৪. আমিসসিক্খাপদং

১৬৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থেৰা ভিক্খূ ভিক্খুনিযো ওৱদন্তা লাভিনো হোন্তি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং. ছব্বগ্গিযা ভিক্খূ এৱং ৱদন্তি – ‘‘ন বহুকতা থেৰা ভিক্খূ ভিক্খুনিযো ওৱদিতুং; আমিসহেতু থেৰা ভিক্খূ ভিক্খুনিযো ওৱদন্তী’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ এৱং ৱক্খন্তি – ‘ন বহুকতা থেৰা ভিক্খূ ভিক্খুনিযো ওৱদিতুং; আমিসহেতু থেৰা ভিক্খূ ভিক্খুনিযো ওৱদন্তী’’’তি…পে… ‘‘সচ্চং কিৰ তুম্হে, ভিক্খৱে, এৱং ৱদেথ – ‘ন বহুকতা থেৰা ভিক্খূ ভিক্খুনিযো ওৱদিতুং; আমিসহেতু থেৰা ভিক্খূ ভিক্খুনিযো ওৱদন্তী’’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, এৱং ৱক্খথ – ন বহুকতা থেৰা ভিক্খূ ভিক্খুনিযো ওৱদিতুং; আমিসহেতু থেৰা ভিক্খূ ভিক্খুনিযো ওৱদন্তীতি! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৬৫. ‘‘যো পন ভিক্খু এৱং ৱদেয্য – ‘আমিসহেতু থেৰা ভিক্খূ ভিক্খুনিযো ওৱন্দতী’তি, পাচিত্তিয’’ন্তি.

১৬৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

আমিসহেতূতি চীৱৰহেতু পিণ্ডপাতহেতু সেনাসনহেতু গিলানপ্পচ্চযভেসজ্জপৰিক্খাৰহেতু সক্কাৰহেতু গৰুকাৰহেতু মাননহেতু ৱন্দনহেতু পূজনহেতু.

এৱং ৱদেয্যাতি উপসম্পন্নং সঙ্ঘেন সম্মতং ভিক্খুনোৱাদকং অৱণ্ণং কত্তুকামো অযসং কত্তুকামো মঙ্কুকত্তুকামো এৱং ৱদেতি – ‘‘চীৱৰহেতু পিণ্ডপাতহেতু সেনাসনহেতু গিলানপ্পচ্চযভেসজ্জপৰিক্খাৰহেতু সক্কাৰহেতু গৰুকাৰহেতু মাননহেতু ৱন্দনহেতু পূজনহেতু ওৱদতী’’তি ভণতি, আপত্তি পাচিত্তিযস্স.

১৬৭. ধম্মকম্মে ধম্মকম্মসঞ্ঞী এৱং ৱদেতি, আপত্তি পাচিত্তিযস্স. ধম্মকম্মে ৱেমতিকো এৱং ৱদেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞী এৱং ৱদেতি, আপত্তি পাচিত্তিযস্স.

উপসম্পন্নং সঙ্ঘেন অসম্মতং ভিক্খুনোৱাদকং অৱণ্ণং কত্তুকামো অযসং কত্তুকামো মঙ্কুকত্তুকামো এৱং ৱদেতি – ‘‘চীৱৰহেতু…পে… পূজনহেতু ওৱদতী’’তি ভণতি, আপত্তি দুক্কটস্স. অনুপসম্পন্নং সঙ্ঘেন সম্মতং ৱা অসম্মতং ৱা ভিক্খুনোৱাদকং অৱণ্ণং কত্তুকামো অযসং কত্তুকামো মঙ্কুকত্তুকামো এৱং ৱদেতি – ‘‘চীৱৰহেতু পিণ্ডপাতহেতু সেনাসনহেতু গিলানপ্পচ্চযভেসজ্জপৰিক্খাৰহেতু সক্কাৰহেতু গৰুকাৰহেতু মাননহেতু ৱন্দনহেতু পূজনহেতু ওৱদতী’’তি ভণতি, আপত্তি দুক্কটস্স. অধম্মকম্মে ধম্মকম্মসঞ্ঞী, আপত্তি দুক্কটস্স. অধম্মকম্মে ৱেমতিকো, আপত্তি দুক্কটস্স. অধম্মকম্মে অধম্মকম্মসঞ্ঞী, আপত্তি দুক্কটস্স.

১৬৮. অনাপত্তি পকতিযা চীৱৰহেতু পিণ্ডপাতহেতু সেনাসনহেতু গিলানপ্পচ্চযভেসজ্জপৰিক্খাৰহেতু সক্কাৰহেতু গৰুকাৰহেতু মাননহেতু ৱন্দনহেতু পূজনহেতু ওৱদন্তং ভণতি, উম্মত্তকস্স, আদিকম্মিকস্সাতি.

আমিসসিক্খাপদং নিট্ঠিতং চতুত্থং.