৭. পাদুকৱগ্গো

৬৩৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পাদুকাৰুড়্হস্স ধম্মং দেসেন্তি…পে….

‘‘ন পাদুকাৰুড়্হস্স অগিলানস্স ধম্মং দেসেস্সামীতি সিক্খা কৰণীযা’’তি.

ন পাদুকাৰুড়্হস্স অগিলানস্স ধম্মো দেসেতব্বো. যো অনাদৰিযং পটিচ্চ অক্কন্তস্স ৱা পটিমুক্কস্স ৱা ওমুক্কস্স ৱা অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

পঠমসিক্খাপদং নিট্ঠিতং.

৬৩৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উপাহনাৰুড়্হস্স ধম্মং দেসেন্তি…পে….

‘‘ন উপাহনাৰুড়্হস্স অগিলানস্স ধম্মং দেসেস্সামীতি সিক্খাকৰণীযা’’তি.

ন উপাহনাৰুড়্হস্স অগিলানস্স ধম্মো দেসেতব্বো. যো অনাদৰিযং পটিচ্চ অক্কন্তস্স ৱা পটিমুক্কস্স ৱা ওমুক্কস্স ৱা অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দুতিযসিক্খাপদং নিট্ঠিতং.

৬৪০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ যানগতস্স ধম্মং দেসেন্তি…পে….

‘‘ন যানগতস্স অগিলানস্স ধম্মং দেসেস্সামীতি সিক্খা কৰণীযা’’তি.

যানং নাম ৱয্হং ৰথো সকটং সন্দমানিকা সিৱিকা পাটঙ্কী.

ন যানগতস্স অগিলানস্স ধম্মো দেসেতব্বো. যো অনাদৰিযং পটিচ্চ যানগতস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

ততিযসিক্খাপদং নিট্ঠিতং.

৬৪১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সযনগতস্স ধম্মং দেসেন্তি…পে….

‘‘ন সযনগতস্স অগিলানস্স ধম্মং দেসেস্সামীতি সিক্খা কৰণীযা’’তি.

ন সযনগতস্স অগিলানস্স ধম্মো দেসেতব্বো. যো অনাদৰিযং পটিচ্চ অন্তমসো ছমাযম্পি নিপন্নস্স সযনগতস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

চতুত্থসিক্খাপদং নিট্ঠিতং.

৬৪২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পল্লত্থিকায নিসিন্নস্স ধম্মং দেসেন্তি…পে….

‘‘ন পল্লত্থিকায নিসিন্নস্স অগিলানস্স ধম্মং দেসেস্সামীতি সিক্খা কৰণীযা’’তি.

ন পল্লত্থিকায নিসিন্নস্স অগিলানস্স ধম্মো দেসেতব্বো. যো অনাদৰিযং পটিচ্চ হত্থপল্লত্থিকায ৱা দুস্সপল্লত্থিকায ৱা নিসিন্নস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

পঞ্চমসিক্খাপদং নিট্ঠিতং.

৬৪৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ৱেঠিতসীসস্স ধম্মং দেসেন্তি…পে….

‘‘ন ৱেঠিতসীসস্স অগিলানস্স ধম্মং দেসেস্সামীতি সিক্খা কৰণীযা’’তি.

ৱেঠিতসীসো নাম কেসন্তং ন দস্সাপেত্ৱা ৱেঠিতো হোতি.

ন ৱেঠিতসীসস্স অগিলানস্স ধম্মো দেসেতব্বো. যো অনাদৰিযং পটিচ্চ ৱেঠিতসীসস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, কেসন্তং ৱিৱৰাপেত্ৱা দেসেতি, আপদাসু, উম্মত্তকস্স, আদিকম্মিকস্সাতি.

ছট্ঠসিক্খাপদং নিট্ঠিতং.

৬৪৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ওগুণ্ঠিতসীসস্স ধম্মং দেসেন্তি…পে….

‘‘ন ওগুণ্ঠিতসীসস্স অগিলানস্স ধম্মং দেসেস্সামীতি সিক্খা কৰণীযা’’তি.

ওগুণ্ঠিতসীসো নাম সসীসং পাৰুতো ৱুচ্চতি.

