৭. আৰঞ্ঞিকৱত্তকথা

৩৬৭. তেন খো পন সমযেন সম্বহুলা ভিক্খূ অৰঞ্ঞে ৱিহৰন্তি. তে নেৱ পানীযং উপট্ঠাপেন্তি, ন পৰিভোজনীযং উপট্ঠাপেন্তি, ন অগ্গিং উপট্ঠাপেন্তি, ন অৰণিসহিতং উপট্ঠাপেন্তি, ন নক্খত্তপদানি জানন্তি, ন দিসাভাগং জানন্তি. চোৰা তত্থ গন্ত্ৱা তে ভিক্খূ এতদৱোচুং – ‘‘অত্থি, ভন্তে, পানীয’’ন্তি? ‘‘নত্থাৱুসো’’তি. ‘‘অত্থি, ভন্তে, পৰিভোজনীয’’ন্তি? ‘‘নত্থাৱুসো’’তি. ‘‘অত্থি, ভন্তে, অগ্গী’’তি? ‘‘নত্থাৱুসো’’তি. ‘‘অত্থি, ভন্তে, অৰণিসহিত’’ন্তি? ‘‘নত্থাৱুসো’’তি. ( ) [(অত্থি ভন্তে নক্খত্তপদানীতি, ন জানাম আৱুসোতি, অত্থি ভন্তে দিসাভাগন্তি, ন জানাম আৱুসোতি.) সী. ৱিমতিটীকায পন সমেতি] ‘‘কেনজ্জ, ভন্তে, যুত্ত’’ন্তি? ‘‘ন খো মযং, আৱুসো, জানামা’’তি. ‘‘কতমাযং, ভন্তে, দিসা’’তি? ‘‘ন খো মযং, আৱুসো, জানামা’’তি. অথ খো তে চোৰা – ‘নেৱিমেসং পানীযং অত্থি, ন পৰিভোজনীযং অত্থি, ন অগ্গি অত্থি, ন অৰণিসহিতং অত্থি, ন নক্খত্তপদানি জানন্তি, ন দিসাভাগং জানন্তি; চোৰা ইমে, নযিমে ভিক্খূ’তি – আকোটেত্ৱা পক্কমিংসু. অথ খো তে ভিক্খূ ভিক্খূনং এতমত্থং আৰোচেসুং. ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি –

৩৬৮. ‘‘তেন হি, ভিক্খৱে, আৰঞ্ঞিকানং ভিক্খূনং ৱত্তং পঞ্ঞপেস্সামি যথা আৰঞ্ঞিকেহি ভিক্খূহি সম্মা ৱত্তিতব্বং. আৰঞ্ঞিকেন, ভিক্খৱে, ভিক্খুনা কালস্সেৱ উট্ঠায পত্তং থৱিকায পক্খিপিত্ৱা অংসে আলগ্গেত্ৱা চীৱৰং খন্ধে কৰিত্ৱা উপাহনা আৰোহিত্ৱা দাৰুভণ্ডং মত্তিকাভণ্ডং পটিসামেত্ৱা দ্ৱাৰৱাতপানং থকেত্ৱা সেনাসনা ওতৰিতব্বং – ইদানি গামং পৱিসিস্সামীতি. উপাহনা ওমুঞ্চিত্ৱা নীচং কত্ৱা পপ্ফোটেত্ৱা থৱিকায পক্খিপিত্ৱা অংসে আলগ্গেত্ৱা তিমণ্ডলং পটিচ্ছাদেন্তেন পৰিমণ্ডলং নিৱাসেত্ৱা কাযবন্ধনং বন্ধিত্ৱা সগুণং কত্ৱা সঙ্ঘাটিযো পাৰুপিত্ৱা গণ্ঠিকং পটিমুঞ্চিত্ৱা ধোৱিত্ৱা পত্তং গহেত্ৱা সাধুকং অতৰমানেন গামো পৱিসিতব্বো. সুপ্পটিচ্ছন্নেন অন্তৰঘৰে গন্তব্বং…পে… ন খম্ভকতেন অন্তৰঘৰে গন্তব্বং. ন ওগুণ্ঠিতেন অন্তৰঘৰে গন্তব্বং. ন উক্কুটিকায অন্তৰঘৰে গন্তব্বং.

‘‘নিৱেসনং পৱিসন্তেন সল্লক্খেতব্বং – ‘ইমিনা পৱিসিস্সামি, ইমিনা নিক্খমিস্সামী’তি. নাতিসহসা পৱিসিতব্বং. নাতিসহসা নিক্খমিতব্বং. নাতিদূৰে ঠাতব্বং. নাচ্চাসন্নে ঠাতব্বং. নাতিচিৰং ঠাতব্বং. নাতিলহুং নিৱত্তিতব্বং. ঠিতকেন সল্লক্খেতব্বং – ‘ভিক্খং দাতুকামা ৱা অদাতুকামা ৱা’তি. সচে কম্মং ৱা নিক্খিপতি, আসনা ৱা ৱুট্ঠাতি, কটচ্ছুং ৱা পৰামসতি, ভাজনং ৱা পৰামসতি, ঠপেতি ৱা – দাতুকামস্সাতি ঠাতব্বং. ভিক্খায দিয্যমানায ৱামেন হত্থেন সঙ্ঘাটিং উচ্চাৰেত্ৱা দক্খিণেন হত্থেন পত্তং পণামেত্ৱা উভোহি হত্থেহি পত্তং পটিগ্গহেত্ৱা ভিক্খা পটিগ্গহেতব্বা. ন চ ভিক্খাদাযিকায মুখং উল্লোকেতব্বং. সল্লক্খেতব্বং – ‘সূপং দাতুকামা ৱা অদাতুকামা ৱা’তি. সচে কটচ্ছু ৱা পৰামসতি, ভাজনং ৱা পৰামসতি, ঠপেতি ৱা – দাতুকামস্সাতি ঠাতব্বং. ভিক্খায দিন্নায সঙ্ঘাটিযা পত্তং পটিচ্ছাদেত্ৱা সাধুকং অতৰমানেন নিৱত্তিতব্বং.

‘‘সুপ্পটিচ্ছন্নেন অন্তৰঘৰে গন্তব্বং…পে… ন উক্কুটিকায অন্তৰঘৰে গন্তব্বং. গামতো নিক্খমিত্ৱা পত্তং থৱিকায পক্খিপিত্ৱা অংসে আলগ্গেত্ৱা চীৱৰং সঙ্ঘৰিত্ৱা সীসে কৰিত্ৱা উপাহনা আৰোহিত্ৱা গন্তব্বং.

‘‘আৰঞ্ঞিকেন, ভিক্খৱে, ভিক্খুনা পানীযং উপট্ঠাপেতব্বং, পৰিভোজনীযং উপট্ঠাপেতব্বং, অগ্গি উপট্ঠাপেতব্বো, অৰণিসহিতং উপট্ঠাপেতব্বং, কত্তৰদণ্ডো উপট্ঠাপেতব্বো, নক্খত্তপদানি উগ্গহেতব্বানি – সকলানি ৱা একদেসানি ৱা, দিসাকুসলেন ভৱিতব্বং. ইদং খো, ভিক্খৱে, আৰঞ্ঞিকানং ভিক্খূনং ৱত্তং যথা আৰঞ্ঞিকেহি ভিক্খূহি সম্মা ৱত্তিতব্ব’’ন্তি.