৩. ভিক্খুনুপস্সযসিক্খাপদং

১৫৮. তেন সমযেন বুদ্ধো ভগৱা সক্কেসু ৱিহৰতি কপিলৱত্থুস্মিং নিগ্ৰোধাৰামে. তেন খো পন সমযেন ছব্বগ্গিযা ভিক্খূ ভিক্খুনুপস্সযং উপসঙ্কমিত্ৱা ছব্বগ্গিযা ভিক্খুনিযো ওৱদন্তি. ভিক্খুনিযো ছব্বগ্গিযা ভিক্খুনিযো এতদৱোচুং – ‘‘এথায্যে, ওৱাদং গমিস্সামা’’তি. ‘‘যম্পি [যং হি (ক.)] মযং, অয্যে, গচ্ছেয্যাম ওৱাদস্স কাৰণা, অয্যা ছব্বগ্গিযা ইধেৱ আগন্ত্ৱা অম্হে ওৱদন্তী’’তি. ভিক্খুনিযো উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনুপস্সযং উপসঙ্কমিত্ৱা ভিক্খুনিযো ওৱদিস্সন্তী’’তি [ছব্বগ্গিযা ভিক্খুনিযো ওৱাদং ন গচ্ছিস্সন্তীতি (সী.)]! অথ খো তা ভিক্খুনিযো ভিক্খূনং এতমত্থং আৰোচেসুং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনুপস্সযং উপসঙ্কমিত্ৱা ভিক্খুনিযো ওৱদিস্সন্তী’’তি…পে… ‘‘সচ্চং কিৰ তুম্হে, ভিক্খৱে, ভিক্খুনুপস্সযং উপসঙ্কমিত্ৱা ভিক্খুনিযো ওৱদথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খুনুপস্সযং উপসঙ্কমিত্ৱা ভিক্খুনিযো ওৱদিস্সথ! নেতং, মোঘপুৰিসা, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

‘‘যো পন ভিক্খু ভিক্খুনুপস্সযং উপসঙ্কমিত্ৱা ভিক্খুনিযো ওৱদেয্য, পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

১৫৯. তেন খো পন সমযেন মহাপজাপতি গোতমী গিলানা হোতি. থেৰা ভিক্খূ যেন মহাপজাপতি গোতমী তেনুপসঙ্কমিংসু; উপসঙ্কমিত্ৱা মহাপজাপতিং গোতমিং এতদৱোচুং – ‘‘কচ্চি তে, গোতমি, খমনীযং কচ্চি যাপনীয’’ন্তি? ‘‘ন মে, অয্যা, খমনীযং ন যাপনীযং’’. ‘‘ইঙ্ঘয্যা, ধম্মং দেসেথা’’তি. ‘‘ন, ভগিনি, কপ্পতি ভিক্খুনুপস্সযং উপসঙ্কমিত্ৱা ভিক্খুনিযো ধম্মং দেসেতু’’ন্তি কুক্কুচ্চাযন্তা ন দেসেসুং. অথ খো ভগৱা পুব্বণ্হসমযং নিৱাসেত্ৱা পত্তচীৱৰমাদায যেন মহাপজাপতি গোতমী তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. নিসজ্জ খো ভগৱা মহাপজাপতিং গোতমিং এতদৱোচ – ‘‘কচ্চি তে, গোতমি, খমনীযং কচ্চি যাপনীয’’ন্তি? ‘‘পুব্বে মে, ভন্তে, থেৰা ভিক্খূ আগন্ত্ৱা ধম্মং দেসেন্তি. তেন মে ফাসু হোতি. ইদানি পন – ‘‘ভগৱতা পটিক্খিত্ত’’ন্তি, কুক্কুচ্চাযন্তা ন দেসেন্তি. তেন মে ন ফাসু হোতী’’তি. অথ খো ভগৱা মহাপজাপতিং গোতমিং ধম্মিযা কথায সন্দস্সেত্ৱা সমাদপেত্ৱা সমুত্তেজেত্ৱা সম্পহংসেত্ৱা উট্ঠাযাসনা পক্কামি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ভিক্খুনুপস্সযং উপসঙ্কমিত্ৱা গিলানং ভিক্খুনিং ওৱদিতুং. এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৬০. ‘‘যো পন ভিক্খু ভিক্খুনুপস্সযং উপসঙ্কমিত্ৱা ভিক্খুনিযো ওৱদেয্য, অঞ্ঞত্ৰ সমযা, পাচিত্তিযং. তত্থাযং সমযো. গিলানা হোতি ভিক্খুনী – অযং তত্থ সমযো’’তি.

১৬১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনুপস্সযো নাম যত্থ ভিক্খুনিযো একৰত্তম্পি ৱসন্তি.

উপসঙ্কমিত্ৱাতি তত্থ গন্ত্ৱা.

ভিক্খুনী নাম উভতোসঙ্ঘে উপসম্পন্না.

ওৱদেয্যাতি অট্ঠহি গৰুধম্মেহি ওৱদতি, আপত্তি পাচিত্তিযস্স.

অঞ্ঞত্ৰ সমযাতি ঠপেত্ৱা সমযং.

গিলানা নাম ভিক্খুনী ন সক্কোতি ওৱাদায ৱা সংৱাসায ৱা গন্তুং.

১৬২. উপসম্পন্নায উপসম্পন্নসঞ্ঞী ভিক্খুনুপস্সযং উপসঙ্কমিত্ৱা অঞ্ঞত্ৰ সমযা ওৱদতি, আপত্তি পাচিত্তিযস্স. উপসম্পন্নায ৱেমতিকো ভিক্খুনুপস্সযং উপসঙ্কমিত্ৱা অঞ্ঞত্ৰ সমযা ওৱদতি, আপত্তি পাচিত্তিযস্স. উপসম্পন্নায অনুপসম্পন্নসঞ্ঞী ভিক্খুনুপস্সযং উপসঙ্কমিত্ৱা অঞ্ঞত্ৰ সমযা ওৱদতি, আপত্তি পাচিত্তিযস্স.

অঞ্ঞেন ধম্মেন ওৱদতি, আপত্তি দুক্কটস্স. একতোউপসম্পন্নায ওৱদতি, আপত্তি দুক্কটস্স. অনুপসম্পন্নায উপসম্পন্নসঞ্ঞী, আপত্তি দুক্কটস্স. অনুপসম্পন্নায ৱেমতিকো, আপত্তি দুক্কটস্স. অনুপসম্পন্নায অনুপসম্পন্নসঞ্ঞী, অনাপত্তি.

১৬৩. অনাপত্তি সমযে, উদ্দেসং দেন্তো, পৰিপুচ্ছং দেন্তো, ‘‘ওসাৰেহি অয্যা’’তি ৱুচ্চমানো ওসাৰেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং ভিক্খুনিযো সুণন্তি, সিক্খমানায সামণেৰিযা, উম্মত্তকস্স, আদিকম্মিকস্সাতি.

ভিক্খুনুপস্সযসিক্খাপদং নিট্ঠিতং ততিযং.