২. পৰিৱাসো

অগ্ঘসমোধানপৰিৱাসো

১৩৪. তেন খো পন সমযেন অঞ্ঞতৰো ভিক্খু সম্বহুলা সঙ্ঘাদিসেসা আপত্তিযো আপন্নো হোতি – একা আপত্তি একাহপ্পটিচ্ছন্না, একা আপত্তি দ্ৱীহপ্পটিচ্ছন্না, একা আপত্তি তীহপ্পটিচ্ছন্না, একা আপত্তি চতূহপ্পটিচ্ছন্না, একা আপত্তি পঞ্চাহপ্পটিচ্ছন্না, একা আপত্তি ছাহপ্পটিচ্ছন্না, একা আপত্তি সত্তাহপ্পটিচ্ছন্না, একা আপত্তি অট্ঠাহপ্পটিচ্ছন্না, একা আপত্তি নৱাহপ্পটিচ্ছন্না, একা আপত্তি দসাহপ্পটিচ্ছন্না. সো ভিক্খূনং আৰোচেসি – ‘‘অহং, আৱুসো, সম্বহুলা সঙ্ঘাদিসেসা আপত্তিযো আপজ্জিং – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘তেন হি, ভিক্খৱে, সঙ্ঘো তস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসং দেতু. এৱঞ্চ পন, ভিক্খৱে, দাতব্বো –

‘‘তেন, ভিক্খৱে, ভিক্খুনা সঙ্ঘং উপসঙ্কমিত্ৱা…পে… এৱমস্স ৱচনীযো – ‘অহং, ভন্তে, সম্বহুলা সঙ্ঘাদিসেসা আপত্তিযো আপজ্জিং – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. সোহং, ভন্তে, সঙ্ঘং তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসং যাচামী’তি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

১৩৫. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. সো সঙ্ঘং তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি – একা আপত্তি একাহপ্পটিচ্ছন্না…পে… একা আপত্তি দসাহপ্পটিচ্ছন্না. সো সঙ্ঘং তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসং যাচতি. সঙ্ঘো ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসং দেতি. যস্সাযস্মতো খমতি ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না; তস্সা অগ্ঘেন সমোধানপৰিৱাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘দিন্নো সঙ্ঘেন ইত্থন্নামস্স ভিক্খুনো তাসং আপত্তীনং যা আপত্তি দসাহপ্পটিচ্ছন্না তস্সা অগ্ঘেন সমোধানপৰিৱাসো. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

সব্বচিৰপ্পটিচ্ছন্নঅগ্ঘসমোধানং

১৩৬. তেন খো পন সমযেন অঞ্ঞতৰো ভিক্খু সম্বহুলা সঙ্ঘাদিসেসা আপত্তিযো আপন্নো হোতি – একা আপত্তি একাহপ্পটিচ্ছন্না, দ্ৱে আপত্তিযো দ্ৱীহপ্পটিচ্ছন্নাযো [দ্ৱীহপ্পটিচ্ছন্না (ক. এৱং যাৱদসাহপ্পটিচ্ছন্না)], তিস্সো আপত্তিযো তীহপ্পটিচ্ছন্নাযো, চতস্সো আপত্তিযো চতূহপ্পটিচ্ছন্নাযো, পঞ্চ আপত্তিযো পঞ্চাহপ্পটিচ্ছন্নাযো, ছ আপত্তিযো ছাহপ্পটিচ্ছন্নাযো, সত্ত আপত্তিযো সত্তাহপ্পটিচ্ছন্নাযো, অট্ঠ আপত্তিযো অট্ঠাহপ্পটিচ্ছন্নাযো, নৱ আপত্তিযো নৱাহপ্পটিচ্ছন্নাযো, দস আপত্তিযো দসাহপ্পটিচ্ছন্নাযো. সো ভিক্খূনং আৰোচেসি – ‘‘অহং, আৱুসো, সম্বহুলা সঙ্ঘাদিসেসা আপত্তিযো আপজ্জিং, একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘তেন হি, ভিক্খৱে, সঙ্ঘো তস্স ভিক্খুনো তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসং দেতু. এৱঞ্চ পন, ভিক্খৱে, দাতব্বো –

‘‘তেন, ভিক্খৱে, ভিক্খুনা সঙ্ঘং উপসঙ্কমিত্ৱা…পে… এৱমস্স ৱচনীযো – ‘অহং, ভন্তে, সম্বহুলা সঙ্ঘাদিসেসা আপত্তিযো আপজ্জিং, একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. সোহং, ভন্তে, সঙ্ঘং তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসং যাচামী’তি. দুতিযম্পি যাচিতব্বো. ততিযম্পি যাচিতব্বো. ‘‘ব্যত্তেন ভিক্খুনা পটিবলেন সঙ্ঘো ঞাপেতব্বো –

