১. ওৱাদসিক্খাপদং

১৪৪. তেন সমযেন বুদ্ধো ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তেন খো পন সমযেন থেৰা ভিক্খূ ভিক্খুনিযো ওৱদন্তা লাভিনো হোন্তি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং. অথ খো ছব্বগ্গিযানং ভিক্খূনং এতদহোসি – ‘‘এতৰহি খো, আৱুসো, থেৰা ভিক্খূ ভিক্খুনিযো ওৱদন্তা লাভিনো হোন্তি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং. হন্দাৱুসো, মযম্পি ভিক্খুনিযো ওৱদামা’’তি. অথ খো ছব্বগ্গিযা ভিক্খূ ভিক্খুনিযো উপসঙ্কমিত্ৱা এতদৱোচুং – ‘‘অম্হেপি, ভগিনিযো, উপসঙ্কমথ; মযম্পি ওৱদিস্সামা’’তি.

অথ খো তা ভিক্খুনিযো যেন ছব্বগ্গিযা ভিক্খূ তেনুপসঙ্কমিংসু; উপসঙ্কমিত্ৱা ছব্বগ্গিযে ভিক্খূ অভিৱাদেত্ৱা একমন্তং নিসীদিংসু. অথ খো ছব্বগ্গিযা ভিক্খূ ভিক্খুনীনং পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেসুং – ‘‘গচ্ছথ, ভগিনিযো’’তি. অথ খো তা ভিক্খুনিযো যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠংসু. একমন্তং ঠিতা খো তা ভিক্খুনিযো ভগৱা এতদৱোচ – ‘‘কচ্চি, ভিক্খুনিযো, ওৱাদো ইদ্ধো অহোসী’’তি? ‘‘কুতো, ভন্তে, ওৱাদো ইদ্ধো ভৱিস্সতি! অয্যা ছব্বগ্গিযা পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেসু’’ন্তি. অথ খো ভগৱা তা ভিক্খুনিযো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো তা ভিক্খুনিযো ভগৱতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৱন্তং অভিৱাদেত্ৱা পদক্খিণং কত্ৱা পক্কমিংসু.

অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ছব্বগ্গিযে ভিক্খূ পটিপুচ্ছি – ‘‘সচ্চং কিৰ তুম্হে, ভিক্খৱে, ভিক্খুনীনং পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খুনীনং পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেস্সথ! নেতং, মোঘপুৰিসা, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ভিক্খুনোৱাদকং সম্মন্নিতুং. এৱঞ্চ পন, ভিক্খৱে, সম্মন্নিতব্বো. পঠমং ভিক্খু যাচিতব্বো. যাচিত্ৱা ব্যত্তেন ভিক্খুনা পটিবলেন সঙ্ঘো ঞাপেতব্বো –

১৪৫. ‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং ভিক্খুনোৱাদকং সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো ইত্থন্নামং ভিক্খুং ভিক্খুনোৱাদকং সম্মন্নতি. যস্সাযস্মতো খমতি ইত্থন্নামস্স ভিক্খুনো ভিক্খুনোৱাদকস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি – সুণাতু মে, ভন্তে, সঙ্ঘো. সঙ্ঘো ইত্থন্নামং ভিক্খুং ভিক্খুনোৱাদকং সম্মন্নতি. যস্সাযস্মতো খমতি ইত্থন্নামস্স ভিক্খুনো ভিক্খুনোৱাদকস্স সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন ইত্থন্নামো ভিক্খু ভিক্খুনোৱাদকো. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

অথ খো ভগৱা ছব্বগ্গিযে ভিক্খূ অনেকপৰিযাযেন ৱিগৰহিত্ৱা দুব্ভৰতায…পে… এৱঞ্চ পন, ভিক্খৱে, ইমং সিক্খাপদং উদ্দিসেয্যাথ –

১৪৬. ‘‘যো পন ভিক্খু অসম্মতো ভিক্খুনিযো ওৱদেয্য পাচিত্তিয’’ন্তি.

