৮. দ্ৱেভিক্খুৱাৰএকাদসকং

১৮১. ‘‘দ্ৱে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে [যথাপটিচ্ছন্নানং (সী.)] চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে ৱেমতিকা হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে মিস্সকদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ মিস্সকং আপন্না হোন্তি. তে মিস্সকে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ মিস্সকং আপন্না হোন্তি. তে মিস্সকে মিস্সকদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ সুদ্ধকং আপন্না হোন্তি. তে সুদ্ধকে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. উভোপি যথাধম্মং কাৰাপেতব্বা.

‘‘দ্ৱে ভিক্খূ সুদ্ধকং আপন্না হোন্তি. তে সুদ্ধকে সুদ্ধকদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. উভোপি যথাধম্মং কাৰাপেতব্বা.

‘‘দ্ৱে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. একস্স হোতি আৰোচেস্সামীতি, একস্স হোতি ন আৰোচেস্সামীতি. সো পঠমম্পি যামং ছাদেতি, দুতিযম্পি যামং ছাদেতি, ততিযম্পি যামং ছাদেতি – উট্ঠিতে অৰুণে ছন্না হোতি আপত্তি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. তে গচ্ছন্তি আৰোচেস্সামাতি. একস্স অন্তৰামগ্গে মক্খধম্মো উপ্পজ্জতি ন আৰোচেস্সামীতি. সো পঠমম্পি যামং ছাদেতি, দুতিযম্পি যামং ছাদেতি, ততিযম্পি যামং ছাদেতি – উট্ঠিতে অৰুণে ছন্না হোতি আপত্তি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ সঙ্ঘাদিসেসং আপন্না হোন্তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. তে উম্মত্তকা হোন্তি. তে পচ্ছা অনুম্মত্তকা হুত্ৱা একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

‘‘দ্ৱে ভিক্খূ সঙ্ঘাদিসেসং আপন্না হোন্তি. তে পাতিমোক্খে উদ্দিস্সমানে এৱং ৱদন্তি – ‘ইদানেৱ খো মযং জানাম – অযম্পি কিৰ ধম্মো সুত্তাগতো সুত্তপৰিযাপন্নো অন্ৱদ্ধমাসং উদ্দেসং আগচ্ছতী’তি. তে সঙ্ঘাদিসেসে সঙ্ঘাদিসেসদিট্ঠিনো হোন্তি. একো ছাদেতি, একো নচ্ছাদেতি. যো ছাদেতি সো দুক্কটং দেসাপেতব্বো. যথাপটিচ্ছন্নে চস্স পৰিৱাসং দত্ৱা উভিন্নম্পি মানত্তং দাতব্বং.

দ্ৱেভিক্খুৱাৰএকাদসকং নিট্ঠিতং.