১৩৭. সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি, একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. সো সঙ্ঘং তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসং যাচতি. যদি সঙ্ঘস্স পত্তকল্লং সঙ্ঘো ইত্থন্নামস্স ভিক্খুনো তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি – একা আপত্তি একাহপ্পটিচ্ছন্না…পে… দস আপত্তিযো দসাহপ্পটিচ্ছন্নাযো. সো সঙ্ঘং তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসং যাচতি. সঙ্ঘো ইত্থন্নামস্স ভিক্খুনো তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসং দেতি. যস্সাযস্মতো খমতি ইত্থন্নামস্স ভিক্খুনো তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘দিন্নো সঙ্ঘেন ইত্থন্নামস্স ভিক্খুনো তাসং আপত্তীনং যা আপত্তিযো সব্বচিৰপ্পটিচ্ছন্নাযো তাসং অগ্ঘেন সমোধানপৰিৱাসো. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

দ্ৱেমাসপৰিৱাসো

১৩৮. তেন খো পন সমযেন অঞ্ঞতৰো ভিক্খু দ্ৱে সঙ্ঘাদিসেসা আপত্তিযো আপন্নো হোতি দ্ৱেমাসপ্পটিচ্ছন্নাযো. তস্স এতদহোসি – ‘‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’’ন্তি. সো সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচি. তস্স সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্যন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’’ন্তি.

সো ভিক্খূনং আৰোচেসি – ‘‘অহং, আৱুসো, দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি – যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্যন্তি. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘তেন হি, ভিক্খৱে, সঙ্ঘো তস্স ভিক্খুনো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতু. এৱঞ্চ পন, ভিক্খৱে, দাতব্বো –

‘‘তেন, ভিক্খৱে, ভিক্খুনা সঙ্ঘং উপসঙ্কমিত্ৱা, একংসং উত্তৰাসঙ্গং কৰিত্ৱা, ৱুড্ঢানং ভিক্খূনং পাদে ৱন্দিত্ৱা, উক্কুটিকং নিসীদিত্ৱা, অঞ্জলিং পগ্গহেত্ৱা, এৱমস্স ৱচনীযো – ‘অহং, ভন্তে, দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি – যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্যন্তি. সোহং, ভন্তে, সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচামীতি.

‘‘দুতিযম্পি যাচিতব্বো. ততিযম্পি যাচিতব্বো. ‘‘ব্যত্তেন ভিক্খুনা পটিবলেন সঙ্ঘো ঞাপেতব্বো –

১৩৯. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো. তস্স এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সো সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচি. তস্স সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্যন্তি. সো সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো. তস্স এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সো সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচি. তস্স সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্যন্তি. সো সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. সঙ্ঘো ইত্থন্নামস্স ভিক্খুনো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. যস্সাযস্মতো খমতি ইত্থন্নামস্স ভিক্খুনো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘দিন্নো সঙ্ঘেন ইত্থন্নামস্স ভিক্খুনো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসো. খমতি সঙ্ঘস্স, তস্মা তুণ্হী, এৱমেতং ধাৰযামী’’তি. তেন, ভিক্খৱে, ভিক্খুনা তদুপাদায দ্ৱে মাসা পৰিৱসিতব্বা.

দ্ৱে মাসা পৰিৱসিতব্বৱিধি

১৪০. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সো সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. তস্স পৰিৱসন্তস্স লজ্জীধম্মো ওক্কমি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সোহং সঙ্ঘং একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো একিস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্যন্তি. সো সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. তেন, ভিক্খৱে, ভিক্খুনা তদুপাদায দ্ৱে মাসা পৰিৱসিতব্বা.

১৪১. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একং আপত্তিং জানাতি, একং আপত্তিং ন জানাতি. সো সঙ্ঘং যং আপত্তিং জানাতি তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. সো পৰিৱসন্তো ইতৰম্পি আপত্তিং জানাতি. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো; একং আপত্তিং জানিং, একং আপত্তিং ন জানিং. সোহং সঙ্ঘং যং আপত্তিং জানিং তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. সোহং পৰিৱসন্তো ইতৰম্পি আপত্তিং জানামি. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সো সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. তেন, ভিক্খৱে, ভিক্খুনা তদুপাদায দ্ৱে মাসা পৰিৱসিতব্বা.