এৱঞ্চিদং ভগৱতা ভিক্খূনং সিক্খাপদং পঞ্ঞত্তং হোতি.

১৪৭. তেন খো পন সমযেন থেৰা ভিক্খূ সম্মতা ভিক্খুনিযো ওৱদন্তা তথেৱ লাভিনো হোন্তি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং. অথ খো ছব্বগ্গিযানং ভিক্খূনং এতদহোসি – ‘‘এতৰহি খো, আৱুসো, থেৰা ভিক্খূ সম্মতা ভিক্খুনিযো ওৱদন্তা তথেৱ লাভিনো হোন্তি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং. হন্দাৱুসো, মযম্পি নিস্সীমং গন্ত্ৱা অঞ্ঞমঞ্ঞং ভিক্খুনোৱাদকং সম্মন্নিত্ৱা ভিক্খুনিযো ওৱদামা’’তি. অথ খো ছব্বগ্গিযা ভিক্খূ নিস্সীমং গন্ত্ৱা অঞ্ঞমঞ্ঞং ভিক্খুনোৱাদকং সম্মন্নিত্ৱা ভিক্খুনিযো উপসঙ্কমিত্ৱা এতদৱোচুং – ‘‘মযম্পি, ভগিনিযো, সম্মতা. অম্হেপি উপসঙ্কমথ. মযম্পি ওৱদিস্সামা’’তি.

অথ খো তা ভিক্খুনিযো যেন ছব্বগ্গিযা ভিক্খূ তেনুপসঙ্কমিংসু; উপসঙ্কমিত্ৱা ছব্বগ্গিযে ভিক্খূ অভিৱাদেত্ৱা একমন্তং নিসীদিংসু. অথ খো ছব্বগ্গিযা ভিক্খূ ভিক্খুনীনং পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেসুং – ‘‘গচ্ছথ ভগিনিযো’’তি. অথ খো তা ভিক্খুনিযো যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠংসু. একমন্তং ঠিতা খো তা ভিক্খুনিযো ভগৱা এতদৱোচ – ‘‘কচ্চি, ভিক্খুনিযো, ওৱাদো ইদ্ধো অহোসী’’তি? ‘‘কুতো, ভন্তে, ওৱাদো ইদ্ধো ভৱিস্সতি! অয্যা ছব্বগ্গিযা পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেসু’’ন্তি.

অথ খো ভগৱা তা ভিক্খুনিযো ধম্মিযা কথায সন্দস্সেসি…পে… অথ খো তা ভিক্খুনিযো ভগৱতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা ভগৱন্তং অভিৱাদেত্ৱা পদক্খিণং কত্ৱা পক্কমিংসু. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ছব্বগ্গিযে ভিক্খূ পটিপুচ্ছি – ‘‘সচ্চং কিৰ তুম্হে, ভিক্খৱে, ভিক্খুনীনং পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেথা’’তি? ‘‘সচ্চং, ভগৱা’’তি. ৱিগৰহি বুদ্ধো ভগৱা…পে… কথঞ্হি নাম তুম্হে, মোঘপুৰিসা, ভিক্খুনীনং পৰিত্তঞ্ঞেৱ ধম্মিং কথং কত্ৱা দিৱসং তিৰচ্ছানকথায ৱীতিনামেত্ৱা উয্যোজেস্সথ! নেতং, মোঘপুৰিসা, অপ্পসন্নানং ৱা পসাদায…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, অট্ঠহঙ্গেহি সমন্নাগতং ভিক্খুং ভিক্খুনোৱাদকং সম্মন্নিতুং. সীলৱা হোতি, পাতিমোক্খসংৱৰসংৱুতো ৱিহৰতি আচাৰগোচৰসম্পন্নো অণুমত্তেসু ৱজ্জেসু ভযদস্সাৱী, সমাদায সিক্খতি সিক্খাপদেসু; বহুস্সুতো হোতি সুতধৰো সুতসন্নিচযো, যে তে ধম্মা আদিকল্যাণা মজ্ঝেকল্যাণা পৰিযোসানকল্যাণা সাত্থং সব্যঞ্জনং কেৱলপৰিপুণ্ণং পৰিসুদ্ধং ব্ৰহ্মচৰিযং অভিৱদন্তি তথাৰূপাস্স ধম্মা বহুস্সুতা হোন্তি ধাতা ৱচসা পৰিচিতা মনসা অনুপেক্খিতা দিট্ঠিযা সুপ্পটিৱিদ্ধা; উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো; কল্যাণৱাচো হোতি কল্যাণৱাক্কৰণো; যেভুয্যেন ভিক্খুনীনং পিযো হোতি মনাপো; পটিবলো হোতি ভিক্খুনিযো ওৱদিতুং; ন খো পনেতং [পন তং (?)] ভগৱন্তং উদ্দিস্স পব্বজিতায কাসাযৱত্থৱসনায গৰুধম্মং অজ্ঝাপন্নপুব্বো হোতি; ৱীসতিৱস্সো ৱা হোতি অতিৰেকৱীসতিৱস্সো ৱা – অনুজানামি, ভিক্খৱে, ইমেহি অট্ঠহঙ্গেহি সমন্নাগতং ভিক্খুং ভিক্খুনোৱাদকং সম্মন্নিতু’’ন্তি.

