১০. দুতিযনৱকং [ইদং নৱকং পোৰাণপোত্থকেসু অৱিসুদ্ধিৱসেনেৱ আগতং, ৱুচ্চমানততিযনৱকেন চ সংসট্ঠং. তং পটিৱিসোধকেহি অসংসট্ঠং কত্ৱা ৱিসুং পতিট্ঠাপিতং. সীহড়স্যামপোত্থকেসু পন তং ৱিসুদ্ধিৱসেনেৱ আগতং. তং পনেৱং ৱেদিতব্বং –§১০- মূলাযৱিসুদ্ধিনৱক (সী. স্যা.)§১৮৩. ইধ পন ভিক্খৱে ভিক্খু সম্বহুলা সংঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সংঘং তাসং আপত্তীনং সমোধানপৰিৱাসং যাচতি, তস্স তস্স সংঘো তাসং আপত্তীনং সমোধানপৰিৱাসং দেতি, সো পৰিৱসন্তো অন্তৰা সম্বহুলা সংঘাদিসেসা আপত্তিযো আপজ্জতি পৰিমাণাযো অপ্পটিচ্ছন্নাযো…পে… পৰিমাণাযো পটিচ্ছন্নাযো…পে… পৰিমাণাযো পটিচ্ছন্নাযোপি অপ্পটিচ্ছন্নাযোপি. সো সংঘং অন্তৰাআপত্তীনং মূলাযপটিকস্সনং যাচতি, তং সংঘো অন্তৰাআপত্তীনং মূলায পটিকস্সতি ধম্মিকেন কম্মেন অকুপ্পেন ঠানাৰহেন, ধম্মেন সমোধানপৰিৱাসং দেতি, ধম্মেন মানত্তং দেতি, ধম্মেন অব্ভেতি. সো ভিক্খৱে ভিক্খু ৱিসুদ্ধো তাহি আপত্তীহি. (১-৩)§ইধ পন ভিক্খৱে ভিক্খু সম্বহুলা সংঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সংঘং তাসং আপত্তীনং সমোধানপৰিৱাসং যাচতি, তস্স সংঘো তাসং আপত্তীনং সমোধানপৰিৱাসং দেতি, সো পৰিৱসন্তো অন্তৰা সম্বহুলা সংঘাদিসেসা আপত্তিযো আপজ্জতি অপৰিমাণাযো অপ্পটিচ্ছন্নাযো…পে… অপৰিমাণাযো পটিচ্ছন্নাযো…পে… অপৰিমাণাযো পটিচ্ছন্নাযোপি অপ্পটিচ্ছন্নাযোপি. সো সংঘং অন্তৰাআপত্তীনং মূলাযপটিকস্সনং যাচতি, তং সংঘো অন্তৰাআপত্তীনং মূলায পটিকস্সতি ধম্মিকেন কম্মেন অকুপ্পেন ঠানাৰহেন, ধম্মেন সমোধানপৰিৱাসং দেতি, ধম্মেন মানত্তং দেতি, ধম্মেন অব্ভেতি. সো ভিক্খৱে ভিক্খু ৱিসুদ্ধো তাহি আপত্তীতি. (৪-৬)§ইধ পন ভিক্খৱে ভিক্খু সম্বহুলা সংঘাদিসেসা আপত্তিযো আপজ্জতী পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সংঘং তাসং আপত্তীনং সমোধানপৰিৱাসং যাচতি, তস্স সংঘো তাসং আপত্তীনং সমোধানপৰিৱাসং দেতি, সো পৰিৱসন্তো অন্তৰা সম্বহুলা সংঘাদিসেসা আপত্তিযো আপজ্জতি পৰিমাণাযোপি অপৰিমাণাযোপি অপ্পটিচ্ছন্নাযো…পে… পৰিমাণাযোপি অপৰিমাণাযোপি পটিচ্ছন্নাযো…পে… পৰিমাণাযোপি অপৰিমাণাযোপি পটিচ্ছন্নাযোপি অপ্পটিচ্ছন্নাযোপি. সো সংঘং অন্তৰাআপত্তীনং মূলাযপটিকস্সনং যাচতি, তং সংঘো অন্তৰাআপত্তীনং মূলায পটিকস্সতি ধম্মিকেন কম্মেন অকুপ্পেন ঠানাৰহেন, ধম্মেন সমোধানপৰিৱাসং দেতি, ধম্মেন মানত্তং দেতি, ধম্মেন অব্ভেতি. সো ভিক্খৱে ভিক্খু ৱিসুদ্ধো তাহি আপত্তীহি. (৭-৯)§মূলায ৱিসুদ্ধিনৱকং নিট্ঠিতং.]

