সব্বসঙ্কলননযকথাৱণ্ণনা

৮৭৩. পৰিৱাৰে মুখাগতা কত্থপঞ্ঞত্তিৱাৰাদযো অট্ঠ ৱাৰা, তেযেৱ পচ্চয-সদ্দেন যোজেত্ৱা ৱুত্তা অট্ঠপচ্চযৱাৰাতি ৱিভঙ্গদ্ৱযে ৱিসুং ৱিসুং দস্সিতা সোড়স পৰিৱাৰা অস্সাতি সোড়সপৰিৱাৰো, তস্স সোড়সপৰিৱাৰস্স. সব্বং সঙ্কলনং নযন্তি সব্বেসং ৱুত্তানং সঙ্কলননযানং সঙ্গহেতব্বতো সব্বং সঙ্কলভেদনং নযং.

৮৭৫. কাযিকা ছব্বিধাতি পঠমপাৰাজিকাপত্তি, কুটিকৰণে পযোগে দুক্কটাপত্তি, একং পিণ্ডং অনাগতে থুল্লচ্চযাপত্তি, তস্মিং আগতে সঙ্ঘাদিসেসাপত্তি, ৱিকালভোজনে পাচিত্তিযাপত্তি, পঠমপাটিদেসনীযাপত্তীতি ছব্বিধা.

তথা ৱাচসিকাপি চাতি চতুত্থপাৰাজিকা, কুটিযা কাৰাপনে পুব্বগতিযো, পদসোধম্মপাচিত্তিযং, দৱকম্যতায হীনেন খুংসনং, তস্স দুব্ভাসিতন্তি তথা ছব্বিধা.

ছাদেন্তস্স চ তিস্সোতি ভিক্খুনিযা ৱজ্জপটিচ্ছাদিকায পাৰাজিকং, ভিক্খুনো সঙ্ঘাদিসেসছাদনে পাচিত্তিযং, অত্তনো দুট্ঠুল্লচ্ছাদনে দুক্কটন্তি তিস্সো চ.

পঞ্চ সংসগ্গপচ্চযাতি কাযসংসগ্গে ভিক্খুনিযা পাৰাজিকং, ভিক্খুনো সঙ্ঘাদিসেসো, কাযেন কাযপটিবদ্ধে থুল্লচ্চযং, নিস্সগ্গিযেন কাযপটিবদ্ধে দুক্কটং, অঙ্গুলিপতোদকে পাচিত্তিযন্তি কাযসংসগ্গপচ্চযা পঞ্চ আপত্তিযো.

৮৭৭. ভিক্খুনিযা ৱজ্জপটিচ্ছাদিকায পাৰাজিকং, ভিক্খুস্স সঙ্ঘাদিসেসপটিচ্ছাদকস্স পাচিত্তিযন্তি দুট্ঠুল্লচ্ছাদনে দুৱে.

৮৭৯. ‘‘গামন্তৰে চতস্সোৱা’’তিআদি পটিনিদ্দেসতো চ ৱিঞ্ঞাযতি.

৮৮১. ৱজন্তিযাতি গচ্ছন্তিযা.

৮৮৫. যা পন ভিক্খুনী ৰত্তন্ধকাৰে অপ্পদীপে হত্থপাসে পুৰিসেন সদ্ধিং যদি সল্লপেয্য, তস্সা পাচিত্তি. দূৰে ঠিতা হত্থপাসং ৱিজহিত্ৱা ঠিতা ৱদেয্য চে, দুক্কটমেৱাতি যোজনা.

৮৮৬. যা পন ভিক্খুনী ছন্নে পটিচ্ছন্নট্ঠানে দিৱা পুৰিসেন সদ্ধিং অস্স পুৰিসস্স হত্থপাসে ঠিতা ৱদেয্য সল্লপেয্য, তস্সা পাচিত্তি. হত্থপাসং ৱিজহিত্ৱা ৱদেয্য চে, দুক্কটমেৱাতি যোজনা.

৮৯১. সনিস্সগ্গা চ পাচিত্তীতি নিস্সজ্জনৱিনযকম্মসহিতাযেৱ পাচিত্তি.