১৪৮. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অসম্মতো নাম ঞত্তিচতুত্থেন কম্মেন অসম্মতো.

ভিক্খুনিযো নাম উভতোসঙ্ঘে উপসম্পন্না.

ওৱদেয্যাতি অট্ঠহি গৰুধম্মেহি ওৱদতি, আপত্তি পাচিত্তিযস্স. অঞ্ঞেন ধম্মেন ওৱদতি, আপত্তি দুক্কটস্স. একতোউপসম্পন্নং ওৱদতি, আপত্তি দুক্কটস্স.

১৪৯. তেন সম্মতেন ভিক্খুনা পৰিৱেণং সম্মজ্জিত্ৱা পানীযং পৰিভোজনীযং উপট্ঠাপেত্ৱা আসনং পঞ্ঞপেত্ৱা দুতিযং গহেত্ৱা নিসীদিতব্বং. ভিক্খুনীহি তত্থ গন্ত্ৱা তং ভিক্খুং অভিৱাদেত্ৱা একমন্তং নিসীদিতব্বং. তেন ভিক্খুনা পুচ্ছিতব্বা – ‘‘সমগ্গাত্থ, ভগিনিযো’’তি? সচে ‘‘সমগ্গাম্হায্যা’’তি ভণন্তি, ‘‘ৱত্তন্তি, ভগিনিযো, অট্ঠ গৰুধম্মা’’তি? সচে ‘‘ৱত্তন্তায্যা’’তি ভণন্তি, ‘‘এসো, ভগিনিযো, ওৱাদো’’তি নিয্যাদেতব্বো [নিয্যাতেতব্বো (ইতিপি)]. সচে ‘‘ন ৱত্তন্তায্যা’’তি ভণন্তি, ওসাৰেতব্বা. ‘‘ৱস্সসতূপসম্পন্নায ভিক্খুনিযা তদহুপসম্পন্নস্স ভিক্খুনো অভিৱাদনং পচ্চুট্ঠানং অঞ্জলিকম্মং সামীচিকম্মং কাতব্বং; অযম্পি ধম্মো সক্কত্ৱা গৰুকত্ৱা মানেত্ৱা পূজেত্ৱা যাৱজীৱং অনতিক্কমনীযো. ন ভিক্খুনিযা অভিক্খুকে আৱাসে ৱস্সং ৱসিতব্বং; অযম্পি ধম্মো সক্কত্ৱা গৰুকত্ৱা মানেত্ৱা পূজেত্ৱা যাৱজীৱং অনতিক্কমনীযো. অন্ৱদ্ধমাসং ভিক্খুনিযা ভিক্খুসঙ্ঘতো দ্ৱে ধম্মা পচ্চাসীসিতব্বা [পচ্চাসিংসিতব্বা (ইতিপি)] উপোসথপুচ্ছকঞ্চ ওৱাদুপসঙ্কমনঞ্চ, অযম্পি ধম্মো…পে… ৱস্সং ৱুট্ঠায ভিক্খুনিযা উভতোসঙ্ঘে তীহি ঠানেহি পৱাৰেতব্বং দিট্ঠেন ৱা সুতেন ৱা পৰিসঙ্কায ৱা; অযম্পি ধম্মো…পে… গৰুধম্মং অজ্ঝাপন্নায ভিক্খুনিযা উভতোসঙ্ঘে পক্খমানত্তং চৰিতব্বং; অযম্পি ধম্মো…পে… দ্ৱে ৱস্সানি ছসু ধম্মেসু সিক্খিতসিক্খায সিক্খমানায উভতোসঙ্ঘে উপসম্পদা পৰিযেসিতব্বা; অযম্পি ধম্মো…পে… ন ভিক্খুনিযা কেন চি পৰিযাযেন ভিক্খু অক্কোসিতব্বো পৰিভাসিতব্বো; অযম্পি ধম্মো…পে… অজ্জতগ্গে ওৱটো ভিক্খুনীনং ভিক্খূসু ৱচনপথো, অনোৱটো ভিক্খূনং ভিক্খুনীসু ৱচনপথো; অযম্পি ধম্মো সক্কত্ৱা গৰুকত্ৱা মানেত্ৱা পূজেত্ৱা যাৱজীৱং অনতিক্কমনীযো’’তি.

