৯. পণীতভোজনসিক্খাপদং

২৫৭. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ পণীতভোজনানি অত্তনো অত্থায ৱিঞ্ঞাপেত্ৱা ভুঞ্জন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা পণীতভোজনানি অত্তনো অত্থায ৱিঞ্ঞাপেত্ৱা ভুঞ্জিস্সন্তি! কস্স সম্পন্নং ন মনাপং, কস্স সাদুং ন ৰুচ্চতী’’তি!! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ পণীতভোজনানি অত্তনো অত্থায ৱিঞ্ঞাপেত্ৱা ভুঞ্জিস্সন্তী’’তি …পে… সচ্চং কিৰ তুম্হে, ভিক্খৱে, পণীতভোজনানি অত্তনো অত্থায ৱিঞ্ঞাপেত্ৱা ভুঞ্জথাতি? ‘‘সচ্চং, ভগৱা’’তি. ৱিগৰহি বুদ্ধো ভগৱা …পে… কথঞ্হি নাম তুম্হে, মোঘপুৰিসা, পণীতভোজনানি অত্তনো অত্থায ৱিঞ্ঞাপেত্ৱা ভুঞ্জিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যানি খো পন তানি পণীতভোজনানি, সেয্যথিদং – সপ্পি নৱনীতং তেলং মধু ফাণিতং মচ্ছো মংসং খীৰং দধি. যো পন ভিক্খু এৱৰূপানি পণীতভোজনানি অত্তনো অত্থায ৱিঞ্ঞাপেত্ৱা ভুঞ্জেয্য, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

২৫৮. তেন খো পন সমযেন ভিক্খূ গিলানা হোন্তি. গিলানপুচ্ছকা ভিক্খূ গিলানে ভিক্খূ এতদৱোচুং – ‘‘কচ্চাৱুসো খমনীযং, কচ্চি যাপনীয’’ন্তি? ‘‘পুব্বে মযং, আৱুসো, পণীতভোজনানি অত্তনো অত্থায ৱিঞ্ঞাপেত্ৱা ভুঞ্জাম, তেন নো ফাসু হোতি; ইদানি পন ‘‘ভগৱতা পটিক্খিত্ত’’ন্তি কুক্কুচ্চাযন্তা ন ৱিঞ্ঞাপেম, তেন নো ন ফাসু হোতী’’তি. ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, গিলানেন ভিক্খুনা পণীতভোজনানি অত্তনো অত্থায ৱিঞ্ঞাপেত্ৱা ভুঞ্জিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

২৫৯. ‘‘যানি খো পন তানি পণীতভোজনানি, সেয্যথিদং – সপ্পি নৱনীতং তেলং মধু ফাণিতং মচ্ছো মংসং খীৰং দধি. যো পন ভিক্খু এৱৰূপানি পণীতভোজনানি অগিলানো অত্তনো অত্থায ৱিঞ্ঞাপেত্ৱা ভুঞ্জেয্য, পাচিত্তিয’’ন্তি.

২৬০. যানি খো পন তানি পণীতভোজনানীতি সপ্পি নাম গোসপ্পি ৱা অজিকাসপ্পি ৱা মহিংসসপ্পি ৱা, যেসং মংসং কপ্পতি তেসং সপ্পি.

নৱনীতং নাম তেসঞ্ঞেৱ নৱনীতং.

তেলং নাম তিলতেলং সাসপতেলং মধুকতেলং এৰণ্ডতেলং ৱসাতেলং.

মধু নাম মক্খিকামধু.

ফাণিতং নাম উচ্ছুম্হা নিব্বত্তং.

মচ্ছো নাম উদকো [উদকচৰো (স্যা. ক.)] ৱুচ্চতি.

মংসং নাম যেসং মংসং কপ্পতি, তেসং মংসং.

খীৰং নাম গোখীৰং ৱা অজিকাখীৰং ৱা মহিংসখীৰং ৱা, যেসং মংসং কপ্পতি, তেসং খীৰং.

দধি নাম তেসঞ্ঞেৱ দধি.

যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

এৱৰূপানি পণীতভোজনানীতি তথাৰূপানি পণীতভোজনানি.

অগিলানো নাম যস্স ৱিনা পণীতভোজনানি ফাসু হোতি.

গিলানো নাম যস্স ৱিনা পণীতভোজনানি ন ফাসু হোতি.

অগিলানো অত্তনো অত্থায ৱিঞ্ঞাপেতি, পযোগে [পযোগে পযোগে (ক.)] দুক্কটং. পটিলাভেন ‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি পাচিত্তিযস্স.

২৬১. অগিলানো অগিলানসঞ্ঞী পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাচিত্তিযস্স. অগিলানো ৱেমতিকো পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাচিত্তিযস্স. অগিলানো গিলানসঞ্ঞী পণীতভোজনানি অত্তনো অত্থায ৱিঞ্ঞাপেত্ৱা ভুঞ্জতি, আপত্তি পাচিত্তিযস্স.

গিলানো অগিলানসঞ্ঞী, আপত্তি দুক্কটস্স. গিলানো ৱেমতিকো, আপত্তি দুক্কটস্স. গিলানো গিলানসঞ্ঞী অনাপত্তি.

২৬২. অনাপত্তি গিলানস্স, গিলানো হুত্ৱা ৱিঞ্ঞাপেত্ৱা অগিলানো ভুঞ্জতি, গিলানস্স সেসকং ভুঞ্জতি, ঞাতকানং পৱাৰিতানং অঞ্ঞস্সত্থায অত্তনো ধনেন, উম্মত্তকস্স, আদিকম্মিকস্সাতি.

পণীতভোজনসিক্খাপদং নিট্ঠিতং নৱমং.