১৪. অন্তেৱাসিকৱত্তকথা

৩৮১. তেন খো পন সমযেন আচৰিযা অন্তেৱাসিকেসু ন সম্মা ৱত্তন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৱিপাচেন্তি – ‘‘কথঞ্হি নাম আচৰিযা অন্তেৱাসিকেসু ন সম্মা ৱত্তিস্সন্তী’’তি! অথ খো তে ভিক্খূ ভগৱতো এতমত্থং আৰোচেসুং. অথ খো ভগৱা এতস্মিং নিদানে এতস্মিং পকৰণে ভিক্খুসঙ্ঘং সন্নিপাতাপেত্ৱা ভিক্খূ পটিপুচ্ছি – ‘‘সচ্চং কিৰ, ভিক্খৱে, আচৰিযা অন্তেৱাসিকেসু ন সম্মা ৱত্তন্তী’’তি? ‘‘সচ্চং ভগৱা’’তি…পে… ৱিগৰহিত্ৱা…পে… ধম্মিং কথং কত্ৱা ভিক্খূ আমন্তেসি –

৩৮২. ‘‘তেন হি, ভিক্খৱে, আচৰিযানং অন্তেৱাসিকেসু ৱত্তং পঞ্ঞপেস্সামি যথা আচৰিযেহি অন্তেৱাসিকেসু সম্মা ৱত্তিতব্বং. [মহাৱ. ৭৯] আচৰিযেন, ভিক্খৱে, অন্তেৱাসিকম্হি সম্মা ৱত্তিতব্বং. তত্ৰাযং সম্মাৱত্তনা –

‘‘আচৰিযেন, ভিক্খৱে, অন্তেৱাসিকো সঙ্গহেতব্বো অনুগ্গহেতব্বো উদ্দেসেন পৰিপুচ্ছায ওৱাদেন অনুসাসনিযা. সচে আচৰিযস্স পত্তো হোতি, অন্তেৱাসিকস্স পত্তো ন হোতি, আচৰিযেন অন্তেৱাসিকস্স পত্তো দাতব্বো, উস্সুক্কং ৱা কাতব্বং – কিন্তি নু খো অন্তেৱাসিকস্স পত্তো উপ্পজ্জিযেথাতি. সচে আচৰিযস্স চীৱৰং হোতি, অন্তেৱাসিকস্স চীৱৰং ন হোতি, আচৰিযেন অন্তেৱাসিকস্স চীৱৰং দাতব্বং, উস্সুক্কং ৱা কাতব্বং – কিন্তি নু খো অন্তেৱাসিকস্স চীৱৰং উপ্পজ্জিযেথাতি. সচে আচৰিযস্স পৰিক্খাৰো হোতি, অন্তেৱাসিকস্স পৰিক্খাৰো ন হোতি, আচৰিযেন অন্তেৱাসিকস্স পৰিক্খাৰো দাতব্বো, উস্সুক্কং ৱা কাতব্বং – কিন্তি নু খো অন্তেৱাসিকস্স পৰিক্খাৰো উপ্পজ্জিযেথাতি.

‘‘সচে অন্তেৱাসিকো গিলানো হোতি, কালস্সেৱ উট্ঠায দন্তকট্ঠং দাতব্বং, মুখোদকং দাতব্বং, আসনং পঞ্ঞপেতব্বং. সচে যাগু হোতি, ভাজনং ধোৱিত্ৱা যাগু উপনামেতব্বা. যাগুং পীতস্স উদকং দত্ৱা ভাজনং পটিগ্গহেত্ৱা নীচং কত্ৱা সাধুকং অপ্পটিঘংসন্তেন ধোৱিত্ৱা পটিসামেতব্বং. অন্তেৱাসিকম্হি ৱুট্ঠিতে আসনং উদ্ধৰিতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে অন্তেৱাসিকো গামং পৱিসিতুকামো হোতি, নিৱাসনং দাতব্বং, পটিনিৱাসনং পটিগ্গহেতব্বং, কাযবন্ধনং দাতব্বং, সগুণং কত্ৱা সঙ্ঘাটিযো দাতব্বা, ধোৱিত্ৱা পত্তো সোদকো দাতব্বো.