সচে ‘‘সমগ্গাম্হায্যা’’তি ভণন্তং অঞ্ঞং ধম্মং ভণতি, আপত্তি দুক্কটস্স. সচে ‘‘ৱগ্গাম্হায্যা’’তি ভণন্তং অট্ঠ গৰুধম্মে ভণতি, আপত্তি দুক্কটস্স. ওৱাদং অনিয্যাদেত্ৱা অঞ্ঞং ধম্মং ভণতি, আপত্তি দুক্কটস্স.

১৫০. অধম্মকম্মে অধম্মকম্মসঞ্ঞী ৱগ্গং ভিক্খুনিসঙ্ঘং ৱগ্গসঞ্ঞী ওৱদতি, আপত্তি পাচিত্তিযস্স. অধম্মকম্মে অধম্মকম্মসঞ্ঞী ৱগ্গং ভিক্খুনীসঙ্ঘং ৱেমতিকো ওৱদতি, আপত্তি পাচিত্তিযস্স. অধম্মকম্মে অধম্মকম্মসঞ্ঞী ৱগ্গং ভিক্খুনিসঙ্ঘং সমগ্গসঞ্ঞী ওৱদতি, আপত্তি পাচিত্তিযস্স.

অধম্মকম্মে ৱেমতিকো ৱগ্গং ভিক্খুনিসঙ্ঘং ৱগ্গসঞ্ঞী ওৱদতি, আপত্তি পাচিত্তিযস্স. অধম্মকম্মে ৱেমতিকো ৱগ্গং ভিক্খুনিসঙ্ঘং ৱেমতিকো ওৱদতি, আপত্তি পাচিত্তিযস্স. অধম্মকম্মে ৱেমতিকো ৱগ্গং ভিক্খুনিসঙ্ঘং সমগ্গসঞ্ঞী ওৱদতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞী ৱগ্গং ভিক্খুনিসঙ্ঘং ৱগ্গসঞ্ঞী ওৱদতি, আপত্তি পাচিত্তিযস্স. অধম্মকম্মে ধম্মকম্মসঞ্ঞী ৱগ্গং ভিক্খুনিসঙ্ঘং ৱেমতিকো ওৱদতি, আপত্তি পাচিত্তিযস্স. অধম্মকম্মে ধম্মকম্মসঞ্ঞী ৱগ্গং ভিক্খুনিসঙ্ঘং সমগ্গসঞ্ঞী ওৱদতি, আপত্তি পাচিত্তিযস্স.