১৮৩. ‘‘ইধ পন, ভিক্খৱে, ভিক্খু সম্বহুলা সঙ্ঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সঙ্ঘং তাসং আপত্তীনং সমোধানপৰিৱাসং যাচতি. তস্স সঙ্ঘো তাসং আপত্তীনং সমোধানপৰিৱাসং দেতি. সো পৰিৱসন্তো অন্তৰা সম্বহুলা সঙ্ঘাদিসেসা আপত্তিযো আপজ্জতি পৰিমাণা অপ্পটিচ্ছন্নাযো. সো সঙ্ঘং অন্তৰাআপত্তীনং মূলাযপটিকস্সনং যাচতি. তং সঙ্ঘো অন্তৰাআপত্তীনং মূলায পটিকস্সতি অধম্মিকেন কম্মেন কুপ্পেন অট্ঠানাৰহেন, অধম্মেন সমোধানপৰিৱাসং দেতি; ধম্মেন মানত্তং দেতি, ধম্মেন অব্ভেতি. সো, ভিক্খৱে, ভিক্খু অৱিসুদ্ধো তাহি আপত্তীহি. (১)

ইধ পন, ভিক্খৱে, ভিক্খু সম্বহুলা সঙ্ঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সঙ্ঘং তাসং আপত্তীনং সমোধানপৰিৱাসং যাচতি. তস্স সঙ্ঘো তাসং আপত্তীনং সমোধানপৰিৱাসং দেতি. সো পৰিৱসন্তো অন্তৰা সম্বহুলা সঙ্ঘাদিসেসা আপত্তিযো আপজ্জতি পৰিমাণা পটিচ্ছন্নাযো. সো সঙ্ঘং অন্তৰাআপত্তীনং মূলাযপটিকস্সনং যাচতি. তং সঙ্ঘো অন্তৰাআপত্তীনং মূলায পটিকস্সতি অধম্মিকেন কম্মেন কুপ্পেন অট্ঠানাৰহেন, অধম্মেন সমোধানপৰিৱাসং দেতি; ধম্মেন মানত্তং দেতি, ধম্মেন অব্ভেতি. সো, ভিক্খৱে, ভিক্খু অৱিসুদ্ধো তাহি আপত্তীহি. (২)

‘‘ইধ পন, ভিক্খৱে, ভিক্খু সম্বহুলা সঙ্ঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সঙ্ঘং তাসং আপত্তীনং সমোধানপৰিৱাসং যাচতি. তস্স সঙ্ঘো তাসং আপত্তীনং সমোধানপৰিৱাসং দেতি. সো পৰিৱসন্তো অন্তৰা সম্বহুলা সঙ্ঘাদিসেসা আপত্তিযো আপজ্জতি পৰিমাণা পটিচ্ছন্নাযোপি অপ্পটিচ্ছন্নাযোপি. সো সঙ্ঘং অন্তৰাআপত্তীনং মূলাযপটিকস্সনং যাচতি. তং সঙ্ঘো অন্তৰাআপত্তীনং মূলায পটিকস্সতি অধম্মিকেন কম্মেন কুপ্পেন অট্ঠানাৰহেন, অধম্মেন সমোধানপৰিৱাসং দেতি; ধম্মেন মানত্তং দেতি, ধম্মেন অব্ভেতি. সো ভিক্খৱে, ভিক্খু অৱিসুদ্ধো তাহি আপত্তীহি. (৩)

