৭. আৱট্টহাৰসম্পাতৱিভাৱনা

৬৯. যেন যেন চতুব্যূহহাৰসম্পাতেন নিৰুত্যাধিপ্পাযনিদানপুব্বাপৰানুসন্ধযো ৱিভত্তা, সো চতুব্যূহহাৰসম্পাতো পৰিপুণ্ণো, ‘‘কতমো আৱট্টহাৰসম্পাতো’’তি পুচ্ছিতব্বত্তা ‘‘তত্থ কতমো আৱট্টো হাৰসম্পাতো’’তিআদি ৱুত্তং. তত্থ কতমো সংৱণ্ণনাৱিসেসো আৱট্টহাৰসম্পাতো নামাতি পুচ্ছতি.

‘‘কতমে সুত্তত্থা কথং আৱট্টেতব্বা’’তি পুচ্ছিতব্বত্তা ‘‘তস্মা’’তিআদি ৱুত্তং. নেক্খম্মসঙ্কপ্পসঙ্খাতসম্মাসঙ্কপ্পবহুলো কসিণাদিৱসেন, অৱিহিংসাসঙ্কপ্পসঙ্খাতসম্মাসঙ্কপ্পবহুলো মেত্তাদিৱসেন অধিগতায চিত্তেকগ্গতায চিত্তং ঠপেন্তো সংকিলেসতো ৰক্খিতচিত্তো নাম হোতি, ‘‘তস্মা ৰক্খিতচিত্তস্স, সম্মাসঙ্কপ্পগোচৰো’’তি ইমিনা ৰক্খিতচিত্তে ৱুত্তে সতি যা একগ্গতা আৱট্টেতব্বা, সা অযং একগ্গতা সমথো. ‘‘সম্মাদিট্ঠিপুৰেক্খাৰো’’তি ইমিনা সম্মাদিট্ঠিপুৰেক্খাৰে ৱুত্তে সতি যা পঞ্ঞা আৱট্টেতব্বা, সা অযং পঞ্ঞা ৱিপস্সনা. ‘‘ঞত্ৱান উদযব্বয’’ন্তি ইমিনা উদযব্বযঞাণসমন্নাগতে ৱুত্তে সতি যা দুক্খপৰিজাননা আৱট্টেতব্বা, সা অযং দুক্খপৰিজাননা দুক্খপৰিঞ্ঞা. ‘‘থিনমিদ্ধাভিভূ ভিক্খূ’’তি ইমিনা পুগ্গলাধিট্ঠানেন যং থিনমিদ্ধাভিভৱনং ৱুত্তং, ইদং থিনমিদ্ধাভিভৱনং সমুদযপ্পহানং. ‘‘সম্মা দুগ্গতিযো জহে’’তি ইমিনা যো সব্বদুগ্গতিজহনসঙ্খাতো অনুপ্পাদো ৱুত্তো, সো অযং অনুপ্পাদো নিৰোধো. ইতি দুক্খপৰিঞ্ঞায পৰিঞ্ঞেতব্বং দুক্খসচ্চং আৱট্টেতব্বং, সমুদযপ্পহানেন পহাতব্বং সমুদযসচ্চং আৱট্টেতব্বং, নিৰোধেন নিৰোধসচ্চং আৱট্টেতব্বং, সমথৱিপস্সনাহি মগ্গসচ্চং আৱট্টেতব্বন্তি ইমানি চত্তাৰি সচ্চানি আৱট্টেতব্বানীতি.

‘‘এত্তকোৱ আৱট্টো হাৰসম্পাতো পৰিপুণ্ণো’’তি ৱত্তব্বত্তা ‘‘নিযুত্তো আৱট্টো হাৰসম্পাতো’’তি ৱুত্তং. যেন যেন সংৱণ্ণনাৱিসেসভূতেন আৱট্টহাৰসম্পাতেন সমথাদযো আৱট্টেতব্বা, সো সো সংৱণ্ণনাৱিসেসভূতো আৱট্টহাৰসম্পাতো নিযুত্তো যথাৰহং নিদ্ধাৰেত্ৱা যুজ্জিতব্বোতি অত্থো গহেতব্বোতি.

ইতি আৱট্টহাৰসম্পাতে সত্তিবলানুৰূপা ৰচিতা

ৱিভাৱনা নিট্ঠিতা.

পণ্ডিতেহি পন…পে… গহেতব্বোতি.