৮. সন্নিধিকাৰকসিক্খাপদং

২৫২. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মতো আনন্দস্স উপজ্ঝাযো আযস্মা বেলট্ঠসীসো [বেলট্ঠিসীসো (সী.) ৱেড়ট্ঠসীসো (স্যা.)] অৰঞ্ঞে ৱিহৰতি. সো পিণ্ডায চৰিত্ৱা সুক্খকুৰং আৰামং হৰিত্ৱা সুক্খাপেত্ৱা নিক্খিপতি. যদা আহাৰেন অত্থো হোতি, তদা উদকেন তেমেত্ৱা তেমেত্ৱা ভুঞ্জতি, চিৰেন গামং পিণ্ডায পৱিসতি. ভিক্খূ আযস্মন্তং বেলট্ঠসীসং এতদৱোচুং – ‘‘কিস্স ত্ৱং, আৱুসো, চিৰেন গামং পিণ্ডায পৱিসসী’’তি? অথ খো আযস্মা বেলট্ঠসীসো ভিক্খূনং এতমত্থং আৰোচেসি. ‘‘কিং পন ত্ৱং, আৱুসো, সন্নিধিকাৰকং ভোজনং ভুঞ্জসী’’তি? ‘‘এৱমাৱুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা বেলট্ঠসীসো সন্নিধিকাৰকং ভোজনং ভুঞ্জিস্সতী’’তি…পে… সচ্চং কিৰ ত্ৱং, বেলট্ঠসীস, সন্নিধিকাৰকং ভোজনং ভুঞ্জসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, বেলট্ঠসীস, সন্নিধিকাৰকং ভোজনং ভুঞ্জিস্সসি! নেতং, বেলট্ঠসীস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

২৫৩. ‘‘যো পন ভিক্খু সন্নিধিকাৰকং খাদনীযং ৱা ভোজনীযং ৱা খাদেয্য ৱা ভুঞ্জেয্য ৱা, পাচিত্তিয’’ন্তি.

২৫৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সন্নিধিকাৰকং নাম অজ্জ পটিগ্গহিতং অপৰজ্জু খাদিতং হোতি.

খাদনীযং নাম পঞ্চ ভোজনানি – যামকালিকং সত্তাহকালিকং যাৱজীৱিকং ঠপেত্ৱা অৱসেসং খাদনীযং নাম.

ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং.

‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি পাচিত্তিযস্স.

২৫৫. সন্নিধিকাৰকে সন্নিধিকাৰকসঞ্ঞী খাদনীযং ৱা ভোজনীযং ৱা খাদতি ৱা ভুঞ্জতি ৱা, আপত্তি পাচিত্তিযস্স. সন্নিধিকাৰকে ৱেমতিকো খাদনীযং ৱা ভোজনীযং ৱা খাদতি ৱা ভুঞ্জতি ৱা, আপত্তি পাচিত্তিযস্স. সন্নিধিকাৰকে অসন্নিধিকাৰকসঞ্ঞী খাদনীযং ৱা ভোজনীযং ৱা খাদতি ৱা ভুঞ্জতি ৱা, আপত্তি পাচিত্তিযস্স.

যামকালিকং সত্তাহকালিকং যাৱজীৱিকং আহাৰত্থায পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে আপত্তি দুক্কটস্স. অসন্নিধিকাৰকে সন্নিধিকাৰকসঞ্ঞী, আপত্তি দুক্কটস্স. অসন্নিধিকাৰকে ৱেমতিকো, আপত্তি দুক্কটস্স. অসন্নিধিকাৰকে অসন্নিধিকাৰকসঞ্ঞী, অনাপত্তি.

২৫৬. অনাপত্তি যাৱকালিকং যাৱকালে নিদহিত্ৱা ভুঞ্জতি, যামকালিকং যামে নিদহিত্ৱা ভুঞ্জতি, সত্তাহকালিকং সত্তাহং নিদহিত্ৱা ভুঞ্জতি, যাৱজীৱিকং সতি পচ্চযে পৰিভুঞ্জতি, উম্মত্তকস্স, আদিকম্মিকস্সাতি.

সন্নিধিকাৰকসিক্খাপদং নিট্ঠিতং অট্ঠমং.