‘‘এত্তাৱতা নিৱত্তিস্সতীতি আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৱা পত্তচীৱৰং পটিগ্গহেতব্বং, পটিনিৱাসনং দাতব্বং, নিৱাসনং পটিগ্গহেতব্বং. সচে চীৱৰং সিন্নং হোতি, মুহুত্তং উণ্হে ওতাপেতব্বং, ন চ উণ্হে চীৱৰং নিদহিতব্বং. চীৱৰং সঙ্ঘৰিতব্বং. চীৱৰং সঙ্ঘৰন্তেন চতুৰঙ্গুলং কণ্ণং উস্সাৰেত্ৱা চীৱৰং সঙ্ঘৰিতব্বং – মা মজ্ঝে ভঙ্গো অহোসীতি. ওভোগে কাযবন্ধনং কাতব্বং.

‘‘সচে পিণ্ডপাতো হোতি, অন্তেৱাসিকো চ ভুঞ্জিতুকামো হোতি, উদকং দত্ৱা পিণ্ডপাতো উপনামেতব্বো. অন্তেৱাসিকো পানীযেন পুচ্ছিতব্বো. ভুত্তাৱিস্স উদকং দত্ৱা পত্তং পটিগ্গহেত্ৱা নীচং কত্ৱা সাধুকং অপ্পটিঘংসন্তেন ধোৱিত্ৱা ৱোদকং কত্ৱা মুহুত্তং উণ্হে ওতাপেতব্বো, ন চ উণ্হে পত্তো নিদহিতব্বো. পত্তচীৱৰং নিক্খিপিতব্বং. পত্তং নিক্খিপন্তেন…পে… চীৱৰং নিক্খিপন্তেন…পে… পাৰতো অন্তং ওৰতো ভোগং কত্ৱা চীৱৰং নিক্খিপিতব্বং. অন্তেৱাসিকম্হি উট্ঠিতে আসনং উদ্ধৰিতব্বং, পাদোদকং পাদপীঠং পাদকথলিকং পটিসামেতব্বং. সচে সো দেসো উক্লাপো হোতি, সো দেসো সম্মজ্জিতব্বো.

‘‘সচে অন্তেৱাসিকো নহাযিতুকামো হোতি, নহানং পটিযাদেতব্বং. সচে সীতেন অত্থো হোতি, সীতং পটিযাদেতব্বং. সচে উণ্হেন অত্থো হোতি, উণ্হং পটিযাদেতব্বং.

‘‘সচে অন্তেৱাসিকো জন্তাঘৰং পৱিসিতুকামো হোতি, চুণ্ণং সন্নেতব্বং, মত্তিকা তেমেতব্বা, জন্তাঘৰপীঠং আদায [আদায অন্তেৱাসিকস্স পিট্ঠিতো পিট্ঠিতো (ক.)] গন্ত্ৱা জন্তাঘৰপীঠং দত্ৱা চীৱৰং পটিগ্গহেত্ৱা একমন্তং নিক্খিপিতব্বং, চুণ্ণং দাতব্বং, মত্তিকা দাতব্বা. সচে উস্সহতি জন্তাঘৰং পৱিসিতব্বং. জন্তাঘৰং পৱিসন্তেন মত্তিকায মুখং মক্খেত্ৱা পুৰতো চ পচ্ছতো চ পটিচ্ছাদেত্ৱা জন্তাঘৰং পৱিসিতব্বং. ন থেৰে ভিক্খূ অনুপখজ্জ নিসীদিতব্বং. ন নৱা ভিক্খূ আসনেন পটিবাহিতব্বা. জন্তাঘৰে অন্তেৱাসিকস্স পৰিকম্মং কাতব্বং. জন্তাঘৰা নিক্খমন্তেন জন্তাঘৰপীঠং আদায পুৰতো চ পচ্ছতো চ পটিচ্ছাদেত্ৱা জন্তাঘৰা নিক্খমিতব্বং.