১৪২. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একং আপত্তিং সৰতি, একং আপত্তিং নস্সৰতি. সো সঙ্ঘং যং আপত্তিং সৰতি তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. সো পৰিৱসন্তো ইতৰম্পি আপত্তিং সৰতি. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো; একং আপত্তিং সৰিং, একং আপত্তিং নস্সৰিং. সোহং সঙ্ঘং যং আপত্তিং সৰিং, তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. সোহং পৰিৱসন্তো ইতৰম্পি আপত্তিং সৰামি. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সো সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. তেন, ভিক্খৱে, ভিক্খুনা তদুপাদায দ্ৱে মাসা পৰিৱসিতব্বা.

১৪৩. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একায আপত্তিযা নিব্বেমতিকো, একায আপত্তিযা ৱেমতিকো. সো সঙ্ঘং যায আপত্তিযা নিব্বেমতিকো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. সো পৰিৱসন্তো ইতৰিস্সাপি আপত্তিযা নিব্বেমতিকো হোতি. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো; একায আপত্তিযা নিব্বেমতিকো, একায আপত্তিযা ৱেমতিকো. সোহং সঙ্ঘং যায আপত্তিযা নিব্বেমতিকো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচিং. তস্স মে সঙ্ঘো তস্সা আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং অদাসি. সোহং পৰিৱসন্তো ইতৰিস্সাপি আপত্তিযা নিব্বেমতিকো. যংনূনাহং সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচেয্য’ন্তি. সো সঙ্ঘং ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং যাচতি. তস্স সঙ্ঘো ইতৰিস্সাপি আপত্তিযা দ্ৱেমাসপ্পটিচ্ছন্নায দ্ৱেমাসপৰিৱাসং দেতি. তেন, ভিক্খৱে, ভিক্খুনা তদুপাদায দ্ৱে মাসা পৰিৱসিতব্বা.

১৪৪. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একা আপত্তি জানপ্পটিচ্ছন্না, একা আপত্তি অজানপ্পটিচ্ছন্না. সো সঙ্ঘং তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং দেতি. তস্স পৰিৱসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ৱিযত্তো মেধাৱী লজ্জী কুক্কুচ্চকো সিক্খাকামো. সো এৱং ৱদেতি – ‘কিং অযং, আৱুসো, ভিক্খু আপন্নো? কিস্সাযং ভিক্খু পৰিৱসতী’তি? তে এৱং ৱদেন্তি – ‘অযং, আৱুসো, ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো; একা আপত্তি জানপ্পটিচ্ছন্না, একা আপত্তি অজানপ্পটিচ্ছন্না. সো সঙ্ঘং তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং অদাসি. তাযো অযং, আৱুসো, ভিক্খু আপন্নো, তাসাযং ভিক্খু পৰিৱসতী’তি. সো এৱং ৱদেতি – ‘যাযং, আৱুসো, আপত্তি জানপ্পটিচ্ছন্না, ধম্মিকং তস্সা আপত্তিযা পৰিৱাসদানং; ধম্মত্তা ৰুহতি. যা চ খ্ৱাযং, আৱুসো, আপত্তি অজানপ্পটিচ্ছন্না, অধম্মিকং তস্সা আপত্তিযা পৰিৱাসদানং; অধম্মত্তা ন ৰুহতি. একিস্সা, আৱুসো, আপত্তিযা ভিক্খু মানত্তাৰহো’’’তি.

১৪৫. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একা আপত্তি সৰমানপ্পটিচ্ছন্না, একা আপত্তি অস্সৰমানপ্পটিচ্ছন্না. সো সঙ্ঘং তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং দেতি. তস্স পৰিৱসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ৱিযত্তো মেধাৱী লজ্জী কুক্কুচ্চকো সিক্খাকামো. সো এৱং ৱদেতি – ‘কি অযং, আৱুসো, ভিক্খু আপন্নো? কিস্সাযং ভিক্খু পৰিৱসতী’তি? তে এৱং ৱদেন্তি – ‘অযং, আৱুসো, ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো; একা আপত্তি সৰমানপ্পটিচ্ছন্না, একা আপত্তি অস্সৰমানপ্পটিচ্ছন্না. সো সঙ্ঘং তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচি. তস্স সঙ্ঘো তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং অদাসি. তাযো অযং, আৱুসো, ভিক্খু আপন্নো; তাসাযং ভিক্খু পৰিৱসতী’তি. সো এৱং ৱদেতি – ‘যাযং, আৱুসো, আপত্তি সৰমানপ্পটিচ্ছন্না ধম্মিকং তস্সা আপত্তিযা পৰিৱাসদানং; ধম্মত্তা ৰুহতি. যা চ খ্ৱাযং, আৱুসো, আপত্তি অস্সৰমানপ্পটিচ্ছন্না, অধম্মিকং তস্সা আপত্তিযা পৰিৱাসদানং; অধম্মত্তা ন ৰুহতি. একিস্সা, আৱুসো, আপত্তিযা ভিক্খু মানত্তাৰহো’’’তি.

