৬. পিণ্ডচাৰিকৱত্তকথা

৩৬৫. তেন খো পন সমযেন পিণ্ডচাৰিকা ভিক্খূ দুন্নিৱত্থা দুপ্পাৰুতা অনাকপ্পসম্পন্না পিণ্ডায চৰন্তি, অসল্লক্খেত্ৱাপি নিৱেসনং পৱিসন্তি, অসল্লক্খেত্ৱাপি নিক্খমন্তি, অতিসহসাপি পৱিসন্তি, অতিসহসাপি নিক্খমন্তি, অতিদূৰেপি তিট্ঠন্তি, অচ্চাসন্নেপি তিট্ঠন্তি, অতিচিৰম্পি তিট্ঠন্তি, অতিলহুম্পি নিৱত্তন্তি. অঞ্ঞতৰোপি পিণ্ডচাৰিকো ভিক্খু অসল্লক্খেত্ৱা নিৱেসনং পাৱিসি. সো চ দ্ৱাৰং মঞ্ঞমানো অঞ্ঞতৰং ওৱৰকং পাৱিসি. তস্মিম্পি ওৱৰকে ইত্থী নগ্গা উত্তানা নিপন্না হোতি. অদ্দসা খো সো ভিক্খু তং ইত্থিং নগ্গং উত্তানং নিপন্নং. দিস্ৱান – ‘‘নযিদং দ্ৱাৰং, ওৱৰকং ইদ’’ন্তি তম্হা ওৱৰকা নিক্খমি. অদ্দসা খো তস্সা ইত্থিযা সামিকো তং ইত্থিং নগ্গং উত্তানং নিপন্নং. দিস্ৱান – ‘‘ইমিনা মে ভিক্খুনা পজাপতী দূসিতা’’তি তং ভিক্খুং গহেত্ৱা আকোটেসি. অথ খো সা ইত্থী তেন সদ্দেন পটিবুজ্ঝিত্ৱা তং পুৰিসং এতদৱোচ – ‘‘কিস্স ত্ৱং, অয্য, ইমং ভিক্খুং আকোটেসী’’তি? ‘‘ইমিনাসি ত্ৱং ভিক্খুনা দূসিতা’’তি? ‘‘নাহং, অয্য, ইমিনা ভিক্খুনা দূসিতা; অকাৰকো সো ভিক্খূ’’তি তং ভিক্খুং মুঞ্চাপেসি. অথ খো সো ভিক্খু আৰামং গন্ত্ৱা ভিক্খূনং এতমত্থং আৰোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম পিণ্ডচাৰিকা ভিক্খূ দুন্নিৱত্থা দুপ্পাৰুতা অনাকপ্পসম্পন্না পিণ্ডায চৰিস্সন্তি, অসল্লক্খেত্ৱাপি নিৱেসনং পৱিসিস্সন্তি, অসল্লক্খেত্ৱাপি নিক্খমিস্সন্তি, অতিসহসাপি পৱিসিস্সন্তি, অতিসহসাপি নিক্খমিস্সন্তি, অতিদূৰেপি তিট্ঠিস্সন্তি, অচ্চাসন্নেপি তিট্ঠিস্সন্তি, অতিচিৰম্পি তিট্ঠিস্সন্তি, অতিলহুম্পি নিৱত্তিস্সন্তী’’তি! অথ খো তে ভিক্খূ ভগৱতো এতমত্থং আৰোচেসুং…পে… সচ্চং কিৰ, ভিক্খৱে…পে… সচ্চং ভগৱাতি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৩৬৬. ‘‘তেন হি, ভিক্খৱে, পিণ্ডচাৰিকানং ভিক্খূনং ৱত্তং পঞ্ঞাপেস্সামি যথা পিণ্ডচাৰিকেহি ভিক্খূহি সম্মা ৱত্তিতব্বং. পিণ্ডচাৰিকেন, ভিক্খৱে, ভিক্খুনা – ‘ইদানি গামং পৱিসিস্সামী’তি তিমণ্ডলং পটিচ্ছাদেন্তেন পৰিমণ্ডলং নিৱাসেত্ৱা কাযবন্ধনং বন্ধিত্ৱা সগুণং কত্ৱা সঙ্ঘাটিযো পাৰুপিত্ৱা গণ্ঠিকং পটিমুঞ্চিত্ৱা ধোৱিত্ৱা পত্তং গহেত্ৱা সাধুকং অতৰমানেন গামো পৱিসিতব্বো.