৮৯৩. ইধ ইমস্মিং সাসনে.

৮৯৬. দুৱিন্নন্তি দ্ৱিন্নং.

৮৯৮. সমানসংৱাসকভূমি নাম পকতত্তস্স ভিক্খুনো সমানলদ্ধিকস্স একসীমাযং ঠিতভাৱো. নানাপদং পুব্বং এতিস্সাতি নানাপদপুব্বিকা, নানাসংৱাসকভূমীতি অত্থো. উক্খিত্তনানালদ্ধিকনানাসীমগতা নানাসংৱাসকভূমি. ইমা দ্ৱেযেৱ সংৱাসকভূমিযো হি মহেসিনা কাৰুণিকেন ৱুত্তাতি যোজনা.

৮৯৯. দুৱিন্নন্তি পাৰিৱাসিকমানত্তচাৰীনং দ্ৱিন্নং পুগ্গলানং. দ্ৱযাতীতেনাতি কামসুখল্লিকানুযোগঅত্তকিলমথানুযোগসঙ্খাতং অন্তদ্ৱযং অতিক্কম্ম মজ্ঝিমায পটিপদায ঠিতেন. অথ ৱা সস্সতুচ্ছেদদ্ৱযং অতিক্কন্তেন.

৯০০. ‘‘দ্ৱঙ্গুলপব্বপৰমং আদাতব্ব’’ন্তি চ তথেৱ ‘‘দ্ৱঙ্গুলং ৱা দুমাসং ৱা’’তি চ দ্ৱঙ্গুলা দুৱে পঞ্ঞত্তাতি যোজনা.

৯০৫. আণত্তিযা মনুস্সমাৰণং, আণত্তিযা অদিন্নাদানম্পীতি যোজনা.

৯০৭. তিস্সো ওভাসনাযিমাতি ইমা তিস্সো মেথুনাধিপ্পাযপ্পকাসনা.

৯০৮. সঙ্ঘাদিসেসো এৱ সঙ্ঘাদিসেসতা.

৯১০. ৱনপ্পতি নাম পুপ্ফং ৱিনা ফলন্তী নিগ্ৰোধউদুম্বৰঅস্সত্থপিলক্খকাদিৰুক্খজাতি, ইধ পন ৱনজেট্ঠো ৰক্খিতগোপিতচেতিযৰুক্খো ৱনপ্পতীতি অধিপ্পাযো. থুল্লতাতি থুল্লচ্চযং.

৯১২. ৱিস্সট্ঠীতি ৱিস্সজ্জি সম্ভৱধাতু. ছড্ডনেতি উপক্কমিত্ৱা মোচনে. ‘‘হৰিতে উচ্চাৰং পস্সাৱং ছড্ডনে’’তি পদচ্ছেদো.

৯১৩. কিং পমাণমেতাসন্তি কিত্তকা.

৯১৫. ভিক্খু ভিক্খুনিযা সদ্ধিন্তি এত্থ ভিক্খূতি সামিৱচনপ্পসঙ্গে পচ্চত্তং, ভিক্খুনোতি অত্থো. গাথাবন্ধৱসেন ৱা ৱণ্ণলোপো.

৯১৮. দুতিযায হত্থপাসকং.

৯২২. ‘‘যাৱততিযকে তিস্সো আপত্তিযো’’তি (পৰি. অট্ঠ. ৪৭৬ অত্থতো সমানং) পদস্স নিদ্দেসে ‘‘থুল্লচ্চযং সিযা সঙ্ঘ-ভেদকস্সানুৱত্তিনো’’তি পঠন্তি. ‘‘তিণ্ণং সঙ্ঘভেদানুৱত্তাকানং কোকালিকাদীনং সঙ্ঘাদিসেসো’’তি অট্ঠকথাযং ৱুত্তত্তা তথা পাঠো ন গহেতব্বো.

৯২৩. যাৱততিযকেতি তিণ্ণং পূৰণী ততিযা, কম্মৱাচা, যাৱততিযায কম্মৱাচায পৰিযোসানে আপজ্জিতব্বা আপত্তি যাৱততিযকা নাম.