১৪৬. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একা আপত্তি নিব্বেমতিকপ্পটিচ্ছন্না, একা আপত্তি ৱেমতিকপ্পটিচ্ছন্না. সো সঙ্ঘং তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং দেতি. তস্স পৰিৱসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ৱিযত্তো মেধাৱী লজ্জী কুক্কুচ্চকো সিক্খাকামো. সো এৱং ৱদেতি – ‘কিং অযং, আৱুসো, ভিক্খু আপন্নো? কিস্সাযং ভিক্খু পৰিৱসতী’তি? তে এৱং ৱদেন্তি – ‘অযং, আৱুসো, ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো; একা আপত্তি নিব্বেমতিকপ্পটিচ্ছন্না, একা আপত্তি ৱেমতিকপ্পটিচ্ছন্না. সো সঙ্ঘং তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচি. তস্স সঙ্ঘো তাসং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং অদাসি. তাযো অযং, আৱুসো, ভিক্খু আপন্নো; তাসাযং ভিক্খু পৰিৱসতী’তি. সো এৱং ৱদেতি – ‘যাযং, আৱুসো, আপত্তি নিব্বেমতিকপ্পটিচ্ছন্না, ধম্মিকং তস্সা আপত্তিযা পৰিৱাসদানং; ধম্মত্তা ৰুহতি. যা চ খ্ৱাযং, আৱুসো, আপত্তি ৱেমতিকপ্পটিচ্ছন্না অধম্মিকং তস্সা আপত্তিযা পৰিৱাসদানং; অধম্মত্তা ন ৰুহতি. একিস্সা, আৱুসো, আপত্তিযা ভিক্খু মানত্তাৰহো’’তি.

১৪৭. তেন খো পন সমযেন অঞ্ঞত্তৰো ভিক্খু দ্ৱে সঙ্ঘাদিসেসা আপত্তিযো আপন্নো হোতি দ্ৱেমাসপ্পটিচ্ছন্নাযো. তস্স এতদহোসি – ‘‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স পৰিৱসন্তস্স লজ্জীধম্মো ওক্কমি – ‘‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং [ইতৰম্পি মাসপৰিৱাসং (স্যা. ক. এৱমুপৰিপি)] যাচেয্য’’ন্তি.

সো ভিক্খূনং আৰোচেসি – ‘‘অহং খো, আৱুসো, দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্য’ন্তি. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘তেন হি, ভিক্খৱে, সঙ্ঘো তস্স ভিক্খুনো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দেতু. এৱঞ্চ পন, ভিক্খৱে, দাতব্বো –

‘‘তেন, ভিক্খৱে, ভিক্খুনা সঙ্ঘং উপসঙ্কমিত্ৱা…পে… এৱমস্স ৱচনীযো – অহং, ভন্তে, দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্যন্তি. সোহং, ভন্তে, সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচামীতি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

১৪৮. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো. তস্স এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্যন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো. তস্স এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচতি. সঙ্ঘো ইত্থন্নামস্স ভিক্খুনো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দেতি. যস্সাযস্মতো খমতি ইত্থন্নামস্স ভিক্খুনো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসস্স [ইতৰম্পি মাসপৰিৱাসস্স (ক.), ইতৰস্সপি মাসপৰিৱাসস্স (স্যা.)] দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘দিন্নো সঙ্ঘেন ইত্থন্নামস্স ভিক্খুনো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসো [ইতৰম্পি মাসপৰিৱাসো (ক.), ইতৰোপি মাসপৰিৱাসো (স্যা.)]. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

‘‘তেন, ভিক্খৱে, ভিক্খুনা পুৰিমং উপাদায দ্ৱে মাসা পৰিৱসিতব্বা.

১৪৯. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং দেতি. তস্স পৰিৱসন্তস্স লজ্জীধম্মো ওক্কমি – অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. তস্স মে এতদহোসি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচেয্য’ন্তি. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং একমাসপৰিৱাসং অদাসি. তস্স মে পৰিৱসন্তস্স লজ্জীধম্মো ওক্কমি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দেতি. তেন, ভিক্খৱে, ভিক্খুনা পুৰিমং উপাদায দ্ৱে মাসা পৰিৱসিতব্বা.

