৮. ৱিভত্তিহাৰৱিভঙ্গৱিভাৱনা

৩৩. যেন যেন সংৱণ্ণনাৱিসেসভূতেন আৱট্টহাৰৱিভঙ্গেন আৱট্টেতব্বা পদট্ঠানাদযো ৱিভত্তা, সো সংৱণ্ণনাৱিসেসভূতো আৱট্টহাৰৱিভঙ্গো পৰিপুণ্ণো, ‘‘তত্থ কতমো ৱিভত্তিহাৰৱিভঙ্গো’’তি পুচ্ছিতব্বত্তা ‘‘তত্থ কতমো ৱিভত্তিহাৰো’’তিআদি ৱুত্তং. তত্থ তত্থাতি তেসু নিদ্দিট্ঠেসু সোড়সসু দেসনাহাৰাদীসু কতমো সংৱণ্ণনাৱিসেসো ৱিভত্তিহাৰো ৱিভত্তিহাৰৱিভঙ্গো নামাতি পুচ্ছতি. ‘‘ধম্মঞ্চ পদট্ঠানং ভূমিঞ্চা’’তিআদিনিদ্দেসস্স ইদানি মযা ৱুচ্চমানো ‘‘দ্ৱে সুত্তানী’’তিআদিকো ৱিত্থাৰভূতো সংৱণ্ণনাৱিসেসো ৱিভত্তিহাৰো ৱিভত্তিহাৰৱিভঙ্গো নামাতি অত্থো গহেতব্বো.

‘‘যেসু সুত্তেসু ৱুত্তা ধম্মপদট্ঠানভূমিযো ইমিনা ৱিভত্তিহাৰেন ৱিভত্তা, তানি সুত্তানি কিত্তকানী’’তি পুচ্ছিতব্বত্তা তানি সুত্তানি পঠমং দস্সেতুং ‘‘দ্ৱে সুত্তানি ৱাসনাভাগিযঞ্চ নিব্বেধভাগিযঞ্চা’’তি ৱুত্তং. তত্থ ৱাসনাভাগিযন্তি পুঞ্ঞভাৱনা ৱাসনা নাম, ৱাসনায ভাগো কোট্ঠাসো ৱাসনাভাগো, ৱাসনাভাগে ৱাচকভাৱেন নিযুত্তং সুত্তন্তি ৱাসনাভাগিযং, কতমং তং? যস্মিং সুত্তে তীণি পুঞ্ঞকিৰিযৱত্থূনি ভগৱতা দেসিতানি, তং সুত্তং ৱাসনাভাগিযং. নিব্বেধভাগিযন্তি লোভক্খন্ধাদীনং নিব্বিজ্ঝনং পদালনং নিব্বেধো, নিব্বেধস্স ভাগো কোট্ঠাসো নিব্বেধভাগো, নিব্বেধভাগে ৱাচকভাৱেন নিযুত্তং সুত্তন্তি নিব্বেধভাগিযং, কতমং তং? যস্মিং সুত্তে সেক্খাসেক্খধম্মা ভগৱতা দেসিতা, তং সুত্তং নিব্বেধভাগিযং.

‘‘তেসং সুত্তানং পটিগ্গাহকা পুগ্গলা যাহি পটিপদাহি সম্পজ্জন্তি, তা পটিপদা কিত্তিকা’’তি পুচ্ছিতব্বত্তা ‘‘দ্ৱে পটিপদা’’তিআদি ৱুত্তং. দানসীলভাৱনামযপুঞ্ঞভাগে ভৱা পটিপদাতি পুঞ্ঞভাগিযা. ফলভাগে ভৱা পটিপদাতি ফলভাগিযা. ‘‘যেসু সীলেসু ঠিতা পটিগ্গাহকা পটিপজ্জন্তি, তানি সীলানি কিত্তকানী’’তি পুচ্ছিতব্বত্তা ‘‘দ্ৱে সীলানী’’তিআদি ৱুত্তং. সংৱৰতি এতেন সংৱৰেনাতি সংৱৰো, সো সংৱৰো পাতিমোক্খসংৱৰো, সতিসংৱৰো, ঞাণসংৱৰো, খন্তিসংৱৰো, ৱীৰিযসংৱৰোতি পঞ্চৱিধো. সব্বোপি পাপসংৱৰণতো সংৱৰো, লোকিযলোকুত্তৰসম্পত্তিট্ঠানত্তা সীলং নাম. পজহতি এতেন পহাতব্বেতি পহানং, পজহনং ৱা পহানং, তঞ্চ পহানং তদঙ্গপ্পহানং, ৱিক্খম্ভনপ্পহানং, সমুচ্ছেদপ্পহানং, পটিপস্সদ্ধিপ্পহানং, নিস্সৰণপ্পহানন্তি পঞ্চৱিধং. তত্থ নিস্সৰণপ্পহানং ৱজ্জেত্ৱা চতুব্বিধং পহানং ৱুত্তনযেন সীলং নাম.

‘‘তেসু সুত্তাদীসু ভগৱা কতমং সুত্তং কতমায পটিপদায দেসযতি, কতৰস্মিং সীলে ঠিতো পুগ্গলো কতমেন সীলেন ব্ৰহ্মচাৰী ভৱতী’’তি পুচ্ছিতব্বত্তা তথা ৱিভজিত্ৱা দস্সেতুং ‘‘তত্থ ভগৱা’’তিআদি ৱুত্তং. তত্থ তেসু ৱাসনাভাগিযাদীসু সুত্তেসু ৱাসনাভাগিযং সুত্তং তত্থ তাসু পুঞ্ঞভাগিযাদিপটিপদাসু পুঞ্ঞভাগিযায পটিপদায ভগৱা যস্স পুগ্গলস্স দেসযতি, সো ৱাসনাভাগিযসুত্তপটিগ্গাহকো পুগ্গলো তত্থ সংৱৰসীলাদীসু সংৱৰসীলে ঠিতো হুত্ৱা তেন সংৱৰসীলসঙ্খাতেন ব্ৰহ্মচৰিযেন সেট্ঠচৰিযেন ব্ৰহ্মচাৰী সেট্ঠাচাৰপূৰকো ভৱতি. তত্থ তেসু ৱাসনাভাগিযাদীসু সুত্তেসু নিব্বেধভাগিযং সুত্তং তত্থ তাসু পুঞ্ঞভাগিযাদিপটিপদাসু ফলভাগিযায পটিপদায যস্স পুগ্গলস্স ভগৱা দেসযতি, সো নিব্বেধভাগিযসুত্তপটিগ্গাহকো পুগ্গলো তত্থ সংৱৰসীলাদীসু পহানসীলে সমুচ্ছেদপ্পস্সদ্ধিপ্পহানৱসেন ঠিতো হুত্ৱা তেন পহানসীলসঙ্খাতেন ৱিসেসভূতেন মগ্গসঙ্খাতেন ব্ৰহ্মচৰিযেন ব্ৰহ্মচাৰী ভৱতীতি যোজনা কাতব্বা.

