২. অত্থঙ্গতসিক্খাপদং

১৫৩. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থেৰা ভিক্খূ ভিক্খুনিযো ওৱদন্তি পৰিযাযেন. তেন খো পন সমযেন আযস্মতো চূড়পন্থকস্স পৰিযাযো হোতি ভিক্খুনিযো ওৱদিতুং. ভিক্খুনিযো এৱমাহংসু – ‘‘ন দানি অজ্জ ওৱাদো ইদ্ধো ভৱিস্সতি, তঞ্ঞেৱ দানি উদানং অয্যো চূড়পন্থকো পুনপ্পুনং ভণিস্সতী’’তি. অথ খো তা ভিক্খুনিযো যেনাযস্মা চূড়পন্থকো তেনুপসঙ্কমিংসু; উপসঙ্কমিত্ৱা আযস্মন্তং চূড়পন্থকং অভিৱাদেত্ৱা একমন্তং নিসীদিংসু. একমন্তং নিসিন্না খো তা ভিক্খুনিযো আযস্মা চূড়পন্থকো এতদৱোচ – ‘‘সমগ্গাত্থ, ভগিনিযো’’তি? ‘‘সমগ্গাম্হায্যা’’তি. ‘‘ৱত্তন্তি, ভগিনিযো, অট্ঠ গৰুধম্মা’’তি? ‘‘ৱত্তন্তায্যা’’তি. ‘‘এসো, ভগিনিযো, ওৱাদো’’তি নিয্যাদেত্ৱা ইমং উদানং পুনপ্পুনং অভাসি –

[উদা. ৩৭] ‘‘অধিচেতসো অপ্পমজ্জতো, মুনিনো মোনপথেসু সিক্খতো;

সোকা ন ভৱন্তি তাদিনো, উপসন্তস্স সদা সতীমতো’’তি.

ভিক্খুনিযো এৱমাহংসু – ‘‘ননু অৱোচুম্হা – ন দানি অজ্জ ওৱাদো ইদ্ধো ভৱিস্সতি, তঞ্ঞেৱ দানি উদানং অয্যো চূড়পন্থকো পুনপ্পুনং ভণিস্সতী’’তি! অস্সোসি খো আযস্মা চূড়পন্থকো তাসং ভিক্খুনীনং ইমং কথাসল্লাপং. অথ খো আযস্মা চূড়পন্থকো ৱেহাসং অব্ভুগ্গন্ত্ৱা আকাসে অন্তলিক্খে চঙ্কমতিপি তিট্ঠতিপি নিসীদতিপি সেয্যম্পি কপ্পেতি ধূমাযতিপি পজ্জলতিপি অন্তৰধাযতিপি, তঞ্চেৱ [তঞ্ঞেৱ (ইতিপি)] উদানং ভণতি অঞ্ঞঞ্চ বহুং বুদ্ধৱচনং. ভিক্খুনিযো এৱমাহংসু – ‘‘অচ্ছৰিযং ৱত ভো, অব্ভুতং ৱত ভো, ন ৱত নো ইতো পুব্বে ওৱাদো এৱং ইদ্ধো ভূতপুব্বো যথা অয্যস্স চূড়পন্থকস্সা’’তি. অথ খো আযস্মা চূড়পন্থকো তা ভিক্খুনিযো যাৱ সমন্ধকাৰা ওৱদিত্ৱা উয্যোজেসি – গচ্ছথ ভগিনিযোতি.

অথ খো তা ভিক্খুনিযো নগৰদ্ৱাৰে থকিতে বহিনগৰে ৱসিত্ৱা কালস্সেৱ নগৰং পৱিসন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘অব্ৰহ্মচাৰিনিযো ইমা ভিক্খুনিযো; আৰামে ভিক্খূহি সদ্ধিং ৱসিত্ৱা ইদানি নগৰং পৱিসন্তী’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আযস্মা চূড়পন্থকো অত্থঙ্গতে সূৰিযে ভিক্খুনিযো ওৱদিস্সতী’’তি…পে… ‘‘সচ্চং কিৰ ত্ৱং, চূড়পন্থক, অত্থঙ্গতে সূৰিযে ভিক্খুনিযো ওৱদসী’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম ত্ৱং, চূড়পন্থক, অত্থঙ্গতে সূৰিযে ভিক্খুনিযো ওৱদিস্সসি! নেতং, চূড়পন্থক, অপ্পসন্নানং ৱা পসাদায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৫৪. ‘‘সম্মতোপি চে ভিক্খু অত্থঙ্গতে সূৰিযে ভিক্খুনিযো ওৱদেয্য, পাচিত্তিয’’ন্তি.

১৫৫. সম্মতো নাম ঞত্তিচতুত্থেন কম্মেন সম্মতো.

অত্থঙ্গতে সূৰিযেতি ওগ্গতে সূৰিযে.

ভিক্খুনী নাম উভতোসঙ্ঘে উপসম্পন্না.

ওৱদেয্যাতি অট্ঠহি ৱা গৰুধম্মেহি অঞ্ঞেন ৱা ধম্মেন ওৱদতি, আপত্তি পাচিত্তিযস্স.

১৫৬. অত্থঙ্গতে অত্থঙ্গতসঞ্ঞী ওৱদতি, আপত্তি পাচিত্তিযস্স. অত্থঙ্গতে ৱেমতিকো ওৱদতি, আপত্তি পাচিত্তিযস্স. অত্থঙ্গতে অনত্থঙ্গতসঞ্ঞী ওৱদতি, আপত্তি পাচিত্তিযস্স.

একতোউপসম্পন্নায ওৱদতি, আপত্তি দুক্কটস্স. অনত্থঙ্গতে অত্থঙ্গতসঞ্ঞী, আপত্তি দুক্কটস্স. অনত্থঙ্গতে ৱেমতিকো, আপত্তি দুক্কটস্স. অনত্থঙ্গতে অনত্থঙ্গতসঞ্ঞী, অনাপত্তি.

১৫৭. অনাপত্তি উদ্দেসং দেন্তো, পৰিপুচ্ছং দেন্তো, ‘‘ওসাৰেহি অয্যা’’তি ৱুচ্চমানো, ওসাৰেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং ভিক্খুনিযো সুণন্তি, সিক্খমানায সামণেৰিযা, উম্মত্তকস্স, আদিকম্মিকস্সাতি.

অত্থঙ্গতসিক্খাপদং নিট্ঠিতং দুতিযং.