১৫০. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একং মাসং জানাতি, একং মাসং ন জানাতি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং জানাতি তং মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং জানাতি তং মাসং পৰিৱাসং দেতি. সো পৰিৱসন্তো ইতৰম্পি মাসং জানাতি. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো; একং মাসং জানিং, একং মাসং ন জানিং. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং জানিং তং মাসং পৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং জানিং তং মাসং পৰিৱাসং অদাসি. সোহং পৰিৱসন্তো ইতৰম্পি মাসং জানামি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দেতি. তেন, ভিক্খৱে, ভিক্খুনা পুৰিমং উপাদায দ্ৱে মাসা পৰিৱসিতব্বা.

১৫১. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একং মাসং সৰতি, একং মাসং নস্সৰতি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং সৰতি তং মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং সৰতি তং মাসং পৰিৱাসং দেতি. সো পৰিৱসন্তো ইতৰম্পি মাসং সৰতি. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো; একং মাসং সৰিং, একং মাসং নস্সৰিং. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং সৰিং তং মাসং পৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং সৰিং তং মাসং পৰিৱাসং অদাসি. সোহং পৰিৱসন্তো ইতৰম্পি মাসং সৰামি. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দেতি. তেন, ভিক্খৱে, ভিক্খুনা পুৰিমং উপাদায দ্ৱে মাসা পৰিৱসিতব্বা.

১৫২. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একং মাসং নিব্বেমতিকো, একং মাসং ৱেমতিকো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং নিব্বেমতিকো তং মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং নিব্বেমতিকো তং মাসং পৰিৱাসং দেতি. সো পৰিৱসন্তো ইতৰম্পি মাসং নিব্বেমতিকো হোতি. তস্স এৱং হোতি – ‘অহং খো দ্ৱে সঙ্ঘাদিসেসা আপত্তিযো আপজ্জিং দ্ৱেমাসপ্পটিচ্ছন্নাযো; একং মাসং নিব্বেমতিকো, একং মাসং ৱেমতিকো. সোহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং যং মাসং নিব্বেমতিকো তং মাসং পৰিৱাসং যাচিং. তস্স মে সঙ্ঘো দ্ৱিন্নং আপত্তীনং দ্ৱেমাসপ্পটিচ্ছান্নানং যং মাসং নিব্বেমতিকো তং মাসং পৰিৱাসং অদাসি. সোহং পৰিৱসন্তো ইতৰম্পি মাসং নিব্বেমতিকো. যংনূনাহং সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচেয্য’ন্তি. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং ইতৰম্পি মাসং পৰিৱাসং দেতি. তেন, ভিক্খৱে, ভিক্খুনা পুৰিমং উপাদায দ্ৱে মাসা পৰিৱসিতব্বা.

১৫৩. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একো মাসো জানপ্পটিচ্ছন্নো, একো মাসো অজানপ্পটিচ্ছন্নো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং দেতি. তস্স পৰিৱসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ৱিযত্তো মেধাৱী লজ্জী কুক্কুচ্চকো সিক্খাকামো. সো এৱং ৱদেতি – ‘কিং অযং, আৱুসো, ভিক্খু আপন্নো? কিস্সাযং ভিক্খু পৰিৱসতী’তি? তে এৱং ৱদেন্তি – ‘অযং, আৱুসো, ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো. একো মাসো জানপ্পটিচ্ছন্নো, একো মাসো অজানপ্পটিচ্ছন্নো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং অদাসি. তাযো অযং, আৱুসো, ভিক্খু আপন্নো তাসাযং ভিক্খু পৰিৱসতী’তি. সো এৱং ৱদেতি – ‘য্ৱাযং, আৱুসো, মাসো জানপ্পটিচ্ছন্নো ধম্মিকং তস্স মাসস্স পৰিৱাসদানং; ধম্মত্তা ৰুহতি. যো চ খ্ৱাযং, আৱুসো, মাসো অজানপ্পটিচ্ছন্নো অধম্মিকং তস্স মাসস্স পৰিৱাসদানং; অধম্মত্তা ন ৰুহতি. একস্স, আৱুসো, মাসস্স ভিক্খু মানত্তাৰহো’তি.

