৮. নাৱাভিৰুহনসিক্খাপদং

১৮৬. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ভিক্খুনীহি সদ্ধিং সংৱিধায একং নাৱং [একনাৱং (স্যা.)] অভিৰুহন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘যথেৱ মযং সপজাপতিকা নাৱায [একনাৱায (স্যা.)] কীড়াম, এৱমেৱিমে সমণা সক্যপুত্তিযা ভিক্খুনীহি সদ্ধিং সংৱিধায নাৱায কীড়ন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনীহি সদ্ধিং সংৱিধায একং নাৱং অভিৰুহিস্সন্তী’’তি…পে… ‘‘সচ্চং কিৰ তুম্হে, ভিক্খৱে, ভিক্খুনীহি সদ্ধিং সংৱিধায একং নাৱং অভিৰুহথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খুনীহি সদ্ধিং সংৱিধায একং নাৱং অভিৰুহিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু ভিক্খুনিযা সদ্ধিং সংৱিধায একং নাৱং [একনাৱং (স্যা.)] অভিৰুহেয্য, উদ্ধংগামিনিং ৱা অধোগামিনিং ৱা, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

১৮৭. তেন খো পন সমযেন সম্বহুলা ভিক্খূ চ ভিক্খুনিযো চ সাকেতা সাৱত্থিং অদ্ধানমগ্গপ্পটিপন্না হোন্তি. অন্তৰামগ্গে নদী তৰিতব্বা [উত্তৰিতব্বা (স্যা.)] হোতি. অথ খো তা ভিক্খুনিযো তে ভিক্খূ এতদৱোচুং – ‘‘মযম্পি অয্যেহি সদ্ধিং উত্তৰিস্সামা’’তি. ‘‘ন, ভগিনী, কপ্পতি ভিক্খুনিযা সদ্ধিং সংৱিধায একং নাৱং অভিৰুহিতুং; তুম্হে ৱা পঠমং উত্তৰথ মযং ৱা উত্তৰিস্সামা’’তি. ‘‘অয্যা, ভন্তে, অগ্গপুৰিসা. অয্যাৱ পঠমং উত্তৰন্তূ’’তি. অথ খো তাসং ভিক্খুনীনং পচ্ছা উত্তৰন্তীনং চোৰা অচ্ছিন্দিংসু চ দূসেসুঞ্চ. অথ খো তা ভিক্খুনিযো সাৱত্থিং গন্ত্ৱা ভিক্খুনীনং এতমত্থং আৰোচেসুং. ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, তিৰিযং তৰণায ভিক্খুনিযা সদ্ধিং সংৱিধায একং নাৱং অভিৰুহিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৮৮. ‘‘যো পন ভিক্খু ভিক্খুনিযা সদ্ধিং সংৱিধায একং নাৱং অভিৰুহেয্য উদ্ধংগামিনিং ৱা অধোগামিনিং ৱা, অঞ্ঞত্ৰ তিৰিযং তৰণায, পাচিত্তিয’’ন্তি.

১৮৯. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনী নাম উভতোসঙ্ঘে উপসম্পন্না.

সদ্ধিন্তি একতো.

সংৱিধাযাতি ‘‘অভিৰুহাম, ভগিনি, অভিৰুহামায্য; অভিৰুহামায্য, অভিৰুহাম, ভগিনি; অজ্জ ৱা হিয্যো ৱা পৰে ৱা অভিৰুহামা’’তি সংৱিদহতি আপত্তি দুক্কটস্স.

ভিক্খুনিযা অভিৰুড়্হে ভিক্খু অভিৰুহতি, আপত্তি পাচিত্তিযস্স. ভিক্খুম্হি অভিৰুড়্হে ভিক্খুনী অভিৰুহতি, আপত্তি পাচিত্তিযস্স. উভো ৱা অভিৰুহন্তি, আপত্তি পাচিত্তিযস্স.

উদ্ধংগামিনিন্তি উজ্জৱনিকায.

অধোগামিনিন্তি ওজৱনিকায.

অঞ্ঞত্ৰ তিৰিযং তৰণাযাতি ঠপেত্ৱা তিৰিযং তৰণং.

কুক্কুটসম্পাতে গামে, গামন্তৰে গামন্তৰে আপত্তি পাচিত্তিযস্স. অগামকে অৰঞ্ঞে, অড্ঢযোজনে অড্ঢযোজনে আপত্তি পাচিত্তিযস্স.

১৯০. সংৱিদহিতে সংৱিদহিতসঞ্ঞী একং নাৱং অভিৰুহতি উদ্ধংগামিনিং ৱা অধোগামিনিং ৱা, অঞ্ঞত্ৰ তিৰিযং তৰণায, আপত্তি পাচিত্তিযস্স. সংৱিদহিতে ৱেমতিকো একং নাৱং অভিৰুহতি উদ্ধংগামিনিং ৱা অধোগামিনিং ৱা, অঞ্ঞত্ৰ তিৰিযং তৰণায, আপত্তি পাচিত্তিযস্স. সংৱিদহিতে অসংৱিদহিতসঞ্ঞী একং নাৱং অভিৰুহতি উদ্ধংগামিনিং ৱা অধোগামিনিং ৱা, অঞ্ঞত্ৰ তিৰিযং তৰণায, আপত্তি পাচিত্তিযস্স.

ভিক্খু সংৱিদহতি, ভিক্খুনী ন সংৱিদহতি, আপত্তি দুক্কটস্স. অসংৱিদহিতে সংৱিদহিতসঞ্ঞী, আপত্তি দুক্কটস্স. অসংৱিদহিতে ৱেমতিকো, আপত্তি দুক্কটস্স. অসংৱিদহিতে, অসংৱিদহিতসঞ্ঞী, অনাপত্তি.

১৯১. অনাপত্তি তিৰিযং তৰণায, অসংৱিদহিত্ৱা অভিৰুহন্তি, ভিক্খুনী সংৱিদহতি, ভিক্খু ন সংৱিদহতি, ৱিসঙ্কেতেন অভিৰুহন্তি, আপদাসু উম্মত্তকস্স, আদিকম্মিস্সাতি.

নাৱাভিৰুহনসিক্খাপদং নিট্ঠিতং অট্ঠমং.