৭. সেখিযকণ্ডং
১. পৰিমণ্ডলৱগ্গো
ইমে খো পনাযস্মন্তো সেখিযা
ধম্মা উদ্দেসং আগচ্ছন্তি.
৫৭৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পুৰতোপি পচ্ছতোপি ওলম্বেন্তা নিৱাসেন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা পুৰতোপি পচ্ছতোপি ওলম্বেন্তা নিৱাসেস্সন্তি, সেয্যথাপি গিহী কামভোগিনো’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ পুৰতোপি পচ্ছতোপি ওলম্বেন্তা নিৱাসেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপৰিযাযেন ৱিগৰহিত্ৱা ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ছব্বগ্গিযে ভিক্খূ পটিপুচ্ছি – ‘‘সচ্চং কিৰ তুম্হে, ভিক্খৱে, পুৰতোপি পচ্ছতোপি ওলম্বেন্তা নিৱাসেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, পুৰতোপি পচ্ছতোপি ওলম্বেন্তা নিৱাসেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –
‘‘পৰিমণ্ডলং নিৱাসেস্সামীতি সিক্খা কৰণীযা’’তি.
পৰিমণ্ডলং নিৱাসেতব্বং নাভিমণ্ডলং জাণুমণ্ডলং পটিচ্ছাদেন্তেন. যো অনাদৰিযং পটিচ্চ পুৰতো ৱা পচ্ছতো ৱা ওলম্বেন্তো নিৱাসেতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,
আদিকম্মিকস্সাতি.
পঠমসিক্খাপদং নিট্ঠিতং.
৫৭৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পুৰতোপি পচ্ছতোপি ওলম্বেন্তা পাৰুপন্তি…পে….
‘‘পৰিমণ্ডলং পাৰুপিস্সামীতি সিক্খা কৰণীযা’’তি.
পৰিমণ্ডলং পাৰুপিতব্বং উভো কণ্ণে সমং কত্ৱা. যো অনাদৰিযং পটিচ্চ পুৰতো ৱা পচ্ছতো ৱা ওলম্বেন্তো পাৰুপতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,
আদিকম্মিকস্সাতি.
দুতিযসিক্খাপদং নিট্ঠিতং.
৫৭৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ কাযং ৱিৱৰিত্ৱা অন্তৰঘৰে গচ্ছন্তি…পে….
‘‘সুপ্পটিচ্ছন্নো অন্তৰঘৰে গমিস্সামীতি সিক্খা কৰণীযা’’তি.
সুপ্পটিচ্ছন্নেন অন্তৰঘৰে গন্তব্বং. যো অনাদৰিযং পটিচ্চ কাযং ৱিৱৰিত্ৱা অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,
আদিকম্মিকস্সাতি.
ততিযসিক্খাপদং নিট্ঠিতং.
৫৭৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ কাযং ৱিৱৰিত্ৱা অন্তৰঘৰে নিসীদন্তি…পে….
‘‘সুপ্পটিচ্ছন্নো অন্তৰঘৰে নিসীদিস্সামীতি সিক্খা কৰণীযা’’তি.
সুপ্পটিচ্ছন্নেন অন্তৰঘৰে নিসীদিতব্বং. যো অনাদৰিযং পটিচ্চ কাযং ৱিৱৰিত্ৱা অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
চতুত্থসিক্খাপদং নিট্ঠিতং.
৫৮০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ হত্থম্পি পাদম্পি কীড়াপেন্তা অন্তৰঘৰে গচ্ছন্তি…পে….
‘‘সুসংৱুতো অন্তৰঘৰে গমিস্সামীতি সিক্খা কৰণীযা’’তি.
সুসংৱুতেন অন্তৰঘৰে গন্তব্বং. যো অনাদৰিযং পটিচ্চ হত্থং ৱা পাদং ৱা কীড়াপেন্তো অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, উম্মত্তকস্স, আদিকম্মিকস্সাতি.
পঞ্চমসিক্খাপদং নিট্ঠিতং.
৫৮১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ হত্থম্পি পাদম্পি কীড়াপেন্তা অন্তৰঘৰে নিসীদন্তি…পে….
‘‘সুসংৱুতো অন্তৰঘৰে নিসীদিস্সামীতি সিক্খা কৰণীযা’’তি.
সুসংৱুতেন অন্তৰঘৰে নিসীদিতব্বং. যো অনাদৰিযং পটিচ্চ হত্থং ৱা পাদং ৱা কীড়াপেন্তো অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, উম্মত্তকস্স, আদিকম্মিকস্সাতি.
ছট্ঠসিক্খাপদং নিট্ঠিতং.