১৫৪. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একো মাসো সৰমানপ্পটিচ্ছন্নো, একো মাসো অস্সৰমানপ্পটিচ্ছন্নো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং দেতি. তস্স পৰিৱসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ৱিযত্তো মেধাৱী লজ্জী কুক্কুচ্চকো সিক্খাকামো. সো এৱং ৱদেতি – ‘কিং অযং, আৱুসো, ভিক্খু আপন্নো? কিস্সাযং ভিক্খু পৰিৱসতী’তি? তে এৱং ৱদেন্তি – ‘অযং, আৱুসো, ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো; একো মাসো সৰমানপ্পটিচ্ছন্নো, একো মাসো অস্সৰমানপ্পটিচ্ছন্নো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং অদাসি. তাযো অযং, আৱুসো, ভিক্খু আপন্নো তাসাযং ভিক্খু পৰিৱসতী’তি. সো এৱং ৱদেতি – ‘য্ৱাযং, আৱুসো, মাসো সৰমানপ্পটিচ্ছন্নো ধম্মিকং তস্স মাসস্স পৰিৱাসদানং; ধম্মত্তা ৰুহতি. যো চ খ্ৱাযং, আৱুসো, মাসো অস্সৰমানপ্পটিচ্ছন্নো অধম্মিকং তস্স মাসস্স পৰিৱাসদানং; অধম্মত্তা ন ৰুহতি. একস্স, আৱুসো, মাসস্স ভিক্খু মানত্তাৰহো’তি.

১৫৫. ‘‘ইধ পন, ভিক্খৱে, ভিক্খু দ্ৱে সঙ্ঘাদিসেসা আপত্তিযো আপজ্জতি দ্ৱেমাসপ্পটিচ্ছন্নাযো; একো মাসো নিব্বেমতিকপ্পটিচ্ছন্নো, একো মাসো ৱেমতিকপ্পটিচ্ছন্নো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচতি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং দেতি. তস্স পৰিৱসন্তস্স অঞ্ঞো ভিক্খু আগচ্ছতি বহুস্সুতো আগতাগমো ধম্মধৰো ৱিনযধৰো মাতিকাধৰো পণ্ডিতো ৱিযত্তো মেধাৱী লজ্জী কুক্কুচ্চকো সিক্খাকামো. সো এৱং ৱদেতি – ‘কিং অযং, আৱুসো, ভিক্খু আপন্নো? কিস্সাযং ভিক্খু পৰিৱসতী’তি? তে এৱং ৱদেন্তি – ‘অযং, আৱুসো, ভিক্খু দ্ৱে সঙ্ঘাদিসেসা আপত্তিযো আপজ্জি দ্ৱেমাসপ্পটিচ্ছন্নাযো; একো মাসো নিব্বেমতিকপ্পটিচ্ছন্নো, একো মাসো ৱেমতিকপ্পটিচ্ছন্নো. সো সঙ্ঘং দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং যাচি. তস্স সঙ্ঘো দ্ৱিন্নং আপত্তীনং দ্ৱেমাসপ্পটিচ্ছন্নানং দ্ৱেমাসপৰিৱাসং অদাসি. তাযো অযং, আৱুসো, ভিক্খু আপন্নো তাসাযং ভিক্খু পৰিৱসতী’তি. সো এৱং ৱদেতি – ‘য্ৱাযং, আৱুসো, মাসো নিব্বেমতিকপ্পটিচ্ছন্নো ধম্মিকং তস্স মাসস্স পৰিৱাসদানং; ধম্মত্তা ৰুহতি. যো চ খ্ৱাযং, আৱুসো, মাসো ৱেমতিকপ্পটিচ্ছন্নো অধম্মিকং তস্স মাসস্স পৰিৱাসদানং; অধম্মত্তা ন ৰুহতি. একস্স, আৱুসো, মাসস্স ভিক্খু মানত্তাৰহো’’তি.