‘‘ৱাসনাভাগিযসুত্তাদীসু কতমং ৱাসনাভাগিযং সুত্ত’’ন্তি পুচ্ছিতব্বত্তা ‘‘তত্থ কতম’’ন্তিআদি ৱুত্তং. তত্থ তত্থাতি তেসু ৱাসনাভাগিযসুত্তাদীসু. দানকথাতি সপ্পুৰিসদানদানফলঅসপ্পুৰিসদানদানফলকথা. সীলকথাতি পঞ্চসীলাদিসীলফলকথা. সগ্গকথাতি সগ্গসম্পত্তিসুখকথা চেৱ সগ্গে নিব্বত্তাপকপুঞ্ঞকথা চ. আদীনৱোতি আদীনৱদস্সকো সুত্তন্তো. আনিসংসোতি আনিসংসদস্সকো সুত্তন্তো. ৱাসনাভাগিযং সুত্তং নামাতি যোজনা.

‘‘তত্থ কতম’’ন্তিআদীসু অনুসন্ধ্যত্থো ৱুত্তনযোৱ. যা দেসনা চতুসচ্চপ্পকাসনা, সা দেসনা নিব্বেধভাগিযং সুত্তং নামাতি যোজনা. এৱঞ্চ সতি ৱাসনাভাগিযসুত্তস্সপি নিব্বেধভাগিযসুত্তভাৱো আপজ্জেয্য চতুসচ্চপ্পকাসনতোতি চোদনং মনসি কত্ৱা ‘‘ৱাসনাভাগিযে সুত্তে’’তিআদি ৱুত্তং. ৱাসনাভাগিযে সুত্তে পজাননা ৱুট্ঠানগামিনিৱিপস্সনা অৰিযমগ্গপদট্ঠানভূতা পঞ্ঞা নত্থি, মগ্গো অৰিযমগ্গো নত্থি, ফলং অৰিযফলং নত্থি. নিব্বেধভাগিযে সুত্তে পন পজাননাদযো অত্থি, ৱাসনাভাগিযে সুত্তে নত্থি. ‘‘পজাননা’’তিআদিনা চতুসচ্চপ্পকাসনা দানকথাদিকা নিব্বেধভাগিযে সুত্তে অন্তোগধা, ইতৰংযেৱ ৱাসনাভাগিযসুত্তন্তি নামাতি দস্সেতি. যেসু সুত্তেসু ৱুত্তা ধম্মপদট্ঠানভূমিযো ৱিভত্তা, তানি সুত্তানি দ্ৱেযেৱ ন হোন্তি, কস্মা ‘‘দ্ৱেযেৱ সুত্তানি নিদ্ধাৰিতানী’’তি চে ৱদেয্যুং? অসঙ্কৰতো সুত্তে ৱুত্তানং ধম্মপদট্ঠানভূমীনং ৱিভজিতব্বানং সুৱিঞ্ঞেয্যত্তা. ‘‘যদি এৱং সংকিলেসভাগিযঅসেক্খভাগিযসুত্তানিপি নিদ্ধাৰিতানি অসঙ্কৰত্তা’’তি চে ৱদেয্যুং? নো নিদ্ধাৰিতানি, ৱাসনাভাগিযসুত্তে নিদ্ধাৰিতে সংকিলেসভাগিযসুত্তম্পি নিদ্ধাৰিতং, সংকিলেসধম্মতো নিস্সট্ঠধম্মানংযেৱ ৱাসনাভাগিযধম্মত্তা নিব্বেধভাগিযসুত্তে চ নিদ্ধাৰিতে অসেক্খভাগিযসুত্তম্পি নিদ্ধাৰিতং অনঞ্ঞত্তা.

‘‘যেসু সুত্তেসু ৱুত্তা ধম্মপদট্ঠানভূমিযো ৱিভত্তিহাৰেন ৱিভত্তা, তানি সুত্তানি কতমেন ফলেন যোজযিতব্বানী’’তি পুচ্ছিতব্বত্তা ‘‘ইমানি চত্তাৰি সুত্তানী’’তিআদি ৱুত্তং. তত্থ ইমানি চত্তাৰি সুত্তানীতি যথানিদ্ধাৰিতানি ৱাসনাভাগিযনিব্বেধভাগিযসুত্তানি চেৱ তংনিদ্ধাৰণেন নিদ্ধাৰিতানি সংকিলেসভাগিযঅসেক্খভাগিযসুত্তানি চাতি চত্তাৰি সুত্তানি ইমেসংযেৱ চতুন্নং সুত্তানং দেসনায নযেন নীতেন ফলেন সব্বতো সব্বভাগেন সংৱৰসীলপ্পহানসীলেন ব্ৰহ্মচৰিযেন যোজযিতব্বানি. যোজেন্তেন চ সব্বতো সব্বভাগেন চ পদাদিৱিচযেন হাৰেন সংৱৰসীলাদিকং ফলং ৱিচিনিত্ৱা যুত্তিহাৰেন যুত্তং ফলং গৱেসিত্ৱা ‘‘ইদং ফলং ইমস্স পুগ্গলস্স ফলং, ইদং ফলং ইমস্স সুত্তস্স ফল’’ন্তি সুত্তানি ৱিসুং ৱিসুং ফলেন যোজযিতব্বানীতি অত্থো গহেতব্বো.

