৫. ভত্তগ্গৱত্তকথা

৩৬৩. তেন খো পন সমযেন ছব্বগ্গিযা ভিক্খূ দুন্নিৱত্থা দুপ্পাৰুতা অনাকপ্পসম্পন্না ভত্তগ্গং গচ্ছন্তি, ৱোক্কম্মপি থেৰানং ভিক্খূনং পুৰতো পুৰতো গচ্ছন্তি, থেৰেপি ভিক্খূ অনুপখজ্জ নিসীদন্তি, নৱেপি ভিক্খূ আসনেন পটিবাহন্তি, সঙ্ঘাটিম্পি ওত্থৰিত্ৱা অন্তৰঘৰে নিসীদন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম ছব্বগ্গিযা ভিক্খূ দুন্নিৱত্থা দুপ্পাৰুতা অনাকপ্পসম্পন্না ভত্তগ্গং গচ্ছিস্সন্তি, ৱোক্কম্মপি থেৰানং ভিক্খূনং পুৰতো পুৰতো গচ্ছিস্সন্তি, থেৰেপি ভিক্খূ অনুপখজ্জ নিসীদিস্সন্তি, নৱেপি ভিক্খূ আসনেনপি পটিবাহিস্সন্তি, সঙ্ঘাটিম্পি ওত্থৰিত্ৱা অন্তৰঘৰে নিসীদিস্সন্তী’’তি! অথ খো তে ভিক্খূ ভগৱতো এতমত্থং আৰোচেসুং…পে… ‘‘সচ্চং কিৰ, ভিক্খৱে, ছব্বগ্গিযা ভিক্খূ দুন্নিৱত্থা দুপ্পাৰুতা অনাকপ্পসম্পন্না ভত্তগ্গং গচ্ছন্তি, ৱোক্কম্মপি থেৰানং ভিক্খূনং পুৰতো পুৰতো গচ্ছন্তি, থেৰেপি ভিক্খূ অনুপখজ্জ নিসীদন্তি, নৱেপি ভিক্খূ আসনেন পটিবাহন্তি, সঙ্ঘাটিম্পি ওত্থৰিত্ৱা অন্তৰঘৰে নিসীদন্তী’’তি? ‘‘সচ্চং ভগৱা’’তি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৩৬৪. ‘‘তেন হি, ভিক্খৱে, ভিক্খূনং ভত্তগ্গৱত্তং পঞ্ঞপেস্সামি যথা ভিক্খূহি ভত্তগ্গে সম্মা ৱত্তিতব্বং. সচে আৰামে কালো আৰোচিতো হোতি, তিমণ্ডলং পটিচ্ছাদেন্তেন পৰিমণ্ডলং নিৱাসেত্ৱা কাযবন্ধনং বন্ধিত্ৱা সগুণং কত্ৱা সঙ্ঘাটিযো পাৰুপিত্ৱা গণ্ঠিকং পটিমুঞ্চিত্ৱা ধোৱিত্ৱা পত্তং গহেত্ৱা সাধুকং অতৰমানেন গামো পৱিসিতব্বো.

‘‘ন ৱোক্কম্ম থেৰানং ভিক্খূনং পুৰতো পুৰতো গন্তব্বং. সুপ্পটিচ্ছন্নেন অন্তৰঘৰে গন্তব্বং. সুসংৱুতেন অন্তৰঘৰে গন্তব্বং. ওক্খিত্তচক্খুনা অন্তৰঘৰে গন্তব্বং. ন উক্খিত্তকায অন্তৰঘৰে গন্তব্বং. ন উজ্জগ্ঘিকায অন্তৰঘৰে গন্তব্বং. অপ্পসদ্দেন অন্তৰঘৰে গন্তব্বং. ন কাযপ্পচালকং অন্তৰঘৰে গন্তব্বং. ন বাহুপ্পচালকং অন্তৰঘৰে গন্তব্বং. ন সীসপ্পচালকং অন্তৰঘৰে গন্তব্বং. ন খম্ভকতেন অন্তৰঘৰে গন্তব্বং. ন ওগুণ্ঠিতেন অন্তৰঘৰে গন্তব্বং. ন উক্কুটিকায অন্তৰঘৰে গন্তব্বং.