সুদ্ধন্তপৰিৱাসো

১৫৬. তেন খো পন সমযেন অঞ্ঞতৰো ভিক্খু সম্বহুলা সঙ্ঘাদিসেসা আপত্তিযো আপন্নো হোতি. সো আপত্তিপৰিযন্তং ন জানাতি; ৰত্তিপৰিযন্তং ন জানাতি; আপত্তিপৰিযন্তং নস্সৰতি, ৰত্তিপৰিযন্তং নস্সৰতি; আপত্তিপৰিযন্তে ৱেমতিকো, ৰত্তিপৰিযন্তে ৱেমতিকো. সো ভিক্খূনং আৰোচেসি – ‘‘অহং, আৱুসো, সম্বহুলা সঙ্ঘাদিসেসা আপত্তিযো আপজ্জিং; আপত্তিপৰিযন্তং ন জানামি, ৰত্তিপৰিযন্তং ন জানামি; আপত্তিপৰিযন্তং নস্সৰামি, ৰত্তিপৰিযন্তং নস্সৰামি; আপত্তিপৰিযন্তে ৱেমতিকো, ৰত্তিপৰিযন্তে ৱেমতিকো. কথং নু খো মযা পটিপজ্জিতব্ব’’ন্তি? ভগৱতো এতমত্থং আৰোচেসুং. ‘‘তেন হি, ভিক্খৱে, সঙ্ঘো তস্স ভিক্খুনো তাসং আপত্তীনং সুদ্ধন্তপৰিৱাসং দেতু. এৱঞ্চ পন, ভিক্খৱে, দাতব্বো –

‘‘তেন, ভিক্খৱে, ভিক্খুনা সঙ্ঘং উপসঙ্কমিত্ৱা…পে… এৱমস্স ৱচনীযো – ‘অহং, ভন্তে, সম্বহুলা সঙ্ঘাদিসেসা আপত্তিযো আপজ্জিং. আপত্তিপৰিযন্তং ন জানামি, ৰত্তিপৰিযন্তং ন জানামি; আপত্তিপৰিযন্তং নস্সৰামি, ৰত্তিপৰিযন্তং নস্সৰামি; আপত্তিপৰিযন্তে ৱেমতিকো, ৰত্তিপৰিযন্তে ৱেমতিকো. সোহং, ভন্তে, সঙ্ঘং তাসং আপত্তীনং সুদ্ধন্তপৰিৱাসং যাচামী’তি. দুতিযম্পি যাচিতব্বো. ততিযম্পি যাচিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

১৫৭. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি. আপত্তিপৰিযন্তং ন জানাতি, ৰত্তিপৰিযন্তং ন জানাতি; আপত্তিপৰিযন্তং নস্সৰতি, ৰত্তিপৰিযন্তং নস্সৰতি; আপত্তিপৰিযন্তে ৱেমতিকো, ৰত্তিপৰিযন্তে ৱেমতিকো. সো সঙ্ঘং তাসং আপত্তীনং সুদ্ধন্তপৰিৱাসং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো তাসং আপত্তীনং সুদ্ধন্তপৰিৱাসং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সম্বহুলা সঙ্ঘাদিসেসা আপত্তিযো আপজ্জি. আপত্তিপৰিযন্তং ন জানাতি, ৰত্তিপৰিযন্তং ন জানাতি; আপত্তিপৰিযন্তং নস্সৰতি, ৰত্তিপৰিযন্তং নস্সৰতি; আপত্তিপৰিযন্তে ৱেমতিকো, ৰত্তিপৰিযন্তে ৱেমতিকো. সো সঙ্ঘং তাসং আপত্তীনং সুদ্ধন্তপৰিৱাসং যাচতি. সঙ্ঘো ইত্থন্নামস্স ভিক্খুনো তাসং আপত্তীনং সুদ্ধন্তপৰিৱাসং দেতি. যস্সাযস্মতো খমতি ইত্থন্নামস্স ভিক্খুনো তাসং আপত্তীনং সুদ্ধন্তপৰিৱাসস্স দানং, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৱদামি…পে… ততিযম্পি এতমত্থং ৱদামি…পে….

‘‘দিন্নো সঙ্ঘেন ইত্থন্নামস্স ভিক্খুনো তাসং আপত্তীনং সুদ্ধন্তপৰিৱাসো. খমতি সঙ্ঘস্স, তস্মা তুণ্হী, এৱমেতং ধাৰযামী’’তি.

১৫৮. ‘‘এৱং খো, ভিক্খৱে, সুদ্ধন্তপৰিৱাসো দাতব্বো; এৱং পৰিৱাসো দাতব্বো. কথঞ্চ, ভিক্খৱে, সুদ্ধন্তপৰিৱাসো দাতব্বো? আপত্তিপৰিযন্তং ন জানাতি, ৰত্তিপৰিযন্তং ন জানাতি; আপত্তিপৰিযন্তং নস্সৰতি, ৰত্তিপৰিযন্তং নস্সৰতি; আপত্তিপৰিযন্তে ৱেমতিকো, ৰত্তিপৰিযন্তে ৱেমতিকো – সুদ্ধন্তপৰিৱাসো দাতব্বো.

