৩. গমিকৱত্তকথা

৩৬০. তেন খো পন সমযেন গমিকা ভিক্খূ দাৰুভণ্ডং মত্তিকাভণ্ডং অপ্পটিসামেত্ৱা দ্ৱাৰৱাতপানং ৱিৱৰিত্ৱা সেনাসনং অনাপুচ্ছা পক্কমন্তি. দাৰুভণ্ডং মত্তিকাভণ্ডং নস্সতি. সেনাসনং অগুত্তং হোতি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম গমিকা ভিক্খূ দাৰুভণ্ডং মত্তিকাভণ্ডং অপ্পটিসামেত্ৱা দ্ৱাৰৱাতপানং ৱিৱৰিত্ৱা সেনাসনং অনাপুচ্ছা পক্কমিস্সন্তি! দাৰুভণ্ডং মত্তিকাভণ্ডং নস্সতি. সেনাসনং অগুত্তং হোতী’’তি. অথ খো তে ভিক্খূ ভগৱতো এতমত্থং আৰোচেসুং…পে… সচ্চং কিৰ, ভিক্খৱে…পে… সচ্চং ভগৱাতি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৩৬১. ‘‘তেন হি, ভিক্খৱে, গমিকানং ভিক্খূনং ৱত্তং পঞ্ঞপেস্সামি যথা গমিকেহি ভিক্খূহি সম্মা ৱত্তিতব্বং. গমিকেন, ভিক্খৱে, ভিক্খুনা দাৰুভণ্ডং মত্তিকাভণ্ডং পটিসামেত্ৱা দ্ৱাৰৱাতপানং থকেত্ৱা সেনাসনং আপুচ্ছা পক্কমিতব্বং [আপুচ্ছিতব্বং (স্যা.)]. সচে ভিক্খু ন হোতি, সামণেৰো আপুচ্ছিতব্বো. সচে সামণেৰো ন হোতি, আৰামিকো আপুচ্ছিতব্বো. সচে আৰামিকো ন হোতি, উপাসকো আপুচ্ছিতব্বো. সচে ন হোতি ভিক্খু ৱা সামণেৰো ৱা আৰামিকো ৱা উপাসকো ৱা, চতূসু পাসাণেসু মঞ্চং পঞ্ঞপেত্ৱা মঞ্চে মঞ্চং আৰোপেত্ৱা পীঠে পীঠং আৰোপেত্ৱা সেনাসনং উপৰি পুঞ্জং কৰিত্ৱা দাৰুভণ্ডং মত্তিকাভণ্ডং পটিসামেত্ৱা দ্ৱাৰৱাতপানং থকেত্ৱা পক্কমিতব্বং. সচে ৱিহাৰো ওৱস্সতি, সচে উস্সহতি, ছাদেতব্বো, উস্সুকং ৱা কাতব্বং – ‘কিন্তি নু খো ৱিহাৰো ছাদিযেথা’তি. এৱঞ্চেতং লভেথ, ইচ্চেতং কুসলং. নো চে লভেথ, যো দেসো অনোৱস্সকো হোতি, তত্থ চতূসু পাসাণেসু মঞ্চং পঞ্ঞপেত্ৱা মঞ্চে মঞ্চং আৰোপেত্ৱা পীঠে পীঠং আৰোপেত্ৱা সেনাসনং উপৰি পুঞ্জং কৰিত্ৱা দাৰুভণ্ডং মত্তিকাভণ্ডং পটিসামেত্ৱা দ্ৱাৰৱাতপানং থকেত্ৱা পক্কমিতব্বং. সচে সব্বো ৱিহাৰো ওৱস্সতি, সচে উস্সহতি, সেনাসনং গামং অতিহৰিতব্বং, উস্সুকং ৱা কাতব্বং – ‘কিন্তি নু খো সেনাসনং গামং অতিহৰিযেথা’তি. এৱঞ্চেতং লভেথ, ইচ্চেতং কুসলং. নো চে লভেথ, অজ্ঝোকাসে চতূসু পাসাণেসু মঞ্চং পঞ্ঞপেত্ৱা মঞ্চে মঞ্চং আৰোপেত্ৱা পীঠে পীঠং আৰোপেত্ৱা সেনাসনং উপৰি পুঞ্জং কৰিত্ৱা দাৰুভণ্ডং মত্তিকাভণ্ডং পটিসামেত্ৱা তিণেন ৱা পণ্ণেন ৱা পটিচ্ছাদেত্ৱা পক্কমিতব্বং – অপ্পেৱ নাম অঙ্গানিপি সেসেয্যুন্তি. ইদং খো, ভিক্খৱে, গমিকানং ভিক্খূনং ৱত্তং যথা গমিকেহি ভিক্খূহি সম্মা ৱত্তিতব্ব’’ন্তি.