৯. পৰিপাচিতসিক্খাপদং

১৯২. তেন সমযেন বুদ্ধো ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন থুল্লনন্দা ভিক্খুনী অঞ্ঞতৰস্স কুলস্স কুলূপিকা হোতি নিচ্চভত্তিকা. তেন চ গহপতিনা থেৰা ভিক্খূ নিমন্তিতা হোন্তি. অথ খো থুল্লনন্দা ভিক্খুনী পুব্বণ্হসমযং নিৱাসেত্ৱা পত্তচীৱৰমাদায যেন তং কুলং তেনুপসঙ্কমি; উপসঙ্কমিত্ৱা তং গহপতিং এতদৱোচ – ‘‘কিমিদং, গহপতি, পহূতং খাদনীযং ভোজনীযং পটিযত্ত’’ন্তি? ‘‘থেৰা মযা, অয্যে, নিমন্তিতা’’তি. ‘‘কে পন তে, গহপতি, থেৰা’’তি? ‘‘অয্যো সাৰিপুত্তো অয্যো মহামোগ্গল্লানো অয্যো মহাকচ্চানো অয্যো মহাকোট্ঠিকো অয্যো মহাকপ্পিনো অয্যো মহাচুন্দো অয্যো অনুৰুদ্ধো অয্যো ৰেৱতো অয্যো উপালি অয্যো আনন্দো অয্যো ৰাহুলো’’তি. ‘‘কিং পন ত্ৱং, গহপতি, মহানাগে তিট্ঠমানে চেটকে নিমন্তেসী’’তি?

‘‘কে পন তে, অয্যে, মহানাগা’’তি? ‘‘অয্যো দেৱদত্তো অয্যো কোকালিকো অয্যো কটমোদকতিস্সকো [কটমোৰকতিস্সকো (সী.) কতমোৰকতিস্সকো (স্যা.)] অয্যো খণ্ডদেৱিযা পুত্তো অয্যো সমুদ্দদত্তো’’তি. অযং চৰহি থুল্লনন্দায ভিক্খুনিযা অন্তৰা কথা ৱিপ্পকতা, অথ তে থেৰা ভিক্খূ পৱিসিংসু. ‘‘সচ্চং মহানাগা খো তযা, গহপতি, নিমন্তিতা’’তি. ‘‘ইদানেৱ খো ত্ৱং, অয্যে, চেটকে অকাসি; ইদানি মহানাগে’’তি. ঘৰতো চ নিক্কড্ঢি, নিচ্চভত্তঞ্চ পচ্ছিন্দি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম দেৱদত্তো জানং ভিক্খুনিপৰিপাচিতং পিণ্ডপাতং ভুঞ্জিস্সতী’’তি…পে… ‘‘সচ্চং কিৰ ত্ৱং, দেৱদত্ত, জানং ভিক্খুনিপৰিপাচিতং পিণ্ডপাতং ভুঞ্জসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, জানং ভিক্খুনিপৰিপাচিতং পিণ্ডপাতং ভুঞ্জিস্সসি. নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু জানং ভিক্খুনিপৰিপাচিতং পিণ্ডপাতং ভুঞ্জেয্য, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