‘‘উদকেপি অন্তেৱাসিকস্স পৰিকম্মং কাতব্বং. নহাতেন পঠমতৰং উত্তৰিত্ৱা অত্তনো গত্তং ৱোদকং কত্ৱা নিৱাসেত্ৱা অন্তেৱাসিকস্স গত্ততো উদকং পমজ্জিতব্বং, নিৱাসনং দাতব্বং, সঙ্ঘাটি দাতব্বা, জন্তাঘৰপীঠং আদায পঠমতৰং আগন্ত্ৱা আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, অন্তেৱাসিকো পানীযেন পুচ্ছিতব্বো.

‘‘যস্মিং ৱিহাৰে অন্তেৱাসিকো ৱিহৰতি, সচে সো ৱিহাৰো উক্লাপো হোতি, সচে উস্সহতি, সোধেতব্বো. ৱিহাৰং সোধেন্তেন পঠমং পত্তচীৱৰং নীহৰিত্ৱা একমন্তং নিক্খিপিতব্বং…পে… আচমনকুম্ভিযা উদকং ন হোতি, আচমনকুম্ভিযা উদকং আসিঞ্চিতব্বং.

‘‘সচে অন্তেৱাসিকস্স অনভিৰতি উপ্পন্না হোতি, আচৰিযেন ৱূপকাসেতব্বো, ৱূপকাসাপেতব্বো, ধম্মকথা ৱাস্স কাতব্বা. সচে অন্তেৱাসিকস্স কুক্কুচ্চং উপ্পন্নং হোতি, আচৰিযেন ৱিনোদেতব্বং, ৱিনোদাপেতব্বং, ধম্মকথা ৱাস্স কাতব্বা. সচে অন্তেৱাসিকস্স দিট্ঠিগতং উপ্পন্নং হোতি, আচৰিযেন ৱিৱেচেতব্বং, ৱিৱেচাপেতব্বং, ধম্মকথা ৱাস্স কাতব্বা. সচে অন্তেৱাসিকো গৰুধম্মং অজ্ঝাপন্নো হোতি, পৰিৱাসাৰহো, আচৰিযেন উস্সুক্কং কাতব্বং – কিন্তি নু খো সঙ্ঘো অন্তেৱাসিকস্স পৰিৱাসং দদেয্যাতি. সচে অন্তেৱাসিকো মূলাযপটিকস্সনাৰহো হোতি, আচৰিযেন উস্সুক্কং কাতব্বং – কিন্তি নু খো সঙ্ঘো অন্তেৱাসিকং মূলায পটিকস্সেয্যাতি. সচে অন্তেৱাসিকো মানত্তাৰহো হোতি, আচৰিযেন উস্সুক্কং কাতব্বং – কিন্তি নু খো সঙ্ঘো অন্তেৱাসিকস্স মানত্তং দদেয্যাতি. সচে অন্তেৱাসিকো অব্ভানাৰহো হোতি, আচৰিযেন উস্সুক্কং কাতব্বং – কিন্তি নু খো সঙ্ঘো অন্তেৱাসিকং অব্ভেয্যাতি. সচে সঙ্ঘো অন্তেৱাসিকস্স কম্মং কত্তুকামো হোতি, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, আচৰিযেন উস্সুক্কং কাতব্বং – কিন্তি নু খো সঙ্ঘো অন্তেৱাসিকস্স কম্মং ন কৰেয্য, লহুকায ৱা পৰিণামেয্যাতি. কতং ৱা পনস্স হোতি, সঙ্ঘেন কম্মং, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, আচৰিযেন উস্সুক্কং কাতব্বং – কিন্তি নু খো অন্তেৱাসিকো সম্মা ৱত্তেয্য, লোমং পাতেয্য, নেত্থাৰং ৱত্তেয্য, সঙ্ঘো তং কম্মং পটিপ্পস্সম্ভেয্যাতি.

