৫. চীৱৰদানসিক্খাপদং

১৬৯. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন অঞ্ঞতৰো ভিক্খু সাৱত্থিযং অঞ্ঞতৰিস্সা ৱিসিখায পিণ্ডায চৰতি. অঞ্ঞতৰাপি ভিক্খুনী তস্সা ৱিসিখায পিণ্ডায চৰতি. অথ খো সো ভিক্খু তং ভিক্খুনিং এতদৱোচ – ‘‘গচ্ছ, ভগিনি, অমুকস্মিং ওকাসে ভিক্খা দিয্যতী’’তি. সাপি খো এৱমাহ – ‘‘গচ্ছায্য, অমুকস্মিং ওকাসে ভিক্খা দিয্যতী’’তি. তে অভিণ্হদস্সনেন সন্দিট্ঠা অহেসুং. তেন খো পন সমযেন সঙ্ঘস্স চীৱৰং ভাজীযতি. অথ খো সা ভিক্খুনী ওৱাদং গন্ত্ৱা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং অভিৱাদেত্ৱা একমন্তং অট্ঠাসি. একমন্তং ঠিতং খো তং ভিক্খুনিং সো ভিক্খু এতদৱোচ – ‘‘অযং মে, ভগিনি, চীৱৰপটিৱীসো [পটিৱিংসো (সী.), পটিৱিসো (ইতিপি)]; সাদিযিস্সসী’’তি? ‘‘আমায্য, দুব্বলচীৱৰাম্হী’’তি.

অথ খো সো ভিক্খু তস্সা ভিক্খুনিযা চীৱৰং অদাসি. সোপি খো ভিক্খু দুব্বলচীৱৰো হোতি. ভিক্খূ তং ভিক্খুং এতদৱোচুং – ‘‘কৰোহি দানি তে, আৱুসো, চীৱৰ’’ন্তি. অথ খো সো ভিক্খু ভিক্খূনং এতমত্থং আৰোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খু ভিক্খুনিযা চীৱৰং দস্সতী’’তি…পে… ‘‘সচ্চং কিৰ ত্ৱং, ভিক্খু, ভিক্খুনিযা চীৱৰং অদাসী’’তি? ‘‘সচ্চং, ভগৱা’’তি. ‘‘ঞাতিকা তে, ভিক্খু, অঞ্ঞাতিকা’’তি? ‘‘অঞ্ঞাতিকা, ভগৱা’’তি. ‘‘অঞ্ঞাতকো, মোঘপুৰিস, অঞ্ঞাতিকায ন জানাতি পতিৰূপং ৱা অপ্পতিৰূপং ৱা সন্তং ৱা অসন্তং ৱা. কথঞ্হি নাম ত্ৱং, মোঘপুৰিস, অঞ্ঞাতিকায ভিক্খুনিযা চীৱৰং দস্সসি! নেতং, মোঘপুৰিস, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু অঞ্ঞাতিকায ভিক্খুনিযা চীৱৰং দদেয্য, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

১৭০. তেন খো পন সমযেন ভিক্খূ কুক্কুচ্চাযন্তা ভিক্খুনীনং পাৰিৱত্তকং [পাৰিৱট্টকং (ইতিপি)] চীৱৰং ন দেন্তি. ভিক্খুনিযো উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম অয্যা অম্হাকং পাৰিৱত্তকং চীৱৰং ন দস্সন্তী’’তি! অস্সোসুং খো ভিক্খূ তাসং ভিক্খুনীনং উজ্ঝাযন্তীনং খিয্যন্তীনং ৱিপাচেন্তীনং. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, পঞ্চন্নং পাৰিৱত্তকং দাতুং. ভিক্খুস্স, ভিক্খুনিযা, সিক্খমানায, সামণেৰস্স, সামণেৰিযা – অনুজানামি, ভিক্খৱে, ইমেসং পঞ্চন্নং পাৰিৱত্তকং দাতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৭১. ‘‘যো পন ভিক্খু অঞ্ঞাতিকায ভিক্খুনিযা চীৱৰং দদেয্য, অঞ্ঞত্ৰ পাৰিৱত্তকা, পাচিত্তিয’’ন্তি.

১৭২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অঞ্ঞাতিকা নাম মাতিতো ৱা পিতিতো ৱা যাৱ সত্তমা পিতামহযুগা অসম্বদ্ধা.

ভিক্খুনী নাম উভতোসঙ্ঘে উপসম্পন্না.

চীৱৰং নাম ছন্নং চীৱৰানং অঞ্ঞতৰং চীৱৰং ৱিকপ্পনুপগং পচ্ছিমং [ৱিকপ্পনুপগপচ্ছিমং (সী.)].

অঞ্ঞত্ৰ পাৰিৱত্তকাতি ঠপেত্ৱা পাৰিৱত্তকং দেতি, আপত্তি পাচিত্তিযস্স.

১৭৩. অঞ্ঞাতিকায অঞ্ঞাতিকসঞ্ঞী চীৱৰং দেতি, অঞ্ঞত্ৰ পাৰিৱত্তকা, আপত্তি পাচিত্তিযস্স. অঞ্ঞাতিকায ৱেমতিকো চীৱৰং দেতি, অঞ্ঞত্ৰ পাৰিৱত্তকা, আপত্তি পাচিত্তিযস্স. অঞ্ঞাতিকায ঞাতিকসঞ্ঞী চীৱৰং দেতি, অঞ্ঞত্ৰ পাৰিৱত্তকা, আপত্তি পাচিত্তিযস্স.

একতো উপসম্পন্নায চীৱৰং দেতি, অঞ্ঞত্ৰ পাৰিৱত্তকা, আপত্তি দুক্কটস্স. ঞাতিকায অঞ্ঞাতিকসঞ্ঞী, আপত্তি দুক্কটস্স. ঞাতিকায ৱেমতিকো, আপত্তি দুক্কটস্স. ঞাতিকায ঞাতিকসঞ্ঞী, অনাপত্তি.

১৭৪. অনাপত্তি ঞাতিকায, পাৰিৱত্তকং পৰিত্তেন ৱা ৱিপুলং, ৱিপুলেন ৱা পৰিত্তং, ভিক্খুনী ৱিস্সাসং গণ্হাতি, তাৱকালিকং গণ্হাতি, চীৱৰং ঠপেত্ৱা অঞ্ঞং পৰিক্খাৰং দেতি, সিক্খমানায, সামণেৰিযা, উম্মত্তকস্স, আদিকম্মিকস্সাতি.

চীৱৰদানসিক্খাপদং নিট্ঠিতং পঞ্চমং.