‘‘কিত্তকেন ফলেন ব্ৰহ্মচৰিযেন যোজেতব্বানী’’তি পুচ্ছিতব্বত্তা ‘‘যাৱতিকা ঞাণস্স ভূমী’’তি ৱুত্তং. ভগৱতা দেসিতেন ৱাসনাভাগিযসুত্তেন সিদ্ধা যাৱতিকা পুঞ্ঞভাগিযা পটিপদাদযো ৱিভজনঞাণস্স ভূমি আৰম্মণা ভৱিতুমৰহন্তি, তাৱতিকাহি ভূমীহি ৱাসনাভাগিযসুত্তং যোজযিতব্বং. নিব্বেধভাগিযসুত্তেন সিদ্ধা যাৱতিকা ফলভাগিযা পটিপদাদযো ৱিভজনঞাণস্স ভূমি আৰম্মণা ভৱিতুমৰহন্তি, তাৱতিকাহি ভূমীহি নিব্বেধভাগিযসুত্তং যোজেতব্বং. ইতৰদ্ৱযম্পি সুত্তং যথাসম্ভৱং যোজেতব্বং. এতেন ঞাণস্স ভূমীনং সুত্তত্থানং বহুৱিধত্তং দস্সেতি.

৩৪. ৱাসনাভাগিযসুত্তাদীসু ৱুত্তা ধম্মা ৱাসনাভাগিযনিব্বেধভাগিযভাৱেহি আচৰিযেন ৱিভত্তা, অম্হেহি চ ঞাতা, ‘‘কথং সংকিলেসভাগিযঅসেক্খাভাগিযভাৱেহি অসাধাৰণাসাধাৰণভাৱেহি ৱিভজিতব্বা’’তি পুচ্ছিতব্বত্তা ‘‘তত্থ কতমে ধম্মা সাধাৰণা’’তিআদি আৰদ্ধং. অট্ঠকথায পন –

‘‘এৱং ৱাসনাভাগিযনিব্বেধভাগিযভাৱেহি ধম্মে একদেসেন ৱিভজিত্ৱা ইদানি তেসং কিলেসভাগিযঅসেক্খভাগিযভাৱেহি সাধাৰণাসাধাৰণভাৱেহি ৱিভজিতুং ‘তত্থ কতমে ধম্মা সাধাৰণা’তিআদি আৰদ্ধ’’ন্তি (নেত্তি. অট্ঠ. ৩৪) –

ৱুত্তং. তত্থ তত্থাতি যে ধম্মা সুত্তে ৱুত্তা ৱিভত্তিহাৰেন ৱিভজিতব্বা, তেসু ধম্মেসু কতমে ধম্মা সাধাৰণাতি পুচ্ছতি, দ্ৱে ধম্মা সাধাৰণাতি ৱিস্সজ্জেতি. তে দ্ৱে ধম্মে সৰূপতো দস্সেতুং ‘‘নামসাধাৰণা, ৱত্থুসাধাৰণা চা’’তি ৱুত্তং. তত্থ নামসাধাৰণাতি নামেন নামপঞ্ঞত্তিযা সাধাৰণা সমানা, ‘‘কুসলা’’তি নামেন একৱীসতি চিত্তুপ্পাদা সমানা, ‘‘অকুসলা’’ত্যাদিনামেন দ্ৱাদস চিত্তুপ্পাদা সমানা, কুসলাদিনামপঞ্ঞত্তিৱচনেন ৱচনীযা অত্থা কুসলাদিনামসাধাৰণাতি ৱুত্তা. তেন টীকাযং –

‘‘নামং নামপঞ্ঞত্তি, তংমুখেনেৱ সদ্দতো তদত্থাৱগমো. সদ্দেন চ সামঞ্ঞৰূপেনেৱ তথাৰূপস্স অত্থস্স গহণং, ন ৱিসেসৰূপেন. তস্মা সদ্দৱচনীযা অত্থা সাধাৰণৰূপনামাযত্তগহণীযতায নামসাধাৰণা ৱুত্তা’’তি –

ৱুত্তং. ৱত্থুসাধাৰণাতি পতিট্ঠানভূতেন ৱত্থুনা সাধাৰণা. যস্মিং পতিট্ঠানভূতে সন্তানে ৱা চিত্তুপ্পাদাদিম্হি ৱা যে ধম্মা পৱত্তন্তি, তে ধম্মা তেন সন্তানেন ৱা ৱত্থুনা তেন চিত্তুপ্পাদাদিনা ৱা সাধাৰণা সমানাতি অত্থো. একসন্তানে পতিতত্তা ফুসনাদিসভাৱতো ভিন্নাপি ৱত্থুসাধাৰণা সমানৱত্থুকাযেৱ ভৱন্তীতি ৱিভত্তিহাৰেন ৱিভজিত্ৱাতি ৱুত্তং হোতি.