‘‘সচে অন্তেৱাসিকস্স চীৱৰং ধোৱিতব্বং হোতি, আচৰিযেন আচিক্খিতব্বং – এৱং ধোৱেয্যাসীতি, উস্সুক্কং ৱা কাতব্বং – কিন্তি নু খো অন্তেৱাসিকস্স চীৱৰং ধোৱিযেথাতি. সচে অন্তেৱাসিকস্স চীৱৰং কাতব্বং হোতি, আচৰিযেন আচিক্খিতব্বং – এৱং কৰেয্যাসীতি, উস্সুক্কং ৱা কাতব্বং – কিন্তি নু খো অন্তেৱাসিকস্স চীৱৰং কৰিযেথাতি. সচে অন্তেৱাসিকস্স ৰজনং পচিতব্বং হোতি, আচৰিযেন আচিক্খিতব্বং – এৱং পচেয্যাসীতি, উস্সুক্কং ৱা কাতব্বং – কিন্তি নু খো অন্তেৱাসিকস্স ৰজনং পচিযেথাতি. সচে অন্তেৱাসিকস্স চীৱৰং ৰজিতব্বং হোতি, আচৰিযেন আচিক্খিতব্বং – এৱং ৰজেয্যাসীতি, উস্সুক্কং ৱা কাতব্বং – কিন্তি নু খো অন্তেৱাসিকস্স চীৱৰং ৰজিযেথাতি. চীৱৰং ৰজন্তেন সাধুকং সম্পৰিৱত্তকং সম্পৰিৱত্তকং ৰজিতব্বং. ন চ অচ্ছিন্নে থেৱে পক্কমিতব্বং. সচে অন্তেৱাসিকো গিলানো হোতি, যাৱজীৱং উপট্ঠাতব্বো, ৱুট্ঠানমস্স আগমেতব্বং. ইদং খো, ভিক্খৱে, আচৰিযানং অন্তেৱাসিকেসু ৱত্তং যথা আচৰিযেহি অন্তেৱাসিকেসু সম্মা ৱত্তিতব্ব’’ন্তি.

ৱত্তক্খন্ধকো অট্ঠমো.

ইমম্হি খন্ধকে ৱত্থূ একূনৱীসতি, ৱত্তা চুদ্দস.

তস্সুদ্দানং –

সউপাহনা ছত্তা চ, ওগুণ্ঠি সীসং পানীযং;

নাভিৱাদে ন পুচ্ছন্তি, অহি উজ্ঝন্তি পেসলা.

ওমুঞ্চি ছত্তং খন্ধে চ, অতৰঞ্চ পটিক্কমং;

পত্তচীৱৰং নিক্খিপা, পতিৰূপঞ্চ পুচ্ছিতা.

আসিঞ্চেয্য ধোৱিতেন, সুক্খেনল্লেনুপাহনা;

ৱুড্ঢো নৱকো পুচ্ছেয্য, অজ্ঝাৱুট্ঠঞ্চ গোচৰা.

সেক্খা ৱচ্চা পানী পৰি, কত্তৰং কতিকং ততো;

কালং মুহুত্তং উক্লাপো, ভূমত্থৰণং নীহৰে.

পটিপাদো ভিসিবিব্বো, মঞ্চপীঠঞ্চ মল্লকং;

অপস্সেনুল্লোককণ্ণা, গেৰুকা কাড় অকতা.

সঙ্কাৰঞ্চ ভূমত্থৰণং, পটিপাদকং মঞ্চপীঠং;

ভিসি নিসীদনম্পি, মল্লকং অপস্সেন চ.

পত্তচীৱৰং ভূমি চ, পাৰন্তং ওৰতো ভোগং;

পুৰত্থিমা পচ্ছিমা চ, উত্তৰা অথ দক্খিণা.

সীতুণ্হে চ দিৱাৰত্তিং, পৰিৱেণঞ্চ কোট্ঠকো;

উপট্ঠানগ্গি সালা চ, ৱত্তং ৱচ্চকুটীসু চ.

পানী পৰিভোজনিযা, কুম্ভি আচমনেসু চ;

অনোপমেন পঞ্ঞত্তং, ৱত্তং আগন্তুকেহিমে [ৱে (ক. এৱমুপৰিপি)].