৫৮২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ তহং তহং ওলোকেন্তা অন্তৰঘৰে গচ্ছন্তি…পে….
‘‘ওক্খিত্তচক্খু অন্তৰঘৰে গমিস্সামীতি সিক্খা কৰণীযা’’তি.
ওক্খিত্তচক্খুনা অন্তৰঘৰে গন্তব্বং যুগমত্তং পেক্খন্তেন. যো অনাদৰিযং পটিচ্চ তহং তহং ওলোকেন্তো অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,
আদিকম্মিকস্সাতি.
সত্তমসিক্খাপদং নিট্ঠিতং.
৫৮৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ তহং তহং ওলোকেন্তা অন্তৰঘৰে নিসীদন্তি…পে….
‘‘ওক্খিত্তচক্খু অন্তৰঘৰে নিসীদিস্সামীতি সিক্খা কৰণীযা’’তি.
ওক্খিত্তচক্খুনা অন্তৰঘৰে নিসীদিতব্বং যুগমত্তং পেক্খন্তেন. যো অনাদৰিযং পটিচ্চ তহং তহং ওলোকেন্তো অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,
আদিকম্মিকস্সাতি.
অট্ঠমসিক্খাপদং নিট্ঠিতং.
৫৮৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উক্খিত্তকায অন্তৰঘৰে গচ্ছন্তি…পে….
‘‘ন উক্খিত্তকায অন্তৰঘৰে গমিস্সামীতি সিক্খা কৰণীযা’’তি.
ন উক্খিত্তকায অন্তৰঘৰে গন্তব্বং. যো অনাদৰিযং পটিচ্চ একতো ৱা উভতো ৱা উক্খিপিত্ৱা অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স,
আদিকম্মিকস্সাতি.
নৱমসিক্খাপদং নিট্ঠিতং.
৫৮৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উক্খিত্তকায অন্তৰঘৰে নিসীদন্তি…পে….
‘‘ন উক্খিত্তকায অন্তৰঘৰে নিসীদিস্সামীতি সিক্খা কৰণীযা’’তি.
ন উক্খিত্তকায অন্তৰঘৰে নিসীদিতব্বং. যো অনাদৰিযং পটিচ্চ একতো ৱা উভতো ৱা উক্খিপিত্ৱা অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
দসমসিক্খাপদং নিট্ঠিতং.
পৰিমণ্ডলৱগ্গো পঠমো.
২. উজ্জগ্ঘিকৱগ্গো
৫৮৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ মহাহসিতং হসন্তা অন্তৰঘৰে গচ্ছন্তি…পে….
‘‘ন উজ্জগ্ঘিকায অন্তৰঘৰে গমিস্সামীতি সিক্খা কৰণীযা’’তি.
ন উজ্জগ্ঘিকায অন্তৰঘৰে গন্তব্বং. যো অনাদৰিযং পটিচ্চ মহাহসিতং হসন্তো অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, হসনীযস্মিং ৱত্থুস্মিং মিহিতমত্তং কৰোতি, আপদাসু, উম্মত্তকস্স, আদিকম্মিকস্সাতি.
পঠমসিক্খাপদং নিট্ঠিতং.
৫৮৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ মহাহসিতং হসন্তা অন্তৰঘৰে নিসীদন্তি…পে….
‘‘ন উজ্জগ্ঘিকায অন্তৰঘৰে নিসীদিস্সামীতি সিক্খা কৰণীযা’’তি.
ন উজ্জগ্ঘিকায অন্তৰঘৰে নিসীদিতব্বং. যো অনাদৰিযং পটিচ্চ মহাহসিতং হসন্তো অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, হসনীযস্মিং ৱত্থুস্মিং মিহিতমত্তং কৰোতি, আপদাসু, উম্মত্তকস্স, আদিকম্মিকস্সাতি.
দুতিযসিক্খাপদং নিট্ঠিতং.
৫৮৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উচ্চাসদ্দং মহাসদ্দং কৰোন্তা অন্তৰঘৰে গচ্ছন্তি…পে….
‘‘অপ্পসদ্দো অন্তৰঘৰে গমিস্সামীতি সিক্খা কৰণীযা’’তি.
অপ্পসদ্দেন অন্তৰঘৰে গন্তব্বং. যো অনাদৰিযং পটিচ্চ উচ্চাসদ্দং মহাসদ্দং কৰোন্তো অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, আপদাসু, উম্মত্তকস্স, আদিকম্মিকস্সাতি.
ততিযসিক্খাপদং নিট্ঠিতং.
৫৮৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উচ্চাসদ্দং মহাসদ্দং কৰোন্তা অন্তৰঘৰে নিসীদন্তি…পে….