‘‘কিং নামসাধাৰণৱত্থুসাধাৰণাযেৱ ৱিভজিতব্বা, অঞ্ঞং ৱিভজিতব্বং নত্থী’’তি পুচ্ছিতব্বত্তা ‘‘যং ৱা পনা’’তিআদি ৱুত্তং. নামসাধাৰণৱত্থুসাধাৰণেহি অঞ্ঞং যং ৱা পন কিচ্চসাধাৰণপচ্চযসাধাৰণপটিপক্খাদিসাধাৰণম্পি ধম্মজাতং এৱংজাতিযং সাধাৰণজাতিযং, তম্পি সব্বং ৱিচযহাৰেন ৱিচিনিত্ৱা যুত্তিহাৰেন গৱেসিত্ৱা যুত্তং সাধাৰণং ৱিভত্তিহাৰেন ৱিভজিতব্বন্তি অধিপ্পাযো. ‘‘তেসু নামসাধাৰণাদীসু কতমে নামসাধাৰণা, কতমে ৱত্থুসাধাৰণা’’তি পুচ্ছিতব্বত্তা ‘‘মিচ্ছত্তনিযতানং সত্তান’’ন্তিআদি ৱুত্তং. মাতুঘাতকাদীনং ছন্নং মিচ্ছত্তনিযতকম্মকৰানং সত্তানঞ্চ দুগ্গতিঅহেতুকসুগতিঅহেতুকদুহেতুকতিহেতুকানং চতুন্নং পুথুজ্জনানং অনিযতকম্মকৰানং সত্তানঞ্চ সন্তানে পৱত্তা দস্সনপহাতব্বা কিলেসা দস্সনপহাতব্বনামসাধাৰণা সমানা ভৱন্তি সক্কাযদিট্ঠিৱিচিকিচ্ছাসীলব্বতপৰামসনৱসেন ভিন্নসভাৱানম্পি দস্সনপহাতব্বনামনাতিৱত্তনতো. ৱুত্তপ্পকাৰানং নিযতানিযতসত্তানং দস্সনপহাতব্বানং কিলেসানং পতিট্ঠানৱত্থুভাৱতো ৱত্থুসাধাৰণা চ সমানৱত্থুকাতি অত্থো. পুথুজ্জনস্স দুগ্গতিঅহেতুকাদিচতুব্বিধসত্তস্স, সোতাপন্নস্স চ সন্তানে পৱত্তা কামৰাগব্যাপাদা কিলেসা কামৰাগব্যাপাদনামসাধাৰণা সমানা ভৱন্তি সকদাগামিমগ্গপ্পহাতব্বঅনাগামিমগ্গপ্পহাতব্বৱসেন ভিন্নসভাৱানম্পি কামৰাগব্যাপাদনামনাতিৱত্তনতো. ৱুত্তপ্পকাৰস্স পুথুজ্জনস্স, সোতাপন্নস্স চ কামৰাগব্যাপাদানং পতিট্ঠানৱত্থুভাৱতো ৱত্থুসাধাৰণা সমানৱত্থুকাতি অত্থো চ গহেতব্বো. পুথুজ্জনস্স, অনাগামিস্স চ সন্তানে পৱত্তা উদ্ধংভাগিযা সংযোজনা উদ্ধম্ভাগিযনামসাধাৰণা সমানা ভৱন্তি ৰূপৰাগাদিৱসেন ভিন্নসভাৱানম্পি উদ্ধংভাগিযনামনাতিৱত্তনতো. পুথুজ্জনস্স, অনাগামিস্স চ উদ্ধংভাগিযানং পতিট্ঠানৱত্থুভাৱতো ৱত্থুসাধাৰণা সমানৱত্থুকাতি অত্থো চ গহেতব্বো. তেন ৱুত্তং টীকাযং – ‘‘দস্সনপহাতব্বানঞ্হি যথা মিচ্ছত্তনিযতসত্তা পৱত্তিট্ঠানং, এৱং অনিযতাপী’’তি ৱুত্তং. সঙ্খেপতো পন সংকিলেসপক্খে পহানেকট্ঠা কিলেসা নামসাধাৰণা হোন্তি, সহজেকট্ঠা কিলেসা ৱত্থুসাধাৰণাতি দট্ঠব্বা.

সংকিলেসপক্খে সাধাৰণা আচৰিযেন ৱিভত্তা, অম্হেহি চ ঞাতা, ‘‘কথং ৱোদানপক্খে সাধাৰণা ৱিভত্তা’’তি পুচ্ছিতব্বত্তা ‘‘যং কিঞ্চি অৰিযসাৱকো’’তিআদি ৱুত্তং. তত্থ যং কিঞ্চীতি সামঞ্ঞৱসেন ৱুত্তা পঠমজ্ঝানসমাপত্তিআদিকা লোকিযা সমাপত্তিযেৱ গহিতা. অৰিযসাৱকোতি অৰিযস্স ভগৱতো সাৱকো অৰিযসাৱকোতি ৱত্তব্বো, ঝানলাভী চ ফলট্ঠো চ পুগ্গলো, ন মগ্গট্ঠো. মগ্গট্ঠো হি লোকিযং যং কিঞ্চি সমাপত্তিং ন সমাপজ্জতি. সব্বা সা লোকিযসমাপত্তি ৰূপাৱচৰা অৰূপাৱচৰা দিব্বৱিহাৰো ব্ৰহ্মৱিহাৰো পঠমজ্ঝানসমাপত্তীতি এৱমাদীহি পৰিযাযেহি সাধাৰণা তংসমঙ্গীহি ৱীতৰাগাৱীতৰাগেহি সাধাৰণা লোকিযসমাপত্তিনামনাতিৱত্তনতো চ ৱীতৰাগাৱীতৰাগেহি সমাপজ্জিতব্বতো চ. ‘‘অৰিযসাৱকো চ লোকিযং সমাপত্তিং সমাপজ্জন্তো ওধিসো ওধিসো সমাপজ্জতি, এৱং সতি কথং ৱীতৰাগেহি সাধাৰণাতি সদ্দহিতব্বা’’তি ৱত্তব্বত্তা ‘‘সাধাৰণা হি ধম্মা’’তিআদি ৱুত্তং. অট্ঠকথাযং পন – ‘‘কথং তে ওধিসো গহিতা, অথ ওধিসো গহেতব্বা, কথং সাধাৰণাতি অনুযোগং মনসি কত্ৱা তং ৱিসোধেন্তো আহ – ‘সাধাৰণা হি ধম্মা এৱং অঞ্ঞমঞ্ঞ’ন্তিআদী’’তি ৱুত্তং.

তত্থ এৱং ৱীতৰাগাৱীতৰাগেহি ওধিসো ওধিসো সমাপজ্জিতব্বা ধম্মা পৰং পৰং পচ্ছা পচ্ছা পৱত্তিযমানং ধম্মজাতং সকং সকং পুব্বে পুব্বে জাতং ‘‘লোকিযসমাপত্তী’’তি নামং নিযতৱিসযং অঞ্ঞমঞ্ঞং হুত্ৱা হি যস্মা নাতিৱত্তন্তি, তস্মা সাধাৰণাতি সদ্দহিতব্বা গহেতব্বাতি অত্থো. ‘‘পৰং পৰং সমাপজ্জন্তো কথং নাতিৱত্ততী’’তি ৱত্তব্বত্তা নাতিৱত্তনং পাকটং কাতুং ‘‘যোপী’’তিআদি ৱুত্তং. যো অৰিযসাৱকো ৱা অৱীতৰাগো ৱা. ইমেহি লোকিযসমাপত্তিধম্মেহি সমন্নাগতো, সো অৰিযসাৱকো ৱা অৱীতৰাগো ৱা পৰং পৰং সমাপজ্জন্তোপি তং ধম্মং লোকিযং সমাপত্তিধম্মং নাতিৱত্ততি, অঞ্ঞং উপগন্ত্ৱা নাতিক্কমতীতি অত্থো. যেহি লোকিযসমাপত্তিধম্মেহি সমন্নাগতো, ইমে লোকিযসমাপত্তি ধম্মা সাধাৰণাৱাতি দট্ঠব্বা.