‘‘ইধ পন, ভিক্খৱে, ভিক্খু সম্বহুলা সঙ্ঘাদিসেসা আপত্তিযো আপজ্জতি পৰিমাণম্পি অপৰিমাণম্পি, একনামম্পি নানানামম্পি, সভাগম্পি ৱিসভাগম্পি, ৱৱত্থিতম্পি সম্ভিন্নম্পি. সো সঙ্ঘং তাসং আপত্তীনং সমোধানপৰিৱাসং যাচতি. তস্স সঙ্ঘো তাসং আপত্তীনং সমোধানপৰিৱাসং দেতি. সো পৰিৱসন্তো অন্তৰা সম্বহুলা সঙ্ঘাদিসেসা আপত্তিযো আপজ্জতি অপৰিমাণা অপ্পটিচ্ছন্নাযো…পে… অপৰিমাণা পটিচ্ছন্নাযো…পে… অপৰিমাণা পটিচ্ছন্নাযোপি অপ্পটিচ্ছন্নাযোপি…পে… পৰিমাণাযোপি অপৰিমাণাযোপি অপ্পটিচ্ছন্নাযো. সো সঙ্ঘং অন্তৰাআপত্তীনং মূলাযপটিকস্সনং যাচতি. তং সঙ্ঘো অন্তৰাআপত্তীনং মূলায পটিকস্সতি অধম্মিকেন কম্মেন কুপ্পেন অট্ঠানাৰহেন, অধম্মেন সমোধানপৰিৱাসং দেতি; ধম্মেন মানত্তং দেতি, ধম্মেন অব্ভেতি. সো, ভিক্খৱে, ভিক্খু অৱিসুদ্ধো তাহি আপত্তীহি. (৪-৭)

‘‘ইধ পন, ভিক্খৱে, ভিক্খু সম্বহুলা সঙ্ঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সঙ্ঘং তাসং আপত্তীনং সমোধানপৰিৱাসং যাচতি. তস্স সঙ্ঘো তাসং আপত্তীনং সমোধানপৰিৱাসং দেতি. সো পৰিৱসন্তো অন্তৰা সম্বহুলা সঙ্ঘাদিসেসা আপত্তিযো আপজ্জতি পৰিমাণাযোপি অপৰিমাণাযোপি পটিচ্ছন্নাযো. সো সঙ্ঘং অন্তৰাআপত্তীনং মূলাযপটিকস্সনং যাচতি. তং সঙ্ঘো অন্তৰাআপত্তীনং মূলায পটিকস্সতি অধম্মিকেন কম্মেন কুপ্পেন অট্ঠানাৰহেন, অধম্মেন সমোধানপৰিৱাসং দেতি, ধম্মেন মানত্তং দেতি, ধম্মেন অব্ভেতি. সো, ভিক্খৱে, ভিক্খু অৱিসুদ্ধো তাহি আপত্তীহি. (৮)

‘‘ইধ পন, ভিক্খৱে, ভিক্খু সম্বহুলা সঙ্ঘাদিসেসা আপত্তিযো আপজ্জতি পৰিমাণম্পি অপৰিমাণম্পি…পে… ৱৱত্থিতম্পি সম্ভিন্নম্পি. সো সঙ্ঘং তাসং আপত্তীনং সমোধানপৰিৱাসং যাচতি. তস্স সঙ্ঘো তাসং আপত্তীনং সমোধানপৰিৱাসং দেতি. সো পৰিৱসন্তো অন্তৰা সম্বহুলা সঙ্ঘাদিসেসা আপত্তিযো আপজ্জতি পৰিমাণাযোপি অপৰিমাণাযোপি পটিচ্ছন্নাযোপি অপ্পটিচ্ছন্নাযোপি. সো সঙ্ঘং অন্তৰাআপত্তীনং মূলাযপটিকস্সনং যাচতি. তং সঙ্ঘো অন্তৰাআপত্তীনং মূলায পটিকস্সতি অধম্মিকেন কম্মেন কুপ্পেন অট্ঠানাৰহেন, অধম্মেন সমোধানপৰিৱাসং দেতি; ধম্মেন মানত্তং দেতি, ধম্মেন অব্ভেতি. সো, ভিক্খৱে, ভিক্খু অৱিসুদ্ধো তাহি আপত্তীহি. (৯)

দুতিযনৱকং নিট্ঠিতং.