৯. জন্তাঘৰৱত্তকথা

৩৭১. তেন খো পন সমযেন ছব্বগ্গিযা ভিক্খূ জন্তাঘৰে থেৰেহি ভিক্খূহি নিৱাৰিযমানা অনাদৰিযং পটিচ্চ পহূতং কট্ঠং আৰোপেত্ৱা অগ্গিং দত্ৱা দ্ৱাৰং থকেত্ৱা দ্ৱাৰে নিসীদন্তি. ভিক্খূ [থেৰা চ ভিক্খূ (স্যা. কং.)] উণ্হাভিতত্তা দ্ৱাৰং অলভমানা মুচ্ছিতা পপতন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ জন্তাঘৰে থেৰেহি ভিক্খূহি নিৱাৰিযমানা অনাদৰিযং পটিচ্চ পহূতং কট্ঠং আৰোপেত্ৱা অগ্গিং দত্ৱা দ্ৱাৰং থকেত্ৱা দ্ৱাৰে নিসীদিস্সন্তি! ভিক্খূ উণ্হাভিতত্তা দ্ৱাৰং অলভমানা মুচ্ছিতা পপতন্তী’’তি. অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ছব্বগ্গিযা ভিক্খূ জন্তাঘৰে থেৰেহি ভিক্খূহি নিৱাৰিযমানা অনাদৰিযং পটিচ্চ পহূতং কট্ঠং আৰোপেত্ৱা অগ্গিং দত্ৱা দ্ৱাৰং থকেত্ৱা দ্ৱাৰে নিসীদন্তি; ভিক্খূ উণ্হাভিতত্তা দ্ৱাৰং অলভমানা মুচ্ছিতা পপতন্তী’’তি? ‘‘সচ্চং ভগৱা’’তি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, জন্তাঘৰে থেৰেন ভিক্খুনা নিৱাৰিযমানেন অনাদৰিযং পটিচ্চ পহূতং কট্ঠং আৰোপেত্ৱা অগ্গি দাতব্বো. যো দদেয্য, আপত্তি দুক্কটস্স. ন, ভিক্খৱে, দ্ৱাৰং থকেত্ৱা দ্ৱাৰে নিসীদিতব্বং. যো নিসীদেয্য, আপত্তি দুক্কটস্স.

৩৭২. ‘‘তেন হি, ভিক্খৱে, ভিক্খূনং জন্তাঘৰৱত্তং পঞ্ঞপেস্সামি যথা ভিক্খূহি জন্তাঘৰে সম্মা ৱত্তিতব্বং. যো পঠমং জন্তাঘৰং গচ্ছতি, সচে ছাৰিকা উস্সন্না হোতি, ছাৰিকা ছড্ডেতব্বা. সচে জন্তাঘৰং উক্লাপং হোতি, জন্তাঘৰং সম্মজ্জিতব্বং. সচে পৰিভণ্ডং উক্লাপং হোতি, পৰিভণ্ডং সম্মজ্জিতব্বং. সচে পৰিৱেণং উক্লাপং হোতি, পৰিৱেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে জন্তাঘৰসালা উক্লাপা হোতি, জন্তাঘৰসালা সম্মজ্জিতব্বা.

‘‘চুণ্ণং সন্নেতব্বং, মত্তিকা তেমেতব্বা, উদকদোণিকায উদকং আসিঞ্চিতব্বং. জন্তাঘৰং পৱিসন্তেন মত্তিকায মুখং মক্খেত্ৱা পুৰতো চ পচ্ছতো চ পটিচ্ছাদেত্ৱা জন্তাঘৰং পৱিসিতব্বং. ন থেৰে ভিক্খূ অনুপখজ্জ নিসীদিতব্বং. ন নৱা ভিক্খূ আসনেন পটিবাহিতব্বা. সচে উস্সহতি, জন্তাঘৰে থেৰানং ভিক্খূনং পৰিকম্মং কাতব্বং. জন্তাঘৰা নিক্খমন্তেন জন্তাঘৰপীঠং আদায পুৰতো চ পচ্ছতো চ পটিচ্ছাদেত্ৱা জন্তাঘৰা নিক্খমিতব্বং. সচে উস্সহতি, উদকেপি থেৰানং ভিক্খূনং পৰিকম্মং কাতব্বং. ন থেৰানং ভিক্খূনং পুৰতোপি নহাযিতব্বং, ন উপৰিতোপি নহাযিতব্বং. নহাতেন উত্তৰন্তেন ওতৰন্তানং মগ্গো দাতব্বো. যো পচ্ছা জন্তাঘৰা নিক্খমতি, সচে জন্তাঘৰং চিক্খল্লং হোতি, ধোৱিতব্বং. মত্তিকাদোণিকং ধোৱিত্ৱা জন্তাঘৰপীঠং পটিসামেত্ৱা অগ্গিং ৱিজ্ঝাপেত্ৱা দ্ৱাৰং থকেত্ৱা পক্কমিতব্বং. ইদং খো, ভিক্খৱে, ভিক্খূনং জন্তাঘৰৱত্তং যথা ভিক্খূহি জন্তাঘৰে সম্মা ৱত্তিতব্ব’’ন্তি.