নেৱাসনং ন উদকং, ন পচ্চু ন চ পানিযং;

নাভিৱাদে নপঞ্ঞপে, উজ্ঝাযন্তি চ পেসলা.

ৱুড্ঢাসনঞ্চ উদকং, পচ্চুগ্গন্ত্ৱা চ পানিযং;

উপাহনে একমন্তং, অভিৱাদে চ পঞ্ঞপে.

ৱুত্থং গোচৰসেক্খো চ, ঠানং পানিযভোজনং;

কত্তৰং কতিকং কালং, নৱকস্স নিসিন্নকে.

অভিৱাদযে আচিক্খে, যথা হেট্ঠা তথা নযে;

নিদ্দিট্ঠং সত্থৱাহেন ৱত্তং আৱাসিকেহিমে.

গমিকা দাৰুমত্তি চ, ৱিৱৰিত্ৱা ন পুচ্ছিয;

নস্সন্তি চ অগুত্তঞ্চ, উজ্ঝাযন্তি চ পেসলা.

পটিসামেত্ৱা থকেত্ৱা, আপুচ্ছিত্ৱাৱ পক্কমে;

ভিক্খু ৱা সামণেৰো ৱা, আৰামিকো উপাসকো.

পাসাণকেসু চ পুঞ্জং, পটিসামে থকেয্য চ;

সচে উস্সহতি উস্সুক্কং, অনোৱস্সে তথেৱ চ.

সব্বো ওৱস্সতি গামং, অজ্ঝোকাসে তথেৱ চ;

অপ্পেৱঙ্গানি সেসেয্যুং, ৱত্তং গমিকভিক্খুনা.

নানুমোদন্তি থেৰেন, ওহায চতুপঞ্চহি;

ৱচ্চিতো মুচ্ছিতো আসি, ৱত্তানুমোদনেসুমে.

ছব্বগ্গিযা দুন্নিৱত্থা, অথোপি চ দুপ্পাৰুতা;

অনাকপ্পা চ ৱোক্কম্ম, থেৰে অনুপখজ্জনে.

নৱে ভিক্খূ চ সঙ্ঘাটি, উজ্ঝাযন্তি চ পেসলা;

তিমণ্ডলং নিৱাসেত্ৱা, কাযসগুণগণ্ঠিকা.

ন ৱোক্কম্ম পটিচ্ছন্নং, সুসংৱুতোক্খিত্তচক্খু;

উক্খিত্তোজ্জগ্ঘিকাসদ্দো, তযো চেৱ পচালনা.

খম্ভোগুণ্ঠিউক্কুটিকা, পটিচ্ছন্নং সুসংৱুতো;

ওক্খিত্তুক্খিত্তউজ্জগ্ঘি, অপ্পসদ্দো তযো চলা.

খম্ভোগুণ্ঠিপল্লত্থি চ, অনুপখজ্জ নাসনে;

ওত্থৰিত্ৱান উদকে, নীচং কত্ৱান সিঞ্চিযা.

পটি সামন্তা সঙ্ঘাটি, ওদনে চ পটিগ্গহে;

সূপং উত্তৰিভঙ্গেন, সব্বেসং সমতিত্থি চ.

সক্কচ্চং পত্তসঞ্ঞী চ, সপদানঞ্চ সূপকং;

ন থূপতো পটিচ্ছাদে, ৱিঞ্ঞত্তুজ্ঝানসঞ্ঞিনা.

মহন্তমণ্ডলদ্ৱাৰং, সব্বহত্থো ন ব্যাহৰে;

উক্খেপো ছেদনাগণ্ড, ধুনং সিত্থাৱকাৰকং.

জিৱ্হানিচ্ছাৰকঞ্চেৱ, চপুচপু সুৰুসুৰু;

হত্থপত্তোট্ঠনিল্লেহং, সামিসেন পটিগ্গহে.

যাৱ ন সব্বে উদকে, নীচং কত্ৱান সিঞ্চিযং;

পটি সামন্তা সঙ্ঘাটি, নীচং কত্ৱা ছমায চ.

