১০. ৱচ্চকুটিৱত্তকথা

৩৭৩. তেন খো পন সমযেন অঞ্ঞতৰো ভিক্খু ব্ৰাহ্মণজাতিকো ৱচ্চং কত্ৱা ন ইচ্ছতি আচমেতুং – কো ইমং ৱসলং দুগ্গন্ধং আমসিস্সতীতি [আচমিস্সতীতি (ক.)]. তস্স ৱচ্চমগ্গে কিমি সণ্ঠাতি. অথ খো সো ভিক্খু ভিক্খূনং এতমত্থং আৰোচেসি. ‘‘কিং পন ত্ৱং, আৱুসো, ৱচ্চং কত্ৱা ন আচমেসী’’তি? ‘‘এৱমাৱুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ভিক্খু ৱচ্চং কত্ৱা ন আচমেস্সতী’’তি! অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ ত্ৱং, ভিক্খু, ৱচ্চং কত্ৱা ন আচমেসী’’তি? ‘‘সচ্চং ভগৱা’’তি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি – ‘‘ন, ভিক্খৱে, ৱচ্চং কত্ৱা সতি উদকে নাচমেতব্বং. যো নাচমেয্য, আপত্তি দুক্কটস্সা’’তি.

তেন খো পন সমযেন ভিক্খূ ৱচ্চকুটিযা যথাৱুড্ঢং ৱচ্চং কৰোন্তি. নৱকা ভিক্খূ পঠমতৰং আগন্ত্ৱা ৱচ্চিতা আগমেন্তি. তে ৱচ্চং সন্ধাৰেন্তা মুচ্ছিতা পপতন্তি. ভগৱতো এতমত্থং আৰোচেসুং…পে… সচ্চং কিৰ ভিক্খৱে…পে… সচ্চং ভগৱাতি…পে… ‘‘ন, ভিক্খৱে, ৱচ্চকুটিযা যথাৱুড্ঢং ৱচ্চো কাতব্বো. যো কৰেয্য, আপত্তি দুক্কটস্স. অনুজানামি, ভিক্খৱে, আগতপটিপাটিযা ৱচ্চং কাতু’’ন্তি.