‘‘অপ্পসদ্দো অন্তৰঘৰে নিসীদিস্সামীতি সিক্খা কৰণীযা’’তি.
অপ্পসদ্দেন অন্তৰঘৰে নিসীদিতব্বং. যো অনাদৰিযং পটিচ্চ উচ্চাসদ্দং মহাসদ্দং কৰোন্তো অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
চতুত্থসিক্খাপদং নিট্ঠিতং.
৫৯০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ কাযপ্পচালকং অন্তৰঘৰে গচ্ছন্তি কাযং ওলম্বেন্তা…পে….
‘‘ন কাযপ্পচালকং অন্তৰঘৰে গমিস্সামীতি সিক্খা কৰণীযা’’তি.
ন কাযপ্পচালকং অন্তৰঘৰে গন্তব্বং. কাযং পগ্গহেত্ৱা গন্তব্বং. যো অনাদৰিযং পটিচ্চ কাযপ্পচালকং অন্তৰঘৰে গচ্ছতি কাযং ওলম্বেন্তো, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
পঞ্চমসিক্খাপদং নিট্ঠিতং.
৫৯১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ কাযপ্পচালকং অন্তৰঘৰে নিসীদন্তি, কাযং ওলম্বেন্তা…পে….
‘‘ন কাযপ্পচালকং অন্তৰঘৰে নিসীদিস্সামীতি সিক্খা কৰণীযা’’তি.
ন কাযপ্পচালকং অন্তৰঘৰে নিসীদিতব্বং. কাযং পগ্গহেত্ৱা নিসীদিতব্বং. যো অনাদৰিযং পটিচ্চ কাযপ্পচালকং অন্তৰঘৰে নিসীদতি কাযং ওলম্বেন্তো, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
ছট্ঠসিক্খাপদং নিট্ঠিতং.
৫৯২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ বাহুপ্পচালকং অন্তৰঘৰে গচ্ছন্তি বাহুং ওলম্বেন্তা…পে….
‘‘ন বাহুপ্পচালকং অন্তৰঘৰে গমিস্সামীতি সিক্খা কৰণীযা’’তি.
ন বাহুপ্পচালকং অন্তৰঘৰে গন্তব্বং. বাহুং পগ্গহেত্ৱা গন্তব্বং. যো অনাদৰিযং পটিচ্চ বাহুপ্পচালকং অন্তৰঘৰে গচ্ছতি বাহুং ওলম্বেন্তো, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
সত্তমসিক্খাপদং নিট্ঠিতং.
৫৯৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ বাহুপ্পচালকং অন্তৰঘৰে নিসীদন্তি বাহুং ওলম্বেন্তা…পে….
‘‘ন বাহুপ্পচালকং অন্তৰঘৰে নিসীদিস্সামীতি সিক্খা কৰণীযা’’তি.
ন বাহুপ্পচালকং অন্তৰঘৰে নিসীদিতব্বং. বাহুং পগ্গহেত্ৱা নিসীদিতব্বং. যো অনাদৰিযং পটিচ্চ বাহুপ্পচালকং অন্তৰঘৰে নিসীদতি বাহুং ওলম্বেন্তো, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
অট্ঠমসিক্খাপদং নিট্ঠিতং.
৫৯৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডকস্স আৰামে. তেন খো পন সমযেন ছব্বগ্গিযা ভিক্খূ সীসপ্পচালকং অন্তৰঘৰে গচ্ছন্তি সীসং ওলম্বেন্তা…পে….
‘‘ন সীসপ্পচালকং অন্তৰঘৰে গমিস্সামীতি সিক্খা কৰণীযা’’তি.
ন সীসপ্পচালকং অন্তৰঘৰে গন্তব্বং. সীসং পগ্গহেত্ৱা গন্তব্বং. যো অনাদৰিযং পটিচ্চ সীসপ্পচালকং অন্তৰঘৰে গচ্ছতি সীসং ওলম্বেন্তো, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
নৱমসিক্খাপদং নিট্ঠিতং.
৫৯৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সীসপ্পচালকং অন্তৰঘৰে নিসীদন্তি সীসং ওলম্বেন্তা…পে….
‘‘ন সীসপ্পচালকং অন্তৰঘৰে নিসীদিস্সামীতি সিক্খা কৰণীযা’’তি.
ন সীসপ্পচালকং অন্তৰঘৰে নিসীদিতব্বং. সীসং পগ্গহেত্ৱা নিসীদিতব্বং. যো অনাদৰিযং পটিচ্চ সীসপ্পচালকং অন্তৰঘৰে নিসীদতি সীসং ওলম্বেন্তো, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
দসমসিক্খাপদং নিট্ঠিতং.
