৬. চীৱৰসিব্বনসিক্খাপদং

১৭৫. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন আযস্মা উদাযী পট্টো [পট্ঠো (সী. স্যা.)] হোতি চীৱৰকম্মং কাতুং. অঞ্ঞতৰা ভিক্খুনী যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘সাধু মে, ভন্তে, অয্যো চীৱৰং সিব্বতূ’’তি. অথ খো আযস্মা উদাযী তস্সা ভিক্খুনিযা চীৱৰং সিব্বিত্ৱা সুৰত্তং সুপৰিকম্মকতং কত্ৱা মজ্ঝে পটিভানচিত্তং ৱুট্ঠাপেত্ৱা সংহৰিত্ৱা নিক্খিপি. অথ খো সা ভিক্খুনী যেনাযস্মা উদাযী তেনুপসঙ্কমি; উপসঙ্কমিত্ৱা আযস্মন্তং উদাযিং এতদৱোচ – ‘‘কহং তং, ভন্তে, চীৱৰ’’ন্তি? ‘‘হন্দ, ভগিনি, ইমং চীৱৰং যথাসংহটং হৰিত্ৱা নিক্খিপিত্ৱা যদা ভিক্খুনিসঙ্ঘো ওৱাদং আগচ্ছতি তদা ইমং চীৱৰং পাৰুপিত্ৱা ভিক্খুনিসঙ্ঘস্স পিট্ঠিতো পিট্ঠিতো আগচ্ছা’’তি. অথ খো সা ভিক্খুনী তং চীৱৰং যথাসংহটং হৰিত্ৱা নিক্খিপিত্ৱা যদা ভিক্খুনিসঙ্ঘো ওৱাদং আগচ্ছতি তদা তং চীৱৰং পাৰুপিত্ৱা ভিক্খুনিসঙ্ঘস্স পিট্ঠিতো পিট্ঠিতো আগচ্ছতি. মনুস্সা উজ্ঝাযন্তি খিয্যন্তি ৱিপাচেন্তি – ‘‘যাৱ ছিন্নিকা ইমা ভিক্খুনিযো ধুত্তিকা অহিৰিকাযো, যত্ৰ হি নাম চীৱৰে পটিভানচিত্তং ৱুট্ঠাপেস্সন্তী’’তি!

ভিক্খুনিযো এৱমাহংসু – ‘‘কস্সিদং কম্ম’’ন্তি? ‘‘অয্যস্স উদাযিস্সা’’তি. ‘‘যেপি তে ছিন্নকা ধুত্তকা অহিৰিকা তেসম্পি এৱৰূপং ন সোভেয্য, কিং পন অয্যস্স উদাযিস্সা’’তি! অথ খো তা ভিক্খুনিযো ভিক্খূনং এতমত্থং আৰোচেসুং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা উদাযী ভিক্খুনিযা চীৱৰং সিব্বিস্সতী’’তি…পে… সচ্চং কিৰ ত্ৱং, উদাযি, ভিক্খুনিযা চীৱৰং সিব্বসী’’তি? ‘‘সচ্চং, ভগৱা’’তি. ‘‘ঞাতিকা তে, উদাযি, অঞ্ঞাতিকা’’তি? ‘‘অঞ্ঞাতিকা, ভগৱা’’তি. ‘‘অঞ্ঞাতকো, মোঘপুৰিস, অঞ্ঞাতিকায ন জানাতি পতিৰূপং ৱা অপ্পতিৰূপং ৱা পাসাদিকং ৱা অপাসাদিকং ৱা. কথঞ্হি নাম ত্ৱং, মোঘপুৰিস, অঞ্ঞাতিকায ভিক্খুনিযা চীৱৰং সিব্বিস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৭৬. ‘‘যো পন ভিক্খু অঞ্ঞাতিকায ভিক্খুনিযা চীৱৰং সিব্বেয্য ৱা সিব্বাপেয্য ৱা, পাচিত্তিয’’ন্তি.

১৭৭. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অঞ্ঞাতিকা নাম মাতিতো ৱা পিতিতো ৱা যাৱ সত্তমা পিতামহযুগা অসম্বদ্ধা.

ভিক্খুনী নাম উভতোসঙ্ঘে উপসম্পন্না.

চীৱৰং নাম ছন্নং চীৱৰানং অঞ্ঞতৰং চীৱৰং.

সিব্বেয্যাতি সযং সিব্বতি আৰাপথে আৰাপথে আপত্তি পাচিত্তিযস্স.

সিব্বাপেয্যাতি অঞ্ঞং আণাপেতি, আপত্তি পাচিত্তিযস্স. সকিং আণত্তো বহুকম্পি সিব্বতি, আপত্তি পাচিত্তিযস্স.

১৭৮. অঞ্ঞাতিকায অঞ্ঞাতিকসঞ্ঞী চীৱৰং সিব্বতি ৱা সিব্বাপেতি ৱা, আপত্তি পাচিত্তিযস্স. অঞ্ঞাতিকায ৱেমতিকো চীৱৰং সিব্বতি ৱা সিব্বাপেতি ৱা, আপত্তি পাচিত্তিযস্স. অঞ্ঞাতিকায ঞাতিকসঞ্ঞী চীৱৰং সিব্বতি ৱা সিব্বাপেতি ৱা, আপত্তি পাচিত্তিযস্স.

একতোউপসম্পন্নায চীৱৰং সিব্বতি ৱা সিব্বাপেতি ৱা, আপত্তি দুক্কটস্স. ঞাতিকায অঞ্ঞাতিকসঞ্ঞী, আপত্তি দুক্কটস্স. ঞাতিকায ৱেমতিকো, আপত্তি দুক্কটস্স. ঞাতিকায ঞাতিকসঞ্ঞী, অনাপত্তি.

১৭৯. অনাপত্তি ঞাতিকায, চীৱৰং ঠপেত্ৱা অঞ্ঞং পৰিক্খাৰং সিব্বতি ৱা সিব্বাপেতি ৱা, সিক্খমানায, সামণেৰিযা, উম্মত্তকস্স, আদিকম্মিকস্সাতি.

চীৱৰসিব্বনসিক্খাপদং নিট্ঠিতং ছট্ঠং.