‘‘নিৱেসনং পৱিসন্তেন সল্লক্খেতব্বং – ‘ইমিনা পৱিসিস্সামি, ইমিনা নিক্খমিস্সামী’তি. নাতিসহসা পৱিসিতব্বং. নাতিসহসা নিক্খমিতব্বং. নাতিদূৰে ঠাতব্বং. নাচ্চাসন্নে ঠাতব্বং. নাতিচিৰং ঠাতব্বং. নাতিলহুং নিৱত্তিতব্বং. ঠিতকেন সল্লক্খেতব্বং – ‘ভিক্খং দাতুকামা ৱা অদাতুকামা ৱা’তি. সচে কম্মং ৱা নিক্খিপতি, আসনা ৱা ৱুট্ঠাতি, কটচ্ছুং ৱা পৰামসতি, ভাজনং ৱা পৰামসতি, ঠপেতি [ঠাপেতি (ক.)] ৱা – দাতুকামস্সাতি [দাতুকামিযাতি (স্যা.), দাতুকামা ৱিযাতি (সী.)] ঠাতব্বং. ভিক্খায দিয্যমানায ৱামেন হত্থেন সঙ্ঘাটিং উচ্চাৰেত্ৱা দক্খিণেন হত্থেন পত্তং পণামেত্ৱা উভোহি হত্থেহি পত্তং পটিগ্গহেত্ৱা ভিক্খা পটিগ্গহেতব্বা. ন চ ভিক্খাদাযিকায মুখং উল্লোকেতব্বং [ওলোকেতব্বং (স্যা.)]. সল্লক্খেতব্বং – ‘সূপং দাতুকামা ৱা অদাতুকামা ৱা’তি. সচে কটচ্ছুং ৱা পৰামসতি, ভাজনং ৱা পৰামসতি, ঠপেতি ৱা – দাতুকামস্সাতি ঠাতব্বং. ভিক্খায দিন্নায সঙ্ঘাটিযা পত্তং পটিচ্ছাদেত্ৱা সাধুকং অতৰমানেন নিৱত্তিতব্বং.

‘‘সুপ্পটিচ্ছন্নেন অন্তৰঘৰে গন্তব্বং. সুসংৱুতেন অন্তৰঘৰে গন্তব্বং. ওক্খিত্তচক্খুনা অন্তৰঘৰে গন্তব্বং. ন উক্খিত্তকায অন্তৰঘৰে গন্তব্বং. ন উজ্জগ্ঘিকায অন্তৰঘৰে গন্তব্বং. অপ্পসদ্দেন অন্তৰঘৰে গন্তব্বং. ন কাযপ্পচালকং অন্তৰঘৰে গন্তব্বং. ন বাহুপ্পচালকং অন্তৰঘৰে গন্তব্বং. ন সীসপ্পচালকং অন্তৰঘৰে গন্তব্বং. ন খম্ভকতেন অন্তৰঘৰে গন্তব্বং. ন ওগুণ্ঠিতেন অন্তৰঘৰে গন্তব্বং. ন উক্কুটিকায অন্তৰঘৰে গন্তব্বং. যো পঠমং গামতো পিণ্ডায পটিক্কমতি, তেন আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, অৱক্কাৰপাতি ধোৱিত্ৱা উপট্ঠাপেতব্বা, পানীযং পৰিভোজনীযং উপট্ঠাপেতব্বং. যো পচ্ছা গামতো পিণ্ডায পটিক্কমতি, সচে হোতি ভুত্তাৱসেসো, সচে আকঙ্খতি, ভুঞ্জিতব্বং. নো চে আকঙ্খতি, অপ্পহৰিতে ৱা ছড্ডেতব্বং, অপ্পাণকে ৱা উদকে ওপিলাপেতব্বং. তেন আসনং উদ্ধৰিতব্বং, পাদোদকং পাদপীঠং পাদকথলিকং পটিসামেতব্বং, অৱক্কাৰপাতি ধোৱিত্ৱা পটিসামেতব্বা, পানীযং পৰিভোজনীযং পটিসামেতব্বং, ভত্তগ্গং সম্মজ্জিতব্বং. যো পস্সতি পানীযঘটং ৱা পৰিভোজনীযঘটং ৱা ৱচ্চঘটং ৱা ৰিত্তং তুচ্ছং তেন উপট্ঠাপেতব্বং. সচস্স হোতি অৱিসয্হং, হত্থৱিকাৰেন দুতিযং আমন্তেত্ৱা হত্থৱিলঙ্ঘকেন উপট্ঠাপেতব্বং, ন চ তপ্পচ্চযা ৱাচা ভিন্দিতব্বা. ইদং খো, ভিক্খৱে, পিণ্ডচাৰিকানং ভিক্খূনং ৱত্তং যথা পিণ্ডচাৰিকেহি ভিক্খূহি সম্মা ৱত্তিতব্ব’’ন্তি.