ন ওগুণ্ঠিতসীসস্স অগিলানস্স ধম্মো দেসেতব্বো. যো অনাদৰিযং পটিচ্চ ওগুণ্ঠিতসীসস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, সীসং ৱিৱৰাপেত্ৱা দেসেতি, আপদাসু, উম্মত্তকস্স, আদিকম্মিকস্সাতি.

সত্তমসিক্খাপদং নিট্ঠিতং.

৬৪৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ছমায নিসীদিত্ৱা আসনে নিসিন্নস্স ধম্মং দেসেন্তি…পে….

‘‘ন ছমাযং নিসীদিত্ৱা আসনে নিসিন্নস্স অগিলানস্স ধম্মং দেসেস্সামীতি সিক্খা কৰণীযা’’তি.

ন ছমাযং নিসীদিত্ৱা [নিসিন্নেন (অট্ঠকথা)] আসনে নিসিন্নস্স অগিলানস্স ধম্মো দেসেতব্বো. যো অনাদৰিযং পটিচ্চ ছমাযং নিসীদিত্ৱা আসনে নিসিন্নস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

অট্ঠমসিক্খাপদং নিট্ঠিতং.

৬৪৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ নীচে আসনে নিসীদিত্ৱা উচ্চে আসনে নিসিন্নস্স ধম্মং দেসেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ নীচে আসনে নিসীদিত্ৱা উচ্চে আসনে নিসিন্নস্স ধম্মং দেসেস্সন্তী’’তি…পে… সচ্চং কিৰ তুম্হে, ভিক্খৱে, নীচে আসনে নিসীদিত্ৱা উচ্চে আসনে নিসিন্নস্স ধম্মং দেসেথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, নীচে আসনে নিসীদিত্ৱা উচ্চে আসনে নিসিন্নস্স ধম্মং দেসেস্সথ! নেতং, মোঘপুৰিসা, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৬৪৭. ‘‘ভূতপুব্বং, ভিক্খৱে, বাৰাণসিযং অঞ্ঞতৰস্স ছপকস্স [ছৱকস্স (স্যা.)] পজাপতি গব্ভিনী অহোসি. অথ খো, ভিক্খৱে, সা ছপকী তং ছপকং এতদৱোচ – ‘গব্ভিনীম্হি, অয্যপুত্ত! ইচ্ছামি অম্বং খাদিতু’ন্তি. ‘নত্থি অম্বং [অম্বো (স্যা.)], অকালো অম্বস্সা’তি. ‘সচে ন লভিস্সামি মৰিস্সামী’তি. তেন খো পন সমযেন, ৰঞ্ঞো অম্বো ধুৱফলো হোতি. অথ খো, ভিক্খৱে, সো ছপকো যেন সো অম্বো তেনুপসঙ্কমি; উপসঙ্কমিত্ৱা তং অম্বং অভিৰুহিত্ৱা নিলীনো অচ্ছি. অথ খো, ভিক্খৱে, ৰাজা পুৰোহিতেন ব্ৰাহ্মণেন সদ্ধিং যেন সো অম্বো তেনুপসঙ্কমি; উপসঙ্কমিত্ৱা উচ্চে আসনে নিসীদিত্ৱা মন্তং পৰিযাপুণাতি. অথ খো, ভিক্খৱে, তস্স ছপকস্স এতদহোসি – ‘যাৱ অধম্মিকো অযং ৰাজা, যত্ৰ হি নাম উচ্চে আসনে নিসীদিত্ৱা মন্তং পৰিযাপুণিস্সতি. অযঞ্চ ব্ৰাহ্মণো অধম্মিকো, যত্ৰ হি নাম নীচে আসনে নিসীদিত্ৱা উচ্চে আসনে নিসিন্নস্স মন্তং ৱাচেস্সতি. অহঞ্চম্হি অধম্মিকো, যোহং ইত্থিযা কাৰণা ৰঞ্ঞো অম্বং অৱহৰামি. সব্বমিদং চৰিমং কত’ন্তি তত্থেৱ পৰিপতি.

[ইমা গাথাযো জা. ১.৪.৩৩-৩৫ জাতকে অঞ্ঞথা দিস্সন্তি] ‘‘উভো অত্থং ন জানন্তি, উভো ধম্মং ন পস্সৰে;

যো চাযং মন্তং ৱাচেতি, যো চাধম্মেনধীযতি.