তেন খো পন সমযেন ছব্বগ্গিযা ভিক্খূ অতিসহসাপি ৱচ্চকুটিং পৱিসন্তি, উব্ভজিত্ৱাপি [উব্ভুজ্জিত্ৱাপি (সী.), উব্ভুজিত্ৱা (স্যা.)] পৱিসন্তি, নিত্থুনন্তাপি ৱচ্চং কৰোন্তি, দন্তকট্ঠং খাদন্তাপি ৱচ্চং কৰোন্তি, বহিদ্ধাপি ৱচ্চদোণিকায ৱচ্চং কৰোন্তি, বহিদ্ধাপি পস্সাৱদোণিকায পস্সাৱং কৰোন্তি, পস্সাৱদোণিকাযপি খেড়ং কৰোন্তি, ফৰুসেনপি কট্ঠেন অৱলেখন্তি, অৱলেখনকট্ঠম্পি ৱচ্চকূপম্হি পাতেন্তি, অতিসহসাপি নিক্খমন্তি, উব্ভজিত্ৱাপি নিক্খমন্তি, চপুচপুকাৰকম্পি আচমেন্তি, আচমনসৰাৱকেপি উদকং সেসেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ অতিসহসাপি ৱচ্চকুটিং পৱিসিস্সন্তি, উব্ভজিত্ৱাপি পৱিসিস্সন্তি, নিত্থুনন্তাপি ৱচ্চং কৰিস্সন্তি, দন্তকট্ঠং খাদন্তাপি ৱচ্চং কৰিস্সন্তি, বহিদ্ধাপি ৱচ্চদোণিকায ৱচ্চং কৰিস্সন্তি, বহিদ্ধাপি পস্সাৱদোণিকায পস্সাৱং কৰিস্সন্তি, পস্সাৱদোণিকাযপি খেড়ং কৰিস্সন্তি, ফৰুসেনপি কট্ঠেন অৱলেখিস্সন্তি, অৱলেখনকট্ঠম্পি ৱচ্চকূপম্হি পাতেস্সন্তি, অতিসহসাপি নিক্খমিস্সন্তি, উব্ভজিত্ৱাপি নিক্খমিস্সন্তি, চপুচপুকাৰকম্পি আচমেস্সন্তি, আচমনসৰাৱকেপি উদকং সেসেস্সন্তী’’তি! অথ খো তে ভিক্খূ ভগৱতো এতমত্থং আৰোচেসুং…পে… সচ্চং কিৰ, ভিক্খৱে…পে… সচ্চং ভগৱাতি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৩৭৪. ‘‘তেন হি, ভিক্খৱে, ভিক্খূনং ৱচ্চকুটিৱত্তং পঞ্ঞপেস্সামি যথা ভিক্খূহি ৱচ্চকুটিযা সম্মা ৱত্তিতব্বং. যো ৱচ্চকুটিং গচ্ছতি তেন বহি ঠিতেন [বহি ঠিতেন (সী. ক.)] উক্কাসিতব্বং. অন্তো নিসিন্নেনপি উক্কাসিতব্বং. চীৱৰৱংসে ৱা চীৱৰৰজ্জুযা ৱা চীৱৰং নিক্খিপিত্ৱা সাধুকং অতৰমানেন ৱচ্চকুটী পৱিসিতব্বা. নাতিসহসা পৱিসিতব্বা. ন উব্ভজিত্ৱা পৱিসিতব্বা. ৱচ্চপাদুকায ঠিতেন উব্ভজিতব্বং. ন নিত্থুনন্তেন ৱচ্চো কাতব্বো. ন দন্তকট্ঠং খাদন্তেন ৱচ্চো কাতব্বো. ন বহিদ্ধা ৱচ্চদোণিকায ৱচ্চো কাতব্বো. ন বহিদ্ধা পস্সাৱদোণিকায পস্সাৱো কাতব্বো. ন পস্সাৱদোণিকায খেড়ো কাতব্বো. ন ফৰুসেন কট্ঠেন অৱলেখিতব্বং. ন অৱলেখনকট্ঠং ৱচ্চকূপম্হি পাতেতব্বং. ৱচ্চপাদুকায ঠিতেন পটিচ্ছাদেতব্বং. নাতিসহসা নিক্খমিতব্বং. ন উব্ভজিত্ৱা নিক্খমিতব্বং. আচমনপাদুকায ঠিতেন উব্ভজিতব্বং. ন চপুচপুকাৰকং আচমেতব্বং. ন আচমনসৰাৱকে উদকং সেসেতব্বং. আচমনপাদুকায ঠিতেন পটিচ্ছাদেতব্বং.

‘‘সচে ৱচ্চকুটি উহতা [ঊহতা (সী. স্যা.)] হোতি, ধোৱিতব্বা. সচে অৱলেখনপিধৰো পূৰো হোতি, অৱলেখনকট্ঠং ছড্ডেতব্বং. সচে ৱচ্চকুটি উক্লাপা হোতি, ৱচ্চকুটি সম্মজ্জিতব্বা. সচে পৰিভণ্ডং উক্লাপং হোতি, পৰিভণ্ডং সম্মজ্জিতব্বং. সচে পৰিৱেণং উক্লাপং হোতি, পৰিৱেণং সম্মজ্জিতব্বং. সচে কোট্ঠকো উক্লাপো হোতি, কোট্ঠকো সম্মজ্জিতব্বো. সচে আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং. ইদং খো, ভিক্খৱে, ভিক্খূনং ৱচ্চকুটিৱত্তং যথা ভিক্খূহি ৱচ্চকুটিযা সম্মা ৱত্তিতব্ব’’ন্তি.