৯২৬. ‘‘অৱস্সুতস্স…পে… কিঞ্চী’’তি ইদং গৰুকাপত্তিযা ৱত্থুদস্সনং. ‘‘সব্বং মংসং অকপ্পিয’’ন্তি ইদং থুল্লচ্চযদুক্কটানং ৱত্থুদস্সনং.

৯২৭. ‘‘ৱিঞ্ঞাপেত্ৱান…পে… ভোজনম্পি চা’’তি ইদং পাটিদেসনীযৱত্থুদস্সনং. ‘‘লসুণম্পি চা’’তি ইদং পাচিত্তিযৱত্থুদস্সনং. ‘‘একতো অজ্ঝোহৰন্তিযা’’তি পদচ্ছেদো.

৯৩০. ৰত্তচিত্তেন ইত্থিযা অঙ্গজাতং ওলোকেন্তস্স দুক্কটং ৱুত্তন্তি যোজনা.

৯৩১. সম্মাৱত্তনাৱ সম্মাৱত্তনকা. তেচত্তালীস ৱত্তনা দ্ৱাসীতিক্খন্ধকৱত্তানং পৰিপূৰণট্ঠানে দস্সিতা.

৯৩২. অদস্সনঅপটিকম্মে আপন্নাপত্তিযা দুৱে পুগ্গলা, পাপিকায দিট্ঠিযা অপ্পটিনিস্সগ্গে আপন্নাপত্তিযা একোতি ইমে তযো উক্খিত্তপুগ্গলা.

৯৩৪. দূসকোতি ভিক্খুনিদূসকো. কণ্টকোতি কণ্টকসামণেৰো.

৯৩৭. দদেয্যচ্চেৱমাদিকাতি ঞত্তিকালে ‘‘সঙ্ঘো দদেয্যা’’তিআদিভেদা ঞত্তিকপ্পনা, ঞত্তিকিৰিযাতি অত্থো. দেতি সঙ্ঘো কৰোতীতিআদীতি কম্মৱাচাকালে ‘‘সঙ্ঘো দেতী’’তি ৱা ‘‘কৰোতী’’তি ৱা আদিভেদা ৱচনকম্মস্স অনিট্ঠিতত্তা ৱিপ্পকতপচ্চুপ্পন্নং নাম সিযা.

৯৩৮. দিন্নং কতং পনিচ্চাদীতি কম্মৱাচায নিট্ঠিতায ‘‘দিন্নং সঙ্ঘেনা’’তি ৱা ‘‘কতং সঙ্ঘেনা’’তি ৱাতিআদিৱচনং অতীতকৰণং নাম সিযা.

৯৩৯. সঙ্ঘেতি সঙ্ঘমজ্ঝে.

‘‘কাৰণেহি পন দ্ৱীহি, সঙ্ঘো ভিজ্জতি নঞ্ঞথা’’তি কস্মা ৱুত্তং, ননু ‘‘পঞ্চহুপালি, আকাৰেহি সঙ্ঘো ভিজ্জতি. কতমেহি পঞ্চহি? কম্মেন, উদ্দেসেন, ৱোহৰন্তো, অনুস্সাৱনেন, সলাকগ্গাহেনা’’তি (পৰি. ৪৫৮) ৱুত্তত্তা, অট্ঠকথাযঞ্চ (পৰি. অট্ঠ. ৪৫৮) ‘‘পঞ্চহি কাৰণেহী’’তি ৱচনতো চ ইধ ইমেহি দ্ৱীহেৱ কাৰণেহি সঙ্ঘভেদকথনং অযুত্তন্তি? ৱুচ্চতে – নাযুত্তং পুব্বপযোগকাৰকৱসেন ৱুত্তত্তা. তথা হি অট্ঠকথাযং –

