১০. উয্যোধিকসিক্খাপদং

৩২২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ দিৰত্ততিৰত্তং সেনায ৱসমানা উয্যোধিকম্পি বলগ্গম্পি সেনাব্যূহম্পি অনীকদস্সনম্পি গচ্ছন্তি. অঞ্ঞতৰোপি ছব্বগ্গিযো ভিক্খু উয্যোধিকং গন্ত্ৱা কণ্ডেন পটিৱিদ্ধো হোতি. মনুস্সা তং ভিক্খুং উপ্পণ্ডেসুং – ‘‘কচ্চি, ভন্তে, সুযুদ্ধং অহোসি, কতি তে লক্খানি লদ্ধানী’’তি? সো ভিক্খু তেহি মনুস্সেহি উপ্পণ্ডীযমানো মঙ্কু অহোসি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা উয্যোধিকং দস্সনায আগচ্ছিস্সন্তি! অম্হাকম্পি অলাভা, অম্হাকম্পি দুল্লদ্ধং, যে মযং আজীৱস্স হেতু পুত্তদাৰস্স কাৰণা উয্যোধিকং আগচ্ছামা’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ উয্যোধিকং দস্সনায গচ্ছিস্সন্তী’’তি…পে… সচ্চং কিৰ তুম্হে, ভিক্খৱে, উয্যোধিকং দস্সনায গচ্ছথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, উয্যোধিকং দস্সনায গচ্ছিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

৩২৩. ‘‘দিৰত্ততিৰত্তং চে ভিক্খু সেনায ৱসমানো উয্যোধিকং ৱা বলগ্গং ৱা সেনাব্যূহং ৱা অনীকদস্সনং ৱা গচ্ছেয্য, পাচিত্তিয’’ন্তি.

৩২৪. দিৰত্ততিৰত্তং চে ভিক্খু সেনায ৱসমানোতি দ্ৱেতিস্সো ৰত্তিযো ৱসমানো.

উয্যোধিকং নাম যত্থ সম্পহাৰো দিস্সতি.

বলগ্গং নাম এত্তকা হত্থী, এত্তকা অস্সা, এত্তকা ৰথা, এত্তকা পত্তী.

সেনাব্যূহং নাম ইতো হত্থী হোন্তু, ইতো অস্সা হোন্তু, ইতো ৰথা হোন্তু, ইতো পত্তিকা হোন্তু.

অনীকং নাম হত্থানীকং, অস্সানীকং, ৰথানীকং, পত্তানীকং. তযো হত্থী পচ্ছিমং হত্থানীকং, তযো অস্সা পচ্ছিমং অস্সানীকং, তযো ৰথা পচ্ছিমং ৰথানীকং, চত্তাৰো পুৰিসা সৰহত্থা পত্তী পচ্ছিমং পত্তানীকং. দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি পাচিত্তিযস্স. দস্সনূপচাৰং ৱিজহিত্ৱা পুনপ্পুনং পস্সতি, আপত্তি পাচিত্তিযস্স.

একমেকং দস্সনায গচ্ছতি, আপত্তি দুক্কটস্স. যত্থ ঠিতো পস্সতি, আপত্তি দুক্কটস্স. দস্সনূপচাৰং ৱিজহিত্ৱা পুনপ্পুনং পস্সতি, আপত্তি দুক্কটস্স.

৩২৫. অনাপত্তি আৰামে ঠিতো পস্সতি, ভিক্খুস্স ঠিতোকাসং ৱা নিসিন্নোকাসং ৱা নিপন্নোকাসং ৱা আগন্ত্ৱা সম্পহাৰো দিস্সতি, পটিপথং গচ্ছন্তো পস্সতি, সতি কৰণীযে গন্ত্ৱা পস্সতি, আপদাসু, উম্মত্তকস্স, আদিকম্মিকস্সাতি.

উয্যোধিকসিক্খাপদং নিট্ঠিতং দসমং.

অচেলকৱগ্গো পঞ্চমো.

তস্সুদ্দানং –

পূৱং কথোপনন্দস্স, তযংপট্ঠাকমেৱ চ;

মহানামো পসেনদি, সেনাৱিদ্ধো ইমে দসাতি [অচেলকং উয্যোজঞ্চ, সভোজনং দুৱে ৰহো; সভত্তকঞ্চ ভেসজ্জং, উয্যুত্তং সেনুয্যোধিকং].