‘‘সুপ্পটিচ্ছন্নেন অন্তৰঘৰে নিসীদিতব্বং. সুসংৱুতেন অন্তৰঘৰে নিসীদিতব্বং. ওক্খিত্তচক্খুনা অন্তৰঘৰে নিসীদিতব্বং. ন উক্খিত্তকায অন্তৰঘৰে নিসীদিতব্বং ন উজ্জগ্ঘিকায অন্তৰঘৰে নিসীদিতব্বং, অপ্পসদ্দেন অন্তৰঘৰে নিসীদিতব্ব. ন কাযপ্পচালকং অন্তৰঘৰে নিসীদিতব্বং. ন বাহুপ্পচালকং অন্তৰঘৰে নিসীদিতব্বং. ন সীসপ্পচালকং অন্তৰঘৰে নিসীদিতব্বং. ন খম্ভকতেন অন্তৰঘৰে নিসীদিতব্বং. ন ওগুণ্ঠিতেন অন্তৰঘৰে নিসীদিতব্বং. ন পল্লত্থিকায অন্তৰঘৰে নিসীদিতব্বং. ন থেৰে ভিক্খূ অনুপখজ্জ নিসীদিতব্বং. ন নৱা ভিক্খূ আসনেন পটিবাহিতব্বা. ন সঙ্ঘাটিং ওত্থৰিত্ৱা অন্তৰঘৰে নিসীদিতব্বং.

‘‘উদকে দিয্যমানে উভোহি হত্থেহি পত্তং পটিগ্গহেত্ৱা উদকং পটিগ্গহেতব্বং. নীচং কত্ৱা সাধুকং অপ্পটিঘংসন্তেন পত্তো ধোৱিতব্বো. সচে উদকপ্পটিগ্গাহকো হোতি, নীচং কত্ৱা উদকপ্পটিগ্গহে উদকং আসিঞ্চিতব্বং – মা উদকপ্পটিগ্গাহকো উদকেন ওসিঞ্চি [ওসিঞ্চিয্যী (ক.)], মা সামন্তা ভিক্খূ উদকেন ওসিঞ্চিংসু [ওসিঞ্চিয্যিংসু (ক.)], মা সঙ্ঘাটি উদকেন ওসিঞ্চীতি. সচে উদকপ্পটিগ্গাহকো ন হোতি, নীচং কত্ৱা ছমায উদকং আসিঞ্চিতব্বং – মা সামন্তা ভিক্খূ উদকেন ওসিঞ্চিংসু, মা সঙ্ঘাটি উদকেন ওসিঞ্চীতি.

‘‘ওদনে দিয্যমানে উভোহি হত্থেহি পত্তং পটিগ্গহেত্ৱা ওদনো পটিগ্গহেতব্বো, সূপস্স ওকাসো কাতব্বো. সচে হোতি সপ্পি ৱা তেলং ৱা উত্তৰিভঙ্গং ৱা, থেৰেন ৱত্তব্বো – ‘সব্বেসং সমকং সম্পাদেহী’তি. সক্কচ্চং পিণ্ডপাতো পটিগ্গহেতব্বো. পত্তসঞ্ঞিনা পিণ্ডপাতো পটিগ্গহেতব্বো. সমসূপকো পিণ্ডপাতো পটিগ্গহেতব্বো. সমতিত্তিকো পিণ্ডপাতো পটিগ্গহেতব্বো.