‘‘কম্মেনাতি অপলোকনাদীসু চতূসু কম্মেসু অঞ্ঞতৰেন কম্মেন. উদ্দেসেনাতি পঞ্চসু পাতিমোক্খুদ্দেসেসু অঞ্ঞতৰেন উদ্দেসেন. ৱোহৰন্তোতি কথযন্তো, তাহি তাহি উপপত্তীহি ‘অধম্মং ধম্মো’তিআদীনি অট্ঠাৰস ভেদকৰৱত্থূনি দীপেন্তো. অনুস্সাৱনেনাতি ‘ননু তুম্হে জানাথ ময্হং উচ্চাকুলা পব্বজিতভাৱং, বহুস্সুতভাৱঞ্চ, মাদিসো নাম উদ্ধম্মং উব্বিনযং সত্থুসাসনং কৰেয্যাতি চিত্তে উপ্পাদেতুং তুম্হাকং যুত্তং, কিং ময্হং অৱীচি নীলুপ্পলৱনমিৱ সীতলো, কিমহং অপাযতো ন ভাযামী’তিআদিনা নযেন কণ্ণমূলে ৱচীভেদং কত্ৱা অনুস্সাৱনেন. সলাকগ্গাহেনাতি এৱং অনুস্সাৱেত্ৱা তেসং চিত্তং উপত্থম্ভেত্ৱা অনিৱত্তিধম্মে কত্ৱা ‘গণ্হথ ইমং সলাক’ন্তি সলাকগ্গাহেন.

‘‘এত্থ চ কম্মমেৱ, উদ্দেসো ৱা পমাণং, ৱোহাৰানুস্সাৱনসলাকগ্গাহা পন পুব্বভাগা. অট্ঠাৰসৱত্থুদীপনৱসেন হি ৱোহৰন্তে তত্থ ৰুচিজননত্থং অনুস্সাৱেত্ৱা সলাকায গহিতাযপি অভিন্নোৱ হোতি সঙ্ঘো. যদা পন এৱং চত্তাৰো ৱা অতিৰেকে ৱা সলাকং গাহেত্ৱা আৱেণিকং কম্মং ৱা উদ্দেসং ৱা কৰোতি, তদা সঙ্ঘো ভিন্নো নাম হোতী’’তি (পৰি. অট্ঠ. ৪৫৮) –

ৱুত্তত্তা সলাকগ্গাহকম্মানি দ্ৱে পধানকাৰণানীতি ইধ তানেৱ দস্সিতানি.

ননু চ সলাকগ্গাহোপি সঙ্ঘভেদস্স পুব্বভাগো ৱুত্তো, উদ্দেসকম্মানেৱ পধানভাৱেন ৱুত্তানি, তস্মা কথমস্স সলাকগ্গাহস্স পধানকাৰণভাৱোতি? ৱুচ্চতে – উদ্দেসকম্মানিপি সলাকগ্গাহে সিদ্ধে অৱস্সম্ভৱনতো অত্থসাধনপযোগেন ৱিনা অসিদ্ধানেৱ হোন্তীতি সো পধানভাৱেন ইধ গহিতো, উদ্দেসো পন পঞ্ঞত্তকম্মপুব্বঙ্গমত্তা কম্মেনেৱ সঙ্গহিতোতি ইধ ৱিসুং ন ৱুত্তোতি দট্ঠব্বং.

৯৪১. পযুত্তাযুত্তৱাচাযাতি পচ্চযুপ্পাদনত্থায পযুত্তা চ সা সক্যপুত্তিযভাৱস্স অযুত্তা অননুৰূপা চাতি পযুত্তাযুত্তা, সাযেৱ ৱাচাতি পযুত্তাযুত্তৱাচা, তায.

৯৪৪. যা ভিক্খুনী ৱিঞ্ঞাপেত্ৱা ভুঞ্জতি, তস্সা চ পাটিদেসনীযং সিযাতি যোজনা.

৯৪৫. অনামযোতি অগিলানো.

৯৪৬. ‘‘দসসতানী’’তিআদিগাথায ৰত্তীনন্তি এত্থ ‘‘সত’’ন্তি সেসো. ছাদনকিৰিযায অচ্চন্তসংযোগে উপযোগৱচনং. দসসতানি আপত্তিযো ৰত্তীনং সতং ছাদেত্ৱাতি যোজনা. এৱং কত্তব্বযোজনাযং –

‘‘দস সতং ৰত্তিসতং, আপত্তিযো ছাদযিত্ৱান;

