিযং পটিচ্চ সসিত্থকং পত্তধোৱনং অন্তৰঘৰে ছড্ডেতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, উদ্ধৰিত্ৱা ৱা ভিন্দিত্ৱা ৱা পটিগ্গহে ৱা নীহৰিত্ৱা ৱা ছড্ডেতি, আপদাসু, উম্মত্তকস্স, আদিকম্মিকস্সাতি.

ছট্ঠসিক্খাপদং নিট্ঠিতং.

৬৩৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ছত্তপাণিস্স ধম্মং দেসেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ছত্তপাণিস্স ধম্মং দেসেস্সন্তী’’তি…পে… সচ্চং কিৰ তুম্হে, ভিক্খৱে, ছত্তপাণিস্স ধম্মং দেসেথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ছত্তপাণিস্স ধম্মং দেসেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন ছত্তপাণিস্স ধম্মং দেসেস্সামীতি সিক্খা কৰণীযা’’তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৬৩৪. তেন খো পন সমযেন ভিক্খূ ছত্তপাণিস্স গিলানস্স ধম্মং দেসেতুং কুক্কুচ্চাযন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা ছত্তপাণিস্স গিলানস্স ধম্মং ন দেসেস্সন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ছত্তপাণিস্স গিলানস্স ধম্মং দেসেতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন ছত্তপাণিস্স অগিলানস্স ধম্মং দেসেস্সামীতি সিক্খা কৰণীযা’’তি.

ছত্তং নাম তীণি ছত্তানি – সেতচ্ছত্তং, কিলঞ্জচ্ছত্তং, পণ্ণচ্ছত্তং মণ্ডলবদ্ধং সলাকবদ্ধং.

ধম্মো নাম বুদ্ধভাসিতো সাৱকভাসিতো ইসিভাসিতো দেৱতাভাসিতো অত্থূপসঞ্হিতো ধম্মূপসঞ্হিতো.

দেসেয্যাতি পদেন দেসেতি, পদে পদে আপত্তি দুক্কটস্স. অক্খৰায দেসেতি, অক্খৰক্খৰায আপত্তি দুক্কটস্স. ন ছত্তপাণিস্স অগিলানস্স ধম্মো দেসেতব্বো. যো অনাদৰিযং পটিচ্চ ছত্তপাণিস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

সত্তমসিক্খাপদং নিট্ঠিতং.

৬৩৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ দণ্ডপাণিস্স ধম্মং দেসেন্তি…পে….

‘‘ন দণ্ডপাণিস্স অগিলানস্স ধম্মং দেসেস্সামীতি সিক্খা কৰণীযা’’তি.

দণ্ডো নাম মজ্ঝিমস্স পুৰিসস্স চতুহত্থো দণ্ডো. ততো উক্কট্ঠো অদণ্ডো, ওমকো অদণ্ডো.

ন দণ্ডপাণিস্স অগিলানস্স ধম্মো দেসেতব্বো. যো অনাদৰিযং পটিচ্চ দণ্ডপাণিস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

অট্ঠমসিক্খাপদং নিট্ঠিতং.

৬৩৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সত্থপাণিস্স ধম্মং দেসেন্তি…পে….

‘‘ন সত্থপাণিস্স অগিলানস্স ধম্মং দেসেস্সামীতি সিক্খা কৰণীযা’’তি.

সত্থং নাম একতোধাৰং উভতোধাৰং পহৰণং.

ন সত্থপাণিস্স অগিলানস্স ধম্মো দেসেতব্বো. যো অনাদৰিযং পটিচ্চ সত্থপাণিস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

নৱমসিক্খাপদং নিট্ঠিতং.

৬৩৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ আৱুধপাণিস্স ধম্মং দেসেন্তি…পে….

‘‘ন আৱুধপাণিস্স অগিলানস্স ধম্মং দেসেস্সামীতি সিক্খা কৰণীযা’’তি.

আৱুধং নাম চাপো কোদণ্ডো.

ন আৱুধপাণিস্স অগিলানস্স ধম্মো দেসেতব্বো. যো অনাদৰিযং পটিচ্চ আৱুধপাণিস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দসমসিক্খাপদং নিট্ঠিতং.

সুৰুসুৰুৱগ্গো ছট্ঠো.