১০. দন্তপোনসিক্খাপদং

২৬৩. তেন সমযেন বুদ্ধো ভগৱা ৱেসালিযং ৱিহৰতি মহাৱনে কূটাগাৰসালাযং. তেন খো পন সমযেন অঞ্ঞতৰো ভিক্খু সব্বপংসুকূলিকো সুসানে ৱিহৰতি. সো মনুস্সেহি দিয্যমানং ন ইচ্ছতি পটিগ্গহেতুং, সুসানেপি ৰুক্খমূলেপি উম্মাৰেপি অয্যৱোসাটিতকানি সামং গহেত্ৱা পৰিভুঞ্জতি [ভুঞ্জতি (স্যা.)]. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অযং ভিক্খু অম্হাকং অয্যৱোসাটিতকানি সামং গহেত্ৱা পৰিভুঞ্জিস্সতি! থেৰোযং ভিক্খু ৱঠৰো মনুস্সমংসং মঞ্ঞে খাদতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খু অদিন্নং মুখদ্ৱাৰং আহাৰং আহৰিস্সতী’’তি…পে… সচ্চং কিৰ ত্ৱং, ভিক্খু, অদিন্নং মুখদ্ৱাৰং আহাৰং আহৰসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, অদিন্নং মুখদ্ৱাৰং আহাৰং আহৰিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু অদিন্নং মুখদ্ৱাৰং আহাৰং আহৰেয্য, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

২৬৪. তেন খো পন সমযেন ভিক্খূ উদকদন্তপোনে [উদকদন্তপোণে (স্যা. ক.)] কুক্কুচ্চাযন্তি. ভগৱতো এতমত্থং আৰোচেসুং…পে… ‘‘অনুজানামি, ভিক্খৱে, উদকদন্তপোনং সামং গহেত্ৱা পৰিভুঞ্জিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

২৬৫. ‘‘যো পন ভিক্খু অদিন্নং মুখদ্ৱাৰং আহাৰং আহৰেয্য, অঞ্ঞত্ৰ উদকদন্তপোনা, পাচিত্তিয’’ন্তি.

২৬৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অদিন্নং নাম অপ্পটিগ্গহিতকং ৱুচ্চতি.

দিন্নং নাম কাযেন ৱা কাযপটিবদ্ধেন ৱা নিস্সগ্গিযেন ৱা দেন্তে হত্থপাসে ঠিতো কাযেন ৱা কাযপটিবদ্ধেন ৱা পটিগ্গণ্হাতি, এতং দিন্নং নাম.

আহাৰো নাম উদকদন্তপোনং ঠপেত্ৱা যংকিঞ্চি অজ্ঝোহৰণীযং, এসো আহাৰো নাম.

অঞ্ঞত্ৰ উদকদন্তপোনাতি ঠপেত্ৱা উদকদন্তপোনং.

‘‘খাদিস্সামি ভুঞ্জিস্সামী’’তি গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি পাচিত্তিযস্স.

২৬৭. অপ্পটিগ্গহিতকে অপ্পটিগ্গহিতকসঞ্ঞী অদিন্নং মুখদ্ৱাৰং আহাৰং আহাৰেতি, অঞ্ঞত্ৰ উদকদন্তপোনা, আপত্তি পাচিত্তিযস্স. অপ্পটিগ্গহিতকে ৱেমতিকো অদিন্নং মুখদ্ৱাৰং আহাৰং আহাৰেতি, অঞ্ঞত্ৰ উদকদন্তপোনা, আপত্তি পাচিত্তিযস্স. অপ্পটিগ্গহিতকে পটিগ্গহিতকসঞ্ঞী অদিন্নং মুখদ্ৱাৰং আহাৰং আহাৰেতি, অঞ্ঞত্ৰ উদকদন্তপোনা, আপত্তি পাচিত্তিযস্স.

পটিগ্গহিতকে অপ্পটিগ্গহিতকসঞ্ঞী, আপত্তি দুক্কটস্স. পটিগ্গহিতকে ৱেমতিকো, আপত্তি দুক্কটস্স. পটিগ্গহিতকে পটিগ্গহিতকসঞ্ঞী, অনাপত্তি.

২৬৮. অনাপত্তি উদকদন্তপোনে, চত্তাৰি মহাৱিকতানি সতি পচ্চযে অসতি কপ্পিযকাৰকে সামং গহেত্ৱা পৰিভুঞ্জতি, উম্মত্তকস্স, আদিকম্মিকস্সাতি.

দন্তপোনসিক্খাপদং নিট্ঠিতং দসমং.

ভোজনৱগ্গো চতুত্থো.

তস্সুদ্দানং –

পিণ্ডো গণং পৰং পূৱং, দ্ৱে চ ৱুত্তা পৱাৰণা;

ৱিকালে সন্নিধী খীৰং, দন্তপোনেন তে দসাতি.