‘‘ৱাসনাভাগিযাদিসুত্তেসু ৱুত্তা যে ধম্মা ইমিনা ৱিভত্তিহাৰেন ৱিভত্তা, যেসু ধম্মেসু কতমে ধম্মা অসাধাৰণা’’তি পুচ্ছিতব্বত্তা ‘‘তত্থ কতমে ধম্মা অসাধাৰণা’’তিআদি ৱুত্তং. তত্থ তেসু ৱিভজিতব্বেসু ধম্মেসু কতমে ধম্মা অসাধাৰণাতি পুচ্ছতি, পুচ্ছিত্ৱা যাৱ দেসনং উপাদায অসাধাৰণা ধম্মা গৱেসিতব্বা, ‘‘সেক্খাসেক্খা’’তি ৱা গৱেসিতব্বা, ‘‘ভব্বাভব্বা’’তি ৱা গৱেসিতব্বা. অথ ৱা যাৱ ‘‘সেক্খাসেক্খা ভব্বাভব্বা’’তি দেসনা ৱুত্তা, তাৱ দেসনং উপাদায অসাধাৰণা গৱেসিতব্বা. কথং গৱেসিতব্বা? অৰিযেসু সেক্খাসেক্খধম্মৱসেন ‘‘সেক্খা’’তি নামং অসেক্খেন অসাধাৰণং, ‘‘অসেক্খা’’তি নামং সেক্খেন অসাধাৰণন্তি ৱা, অনৰিযেসু ‘‘ভব্বা’’তি নামং অভব্বেন অসাধাৰণং, ‘‘অভব্বা’’তি নামং ভব্বেন অসাধাৰণন্তি ৱা গৱেসিতব্বা. কামৰাগব্যাপাদা সংযোজনা অপ্পহীনত্তা অনুসযভাৱেন উপ্পজ্জনাৰহত্তা অট্ঠমকস্স সোতাপত্তিমগ্গট্ঠস্স চ সোতাপন্নস্স ফলট্ঠস্স চ সাধাৰণা ভৱন্তি, ধম্মতা ধম্মসভাৱো অসাধাৰণো. ইদং ৱুত্তং হোতি – ‘‘অট্ঠমকস্স সোতাপত্তিমগ্গট্ঠতা সোতাপন্নস্স অসাধাৰণা, সোতাপন্নস্স সোতাপন্নফলট্ঠতা চ অট্ঠমকস্স সোতাপত্তিমগ্গট্ঠস্স অসাধাৰণা. অট্ঠমকস্স ৱা পহীযমানকিলেসতা সোতাপন্নস্স অসাধাৰণা, সোতাপন্নস্স পহীনকিলেসতা চ অট্ঠমকস্স অসাধাৰণা’’তি.

উদ্ধম্ভাগিযা সংযোজনা অপ্পহীনত্তা অনুসযভাৱেন উপ্পজ্জনাৰহত্তা অট্ঠমকস্স মগ্গট্ঠভাৱেন অট্ঠমকসদিসস্স অনাগামিমগ্গট্ঠস্স চ অনাগামিস্স ফলট্ঠস্স চ সাধাৰণা, ধম্মতা ধম্মসভাৱো অসাধাৰণা. ইদং ৱুত্তং হোতি – ‘‘অট্ঠমকস্স অনাগামিমগ্গট্ঠতা অনাগামিস্স ফলট্ঠস্স অসাধাৰণা, অনাগামিস্স অনাগামিফলট্ঠতা চ অট্ঠমকস্স অসাধাৰণা. অট্ঠমকস্স ৱা পহীযমানকিলেসতা অনাগামিস্স অসাধাৰণা, অনাগামিস্স ফলট্ঠস্স পহীনকিলেসতা চ অট্ঠমকস্স অসাধাৰণা’’তি. ‘‘মগ্গট্ঠতা ফলট্ঠতায অসাধাৰণা, ফলট্ঠতা চ মগ্গট্ঠতায অসাধাৰণা’’তিপি ৱত্তুং ৱট্টতি. সব্বেসং সত্তন্নং সেক্খানং পুগ্গলানং নামং‘‘সেক্খা’’তি নামং সাধাৰণং. ধম্মতা অসাধাৰণাতি চতুন্নং মগ্গট্ঠানং তংতংমগ্গট্ঠতা অঞ্ঞমঞ্ঞং মগ্গট্ঠানং অসাধাৰণা. হেট্ঠিমফলত্তযট্ঠানঞ্চ অসাধাৰণা, হেট্ঠিমফলত্তযট্ঠানং তংতংফলট্ঠতা চ অঞ্ঞমঞ্ঞং ফলট্ঠানং অসাধাৰণা, চতুন্নং মগ্গট্ঠানঞ্চ অসাধাৰণাতি অত্থো. ‘‘সেক্খানং তংতংমগ্গট্ঠতা তংতংফলট্ঠতায অসাধাৰণা, তংতংফলট্ঠতা চ তংতংমগ্গট্ঠতায অসাধাৰণা’’তি ৱত্তুম্পি ৱট্টতি. সব্বেসং পটিপন্নকানন্তি ফলত্থায পটিপজ্জন্তীতি পটিপন্নকা, তেসং মগ্গসমঙ্গীনং চতুন্নং পুগ্গলানং নামং ‘‘পটিপন্নকা’’তি নামং সাধাৰণং, ধম্মতা তংতংমগ্গট্ঠতা অসাধাৰণা. সব্বেসং সেক্খানং সত্তন্নং পুগ্গলানং সেক্খানং সীলং সাধাৰণং, ধম্মতা তংতংমগ্গট্ঠফলট্ঠতা অসাধাৰণাতি. ৱাসনাভাগিযসংকিলেসভাগিযসুত্তেসু ৱুত্তা দস্সনেনপহাতব্বাদযো চেৱ নিব্বেধভাগিযঅসেক্খভাগিযসুত্তেসু ৱুত্তা সেক্খাদযো চ ধম্মা সাধাৰণাসাধাৰণভেদেন ৱিভত্তিহাৰেন ৱিভজিতব্বাতি অধিপ্পাযো ৱেদিতব্বো.