দস ৰত্তিযো ৱসিত্ৱান, মুচ্চেয্য পাৰিৱাসিকো’’তি. (পৰি. ৪৭৭) –

অযং পৰিৱাৰগাথাপমাণং. একদিৱসং সতংসঙ্ঘাদিসেসাপত্তিযো আপজ্জিত্ৱা দসদিৱসে ছাদনৱসেন সতংদিৱসে সহস্সসঙ্ঘাদিসেসাপত্তিযো ছাদযিত্ৱাতি অত্থো. অযমেত্থ সঙ্খেপত্থো – যো দসদিৱসে সতং সঙ্ঘাদিসেসা আপত্তিযো আপজ্জিত্ৱা দসদিৱসে পটিচ্ছাদেতি, তেন ৰত্তিসতং আপত্তিসহস্সং পটিচ্ছাদিতং হোতীতি. দস ৰত্তিযো ৱসিত্ৱানাতি ‘‘সব্বাৱ তা আপত্তিযো দসাহপটিচ্ছন্না’’তি পৰিৱাসং যাচিত্ৱা দস ৰত্তিযো ৱসিত্ৱাতি অত্থো. মুচ্চেয্য পাৰিৱাসিকোতি পৰিৱাসং ৱসন্তো ভিক্খু অত্তনা ৱসিতব্বপৰিৱাসতো মুচ্চেয্য, মুত্তো ভৱেয্যাতি অত্থো.

৯৪৭. পাৰাজিকানি অট্ঠেৱাতি অগ্গহিতগ্গহণেন. তেৱীস গৰুকাতি ভিক্খূহি অসাধাৰণা ভিক্খুনীনং দস, ভিক্খুনীহি অসাধাৰণা ভিক্খূনং ছ, উভিন্নং সাধাৰণা সত্তাতি এৱং তেৱীস সঙ্ঘাদিসেসা.

৯৪৮. ৱুত্তানীতি যথাৱুত্তানি নিস্সগ্গিযানি. দ্ৱেচত্তালীস হোন্তীতি ভিক্খুৱিভঙ্গাগতা তিংস, ভিক্খূহি অসাধাৰণা ভিক্খুনীনং আদিতো দ্ৱাদস চাতি দ্ৱাচত্তালীস নিস্সগ্গিযানি হোন্তি. অট্ঠাসীতিসতং পাচিত্তিযা পুব্বে দস্সিতাৱ.

৯৪৯. সুসিক্খেনাতি সুট্ঠু সিক্খিতঅধিসীলাদিতিৱিধসিক্খেন ভগৱতা.

৯৫০. সুপঞ্ঞেনাতি সোভণা দসবলচতুৱেসাৰজ্জছঅসাধাৰণাদযো পঞ্ঞা যস্স সো সুপঞ্ঞো, তেন. যসস্সিনাতি অট্ঠঅৰিযপুগ্গলসমূহসঙ্খাতপৰিৱাৰযসা চ সব্বলোকব্যাপকগুণঘোসসঙ্খাতকিত্তিযসা চ তেন সমন্নাগতত্তা যসস্সিনা. অড্ঢুড্ঢানি সতানি ভৱন্তীতি যথাদস্সিতগণনায পিণ্ডৱসেন পঞ্ঞাসাধিকানি তীণি সতানি ভৱন্তীতি অত্থো. সুপঞ্ঞেন যসস্সিনা গোতমেন পঞ্ঞত্তানি সব্বানি সিক্খাপদানি অড্ঢুড্ঢানি সতানি ভৱন্তীতি যোজনা.

৯৫১. এতেসু সিক্খাপদেসু যো সাৰভূতো ৱিনিচ্ছযো ৱত্তব্বো, সো সকলো মযা সমাসেন সব্বথা সব্বাকাৰেন ৱুত্তোতি যোজনা.

৯৫২. ইদং উত্তৰং নাম পকৰণং.