১৯৩. তেন খো পন সমযেন অঞ্ঞতৰো ভিক্খু ৰাজগহা পব্বজিতো ঞাতিকুলং অগমাসি. মনুস্সা – ‘‘চিৰস্সম্পি ভদন্তো আগতো’’তি সক্কচ্চং ভত্তং অকংসু. তস্স কুলস্স কুলূপিকা ভিক্খুনী তে মনুস্সে এতদৱোচ – ‘‘দেথয্যস্স, আৱুসো, ভত্ত’’ন্তি. অথ খো সো ভিক্খু – ‘‘ভগৱতা পটিক্খিত্তং জানং ভিক্খুনিপৰিপাচিতং পিণ্ডপাতং ভুঞ্জিতু’’ন্তি কুক্কুচ্চাযন্তো ন পটিগ্গহেসি. নাসক্খি পিণ্ডায চৰিতুং, ছিন্নভত্তো অহোসি. অথ খো সো ভিক্খু আৰামং গন্ত্ৱা ভিক্খূনং এতমত্থং আৰোচেসি. ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পুব্বে গিহিসমাৰম্ভে জানং ভিক্খুনিপৰিপাচিতং পিণ্ডপাতং ভুঞ্জিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৯৪. ‘‘যো পন ভিক্খু জানং ভিক্খুনিপৰিপাচিতং পিণ্ডপাতং ভুঞ্জেয্য, অঞ্ঞত্ৰ পুব্বে গিহিসমাৰম্ভা, পাচিত্তিয’’ন্তি.

১৯৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

জানাতি নাম সামং ৱা জানাতি অঞ্ঞে ৱা তস্স আৰোচেন্তি সা ৱা আৰোচেতি.

ভিক্খুনী নাম উভতোসঙ্ঘে উপসম্পন্না.

পৰিপাচেতি নাম পুব্বে অদাতুকামানং অকত্তুকামানং – ‘‘অয্যো ভাণকো, অয্যো বহুস্সুতো, অয্যো সুত্তন্তিকো, অয্যো ৱিনযধৰো, অয্যো ধম্মকথিকো, দেথ অয্যস্স, কৰোথ অয্যস্সা’’তি এসা পৰিপাচেতি নাম.

পিণ্ডপাতো নাম পঞ্চন্নং ভোজনানং অঞ্ঞতৰং ভোজনং.

অঞ্ঞত্ৰ পুব্বে গিহিসমাৰম্ভাতি ঠপেত্ৱা গিহিসমাৰম্ভং.

গিহিসমাৰম্ভো নাম ঞাতকা ৱা হোন্তি পৱাৰিতা ৱা পকতিপটিযত্তং ৱা.

অঞ্ঞত্ৰ পুব্বে গিহিসমাৰম্ভা ভুঞ্জিস্সামীতি পটিগ্গণ্হাতি, আপত্তি দুক্কটস্স. অজ্ঝোহাৰে অজ্ঝোহাৰে, আপত্তি পাচিত্তিযস্স.

১৯৬. পৰিপাচিতে পৰিপাচিতসঞ্ঞী ভুঞ্জতি, অঞ্ঞত্ৰ পুব্বে গিহিসমাৰম্ভা, আপত্তি পাচিত্তিযস্স. পৰিপাচিতে ৱেমতিকো ভুঞ্জতি, অঞ্ঞত্ৰ পুব্বে গিহিসমাৰম্ভা, আপত্তি দুক্কটস্স. পৰিপাচিতে অপৰিপাচিতসঞ্ঞী ভুঞ্জতি, অঞ্ঞত্ৰ পুব্বে গিহিসমাৰম্ভা, অনাপত্তি. একতোউপসম্পন্নায পৰিপাচিতং ভুঞ্জতি, অঞ্ঞত্ৰ পুব্বে গিহিসমাৰম্ভা, আপত্তি দুক্কটস্স. অপৰিপাচিতে পৰিপাচিতসঞ্ঞী, আপত্তি দুক্কটস্স. অপৰিপাচিত্তে ৱেমতিকো, আপত্তি দুক্কটস্স. অপৰিপাচিতে অপৰিপাচিতসঞ্ঞী, অনাপত্তি.

১৯৭. অনাপত্তি পুব্বে গিহিসমাৰম্ভে, সিক্খমানা পৰিপাচেতি, সামণেৰী পৰিপাচেতি, পঞ্চ ভোজনানি ঠপেত্ৱা সব্বত্থ অনাপত্তি, উম্মত্তকস্স, আদিকম্মিকস্সাতি.

পৰিপাচিতসিক্খাপদং নিট্ঠিতং নৱমং.