১০. ৱেৱচনহাৰসম্পাতৱিভাৱনা

৭২. যেন যেন পৰিৱত্তনহাৰসম্পাতেন সুত্তপ্পদেসত্থা পৰিৱত্তেতব্বা, সো পৰিৱত্তনো হাৰসম্পাতোতি পৰিপুণ্ণো, ‘‘কতমো ৱেৱচনো হাৰসম্পাতো’’তি পুচ্ছিতব্বত্তা ‘‘তত্থ কতমো ৱেৱচনো হাৰসম্পাতো’’তিআদি ৱুত্তং.

‘‘কতমেসং সুত্তপ্পদেসত্থানং, সুত্তপদানং ৱা কতমানি ৱেৱচনানী’’তি পুচ্ছিতব্বত্তা ‘‘তস্মা’’তিআদি ৱুত্তং. যা ‘‘তস্মা…পে… গোচৰো’’তি গাথা ৱুত্তা, তায গাথায ‘‘ৰক্খিতচিত্তস্সা’’তি পদেন ৱুত্তস্স চিত্তস্স, ‘‘ৰক্খিতচিত্তস্সা’’তি এত্থ চিত্তস্স পদস্স ৱা ‘‘চিত্তং…পে… ৱিজানিতত্ত’’ন্তি যং ৱচনং ৱুত্তং, ইদং ৱচনং ৱেৱচনং, ‘‘মানসং হদয’’ন্তিআদিৱচনম্পি (ধ. স. ১৭, ৬৩) চিত্তস্স ৱেৱচনং. ‘‘সম্মাসঙ্কপ্পগোচৰো’’তি এত্থ সম্মাসঙ্কপ্পস্স ‘‘নেক্খম্মসঙ্কপ্পো অব্যাপাদসঙ্কপ্পো অৱিহিংসাসঙ্কপ্পো’’তি যং ৱচনং ৱুত্তং, ইদং ৱচনং ৱেৱচনং, ‘‘তক্কো ৱিতক্কো’’তিআদি (ধ. স. ৭) ৱচনম্পি সম্মাসঙ্কপ্পস্স ৱেৱচনং. ‘‘সম্মাদিট্ঠিপুৰেক্খাৰো’’তি এত্থ সম্মাদিট্ঠিপদস্স ‘‘সম্মাদিট্ঠি নাম পঞ্ঞাসত্থং পঞ্ঞাখগ্গো পঞ্ঞাৰতনং পঞ্ঞাপতোদো পঞ্ঞাপাসাদো’’তি যং ৱচনং ৱুত্তং, ইদং ৱচনং ৱেৱচনং, ‘‘পঞ্ঞা পজাননা ৱিচযো’’তিআদি (ধ. স. ১৬) ৱচনম্পি সম্মাদিট্ঠিপদস্স ৱেৱচনং. ‘‘থিনং থিযনা থিযিতত্তং চিত্তস্স, চিত্তস্স অকল্লতা অকম্মঞ্ঞতা ওনাহো পৰিযোনাহো অন্তোসঙ্কোচো’’তি (ধ. স. ১১৬২-১১৬৩) যং ৱচনং ৱুত্তং, ইদং ৱচনং থিনস্স ৱেৱচনং. ‘‘কাযস্স অকল্লতা অকম্মঞ্ঞতা কাযালসিযং সোপ্পং সুপনা সুপ্পিতত্ত’’ন্তি (ধ. স. ১১৬৩) যং ৱচনং ৱুত্তং, ইদং ৱচনং মিদ্ধস্স ৱেৱচনং. ‘‘ভিক্খকো ভিক্খূ’’তিআদিকং (পাৰা. ৪৫; ৱিভ. ৫১০) যং ৱচনং ৱুত্তং, ইদং ৱচনং ভিক্খুপদস্স ৱেৱচনং. ‘‘দুগ্গতি অপাযো ৱিনিপাতো ৱট্টদুক্খং সংসাৰো’’তিআদিকং যং ৱচনং ৱুত্তং, ইদং ৱচনং দুগ্গতিপদস্স ৱেৱচনং. ইতি ৱেৱচনানি নীহৰিতানি.

‘‘এত্তকোৱ ৱেৱচনহাৰসম্পাতো পৰিপুণ্ণো’’তি ৱত্তব্বত্তা ‘‘নিযুত্তো ৱেৱচনো হাৰসম্পাতো’’তি ৱুত্তং. যেন যেন সংৱণ্ণনাৱিসেসভূতেন ৱেৱচনহাৰসম্পাতেন ৱেৱচনানি নীহৰিতানি, সো সো সংৱণ্ণনাৱিসেসভূতো ৱেৱচনহাৰসম্পাতো নিযুত্তো যথাসম্ভৱং নীহৰিত্ৱা যুজ্জিতব্বোতি অত্থো গহিতোতি.

ইতি ৱেৱচনহাৰসম্পাতে সত্তিবলানুৰূপা ৰচিতা

ৱিভাৱনা নিট্ঠিতা.

পণ্ডিতেহি পন…পে… গহেতব্বোতি.