৯৫৩. তস্মাতি মযা ৱিচাৰেত্ৱা ৱুত্তত্তাৱ. অত্থেতি ৱচনত্থভাৱত্থাদিভেদে অত্থে ৱা. অক্খৰবন্ধে ৱাতি অক্খৰসঙ্খাতপদবন্ধে ৱা. ৱিঞ্ঞাসস্স কমেপি ৱাতি উদ্দেসৱসেন গন্থনিক্খেপস্স কমেপি. কঙ্খা ন কাতব্বাতি ‘‘যথাঅধিপ্পেতস্স ইদং ৱাচকং নু খো, অৱাচক’’ন্তি ৱা ‘‘ইদমযুত্তং নু খো, যুত্ত’’ন্তি ৱা ‘‘ইদমধিকং নু খো, ঊন’’ন্তি ৱা ‘‘ইদমঘট্টিতক্কমং নু খো, ঘট্টিতক্কম’’ন্তি ৱা ‘‘ইদং ৱিৰুদ্ধসমযং নু খো, অৱিৰুদ্ধসময’’ন্তি ৱা ‘‘ইদং দুৰুত্তং নু খো, সুৱুত্ত’’ন্তি ৱা ‘‘ইদং সত্থকং নু খো, নিৰত্থক’’ন্তি ৱা কঙ্খা ৱিমতি যেন কেনচি ন কাতব্বা. বহুমানতাতি ‘‘ৱিনযো সংৱৰত্থাযা’’তিআদিনা (পৰি. ৩৬৬) নিদ্দিট্ঠপযোজনপৰম্পৰায মূলকাৰণত্তা মহতী সম্মানা কাতব্বাতি অত্থো.

৯৫৪. যো ভিক্খু সউত্তৰং উত্তৰপকৰণেন সহিতং ৱিনযস্সৱিনিচ্ছযং নাম পকৰণং জানাতি ধম্মতো চেৱ অত্থতো চ ৱিনিচ্ছযতো চ সব্বথা অৱবুজ্ঝতি, সো ভিক্খু অত্তনা সিক্খিতব্বায সিক্খায সব্বসো ৱিঞ্ঞাতত্তা সিক্খাপকেন আচৰিযেন ৱিনাপি সিক্খিতুং সমত্থোতি. নিস্সযং ৱিমুঞ্চিত্ৱাতি আচৰিযুপজ্ঝাযে নিস্সায ৱাসং মুঞ্চিত্ৱা. যথাকামঙ্গতো সিযাতি যাদিসা যাদিসা অত্তনা গামিতা, তত্থ তত্থ গমনাৰহো ভৱেয্যাতি অত্থো.

৯৫৫. নিস্সযং দাতুকামেন. সহ ৱিভঙ্গেন সৱিভঙ্গং. সহ মাতিকায সমাতিকং. ইদং সউত্তৰং ৱিনযৱিনিচ্ছযপকৰণং সুট্ঠু ৱাচুগ্গতং কত্ৱা গন্থতো সুট্ঠু পগুণং ৱাচুগ্গতং কত্ৱা অত্থতো, ৱিনিচ্ছযতো চ সম্মা জানিত্ৱা এৱং দাতব্বন্তি যোজনা.

৯৫৬-৭. যো ভিক্খু ইমং সউত্তৰং ৱিনযৱিনিচ্ছযপকৰণং ৱাচায পঠতি, মনসা চিন্তেতি, অঞ্ঞেহি ৱুচ্চমানং সুণাতি, অত্থং পৰিপুচ্ছতি, পৰং ৱাচেতি, নিচ্চং অত্থং উপপৰিক্খতি যথাপৰিপুচ্ছিতমত্থং হেতুউদাহৰণপৱত্তিৱসেন উপগন্ত্ৱা সমন্ততো ইক্খতি পঞ্ঞায নিযমেতি ৱৱত্থপেতি, তস্স পন ভিক্খুস্স ৱিনযনিস্সিতা সব্বেৱ অত্থা আপত্তানাপত্তিকপ্পিযাকপ্পিযাদিপভেদা সব্বে অত্থা হত্থে আমলকং ৱিয কৰতলে অমলমণিৰতনং ৱিয উপট্ঠহন্তি পাকটা ভৱন্তীতি যোজনা. নত্থি এতস্স মলন্তি অমলং, অমলমেৱ আমলকন্তি মণিৰতনং ৱুচ্চতি.