‘‘অট্ঠমকস্সা’’তিআদিনা অৰিযেসু পুগ্গলেসু অসাধাৰণা আচৰিযেন ৱিভত্তা, অম্হেহি চ ঞাতা, ‘‘কথং অনৰিযেসু অসাধাৰণা ৱিভত্তা’’তি পুচ্ছিতব্বত্তা অৰিযেসু ৱুত্তনযানুসাৰেন অনৰিযেসুপি ৱিভজিত্ৱা গৱেসিতব্বাতি দস্সেতুং ‘‘এৱং ৱিসেসানুপস্সিনা’’তিআদি ৱুত্তং. অট্ঠকথাযং পন – ‘‘এৱং ‘অট্ঠমকস্সা’তিআদিনা অৰিযপুগ্গলেসু অসাধাৰণধম্মং দস্সেত্ৱা ইতৰেসু নযদস্সনত্থং ‘এৱং ৱিসেসানুপস্সিনা’তিআদি ৱুত্ত’’ন্তি ৱুত্তং. এৱং অৰিযেসু ৱুত্তনযানুসাৰেন ভব্বাভব্বেসু অনৰিযেসু ৱিসেসানুপস্সিনা অসাধাৰণতো ৱিসেসং অসাধাৰণং অনুপস্সিনা গৱেসকেন পণ্ডিতেন ভব্বাভব্বেসুপি হীনুক্কট্ঠমজ্ঝিমং উপাদায গৱেসিতব্বং. কথং? মাতুঘাতাদিৱসেন পৱত্তানং পটিঘসম্পযুত্তদিট্ঠিসম্পযুত্তসত্তমজৱনচিত্তুপ্পাদানং মিচ্ছত্তনিযতানং তংসমঙ্গীনং ৱা তথাপৱত্তা পঠমজৱনচিত্তুপাদাদযো অনিযতা ধম্মা পটিঘসম্পযুত্তাদিভাৱেন সাধাৰণা, মিচ্ছত্তনিযতা ধম্মা একচিত্তুপ্পাদত্তা অসাধাৰণা. যথা হি চিত্তং ‘‘চিত্তসংসট্ঠ’’ন্তি ন ৱত্তব্বং, এৱং মিচ্ছত্তনিযতাপি ‘‘মিচ্ছত্তনিযতসাধাৰণা’’তি ন ৱত্তব্বা. মিচ্ছত্তনিযতেসুপি নিযতমিচ্ছাদিট্ঠিকানং দিট্ঠিসম্পযুত্তসত্তমজৱনচিত্তুপ্পাদসমঙ্গীনং অনিযতা দিট্ঠিসম্পযুত্তপঠমজৱনচিত্তুপ্পাদাদযো ধম্মা দিট্ঠিসম্পযুত্তাদিভাৱেন সাধাৰণা, নিযতমিচ্ছাদিট্ঠি একচিত্তুপ্পাদসমঙ্গীভাৱতো অসাধাৰণা. তেনাহ অট্ঠকথাচৰিযো –

‘‘মিচ্ছত্তনিযতানং অনিযতা ধম্মা সাধাৰণ, মিচ্ছত্তনিযতা ধম্মা অসাধাৰণা. মিচ্ছত্তনিযতেসুপি নিযতমিচ্ছাদিট্ঠিকানং অনিযতা ধম্মা সাধাৰণা, নিযতমিচ্ছাদিট্ঠি অসাধাৰণাতি ইমিনা নযেন ৱিসেসানুপস্সিনা ৱেদিতব্বা’’তি (নেত্তি. অট্ঠ. ৩৪).

তত্থ ‘‘ইমিনা নযেনা’’তি ইমিনা মিচ্ছত্তনিযতানং উপ্পজ্জিতুং ভব্বা অনিযতা ধম্মা সাধাৰণা, উপ্পজ্জিতুং অভব্বা অনিযতা ধম্মা অসাধাৰণাতি গহিতা. তেন ৱুত্তং ‘‘ভব্বাভব্বা’’তি. তথা হীনস্স হীনো হীনভাৱেন সাধাৰণো, মজ্ঝিমুক্কট্ঠা অসাধাৰণা. মজ্ঝিমস্স মজ্ঝিমো সাধাৰণো, হীনুক্কট্ঠা অসাধাৰণা. উক্কট্ঠস্স উক্কট্ঠো উক্কট্ঠভাৱেন সাধাৰণো, হীনমজ্ঝিমা অসাধাৰণাতিপি গৱেসিতব্বা. তেনাহ – ‘‘হীনুক্কট্ঠমজ্ঝিমং উপাদায গৱেসিতব্ব’’ন্তি.

‘‘তত্থ কতমে ধম্মা সাধাৰণা’’তিআদিনা নানাৱিধেন ৱিভত্তিহাৰনযেন ধম্মা ৱিভজিত্ৱা দস্সিতা, অম্হেহি চ ঞাতা, ‘‘কথং ভূমিপদট্ঠানানি ৱিভত্তিহাৰনযেন ৱিভজিত্ৱা দস্সিতানী’’তি পুচ্ছিতব্বভাৱতো ধম্মৱিভজনানন্তৰং ভূমিপদট্ঠানানি ৱিভজিত্ৱা দস্সেন্তো ‘‘দস্সনভূমী’’তিআদিমাহ. তত্থ দস্সনভূমীতি দস্সনং ভৱতি এত্থ পঠমমগ্গেতি দস্সনভূমি, সোতাপত্তিমগ্গো. নিযামাৱক্কন্তিযাতি নিযমনং নিযামো, কো সো? সম্পত্তনিযামো, অৱক্কনং অৱক্কন্তি, সোতাপত্তিফলং, নিযামস্স অৱক্কন্তি নিযামাৱক্কন্তি, তায. দস্সনভূমিনামকো সোতাপত্তিমগ্গো নিযামাৱক্কন্তিনামকস্স সোতাপত্তিফলস্স পত্তিযা পদট্ঠানং. পঠমমগ্গসমঙ্গী পুগ্গলো হি নিযামং ওক্কমন্তো নাম, ফলসমঙ্গী পন নিযামং ওক্কন্তো নাম হোতি, তস্মা নিযামাৱক্কন্তিসদ্দেন পঠমফলুপ্পত্তি গহিতা. ভাৱনাভূমীতি উপৰিমগ্গত্তযং. উত্তৰিকানন্তি তস্স তস্স মগ্গস্স উপৰিপৱত্তানং তংতংফলানং পত্তিযা পদট্ঠানন্তি পচ্চেকং যোজেতব্বং.

