৪. অনুমোদনৱত্তকথা

৩৬২. তেন খো পন সমযেন ভিক্খূ ভত্তগ্গে ন অনুমোদন্তি. মনুস্সা উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম সমণা সক্যপুত্তিযা ভত্তগ্গে ন অনুমোদিস্সন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৱিপাচেন্তানং. অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ভত্তগ্গে অনুমোদিতু’’ন্তি. অথ খো তেসং ভিক্খূনং এতদহোসি – ‘‘কেন নু খো ভত্তগ্গে অনুমোদিতব্ব’’ন্তি? ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, থেৰেন ভিক্খুনা ভত্তগ্গে অনুমোদিতু’’ন্তি.

তেন খো পন সমযেন অঞ্ঞতৰস্স পূগস্স সঙ্ঘভত্তং হোতি. আযস্মা সাৰিপুত্তো সঙ্ঘত্থেৰো হোতি. ভিক্খূ – ‘ভগৱতা অনুঞ্ঞাতং থেৰেন ভিক্খুনা ভত্তগ্গে অনুমোদিতু’ন্তি – আযস্মন্তং সাৰিপুত্তং এককং ওহায পক্কমিংসু. অথ খো আযস্মা সাৰিপুত্তো তে মনুস্সে পটিসম্মোদিত্ৱা পচ্ছা এককো অগমাসি. অদ্দসা খো ভগৱা আযস্মন্তং সাৰিপুত্তং দূৰতোৱ এককং আগচ্ছন্তং. দিস্ৱান আযস্মন্তং সাৰিপুত্তং এতদৱোচ – ‘‘কচ্চি, সাৰিপুত্ত, ভত্তং ইদ্ধং অহোসী’’তি? ‘‘ইদ্ধং খো, ভন্তে, ভত্তং অহোসি; অপিচ মং ভিক্খূ এককং ওহায পক্কন্তা’’তি. অথ খো ভগৱা এতস্মিং নিদানে এতস্মিং পকৰণে ধম্মিং কথং কত্ৱা ভিক্খূ আমন্তেসি – ‘‘অনুজানামি, ভিক্খৱে, ভত্তগ্গে চতূহি পঞ্চহি থেৰানুথেৰেহি ভিক্খূহি আগমেতু’’ন্তি.

তেন খো পন সমযেন অঞ্ঞতৰো থেৰো ভত্তগ্গে ৱচ্চিতো আগমেসি. সো ৱচ্চং সন্ধাৰেতুং অসক্কোন্তো মুচ্ছিতো পপতি. ভগৱতো এতমত্থং আৰোচেসুং. ‘‘অনুজানামি, ভিক্খৱে, সতি কৰণীযে আনন্তৰিকং ভিক্খুং আপুচ্ছিত্ৱা গন্তু’’ন্তি.