৯৫৮. নত্থি এতেসং বুদ্ধীতি অবুদ্ধী, অবুদ্ধী চ তে জনা চাতি অবুদ্ধিজনা, অবুদ্ধিজনানং সাৰং অৱসাৰং ওসীদনং দদাতি আদদাতি কৰোতীতি অবুদ্ধিজনসাৰদং, বুদ্ধিৱিৰহিতানং অগাধং গম্ভীৰং. তেহি অলদ্ধপতিট্ঠং অমতসাগৰং সদ্দত্থৰসামতস্স, নিব্বানামতস্স ৱা পটিলাভকাৰণত্তা সাগৰসদিসং পৰমং উত্তমং ইমং উত্তৰং সাগৰং আসন্নপচ্চক্খং উত্তৰপকৰণসঙ্খাতং সমুদ্দসাগৰং সাৰদো হুত্ৱা উত্তৰং উত্তৰন্তো পৰিযোসাপেন্তো নৰো ভিক্খু হি যস্মা ৱিনযপাৰগো ৱিনযপিটকস্স পৰিযন্তং গতো হুত্ৱা পাৰগো পাৰং সংসাৰস্স পাৰসঙ্খাতং নিব্বানং গচ্ছন্তো সিযা ভৱেয্যাতি যোজনা.

৯৫৯. অতোতি তস্মাদেৱ কাৰণা অৱপূৰতোৰতো পাপপূৰতো নিৰাসঙ্কতায ওৰতো নিৱত্তো পাপভীৰুকো নৰো তমং ৱিধূয পাপভীৰুকতায এৱ চিত্তপৰিযুট্ঠানৱসেন উপ্পজ্জনকং মোহন্ধকাৰং তদঙ্গপহানৱসেন ৱিধমেত্ৱা. সব্বঙ্গণকম্মদং সব্বেসং ৰাগাদীনং অঙ্গণানং কম্মং তদঙ্গাদিপহানং দদাতি আৱহতীতি ‘‘সব্বঙ্গণকম্মদ’’ন্তি লদ্ধনামং সুখস্স পদং লোকিযলোকুত্তৰস্স সুখস্স কাৰণং গুণসংহিতং সীলাদীহি অত্থভূতেহি গুণেহি সংহিতং যুত্তং গুণপ্পকাসকং হিতং অমতোসধং ৱিয সব্বদোসসব্বব্যাধিৰহিততায অজৰাঅমতাদিগুণাৱহত্তা হিতং ইমং উত্তৰং নাম পকৰণং সক্কচ্চং আদৰো হুত্ৱা নিচ্চং সততং সিক্খে ‘‘এৱং পৰিচযন্তং কৰোমী’’তি চিন্তেত্ৱা একন্তেন যথাৱুত্তপযোজনসাধনযোগ্গং কত্ৱা অজ্ঝেনাদিৱসেন সিক্খেয্য এৱ, ন অজ্ঝুপেক্খকো ভৱেয্যাতি যোজনা.

৯৬০. পটুভাৱকৰে পাতিমোক্খসংৱৰসীলপূৰণে, সাসনপচ্চত্থিকাভিভৱনে চ পটুভাৱং ছেকত্তং ৱেসাৰজ্জং কৰোতি অত্তানং ধাৰেন্তানং লজ্জিপুগ্গলানন্তি পটুভাৱকৰে পৰমে ততোযেৱ উত্তমে পিটকে ৱিনযপিটকে পটুতং পাটৱং পঞ্ঞাকোসল্লং অভিপত্থযন্তেন পটুনা যতিনা নিম্মলপ্পৱত্তিকেন পটুনা ৱিধিনা ছেকেন সাৰেন ৱিধানেন ইদং সউত্তৰং ৱিনযৱিনিচ্ছযপকৰণং সততং নিৰন্তৰং পৰিযাপুণিতব্বং উগ্গহণধাৰণপৰিপুচ্ছাচিন্তনাদিৱসেন সিক্খিতব্বন্তি যোজনা.

ইতি উত্তৰে লীনত্থপকাসনিযা

সব্বসঙ্কলননযকথাৱণ্ণনা নিট্ঠিতা.