দুক্খা পটিপদা দন্ধাভিঞ্ঞা মন্দপঞ্ঞস্স উপ্পজ্জনতো সমথং আৱহন্তী হুত্ৱা সমথস্স পদট্ঠানং হোতি, সুখাপটিপদা খিপ্পাভিঞ্ঞা ঞাণাধিকস্স উপ্পজ্জনতো ৱিপস্সনাৱহন্তী হুত্ৱা ৱিপস্সনায পদট্ঠানং, অৱসেসা দ্ৱে পটিপদাপি নাতিপঞ্ঞস্স উপ্পজ্জনতো সমথস্স পদট্ঠানন্তি গহেতব্বা. তেন অট্ঠকথাযং ৱুত্তং – ‘‘ইতৰা পন তিস্সোপি পটিপদা সমথং আৱহন্তী’’তিআদি (নেত্তি. অট্ঠ. ৩৪). দানমযং পুঞ্ঞকিৰিযৱত্থু সযমেৱ একন্তেন ধম্মস্সৱনস্স পদট্ঠানং ন হোতি, ৱন্দনযাচনপঞ্হাপুচ্ছনাদযোপি পদট্ঠানং হোন্তি, তস্মা তেহি কাৰণেহি সাধাৰণং হুত্ৱা পৰতোঘোসস্স পদট্ঠানং হোতি, পৰতোঘোসো চ ধম্মস্সৱনপঞ্হাৱিস্সজ্জনাদিৱসেন পৱত্তো. দাতব্বৱত্থুপৰিচ্চজনৱন্দনযাচনকালেসু হি যেভুয্যেন ধম্মং দেসেন্তি, পঞ্হাপুচ্ছনাদিকালেসু চ ৱিস্সজ্জেন্তি, পটিপুচ্ছসাকচ্ছাদীনি ৱা কৰোন্তি. সীলমযং পুঞ্ঞকিৰিযৱত্থু পামোজ্জপীতিপস্সদ্ধিসুখসমাধীহি পদট্ঠানভাৱেন সাধাৰণং হুত্ৱা চিন্তামযিযা পঞ্ঞায পদট্ঠানং হোতি. সীলৱন্তস্স হি সীলং পচ্চৱেক্খন্তস্স পামোজ্জাদযো হোন্তি, সমাহিতো চ ধম্মচিন্তনে সমত্থো হোতি.

ভাৱনামযং পুঞ্ঞকিৰিযৱত্থূতি পুৰিমা পুৰিমা সমথভাৱনা চেৱ ৱিপস্সনাভাৱনা চ পুঞ্ঞকিৰিযৱত্থুদানসীলাদীহি কাৰণেহি সাধাৰণং হুত্ৱা ভাৱনামযিযা পঞ্ঞায পচ্ছিমায পচ্ছিমায সমথভাৱনায চেৱ ৱিপস্সনাভাৱনায চ পদট্ঠানং. তেন ৱুত্তং অট্ঠকথাযং – ‘‘সাধাৰণন্তি ন বীজং ৱিয অঙ্কুৰস্স, দস্সনভূমিআদযো ৱিয নিযামাৱক্কন্তিআদীনং আৱেণিকং, অথ খো সাধাৰণং তদঞ্ঞকাৰণেহিপী’’তি. ‘‘দানমযসীলমযভাৱনামযপুঞ্ঞকিৰিযৱত্থূনং পৰতোঘোসচিন্তামযিভাৱনামযিপঞ্ঞানং পদট্ঠানভাৱো আচৰিযেন ৱিভত্তো, এৱং সতি তেসং দানমযাদীনং যথাক্কমং পৰিযত্তিবাহুসচ্চকম্মট্ঠানানুযোগমগ্গসম্মাদিট্ঠীনং পদট্ঠানভাৱো ন ভৱেয্যা’’তি ৱত্তব্বত্তা তথাপৱত্তং পদট্ঠানভাৱম্পি দস্সেতুং ‘‘দানমযং পুঞ্ঞকিৰিযৱত্থু পৰতো চ ঘোসস্স সুতমযিযা চ পঞ্ঞাযা’’তিআদি ৱুত্তং. অট্ঠকথাযং পন –

‘‘ইদানি যস্মা দানং, সীলং, লোকিযভাৱনা চ ন কেৱলং যথাৱুত্তপৰতোঘোসাদীনংযেৱ, অথ খো যথাক্কমং পৰিযত্তিবাহুসচ্চকম্মট্ঠানানুযোগমগ্গসম্মাদিট্ঠীনম্পি পচ্চযা হোন্তি, তস্মা তম্পি নযং দস্সেতুং পুন ‘দানময’ন্তিআদিনা দেসনং ৱড্ঢেসী’’তি (নেত্তি. অট্ঠ. ৩৪) –

ৱুত্তং. তত্থ দানমযপুঞ্ঞকিৰিযৱত্থুনো পৰতোঘোসস্স সাধাৰণপদট্ঠানভাৱো হেট্ঠা ৱুত্তনযেন ঞাতব্বো. দানং পন দত্ৱা দেসনং সুত্ৱা সুতানুসাৰেন ৱিত্থাৰেত্ৱা চিন্তেন্তস্স পৱত্তমানায সুতমযিযা পঞ্ঞায ৱন্দনযাচনাদীহি সাধাৰণং হুত্ৱা পদট্ঠানং হোতি. সীলমযপুঞ্ঞকিৰিযৱত্থুনোপি চিন্তামযিযা পঞ্ঞায সাধাৰণপদট্ঠানভাৱো ৱুত্তোযেৱ. পৰিসুদ্ধসীলং পন নিস্সায ‘‘ঝানং নিব্বত্তেস্সামি, মগ্গফলং নিব্বত্তেস্সামী’’তিআদিনা পচ্চৱেক্খন্তস্স পৱত্তমানস্স যোনিসোমনসিকাৰস্স পামোজ্জাদীহি সাধাৰণং হুত্ৱা পদট্ঠানং হোতি. ভাৱনামযপুঞ্ঞকিৰিযৱত্থুনো ভাৱনামযিযা পঞ্ঞায সাধাৰণপদট্ঠানভাৱোপি ৱুত্তোযেৱ. সমথভাৱনাসঙ্খাতং পন ঝানং পাদকং কত্ৱা ৱা পৰিপাকং ৱিপস্সনাভাৱংযেৱ ৱা নিস্সায পৱত্তমানায সম্মাদিট্ঠিযা পৰিসুদ্ধসীলাদীহি সাধাৰণং হুত্ৱা পদট্ঠানং হোতি.