‘‘সালীনং ওদনো ভুত্তো, সুচিমংসূপসেচনো;

তস্মা ধম্মে ন ৱত্তামি, ধম্মো অৰিযেভি ৱণ্ণিতো.

‘‘ধিৰত্থু তং ধনলাভং, যসলাভঞ্চ ব্ৰাহ্মণ;

যা ৱুত্তি ৱিনিপাতেন, অধম্মচৰণেন ৱা.

‘‘পৰিব্বজ মহাব্ৰহ্মে, পচন্তঞ্ঞেপি পাণিনো;

মা ত্ৱং অধম্মো আচৰিতো, অস্মা কুম্ভমিৱাভিদা’’তি.

‘‘তদাপি মে, ভিক্খৱে, অমনাপা নীচে আসনে নিসীদিত্ৱা উচ্চে আসনে নিসিন্নস্স মন্তং ৱাচেতুং, কিমঙ্গ পন এতৰহি ন অমনাপা ভৱিস্সতি নীচে আসনে নিসীদিত্ৱা উচ্চে আসনে নিসিন্নস্স ধম্মং দেসেতুং. নেতং, ভিক্খৱে, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন নীচে আসনে নিসীদিত্ৱা উচ্চে আসনে নিসিন্নস্স অগিলানস্স ধম্মং দেসেস্সামীতি সিক্খা কৰণীযা’’তি.

ন নীচে আসনে নিসীদিত্ৱা উচ্চে আসনে নিসিন্নস্স অগিলানস্স ধম্মো দেসেতব্বো. যো অনাদৰিযং পটিচ্চ নীচে আসনে নিসীদিত্ৱা উচ্চে আসনে নিসিন্নস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

নৱমসিক্খাপদং নিট্ঠিতং.

৬৪৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ঠিতা নিসিন্নস্স ধম্মং দেসেন্তি…পে….

‘‘ন ঠিতো নিসিন্নস্স অগিলানস্স ধম্মং দেসেস্সামীতি সিক্খা কৰণীযা’’তি.

ন ঠিতেন নিসিন্নস্স অগিলানস্স ধম্মো দেসেতব্বো. যো অনাদৰিযং পটিচ্চ ঠিতো নিসিন্নস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দসমসিক্খাপদং নিট্ঠিতং.

৬৪৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পচ্ছতো গচ্ছন্তা পুৰতো গচ্ছন্তস্স ধম্মং দেসেন্তি…পে….

‘‘ন পচ্ছতো গচ্ছন্তো পুৰতো গচ্ছন্তস্স অগিলানস্স ধম্মং দেসেস্সামীতি সিক্খা কৰণীযা’’তি.

ন পচ্ছতো গচ্ছন্তেন পুৰতো গচ্ছন্তস্স অগিলানস্স ধম্মো দেসেতব্বো. যো অনাদৰিযং পটিচ্চ পচ্ছতো গচ্ছন্তো পুৰতো গচ্ছন্তস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

একাদসমসিক্খাপদং নিট্ঠিতং.

৬৫০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উপ্পথেন গচ্ছন্তা পথেন গচ্ছন্তস্স ধম্মং দেসেন্তি…পে….

‘‘ন উপ্পথেন গচ্ছন্তো পথেন গচ্ছন্তস্স অগিলানস্স ধম্মং দেসেস্সামীতি সিক্খা কৰণীযা’’তি.

ন উপ্পথেন গচ্ছন্তেন পথেন গচ্ছন্তস্স অগিলানস্স ধম্মো দেসেতব্বো. যো অনাদৰিযং পটিচ্চ উপ্পথেন গচ্ছন্তো পথেন গচ্ছন্তস্স অগিলানস্স ধম্মং দেসেতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

দ্ৱাদসমসিক্খাপদং নিট্ঠিতং.

৬৫১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ঠিতা উচ্চাৰম্পি পস্সাৱম্পি কৰোন্তি…পে….

‘‘ন ঠিতো অগিলানো উচ্চাৰং ৱা পস্সাৱং ৱা কৰিস্সামীতি সিক্খা কৰণীযা’’তি.

ন ঠিতেন অগিলানেন উচ্চাৰো ৱা পস্সাৱো ৱা কাতব্বো. যো অনাদৰিযং পটিচ্চ ঠিতো অগিলানো উচ্চাৰং ৱা পস্সাৱং ৱা কৰোতি, আপত্তি দুক্কটস্স.