উজ্জগ্ঘিকৱগ্গো দুতিযো.
৩. খম্ভকতৱগ্গো
৫৯৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ খম্ভকতা অন্তৰঘৰে গচ্ছন্তি…পে….
‘‘ন খম্ভকতো অন্তৰঘৰে গমিস্সামীতি সিক্খা কৰণীযা’’তি.
ন খম্ভকতেন অন্তৰঘৰে গন্তব্বং. যো অনাদৰিযং পটিচ্চ একতো ৱা উভতো ৱা খম্ভং কত্ৱা অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
পঠমসিক্খাপদং নিট্ঠিতং.
৫৯৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ খম্ভকতা অন্তৰঘৰে নিসীদন্তি…পে….
‘‘ন খম্ভকতো অন্তৰঘৰে নিসীদিস্সামীতি সিক্খা কৰণীযা’’তি.
ন খম্ভকতেন অন্তৰঘৰে নিসীদিতব্বং. যো অনাদৰিযং পটিচ্চ একতো ৱা উভতো ৱা খম্ভং কত্ৱা অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
দুতিযসিক্খাপদং নিট্ঠিতং.
৫৯৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সসীসং পাৰুপিত্ৱা অন্তৰঘৰে গচ্ছন্তি…পে….
‘‘ন ওগুণ্ঠিতো অন্তৰঘৰে গমিস্সামীতি সিক্খা কৰণীযা’’তি.
ন ওগুণ্ঠিতেন অন্তৰঘৰে গন্তব্বং. যো অনাদৰিযং পটিচ্চ সসীসং পাৰুপিত্ৱা অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
ততিযসিক্খাপদং নিট্ঠিতং.
৫৯৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ সসীসং পাৰুপিত্ৱা অন্তৰঘৰে নিসীদন্তি…পে….
‘‘ন ওগুণ্ঠিতো অন্তৰঘৰে নিসীদিস্সামীতি সিক্খা কৰণীযা’’তি.
ন ওগুণ্ঠিতেন অন্তৰঘৰে নিসীদিতব্বং. যো অনাদৰিযং পটিচ্চ সসীসং পাৰুপিত্ৱা অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু, উম্মত্তকস্স, আদিকম্মিকস্সাতি.
চতুত্থসিক্খাপদং নিট্ঠিতং.
৬০০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ উক্কুটিকায অন্তৰঘৰে গচ্ছন্তি…পে….
‘‘ন উক্কুটিকায অন্তৰঘৰে গমিস্সামীতি সিক্খা কৰণীযা’’তি.
ন উক্কুটিকায অন্তৰঘৰে গন্তব্বং. যো অনাদৰিযং পটিচ্চ উক্কুটিকায অন্তৰঘৰে গচ্ছতি, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
পঞ্চমসিক্খাপদং নিট্ঠিতং.
৬০১. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পল্লত্থিকায [পল্লত্তিকায (ক.)] অন্তৰঘৰে নিসীদন্তি…পে….
‘‘ন পল্লত্থিকায অন্তৰঘৰে নিসীদিস্সামীতি সিক্খা কৰণীযা’’তি.
ন পল্লত্থিকায অন্তৰঘৰে নিসীদিতব্বং. যো অনাদৰিযং পটিচ্চ হত্থপল্লত্থিকায ৱা দুস্সপল্লত্থিকায ৱা অন্তৰঘৰে নিসীদতি, আপত্তি দুক্কটস্স.
অনাপত্তি অসঞ্চিচ্চ, অস্সতিযা, অজানন্তস্স, গিলানস্স, ৱাসূপগতস্স, আপদাসু,
উম্মত্তকস্স, আদিকম্মিকস্সাতি.
ছট্ঠসিক্খাপদং নিট্ঠিতং.
৬০২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ অসক্কচ্চং পিণ্ডপাতং পটিগ্গণ্হন্তি ছড্ডেতুকামা ৱিয…পে….
‘‘সক্কচ্চং পিণ্ডপাতং পটিগ্গহেস্সামীতি সিক্খা কৰণীযা’’তি.
সক্কচ্চং পিণ্ডপাতো পটিগ্গহেতব্বো. যো অনাদৰিযং পটিচ্চ অসক্কচ্চং পিণ্ডপাতং পটিগ্গণ্হাতি ছড্ডেতুকামো ৱিয, আপত্তি দুক্কটস্স.
অনাপত্তি অসঞ্চিচ্চ…পে… আদিকম্মিকস্সাতি.
সত্তমসিক্খাপদং নিট্ঠিতং.