দানমযপুঞ্ঞকিৰিযৱত্থুআদীনং পৰতোঘোসাদীনং পদট্ঠানভাৱো পুনপ্পুনং আচৰিযেন ৱিভত্তো, অম্হেহি চ ঞাতো, ‘‘পতিৰূপদেসৱাসাদযোপি ইমেসং ধম্মানং পদট্ঠানানীতি যথা ৱিভজিতব্বা, অম্হেহি চ ৱিঞ্ঞাতব্বা, তথা ৱিভজিত্ৱা দস্সেথা’’তি ৱত্তব্বত্তা তেপি ৱিভজিত্ৱা দস্সেতুং ‘‘পতিৰূপদেসৱাসো’’তিআদিমাহ. অট্ঠকথাযং পন ‘‘তথা পতিৰূপদেসৱাসাদযো কাযৱিৱেকচিত্তৱিৱেকাদীনং কাৰণং হোন্তীতি ইমং নযং দস্সেতুং ‘পতিৰূপদেসৱাসো’তিআদিমাহা’’তি (নেত্তি. অট্ঠ. ৩৪) ৱুত্তং. পতিৰূপদেসং নিস্সায ৱসন্তস্স কাযৱিৱেকচিত্তৱিৱেকৱড্ঢনতো, সমাধিৱড্ঢনতো চ পতিৰূপদেসৱাসো কাযচিত্তৱিৱেকস্স চ উপচাৰসমাধিঅপ্পনাসমাধিস্স চ সীলাদীহি সাধাৰণং হুত্ৱা পদট্ঠানং. সপ্পুৰিসূপনিস্সযোতি সপ্পুৰিসসন্তানে পৱত্তো পযিৰুপাসতো আলম্বিতব্বো পসাদো, ততো ৱা উপনিস্সযং লভিত্ৱা পযিৰুপাসন্তানং সন্তানে পৱত্তো পুব্বপসাদো যথাৱিধো সপ্পুৰিসূপনিস্সযো পযিৰুপাসন্তস্স সদ্ধাসম্পন্নস্স ৰতনত্তযে তিণ্ণং অৱেচ্চপ্পসাদানং ৰতনত্তযগুণাদীহি সাধাৰণং হুত্ৱা পদট্ঠানং, সমথস্স লভননিমিত্তদাযকং সপ্পুৰিসং পযিৰুপাসিত্ৱা তেন দিন্ননযে ঠত্ৱা পৱত্তেতব্বস্স সমথস্স সপ্পুৰিসূপনিস্সযো সীলপামোজ্জপীতাদীহি সাধাৰণং হুত্ৱা পদট্ঠানং. অত্তসম্মাপণিহিতস্স পাপজিগুচ্ছাদীনং সম্ভৱতো অত্তসম্মাপণিধানং জাতিৱযাদিপচ্চৱেক্খণেন সাধাৰণং হুত্ৱা হিৰিযা চ পদট্ঠানং, অত্তসম্মাপণিহিতস্স নিব্বিদাদীনং সম্ভৱতো সীলাদীহি সাধাৰণং হুত্ৱা ৱিপস্সনায চ পদট্ঠানং.

তদঙ্গাদিৱসেন অকুসলপৰিচ্চাগো নিব্বিদাঞাণাদীহি সাধাৰণং হুত্ৱা কুসলৱীমংসায পটিসঙ্খানুপস্সনায পঞ্ঞায চ অৰিযমগ্গসমাধিন্দ্ৰিযস্স চ পদট্ঠানং. ধম্মস্ৱাক্খাততা স্ৱাক্খাতধম্মস্সৱনানুসাৰেন পৱত্তকুসলমূলকা লোকিযলোকুত্তৰসম্পত্তি কুসলমূলৰোপনা নাম, তায চ তথাৱিধকুসলমূলকায ফলসমাপত্তিযা চ পদট্ঠানং. সঙ্ঘসুপ্পটিপন্নতা সঙ্ঘসুট্ঠুতায সঙ্ঘস্স উপট্ঠাকানং সুট্ঠুভাৱায সপ্পতিস্সৱায ৱচনসম্পটিচ্ছনভাৱায পদট্ঠানং. সত্থুসম্পদা সত্থৰি চেৱ ধম্মাদীসু চ গুণঅজাননতায অপ্পসন্নানঞ্চ পসাদায পসন্নানঞ্চ অপ্পমত্তকপসাদানঞ্চ ভিয্যোভাৱায ৱড্ঢনায পদট্ঠানং. অপ্পটিহতপাতিমোক্খতা সঙ্ঘমজ্ঝে ৱা পৰিসমজ্ঝে ৱা দুম্মঙ্কূনং দুম্মুখানং দুস্সীলানং পুগ্গলানং নিগ্গহায, পেসলানং পাতিমোক্খসংৱৰাদিসীলসম্পন্নানং পুগ্গলানং ফাসুৱিহাৰায চ পদট্ঠানং হোতি. হোন্তো পন যথানুৰূপেহি অঞ্ঞেহি কাৰণেহি সাধাৰণং হুত্ৱা হোতীতি ৱেদিতব্বো.

‘‘ৱাসনাভাগিযসুত্তাদীসু ৱুত্তধম্মভূমিপদট্ঠানানং ৱিভত্তিহাৰেন ৱিভজিতব্বভাৱো অম্হেহি কেন জানিতব্বো সদ্দহিতব্বো’’তি পুচ্ছিতব্বত্তা ‘‘তেনাহা’’তিআদি ৱুত্তং. তস্সত্থো ৱুত্তনযানুসাৰেন ৱেদিতব্বো.

‘‘এত্তাৱতা চ ৱিভত্তিহাৰো পৰিপুণ্ণো, অঞ্ঞো নিযুত্তো নত্থী’’তি ৱত্তব্বত্তা ‘‘নিযুত্তো ৱিভত্তিহাৰো’’তি ৱুত্তং. যত্থ যত্থ সুত্তে যে যে ধম্মাদযো ৱুত্তা, তত্থ তত্থ সুত্তে ৱুত্তেসু তেসু তেসু ধম্মাদীসু যথালাভৱসেন যো যো ৱিভত্তিহাৰো যোজিতো, সো সো ৱিভত্তিহাৰো নিদ্ধাৰেত্ৱা যুত্তো যোজিতোতি অত্থো দট্ঠব্বো.

ইতি ৱিভত্তিহাৰৱিভঙ্গে সত্তিবলানুৰূপা ৰচিতা

ৱিভাৱনা নিট্ঠিতা.

পণ্ডিতেহি পন অট্ঠকথাটীকানুসাৰেনেৱ গম্ভীৰত্থো ৱিত্থাৰতো ৱিভজিত্ৱা গহেতব্বোতি.