‘‘আপত্তিপৰিযন্তং জানাতি, ৰত্তিপৰিযন্তং ন জানাতি; আপত্তিপৰিযন্তং সৰতি, ৰত্তিপৰিযন্তং নস্সৰতি; আপত্তিপৰিযন্তে নিব্বেমতিকো, ৰত্তিপৰিযন্তে ৱেমতিকো – সুদ্ধন্তপৰিৱাসো দাতব্বো.

‘‘আপত্তিপৰিযন্তং একচ্চং জানাতি, একচ্চং ন জানাতি, ৰত্তিপৰিযন্তং ন জানাতি; আপত্তিপৰিযন্তং একচ্চং সৰতি, একচ্চং নস্সৰতি, ৰত্তিপৰিযন্তং নস্সৰতি; আপত্তিপৰিযন্তে একচ্চে ৱেমতিকো, একচ্চে নিব্বেমতিকো, ৰত্তিপৰিযন্তে ৱেমতিকো – সুদ্ধন্তপৰিৱাসো দাতব্বো.

‘‘আপত্তিপৰিযন্তং ন জানাতি, ৰত্তিপৰিযন্তং একচ্চং জানাতি, একচ্চং ন জানাতি; আপত্তিপৰিযন্তং নস্সৰতি, ৰত্তিপৰিযন্তং একচ্চং সৰতি, একচ্চং নস্সৰতি; আপত্তিপৰিযন্তে ৱেমতিকো, ৰত্তিপৰিযন্তে একচ্চে ৱেমতিকো, একচ্চে নিব্বেমতিকো – সুদ্ধন্তপৰিৱাসো দাতব্বো.

‘‘আপত্তিপৰিযন্তং জানাতি, ৰত্তিপৰিযন্তং একচ্চং জানাতি, একচ্চং ন জানাতি; আপত্তিপৰিযন্তং সৰতি, ৰত্তিপৰিযন্তং একচ্চং সৰতি, একচ্চং নস্সৰতি; আপত্তিপৰিযন্তে নিব্বেমতিকো, ৰত্তিপৰিযন্তে একচ্চে ৱেমতিকো, একচ্চে নিব্বেমতিকো – সুদ্ধন্তপৰিৱাসো দাতব্বো.

‘‘আপত্তিপৰিযন্তং একচ্চং জানাতি, একচ্চং ন জানাতি; ৰত্তিপৰিযন্তং একচ্চং জানাতি, একচ্চং ন জানাতি; আপত্তিপৰিযন্তং একচ্চং সৰতি, একচ্চং নস্সৰতি; ৰত্তিপৰিযন্তং একচ্চং সৰতি, একচ্চং নস্সৰতি; আপত্তিপৰিযন্তে একচ্চে ৱেমতিকো, একচ্চে নিব্বেমতিকো; ৰত্তিপৰিযন্তে একচ্চে ৱেমতিকো, একচ্চে নিব্বেমতিকো – সুদ্ধন্তপৰিৱাসো দাতব্বো. এৱং খো, ভিক্খৱে, সুদ্ধন্তপৰিৱাসো দাতব্বো.

১৫৯. ‘‘কথঞ্চ, ভিক্খৱে, পৰিৱাসো দাতব্বো? আপত্তিপৰিযন্তং জানাতি, ৰত্তিপৰিযন্তং জানাতি; আপত্তিপৰিযন্তং সৰতি, ৰত্তিপৰিযন্তং সৰতি; আপত্তিপৰিযন্তে নিব্বেমতিকো, ৰত্তিপৰিযন্তে নিব্বেমতিকো – পৰিৱাসো দাতব্বো.

‘‘আপত্তিপৰিযন্তং ন জানাতি, ৰত্তিপৰিযন্তং জানাতি; আপত্তিপৰিযন্তং নস্সৰতি, ৰত্তিপৰিযন্তং সৰতি, আপত্তিপৰিযন্তে ৱেমতিকো, ৰত্তিপৰিযন্তে নিব্বেমতিকো – পৰিৱাসো দাতব্বো.

‘‘আপত্তিপৰিযন্তং একচ্চং জানাতি, একচ্চং ন জানাতি, ৰত্তিপৰিযন্তং জানাতি; আপত্তিপৰিযন্তং একচ্চং সৰতি, একচ্চং নস্সৰতি, ৰত্তিপৰিযন্তং সৰতি; আপত্তিপৰিযন্তে একচ্চে ৱেমতিকো, একচ্চে নিব্বেমতিকো, ৰত্তিপৰিযন্তে নিব্বেমতিকো – পৰিৱাসো দাতব্বো. এৱং খো, ভিক্খৱে, পৰিৱাসো দাতব্বো.

পৰিৱাসো নিট্ঠিতো.