৩. চত্তালীসকং

১৬০. তেন খো পন সমযেন অঞ্ঞতৰো ভিক্খু পৰিৱসন্তো ৱিব্ভমি. সো পুন পচ্চাগন্ত্ৱা ভিক্খূ উপসম্পদং যাচি. ভগৱতো এতমত্থং আৰোচেসুং.

‘‘ইধ পন, ভিক্খৱে, ভিক্খু পৰিৱসন্তো ৱিব্ভমতি. ৱিব্ভন্তকস্স, ভিক্খৱে, পৰিৱাসো ন ৰুহতি. সো চে পুন উপসম্পজ্জতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো সামণেৰো হোতি. সামণেৰস্স, ভিক্খৱে, পৰিৱাসো ন ৰুহতি. সো চে পুন উপসম্পজ্জতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো উম্মত্তকো হোতি. উম্মত্তকস্স, ভিক্খৱে, পৰিৱাসো ন ৰুহতি. সো চে পুন অনুম্মত্তকো হোতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো খিত্তচিত্তো হোতি. খিত্তচিত্তস্স, ভিক্খৱে, পৰিৱাসো ন ৰুহতি. সো চে পুন অখিত্তচিত্তো হোতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পুৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো ৱেদনাট্টো হোতি. ৱেদনাট্টস্স, ভিক্খৱে, পৰিৱাসো ন ৰুহতি. সো চে পুন অৱেদনাট্টো হোতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো, আপত্তিযা অদস্সনে, উক্খিপিয্যতি [উক্খিপিযতি (স্যা.), উক্খিপীযতি (ক.)]. উক্খিত্তকস্স, ভিক্খৱে, পৰিৱাসো ন ৰুহতি. সো চে পুন ওসাৰিয্যতি [ওসাৰিযতি (স্যা.), ওসাৰীযতি (ক.)], তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো, আপত্তিযা অপ্পটিকম্মে, উক্খিপিয্যতি. উক্খিত্তকস্স, ভিক্খৱে, পৰিৱাসো ন ৰুহতি. সো চে পুন ওসাৰিয্যতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

‘‘ইধ পন, ভিক্খৱে, ভিক্খু পৰিৱসন্তো, পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৱে, পৰিৱাসো ন ৰুহতি. সো চে পুন ওসাৰিয্যতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো, অৱসেসো পৰিৱসিতব্বো.

১৬১. ‘‘ইধ পন, ভিক্খৱে, ভিক্খু মূলাযপটিকস্সনাৰহো ৱিব্ভমতি. ৱিব্ভন্তকস্স, ভিক্খৱে, মূলাযপটিকস্সনা ন ৰুহতি. সো চে পুন উপসম্পজ্জতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো. সো ভিক্খু মূলায পটিকস্সিতব্বো.

‘‘ইধ পন, ভিক্খৱে, ভিক্খু মূলাযপটিকস্সনাৰহো সামণেৰো হোতি…পে… উম্মত্তকো হোতি…পে… খিত্তচিত্তো হোতি…পে… ৱেদনাট্টো হোতি…পে… আপত্তিযা অদস্সনে উক্খিপিয্যতি…পে… আপত্তিযা অপ্পটিকম্মে উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৱে, মূলাযপটিকস্সনা ন ৰুহতি. সো চে পুন ওসাৰিয্যতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো. সো ভিক্খু মূলায পটিকস্সিতব্বো.

১৬২. ‘‘ইধ পন, ভিক্খৱে, ভিক্খু মানত্তাৰহো ৱিব্ভমতি. ৱিব্ভন্তকস্স, ভিক্খৱে, মানত্তদানং ন ৰুহতি. সো চে পুন উপসম্পজ্জতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো. তস্স ভিক্খুনো মানত্তং দাতব্বং.

‘‘ইধ পন, ভিক্খৱে, ভিক্খু মানত্তাৰহো সামণেৰো হোতি…পে… উম্মত্তকো হোতি…পে… খিত্তচিত্তো হোতি…পে… ৱেদনাট্টো হোতি…পে… আপত্তিযা অদস্সনে, উক্খিপিয্যতি…পে… আপত্তিযা অপ্পটিকম্মে, উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৱে, মানত্তদানং ন ৰুহতি. সো চে পুন ওসাৰিয্যতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো. তস্স ভিক্খুনো মানত্তং দাতব্বং.

১৬৩. ‘‘ইধ পন, ভিক্খৱে, ভিক্খু মানত্তং চৰন্তো ৱিব্ভমতি. ৱিব্ভন্তকস্স, ভিক্খৱে, মানত্তচৰিযা ন ৰুহতি. সো চে পুন উপসম্পজ্জতি তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং, অৱসেসং চৰিতব্বং.

‘‘ইধ পন, ভিক্খৱে, ভিক্খু মানত্তং চৰন্তো সামণেৰো হোতি…পে… উম্মত্তকো হোতি…পে… খিত্তচিত্তো হোতি…পে… ৱেদনাট্টো হোতি…পে… আপত্তিযা অদস্সনে, উক্খিপিয্যতি…পে… আপত্তিযা অপ্পটিকম্মে, উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৱে, মানত্তচৰিযা ন ৰুহতি. সো চে পুন ওসাৰিয্যতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পুৰিৱুত্থো সুপৰিৱুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং, অৱসেসং চৰিতব্বং.

১৬৪. ‘‘ইধ পন, ভিক্খৱে, ভিক্খু অব্ভানাৰহো ৱিব্ভমতি. ৱিব্ভন্তকস্স, ভিক্খৱে, অব্ভানং ন ৰুহতি. সো চে পুন উপসম্পজ্জতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং. সো ভিক্খু অব্ভেতব্বো.

‘‘ইধ পন, ভিক্খৱে, ভিক্খু অব্ভানাৰহো সামণেৰো হোতি…পে… উম্মত্তকো হোতি…পে…

খিত্তচিত্তো হোতি…পে… ৱেদনাট্টো হোতি…পে… আপত্তিযা অদস্সনে, উক্খিপিয্যতি…পে… আপত্তিযা অপ্পটিকম্মে, উক্খিপিয্যতি…পে… পাপিকায দিট্ঠিযা, অপ্পটিনিস্সগ্গে, উক্খিপিয্যতি. উক্খিত্তকস্স, ভিক্খৱে, অব্ভানং ন ৰুহতি. সো চে পুন ওসাৰিয্যতি, তস্স তদেৱ পুৰিমং পৰিৱাসদানং. যো পৰিৱাসো দিন্নো সুদিন্নো, যো পৰিৱুত্থো সুপৰিৱুত্থো; যং মানত্তং দিন্নং সুদিন্নং, যং মানত্তং চিণ্ণং সুচিণ্ণং. সো ভিক্খু অব্ভেতব্বো.

চত্তালীসকং সমত্তং.