‘‘ন তাৱ থেৰেন ভুঞ্জিতব্বং যাৱ ন সব্বেসং ওদনো সম্পত্তো হোতি. সক্কচ্চং পিণ্ডপাতো ভুঞ্জিতব্বো. পত্তসঞ্ঞিনা পিণ্ডপাতো ভুঞ্জিতব্বো. সপদানং পিণ্ডপাতো ভুঞ্জিতব্বো. সমসূপকো পিণ্ডপাতো ভুঞ্জিতব্বো. ন থূপকতো ওমদ্দিত্ৱা পিণ্ডিপাতো ভুঞ্জিতব্বো. ন সূপং ৱা ব্যঞ্জনং ৱা ওদনেন পটিচ্ছাদেতব্বং ভিয্যোকম্যতং উপাদায. ন সূপং ৱা ওদনং ৱা অগিলানেন অত্তনো অত্থায ৱিঞ্ঞাপেত্ৱা ভুঞ্জিতব্বং. ন উজ্ঝানসঞ্ঞিনা পৰেসং পত্তো ওলোকেতব্বো. নাতিমহন্তো কবড়ো কাতব্বো. পৰিমণ্ডলো আলোপো কাতব্বো. ন অনাহটে কবড়ে মুখদ্ৱাৰং ৱিৱৰিতব্বং. ন ভুঞ্জমানেন সব্বো হত্থো মুখে পক্খিপিতব্বো. ন সকবড়েন মুখেন ব্যাহৰিতব্বং. ন পিণ্ডুক্খেপকং ভুঞ্জিতব্বং. ন কবড়াৱচ্ছেদকং ভুঞ্জিতব্বং. ন অৱগণ্ডকাৰকং ভুঞ্জিতব্বং. ন হত্থনিদ্ধুনকং ভুঞ্জিতব্বং. ন সিত্থাৱকাৰকং ভুঞ্জিতব্বং. ন জিৱ্হানিচ্ছাৰকং ভুঞ্জিতব্বং. ন চপুচপুকাৰকং ভুঞ্জিতব্বং. ন সুৰুসুৰুকাৰকং ভুঞ্জিতব্বং. ন হত্থনিল্লেহকং ভুঞ্জিতব্বং. ন পত্তনিল্লেহকং ভুঞ্জিতব্বং. ন ওট্ঠনিল্লেহকং ভুঞ্জিতব্বং.

‘‘ন সামিসেন হত্থেন পানীযথালকো পটিগ্গহেতব্বো. ন তাৱ থেৰেন উদকং পটিগ্গহেতব্বং যাৱ ন সব্বেৱ ভুত্তাৱিনো হোন্তি. উদকে দিয্যমানে উভোহি হত্থেহি পত্তং পটিগ্গহেত্ৱা উদকং পটিগ্গহেতব্বং. নীচং কত্ৱা সাধুকং অপ্পটিঘংসন্তেন পত্তো ধোৱিতব্বো. সচে উদকপ্পটিগ্গাহকো হোতি, নীচং কত্ৱা উদকপ্পটিগ্গহে উদকং আসিঞ্চিতব্বং – মা উদকপ্পটিগ্গাহকো উদকেন ওসিঞ্চি, মা সামন্তা ভিক্খূ উদকেন ওসিঞ্চিংসু, মা সঙ্ঘাটি উদকেন ওসিঞ্চীতি. সচে উদকপ্পটিগ্গাহকো ন হোতি, নীচং কত্ৱা ছমায উদকং আসিঞ্চিতব্বং – মা সামন্তা ভিক্খূ উদকেন ওসিঞ্চিংসু, মা সঙ্ঘাটি উদকেন ওসিঞ্চীতি. ন সসিত্থকং পত্তধোৱনং অন্তৰঘৰে ছড্ডেতব্বং.

‘‘নিৱত্তন্তেন নৱকেহি ভিক্খূহি পঠমতৰং নিৱত্তিতব্বং. পচ্ছা থেৰেহি সুপ্পটিচ্ছন্নেন অন্তৰঘৰে গন্তব্বং. সুসংৱুতেন অন্তৰঘৰে গন্তব্বং. ওক্খিত্তচক্খুনা অন্তৰঘৰে গন্তব্বং. ন উক্খিত্তকায অন্তৰঘৰে গন্তব্বং. ন উজ্জগ্ঘিকায অন্তৰঘৰে গন্তব্বং. অপ্পসদ্দেন অন্তৰঘৰে গন্তব্বং. ন কাযপ্পচালকং অন্তৰঘৰে গন্তব্বং. ন বাহুপ্পচালকং অন্তৰঘৰে গন্তব্বং. ন সীসপ্পচালকং অন্তৰঘৰে গন্তব্বং. ন খম্ভকতেন অন্তৰঘৰে গন্তব্বং. ন ওগুণ্ঠিতেন অন্তৰঘৰে গন্তব্বং. ন উক্কুটিকায অন্তৰঘৰে গন্তব্বং. ইদং খো, ভিক্খৱে, ভিক্খূনং ভত্তগ্গৱত্তং যথা ভিক্খূহি ভত্তগ্গে সম্মা ৱত্তিতব্ব’’ন্তি.

পঠমভাণৱাৰো নিট্ঠিতো.