১৬. সমাৰোপনহাৰসম্পাতৱিভাৱনা

৭৮. ‘‘তস্মা ৰক্খিতচিত্তস্সা’’তি পদেন যং ৰক্খিতচিত্তং ৱুত্তং, তং ৰক্খিতচিত্তং তিণ্ণং সুচৰিতানং কম্মানং পদট্ঠানং. সম্মাদিট্ঠিযা ভাৱিতায অৰিযো অট্ঠঙ্গিকো মগ্গো ভাৱিতো ভৱতি একতো ভাৱিতব্বত্তা, পদট্ঠানকাৰণত্তা চ. তেন ৱুত্তং – ‘‘সম্মাদিট্ঠিতো হী’’তিআদি. যস্স অৰহতো সমাধিৱিমুত্তি ভৱতি, অযং অৰহা অনুপাদিসেসো পুগ্গলো, অযং সমাধিৱিমুত্তি অনুপাদিসেসা নিব্বানধাতু.

‘‘দেসনাহাৰসম্পাতাদিকো হাৰসম্পাতো যেন সোড়সপ্পভেদভাৱেন সুত্তপ্পদেসত্থে নিদ্ধাৰেত্ৱা যুজ্জিতো, সোড়সপ্পভেদভাৱো কেন অম্হেহি সদ্দহিতব্বো’’তি ৱত্তব্বত্তা ‘‘তেনাহা’’তিআদি ৱুত্তং. তেন সোড়সপ্পভেদভাৱেন আযস্মা মহাকচ্চানো ‘‘সোড়স…পে… সুত্ত’’ন্তি যং ৱচনং আহ, তেন ৱচনেন সোড়সপ্পভেদভাৱো তুম্হেহি সদ্দহিতব্বো.

‘‘এত্তকোৱ হাৰসম্পাতো পৰিপুণ্ণো’’তি ৱত্তব্বত্তা ‘‘নিযুত্তো হাৰসম্পাতো’’তি ৱুত্তং. যেন যেন সংৱণ্ণনাৱিসেসভূতেন দেসনাহাৰসম্পাতেন সুত্তপ্পদেসত্থা নিদ্ধাৰিতা, সো সো সংৱণ্ণনাৱিসেসভূতো দেসনাহাৰসম্পাতাদিহাৰসম্পাতো নিযুত্তো যথাৰহং নিদ্ধাৰেত্ৱা যুজ্জিতব্বোতি অত্থো গহেতব্বো, অট্ঠকথাযঞ্চ (নেত্তি. অট্ঠ. ৭৩, ৭৬) তথা নিদ্ধাৰেত্ৱা যুজ্জিতোতি.

ইতি দেসনাহাৰসম্পাতাদিহাৰসম্পাতে সত্তিবলানুৰূপা

ৰচিতা ৱিভাৱনা নিট্ঠিতা.

পণ্ডিতেহি পন অট্ঠকথাটীকানুসাৰেন গম্ভীৰত্থো ৱিত্থাৰতো ৱিভজিত্ৱা গহেতব্বোতি.