১১. পঞ্ঞত্তিহাৰসম্পাতৱিভাৱনা

৭৩. যেন যেন ৱেৱচনহাৰসম্পাতেন ৱেৱচনানি নিদ্ধাৰিতানি, সো ৱেৱচনহাৰসম্পাতো পৰিপুণ্ণো, ‘‘কতমো পঞ্ঞত্তিহাৰসম্পাতো’’তি পুচ্ছিতব্বত্তা ‘‘তত্থ কতমো পঞ্ঞত্তিহাৰসম্পাতো’’তিআদি ৱুত্তং.

‘‘কতমা সুত্তপ্পদেসভূতা পঞ্ঞত্তি কতমেসং ধম্মানং পঞ্ঞত্তী’’তি পুচ্ছিতব্বত্তা ‘‘তস্মা’’তিআদি ৱুত্তং. ‘‘তস্মা ৰক্খিতচিত্তস্সা’’তি পঞ্ঞত্তি সতিযা পদট্ঠানস্স ৰক্খিতব্বস্স চিত্তস্স পঞ্ঞাপনতো সতিযা পদট্ঠানপঞ্ঞত্তি নাম. সতিযা হি ৰক্খিতব্বং চিত্তং সতিযা পদট্ঠানং অধিট্ঠানং নাম. তেনাহ অট্ঠকথাযং – ‘‘অধিট্ঠহিত্ৱা ৰক্খন্তিযা সতিযা ৰক্খিযমানং চিত্তং তস্সা অধিট্ঠানং ৱিয হোতী’’তি. ‘‘সম্মাসঙ্কপ্পগোচৰো’’তি পঞ্ঞত্তি সমথস্স ভাৱনায পঞ্ঞাপনতো সমথস্স ভাৱনাপঞ্ঞত্তি নাম. ‘‘সম্মাদিট্ঠিপুৰেক্খাৰো, ঞত্ৱান উদযব্বয’’ন্তি পঞ্ঞত্তি দস্সনভূমিযা নিক্খেপস্স পঞ্ঞাপনতো নিক্খেপপঞ্ঞত্তি নাম. ‘‘থিনমিদ্ধাভিভূ ভিক্খূ’’তি সমুদযস্স অনৱসেসপ্পহানস্স পঞ্ঞাপনতো অনৱসেসপ্পহানপঞ্ঞত্তি নাম. ‘‘সব্বা দুগ্গতিযো জহে’’তি পঞ্ঞত্তি মগ্গস্স অৰিযমগ্গস্স ভাৱনায পঞ্ঞাপনতো ভাৱনাপঞ্ঞত্তি নাম.

‘‘এত্তকোৱ পঞ্ঞত্তিহাৰসম্পাতো পৰিপুণ্ণো’’তি ৱত্তব্বত্তা ‘‘নিযুত্তো পঞ্ঞত্তিহাৰসম্পাতো’’তি ৱুত্তং. যেন যেন সংৱণ্ণনাৱিসেসভূতেন পঞ্ঞত্তিহাৰসম্পাতেন পঞ্ঞত্তিপ্পভেদা নিদ্ধাৰিতা, সো সো সংৱণ্ণনাৱিসেসভূতো পঞ্ঞত্তিহাৰসম্পাতো নিযুত্তো যথাৰহং নিদ্ধাৰেত্ৱা যুজ্জিতব্বোতি অত্থো গহেতব্বোতি.

ইতি পঞ্ঞত্তিহাৰসম্পাতে সত্তিবলানুৰূপা ৰচিতা

ৱিভাৱনা নিট্ঠিতা.

পণ্ডিতেহি পন…পে… গহেতব্বোতি.