অধম্মকম্মে অধম্মকম্মসঞ্ঞী সমগ্গং ভিক্খুনিসঙ্ঘং ৱগ্গসঞ্ঞী ওৱদতি, আপত্তি পাচিত্তিযস্স. অধম্মকম্মে অধম্মকম্মসঞ্ঞী সমগ্গং ভিক্খুনিসঙ্ঘং ৱেমতিকো ওৱদতি, আপত্তি পাচিত্তিযস্স. অধম্মকম্মে অধম্মকম্মসঞ্ঞী সমগ্গং ভিক্খুনিসঙ্ঘং সমগ্গসঞ্ঞী ওৱদতি, আপত্তি পাচিত্তিযস্স.

অধম্মকম্মে ৱেমতিকো সমগ্গং ভিক্খুনিসঙ্ঘং ৱগ্গসঞ্ঞী ওৱদতি…পে… ৱেমতিকো ওৱদতি…পে… সমগ্গসঞ্ঞী ওৱদতি, আপত্তি পাচিত্তিযস্স.

অধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং ৱগ্গসঞ্ঞী ওৱদতি…পে… ৱেমতিকো ওৱদতি…পে… সমগ্গসঞ্ঞী ওৱদতি, আপত্তি পাচিত্তিযস্স.

১৫১. ধম্মকম্মে অধম্মকম্মসঞ্ঞী ৱগ্গং ভিক্খুনিসঙ্ঘং ৱগ্গসঞ্ঞী ওৱদতি, আপত্তি দুক্কটস্স. ধম্মকম্মে অধম্মকম্মসঞ্ঞী ৱগ্গং ভিক্খুনিসঙ্ঘং ৱেমতিকো ওৱদতি…পে… সমগ্গসঞ্ঞী ওৱদতি, আপত্তি দুক্কটস্স.

ধম্মকম্মে ৱেমতিকো ৱগ্গং ভিক্খুনিসঙ্ঘং ৱগ্গসঞ্ঞী ওৱদতি…পে… ৱেমতিকো ওৱদতি…পে… সমগ্গসঞ্ঞী ওৱদতি, আপত্তি দুক্কটস্স.

ধম্মকম্মে ধম্মকম্মসঞ্ঞী ৱগ্গং ভিক্খুনিসঙ্ঘং ৱগ্গসঞ্ঞী ওৱদতি…পে… ৱেমতিকো ওৱদতি…পে… সমগ্গসঞ্ঞী ওৱদতি, আপত্তি দুক্কটস্স.

ধম্মকম্মে অধম্মকম্মসঞ্ঞী সমগ্গং ভিক্খুনিসঙ্ঘং ৱগ্গসঞ্ঞী ওৱদতি…পে… ৱেমতিকো ওৱদতি…পে… সমগ্গসঞ্ঞী ওৱদতি, আপত্তি দুক্কটস্স.

ধম্মকম্মে ৱেমতিকো সমগ্গং ভিক্খুনিসঙ্ঘং ৱগ্গসঞ্ঞী ওৱদতি…পে… ৱেমতিকো ওৱদতি…পে… সমগ্গসঞ্ঞী ওৱদতি, আপত্তি দুক্কটস্স.

ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং ৱগ্গসঞ্ঞী ওৱদতি, আপত্তি দুক্কটস্স. ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং ৱেমতিকো ওৱদতি, আপত্তি দুক্কটস্স. ধম্মকম্মে ধম্মকম্মসঞ্ঞী সমগ্গং ভিক্খুনিসঙ্ঘং সমগ্গসঞ্ঞী ওৱদতি, অনাপত্তি.

১৫২. অনাপত্তি উদ্দেসং দেন্তো, পৰিপুচ্ছং দেন্তো, ‘‘ওসাৰেহি অয্যা’’তি ৱুচ্চমানো, ওসাৰেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং ভিক্খুনিযো সুণন্তি, সিক্খমানায, সামণেৰিযা, উম্মত্তকস্স, আদিকম্মিকস্সাতি.

ওৱাদসিক্খাপদং নিট্ঠিতং পঠমং.