সসিত্থকং নিৱত্তন্তে, সুপ্পটিচ্ছন্নমুক্কুটি;

ধম্মৰাজেন পঞ্ঞত্তং, ইদং ভত্তগ্গৱত্তনং.

দুন্নিৱত্থা অনাকপ্পা, অসল্লেক্খেত্ৱা চ সহসা;

দূৰে অচ্চ চিৰং লহুং, তথেৱ পিণ্ডচাৰিকো.

পটিচ্ছন্নোৱ গচ্ছেয্য, সুংসৱুতোক্খিত্তচক্খু;

উক্খিত্তোজ্জগ্ঘিকাসদ্দো, তযো চেৱ পচালনা.

খম্ভোগুণ্ঠিউক্কুটিকা, সল্লক্খেত্ৱা চ সহসা;

দূৰে অচ্চ চিৰং লহুং, আসনকং কটচ্ছুকা.

ভাজনং ৱা ঠপেতি চ, উচ্চাৰেত্ৱা পণামেত্ৱা;

পটিগ্গহে ন উল্লোকে, সূপেসুপি তথেৱ তং.

ভিক্খু সঙ্ঘাটিযা ছাদে, পটিচ্ছন্নেৱ গচ্ছিযং;

সংৱুতোক্খিত্তচক্খু চ, উক্খিত্তোজ্জগ্ঘিকায চ;

অপ্পসদ্দো তযো চালা, খম্ভোগুণ্ঠিকউক্কুটি.

পঠমাসনৱক্কাৰ, পানিযং পৰিভোজনী;

পচ্ছাকঙ্খতি ভুঞ্জেয্য, ওপিলাপেয্য উদ্ধৰে.

পটিসামেয্য সম্মজ্জে, ৰিত্তং তুচ্ছং উপট্ঠপে;

হত্থৱিকাৰে ভিন্দেয্য, ৱত্তিদং পিণ্ডচাৰিকে.

পানী পৰি অগ্গিৰণি, নক্খত্তদিসচোৰা চ;

সব্বং নত্থীতি কোট্টেত্ৱা, পত্তংসে চীৱৰং ততো.

ইদানি অংসে লগ্গেত্ৱা, তিমণ্ডলং পৰিমণ্ডলং;

যথা পিণ্ডচাৰিৱত্তং, নযে আৰঞ্ঞকেসুপি.

পত্তংসে চীৱৰং সীসে, আৰোহিত্ৱা চ পানিযং;

পৰিভোজনিযং অগ্গি, অৰণী চাপি কত্তৰং.

নক্খত্তং সপ্পদেসং ৱা, দিসাপি কুসলো ভৱে;

সত্তুত্তমেন পঞ্ঞত্তং, ৱত্তং আৰঞ্ঞকেসুমে.

অজ্ঝোকাসে ওকিৰিংসু, উজ্ঝাযন্তি চ পেসলা;

সচে ৱিহাৰো উক্লাপো, পঠমং পত্তচীৱৰং.

ভিসিবিব্বোহনং মঞ্চং, পীঠঞ্চ খেড়মল্লকং;

অপস্সেনুল্লোককণ্ণা, গেৰুকা কাড় অকতা.

সঙ্কাৰং ভিক্খুসামন্তা, সেনাৱিহাৰপানিযং;

পৰিভোজনসামন্তা, পটিৱাতে চ অঙ্গণে.

অধোৱাতে অত্থৰণং, পটিপাদকমঞ্চো চ;

পীঠং ভিসি নিসীদনং, মল্লকং অপস্সেন চ.

পত্তচীৱৰং ভূমি চ, পাৰন্তং ওৰতো ভোগং;

পুৰত্থিমা চ পচ্ছিমা, উত্তৰা অথ দক্খিণা.

সীতুণ্হে চ দিৱা ৰত্তিং, পৰিৱেণঞ্চ কোট্ঠকো;

উপট্ঠানগ্গিসালা চ, ৱচ্চকুটী চ পানিযং.

