৯. পৰিৱত্তনহাৰসম্পাতৱিভাৱনা

৭১. যেন যেন ৱিভত্তিহাৰসম্পাতেন সুত্তপ্পদেসত্থা ৱিভত্তা, সো ৱিভত্তিহাৰসম্পাতো পৰিপুণ্ণো, ‘‘কতমো পৰিৱত্তনহাৰসম্পাতো’’তি পুচ্ছিতব্বত্তা ‘‘তত্থ কতমো পৰিৱত্তনো হাৰসম্পাতো’’তিআদি ৱুত্তং.

‘‘কতমে সুত্তপ্পদেসত্থা কথং পৰিৱত্তেতব্বা’’তি পুচ্ছিতব্বত্তা ‘‘তস্মা’’তিআদি ৱুত্তং. যা ‘‘তস্মা…পে… গোচৰো’’তি গাথা ৱুত্তা, তায গাথায যা সমথৱিপস্সনা নিদ্ধাৰিতা, তায সমথৱিপস্সনায ভাৱিতায অকুসলানং নিৰোধো ফলং পযোজনং হোতি, পৰিঞ্ঞাতং দুক্খং হোতি, সমুদযো পহীনো হোতি, মগ্গো ভাৱিতো হোতীতি পৰিৱত্তেতব্বো. পটিপক্খেন পন সমথৱিপস্সনায অভাৱিতায অকুসলানং অনিৰোধো, অপৰিঞ্ঞাতং দুক্খং, সমুদযো অপ্পহীনো, মগ্গো অভাৱিতো হোতীতি পৰিৱত্তেতব্বো.

‘‘এত্তকোৱ পৰিৱত্তনহাৰসম্পাতো পৰিপুণ্ণো’’তি ৱত্তব্বত্তা ‘‘নিযুত্তো পৰিৱত্তনো হাৰসম্পাতো’’তি ৱুত্তং. যেন যেন সংৱণ্ণনাৱিসেসভূতেন পৰিৱত্তনহাৰসম্পাতেন সুত্তপ্পদেসত্থা পৰিৱত্তেতব্বা, সো সো সংৱণ্ণনাৱিসেসভূতো পৰিৱত্তনহাৰসম্পাতো নিযুত্তো যথাৰহং নীহৰিত্ৱা যুজ্জিতব্বোতি অত্থো গহেতব্বোতি.

ইতি পৰিৱত্তনহাৰসম্পাতে সত্তিবলানুৰূপা ৰচিতা

ৱিভাৱনা নিট্ঠিতা.

পণ্ডিতেহি পন…পে… গহেতব্বোতি.