১০. ৰহোনিসজ্জসিক্খাপদং

১৯৮. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মতো উদাযিস্স পুৰাণদুতিযিকা ভিক্খুনীসু পব্বজিতা হোতি. সা আযস্মতো উদাযিস্স সন্তিকে অভিক্খণং আগচ্ছতি, আযস্মাপি উদাযী তস্সা ভিক্খুনিযা সন্তিকে অভিক্খণং গচ্ছতি. তেন খো পন সমযেন আযস্মা উদাযী তস্সা ভিক্খুনিযা সদ্ধিং একো একায ৰহো নিসজ্জং কপ্পেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী ভিক্খুনিযা সদ্ধিং একো একায ৰহো নিসজ্জং কপ্পেস্সতী’’তি…পে… সচ্চং কিৰ ত্ৱং, উদাযি, ভিক্খুনিযা সদ্ধিং একো একায ৰহো নিসজ্জং কপ্পেসীতি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, মোঘপুৰিস, ভিক্খুনিযা সদ্ধিং একো একায ৰহো নিসজ্জং কপ্পেস্সসি! নেতং, মোঘপুৰিস অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৯৯. ‘‘যো পন ভিক্খু ভিক্খুনিযা সদ্ধিং একো একায ৰহো নিসজ্জং কপ্পেয্য, পাচিত্তিয’’ন্তি.

২০০. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনী নাম উভতোসঙ্ঘে উপসম্পন্না.

সদ্ধিন্তি একতো.

একো একাযাতি ভিক্খু চেৱ হোতি ভিক্খুনী চ.

[পাচি. ২৮৬, ২৯১; পাৰা. ৪৪৫,৪৫৪] ৰহো নাম চক্খুস্স ৰহো সোতস্স ৰহো. চক্খুস্স ৰহো নাম ন সক্কা হোতি অক্খিং ৱা নিখণীযমানে ভমুকং ৱা উক্খিপীযমানে সীসং ৱা উক্খিপীযমানে পস্সিতুং. সোতস্স ৰহো নাম ন সক্কা হোতি পকতিকথা সোতুং.

নিসজ্জং কপ্পেয্যাতি ভিক্খুনিযা নিসিন্নায ভিক্খু উপনিসিন্নো ৱা হোতি উপনিপন্নো ৱা, আপত্তি পাচিত্তিযস্স.

ভিক্খু নিসিন্নে ভিক্খুনী উপনিসিন্না ৱা হোতি উপনিপন্না ৱা, আপত্তি পাচিত্তিযস্স. উভো ৱা নিসিন্না হোন্তি উভো ৱা নিপন্না, আপত্তি পাচিত্তিযস্স.

২০১. ৰহো ৰহোসঞ্ঞী একো একায নিসজ্জং কপ্পেতি, আপত্তি পাচিত্তিযস্স. ৰহো ৱেমতিকো একো একায নিসজ্জং কপ্পেতি, আপত্তি পাচিত্তিযস্স. ৰহো অৰহোসঞ্ঞী একো একায নিসজ্জং কপ্পেতি, আপত্তি পাচিত্তিযস্স.

অৰহো ৰহোসঞ্ঞী, আপত্তি দুক্কটস্স. অৰহো ৱেমতিকো, আপত্তি দুক্কটস্স. অৰহো অৰহোসঞ্ঞী, অনাপত্তি.

২০২. অনাপত্তি যো কোচি ৱিঞ্ঞূ দুতিযো হোতি, তিট্ঠতি ন নিসীদতি, অৰহোপেক্খো, অঞ্ঞৱিহিতো নিসীদতি, উম্মত্তকস্স, আদিকম্মিকস্সাতি.

ৰহোনিসজ্জসিক্খাপদং নিট্ঠিতং দসমং.

ওৱাদৱগ্গো ততিযো.

তস্সুদ্দানং –

অসম্মতঅত্থঙ্গতূ, পস্সযামিসদানেন;

সিব্বতি অদ্ধানং নাৱং ভুঞ্জেয্য, একো একায তে দসাতি.