১০. চীৱৰঅপনিধানসিক্খাপদং

৩৭৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন সত্তৰসৱগ্গিযা ভিক্খূ অসন্নিহিতপৰিক্খাৰা হোন্তি. ছব্বগ্গিযা ভিক্খূ সত্তৰসৱগ্গিযানং ভিক্খূনং পত্তম্পি চীৱৰম্পি অপনিধেন্তি. সত্তৰসৱগ্গিযা ভিক্খূ ছব্বগ্গিযে ভিক্খূ এতদৱোচুং – ‘‘দেথাৱুসো, অম্হাকং পত্তম্পি চীৱৰম্পী’’তি. ছব্বগ্গিযা ভিক্খূ হসন্তি, তে ৰোদন্তি. ভিক্খূ এৱমাহংসু – ‘‘কিস্স তুম্হে, আৱুসো, ৰোদথা’’তি? ‘‘ইমে, আৱুসো, ছব্বগ্গিযা ভিক্খূ অম্হাকং পত্তম্পি চীৱৰম্পি অপনিধেন্তী’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খূনং পত্তম্পি চীৱৰম্পি অপনিধেস্সন্তী’’তি…পে… সচ্চং কিৰ তুম্হে, ভিক্খৱে, ভিক্খূনং পত্তম্পি চীৱৰম্পি অপনিধেথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খূনং পত্তম্পি চীৱৰম্পি অপনিধেস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩৭৮. ‘‘যো পন ভিক্খু ভিক্খুস্স পত্তং ৱা চীৱৰং ৱা নিসীদনং ৱা সূচিঘৰং ৱা কাযবন্ধনং ৱা অপনিধেয্য ৱা অপনিধাপেয্য ৱা, অন্তমসো হসাপেক্খোপি, পাচিত্তিয’’ন্তি.

৩৭৯. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

পত্তো নাম দ্ৱে পত্তা – অযোপত্তো, মত্তিকাপত্তো.

চীৱৰং নাম ছন্নং চীৱৰানং অঞ্ঞতৰং চীৱৰং, ৱিকপ্পনুপগং পচ্ছিমং.

নিসীদনং নাম সদসং ৱুচ্চতি.

সূচিঘৰং নাম সসূচিকং ৱা অসূচিকং ৱা.

কাযবন্ধনং নাম দ্ৱে কাযবন্ধনানি – পট্টিকা, সূকৰন্তকং.

অপনিধেয্য ৱাতি সযং অপনিধেতি, আপত্তি পাচিত্তিযস্স.

অপনিধাপেয্য ৱাতি অঞ্ঞং আণাপেসি, আপত্তি পাচিত্তিযস্স. অপনিধাপেয্য ৱা তি অয্যং আণাপেতি, আপত্তি পাচিত্তিযস্স. সকিং আণত্তো বহুকম্পি অপনিধেতি, আপত্তি পাচিত্তিযস্স.

অন্তমসো হসাপেক্খোপীতি কীড়াধিপ্পাযো.

৩৮০. উপসম্পন্নে উপসম্পন্নসঞ্ঞী পত্তং ৱা চীৱৰং ৱা নিসীদনং ৱা সূচিঘৰং ৱা কাযবন্ধনং ৱা অপনিধেতি ৱা অপনিধাপেতি ৱা, অন্তমসো হসাপেক্খোপি, আপত্তি পাচিত্তিযস্স. উপসম্পন্নে ৱেমতিকো…পে… উপসম্পন্নে অনুপসম্পন্নসঞ্ঞী পত্তং ৱা চীৱৰং ৱা নিসীদনং ৱা সূচিঘৰং ৱা কাযবন্ধনং ৱা অপনিধেতি ৱা অপনিধাপেতি ৱা, অন্তমসো হসাপেক্খোপি, আপত্তি পাচিত্তিযস্স.

অঞ্ঞং পৰিক্খাৰং অপনিধেতি ৱা অপনিধাপেতি ৱা, অন্তমসো হসাপেক্খোপি, আপত্তি দুক্কটস্স. অনুপসম্পন্নস্স পত্তং ৱা চীৱৰং ৱা অঞ্ঞং ৱা পৰিক্খাৰং অপনিধেতি ৱা অপনিধাপেতি ৱা, অন্তমসো হসাপেক্খোপি, আপত্তি দুক্কটস্স. অনুপসম্পন্নে উপসম্পন্নসঞ্ঞী, আপত্তি দুক্কটস্স. অনুপসম্পন্নে ৱেমতিকো, আপত্তি দুক্কটস্স. অনুপসম্পন্নে অনুপসম্পন্নসঞ্ঞী, আপত্তি দুক্কটস্স.

৩৮১. অনাপত্তি নহসাধিপ্পাযো, দুন্নিক্খিত্তং পটিসামেতি, ‘‘ধম্মিং কথং কত্ৱা দস্সামী’’তি পটিসামেতি, উম্মত্তকস্স, আদিকম্মিকস্সাতি.

চীৱৰঅপনিধানসিক্খাপদং নিট্ঠিতং দসমং.

সুৰাপানৱগ্গো ছট্ঠো.

তস্সুদ্দানং –

সুৰা অঙ্গুলি হাসো চ [তোযঞ্চ (ইতিপি)], অনাদৰিযঞ্চ ভিংসনং;

জোতিনহানদুব্বণ্ণং, সামং অপনিধেন চাতি.