অনাপত্তি অসঞ্চিচ্চ…পে… আদিকম্মিকস্সাতি.

তেৰসমসিক্খাপদং নিট্ঠিতং.

৬৫২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ হৰিতে উচ্চাৰম্পি পস্সাৱম্পি খেড়ম্পি কৰোন্তি…পে….

‘‘ন হৰিতে অগিলানো উচ্চাৰং ৱা পস্সাৱং ৱা খেড়ং ৱা কৰিস্সামীতি সিক্খা কৰণীযা’’তি.

ন হৰিতে অগিলানেন উচ্চাৰো ৱা পস্সাৱো ৱা খেড়ো ৱা কাতব্বো. যো অনাদৰিযং পটিচ্চ হৰিতে অগিলানো উচ্চাৰং ৱা পস্সাৱং ৱা খেড়ং ৱা কৰোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, অপ্পহৰিতে কতো হৰিতং ওত্থৰতি, আপদাসু, উম্মত্তকস্স, আদিকম্মিকস্সাতি.

চুদ্দসমসিক্খাপদং নিট্ঠিতং.

৬৫৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উদকে উচ্চাৰম্পি পস্সাৱম্পি খেড়ম্পি কৰোন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা উদকে উচ্চাৰম্পি পস্সাৱম্পি খেড়ম্পি কৰিস্সন্তি, সেয্যথাপি গিহী কামভোগিনো’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ উদকে উচ্চাৰম্পি পস্সাৱম্পি খেড়ম্পি কৰিস্সন্তী’’তি…পে… সচ্চং কিৰ তুম্হে, ভিক্খৱে, উদকে উচ্চাৰম্পি পস্সাৱম্পি খেড়ম্পি কৰোথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, উদকে উচ্চাৰম্পি পস্সাৱম্পি খেড়ম্পি কৰিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন উদকে উচ্চাৰং ৱা পস্সাৱং ৱা খেড়ং ৱা কৰিস্সামীতি সিক্খা কৰণীযা’’তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

৬৫৪. তেন খো পন সমযেন গিলানা ভিক্খূ উদকে উচ্চাৰম্পি পস্সাৱম্পি খেড়ম্পি কাতুং কুক্কুচ্চাযন্তি. ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, গিলানেন ভিক্খুনা উদকে উচ্চাৰম্পি পস্সাৱম্পি খেড়ম্পি কাতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘ন উদকে অগিলানো উচ্চাৰং ৱা পস্সাৱং ৱা খেড়ং ৱা কৰিস্সামীতি সিক্খা কৰণীযা’’তি.

ন উদকে অগিলানেন উচ্চাৰো ৱা পস্সাৱো ৱা খেড়ো ৱা কাতব্বো. যো অনাদৰিযং পটিচ্চ উদকে অগিলানো উচ্চাৰং ৱা পস্সাৱং ৱা খেড়ং ৱা কৰোতি, আপত্তি দুক্কটস্স.

অনাপত্তি অসঞ্চিচ্চ, অস্সতিযা, অজানন্তস্স, গিলানস্স, থলে কতো উদকং ওত্থৰতি, আপদাসু, উম্মত্তকস্স, খিত্তচিত্তস্স, ৱেদনাট্টস্স, আদিকম্মিকস্সাতি.

পন্নৰসমসিক্খাপদং নিট্ঠিতং.

পাদুকৱগ্গো সত্তমো.

উদ্দিট্ঠা খো, আযস্মন্তো, সেখিযা ধম্মা. তত্থাযস্মন্তে পুচ্ছামি – ‘‘কচ্চিত্থ পৰিসুদ্ধা’’? দুতিযম্পি পুচ্ছামি – ‘‘কচ্চিত্থ পৰিসুদ্ধা’’? ততিযম্পি পুচ্ছামি – ‘‘কচ্চিত্থ পৰিসুদ্ধা’’? পৰিসুদ্ধেত্থাযস্মন্তো, তস্মা তুণ্হী, এৱমেতং ধাৰযামীতি.

সেখিযা নিট্ঠিতা.

সেখিযকণ্ডং নিট্ঠিতং.