আচমনকুম্ভি ৱুড্ঢে চ, উদ্দেসপুচ্ছনা সজ্ঝা;

ধম্মো পদীপং ৱিজ্ঝাপে, ন ৱিৱৰে নপি থকে.

যেন ৱুড্ঢো পৰিৱত্তি, কণ্ণেনপি ন ঘট্টযে;

পঞ্ঞপেসি মহাৱীৰো, ৱত্তং সেনাসনেসু তং.

নিৱাৰিযমানা দ্ৱাৰং, মুচ্ছিতুজ্ঝন্তি পেসলা;

ছাৰিকং ছড্ডযে জন্তা, পৰিভণ্ডং তথেৱ চ.

পৰিৱেণং কোট্ঠকো সালা, চুণ্ণমত্তিকদোণিকা;

মুখং পুৰতো ন থেৰে, ন নৱে উস্সহতি সচে.

পুৰতো উপৰিমগ্গো, চিক্খল্লং মত্তি পীঠকং;

ৱিজ্ঝাপেত্ৱা থকেত্ৱা চ, ৱত্তং জন্তাঘৰেসুমে.

নাচমেতি যথাৱুড্ঢং, পটিপাটি চ সহসা;

উব্ভজি নিত্থুনো কট্ঠং, ৱচ্চং পস্সাৱ খেড়কং.

ফৰুসা কূপ সহসা, উব্ভজি চপু সেসেন;

বহি অন্তো চ উক্কাসে, ৰজ্জু অতৰমানঞ্চ.

সহসা উব্ভজি ঠিতে, নিত্থুনে কট্ঠ ৱচ্চঞ্চ;

পস্সাৱ খেড় ফৰুসা, কূপঞ্চ ৱচ্চপাদুকে.

নাতিসহসা উব্ভজি, পাদুকায চপুচপু;

ন সেসযে পটিচ্ছাদে, উহতপিধৰেন চ.

ৱচ্চকুটী পৰিভণ্ডং, পৰিৱেণঞ্চ কোট্ঠকো;

আচমনে চ উদকং, ৱত্তং ৱচ্চকুটীসুমে.

উপাহনা দন্তকট্ঠং, মুখোদকঞ্চ আসনং;

যাগু উদকং ধোৱিত্ৱা, উদ্ধাৰুক্লাপ গাম চ.

নিৱাসনা কাযবন্ধা, সগুণং পত্তসোদকং;

পচ্ছা তিমণ্ডলো চেৱ, পৰিমণ্ডল বন্ধনং.

সগুণং ধোৱিত্ৱা পচ্ছা, নাতিদূৰে পটিগ্গহে;

ভণমানস্স আপত্তি, পঠমাগন্ত্ৱান আসনং.

উদকং পীঠকথলি, পচ্চুগ্গন্ত্ৱা নিৱাসনং;

ওতাপে নিদহি ভঙ্গো, ওভোগে ভুঞ্জিতু নমে.

পানীযং উদকং নীচং, মুহুত্তং ন চ নিদহে;

পত্তচীৱৰং ভূমি চ, পাৰন্তং ওৰতো ভোগং.

উদ্ধৰে পটিসামে চ, উক্লাপো চ নহাযিতুং;

সীতং উণ্হং জন্তাঘৰং, চুণ্ণং মত্তিক পিট্ঠিতো.

পীঠঞ্চ চীৱৰং চুণ্ণং, মত্তিকুস্সহতি মুখং;

পুৰতো থেৰে নৱে চ, পৰিকম্মঞ্চ নিক্খমে.

পুৰতো উদকে ন্হাতে, নিৱাসেত্ৱা উপজ্ঝাযং;

নিৱাসনঞ্চ সঙ্ঘাটি, পীঠকং আসনেন চ.

পাদো পীঠং কথলিঞ্চ, পানীযুদ্দেসপুচ্ছনা;

উক্লাপং সুসোধেয্য, পঠমং পত্তচীৱৰং.

নিসীদনপচ্চত্থৰণং, ভিসি বিব্বোহনানি চ;

মঞ্চো পীঠং পটিপাদং, মল্লকং অপস্সেন চ.