৭. সংৱিধানসিক্খাপদং

১৮০. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন ছব্বগ্গিযা ভিক্খূ ভিক্খুনীহি সদ্ধিং সংৱিধায একদ্ধানমগ্গং পটিপজ্জন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘যথেৱ মযং সপজাপতিকা আহিণ্ডাম, এৱমেৱিমে সমণা সক্যপুত্তিযা ভিক্খুনীহি সদ্ধিং সংৱিধায আহিণ্ডন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনীহি সদ্ধিং সংৱিধায একদ্ধানমগ্গং পটিপজ্জিস্সন্তী’’তি…পে… ‘‘সচ্চং কিৰ তুম্হে, ভিক্খৱে, ভিক্খুনীহি সদ্ধিং সংৱিধায একদ্ধানমগ্গং পটিপজ্জথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খুনীহি সদ্ধিং সংৱিধায একদ্ধানমগ্গং পটিপজ্জিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ.

‘‘যো পন ভিক্খু ভিক্খুনিযা সদ্ধিং সংৱিধায একদ্ধানমগ্গং পটিপজ্জেয্য, অন্তমসো গামন্তৰম্পি, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

১৮১. তেন খো পন সমযেন সম্বহুলা ভিক্খূ চ ভিক্খুনিযো চ সাকেতা সাৱত্থিং অদ্ধানমগ্গপ্পটিপন্না হোন্তি. অথ খো তা ভিক্খুনিযো তে ভিক্খূ এতদৱোচুং – ‘‘মযম্পি অয্যেহি সদ্ধিং গমিস্সামা’’তি. ‘‘ন, ভগিনী, কপ্পতি ভিক্খুনিযা সদ্ধিং সংৱিধায একদ্ধানমগ্গং পটিপজ্জিতুং. তুম্হে ৱা পঠমং গচ্ছথ মযং ৱা গমিস্সামা’’তি. ‘‘অয্যা, ভন্তে, অগ্গপুৰিসা. অয্যাৱ পঠমং গচ্ছন্তূ’’তি. অথ খো তাসং ভিক্খুনীনং পচ্ছা গচ্ছন্তীনং অন্তৰামগ্গে চোৰা অচ্ছিন্দিংসু চ দূসেসুঞ্চ. অথ খো তা ভিক্খুনিযো সাৱত্থিং গন্ত্ৱা ভিক্খুনীনং এতমত্থং আৰোচেসুং. ভিক্খুনিযো ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, সত্থগমনীযে মগ্গে সাসঙ্কসম্মতে সপ্পটিভযে ভিক্খুনিযা সদ্ধিং সংৱিধায একদ্ধানমগ্গং পটিপজ্জিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৮২. ‘‘যো পন ভিক্খু ভিক্খুনিযা সদ্ধিং সংৱিধায একদ্ধানমগ্গং পটিপজ্জেয্য, অন্তমসো গামন্তৰম্পি, অঞ্ঞত্ৰ সমযা, পাচিত্তিযং. তত্থাযং সমযো . সত্থগমনীযো হোতি মগ্গো সাসঙ্কসম্মতো সপ্পটিভযো – অযং তত্থ সমযো’’তি.

১৮৩. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনী নাম উভতোসঙ্ঘে উপসম্পন্না.

সদ্ধিন্তি একতো.

সংৱিধাযাতি – ‘‘গচ্ছাম, ভগিনি, গচ্ছামায্য; গচ্ছামায্য, গচ্ছাম, ভগিনি; অজ্জ ৱা হিয্যো ৱা পৰে ৱা গচ্ছামা’’তি সংৱিদহতি, আপত্তি দুক্কটস্স.

অন্তমসো গামন্তৰম্পীতি কুক্কুটসম্পাতে গামে, গামন্তৰে গামন্তৰে আপত্তি পাচিত্তিযস্স. অগামকে অৰঞ্ঞে, অদ্ধযোজনে অদ্ধযোজনে আপত্তি পাচিত্তিযস্স.

অঞ্ঞত্ৰ সমযাতি ঠপেত্ৱা সমযং.

সত্থগমনীযো নাম মগ্গো ন সক্কা হোতি ৱিনা সত্থেন গন্তুং.

সাসঙ্কং নাম তস্মিং মগ্গে [যস্মিং মগ্গে (?)] চোৰানং নিৱিট্ঠোকাসো দিস্সতি, ভুত্তোকাসো দিস্সতি, ঠিতোকাসো দিস্সতি, নিসিন্নোকাসো দিস্সতি, নিপন্নোকাসো দিস্সতি.

সপ্পটিভযং নাম তস্মিং মগ্গে চোৰেহি মনুস্সা হতা দিস্সন্তি, ৱিলুত্তা দিস্সন্তি, আকোটিতা দিস্সন্তি, সপ্পটিভযং গন্ত্ৱা অপ্পটিভযং দস্সেত্ৱা উয্যোজেতব্বা – ‘‘গচ্ছথ ভগিনিযো’’তি.

১৮৪. সংৱিদহিতে সংৱিদহিতসঞ্ঞী একদ্ধানমগ্গং পটিপজ্জতি, অন্তমসো গামন্তৰম্পি, অঞ্ঞত্ৰ সমযা, আপত্তি পাচিত্তিযস্স. সংৱিদহিতে ৱেমতিকো একদ্ধানমগ্গং পটিপজ্জতি, অন্তমসো গামন্তৰম্পি, অঞ্ঞত্ৰ সমযা, আপত্তি পাচিত্তিযস্স. সংৱিদহিতে, অসংৱিদহিতসঞ্ঞী একদ্ধানমগ্গং পটিপজ্জতি, অন্তমসো গামন্তৰম্পি, অঞ্ঞত্ৰ সমযা, আপত্তি পাচিত্তিযস্স.

ভিক্খু সংৱিদহতি ভিক্খুনী ন সংৱিদহতি, আপত্তি দুক্কটস্স. অসংৱিদহিতে সংৱিদহিতসঞ্ঞী, আপত্তি দুক্কটস্স. অসংৱিদহিতে ৱেমতিকো, আপত্তি দুক্কটস্স. অসংৱিদহিতে অসংৱিদহিতসঞ্ঞী, অনাপত্তি.

১৮৫. অনাপত্তি সমযে, অসংৱিদহিত্ৱা গচ্ছতি, ভিক্খুনী সংৱিদহতি, ভিক্খু ন সংৱিদহতি, ৱিসঙ্কেতেন গচ্ছন্তি, আপদাসু, উম্মত্তকস্স, আদিকম্মিকস্সাতি.

সংৱিধানসিক্খাপদং নিট্ঠিতং সত্তমং.