নিগমনকথাৱণ্ণনা

৯৬১-৩. মহেসিনো তিৱিধস্সাপি সাসনস্স সুচিৰট্ঠিতিকামেন অতিচিৰকালপ্পৱত্তিং ইচ্ছন্তেন ধীমতা পসত্থতৰঞাণেন সুদ্ধচিত্তেন লাভসক্কাৰনিৰপেক্খতায পৰিসুদ্ধজ্ঝাসযেন বুদ্ধদত্তেন বুদ্ধদত্তাভিধানেন আচৰিযৱৰেন ৰচিতো.

পজ্জৱসেন গন্থতো, অত্থতো চেৱ পৰমুত্তৰো উত্তৰো ৱিনিচ্ছযো অন্তৰাযং অন্তৰেন অজ্ঝত্তিকং, বাহিৰং ৱা অন্তৰাযং ৱিনা যথা সিদ্ধিং উপাগতো পৰিনিট্ঠানং পত্তো, তথা সত্তানং ধম্মসংযুতা কুসলূপসংহিতা সঙ্কপ্পা মনোৰথা সিজ্ঝন্তু অন্তৰাযং ৱিনা নিপ্পজ্জন্তু, এতেন উত্তৰৱিনিচ্ছযৰচনামযেন মহতা পুঞ্ঞোদযেন চতূহি সঙ্গহৱত্থূহি জনং ৰঞ্জেতীতি ‘‘ৰাজা’’তি সঙ্খং গতো মহীপালো মহিং পথৱিসন্নিস্সিতং জনকাযং সম্মা ঞাযেন দস ৰাজধম্মে অকোপেন্তো পালেতু. দেৱো পজ্জুন্নো কালে থাৱৰজঙ্গমানং উপযোগাৰহকালে সম্মা পৱস্সতু অৱুট্ঠিঅতিৱুট্ঠিকং অকত্ৱা সম্মা পৱচ্ছতু.

৯৬৪. সেলিন্দো সিনেৰুপব্বতৰাজা যাৱ তিট্ঠতি যাৱ লোকে পৱত্ততি, চন্দো সকলজনপদনযনসাযনো যাৱ ৱিৰোচতি যাৱ অত্তনো সভাৱং জোতেতি, তাৱ যসস্সিনো গোতমস্স অৰহতো সম্মাসম্বুদ্ধস্স সদ্ধম্মো পৰিযত্তিপটিপত্তিপটিৱেধৱসেন তিৱিধো সদ্ধম্মো তিট্ঠতু পৱত্ততু.

৯৬৫. সীহাদীনং, দাহাদীনঞ্চ বাহিৰজ্ঝত্তিকানং পৰিস্সযানং খমনং সহনং অভিভৱিত্ৱা পৱত্তনং খন্তি. সোৰচ্চন্তি সোভনে ৰতোতি সুৰতো, সুৰতস্স ভাৱো সোৰচ্চং. সুন্দৰং অখণ্ডতাদিগুণসমন্নাগতং সীলং অস্সাতি সুসীলো. সুসীলস্স ভাৱো.

নিগমনকথাৱণ্ণনা নিট্ঠিতা.

উত্তৰৱিনিচ্ছযটীকা নিট্ঠিতা.

ইতি ৱিনযত্থসাৰসন্দীপনী নাম ৱিনযৱিনিচ্ছযৱণ্ণনা,

লীনত্থপকাসনী নাম উত্তৰৱিনিচ্ছযৱণ্ণনা চ

সমত্তা.

পচ্ছা ঠপিতগাথাযো

থেৰেন থিৰচিত্তেন, সাসনুজ্জোতনত্থিনা;

পুঞ্ঞৱা ঞাণৱা সীলী, সুহজ্জো মুদুকো তথা.

যো সীহড়াৰিমদ্দেসু, চন্দিমা সূৰিযো ৱিয;

পাকটো সীৱলিত্থেৰো, মহাতেজো মহাযসো.

তেন নীতা সীহড়া যা, ইধ পত্তা সুধীমতা;

এসা সংৱণ্ণনা সীহ-ড়ক্খৰেন সুলিক্খিতা.

ৰেৱতো ইতি নামেন, থেৰেন থিৰচেতসা;

অৰিমদ্দিকে ৰক্খন্তেন, পৰিৱত্তেত্ৱান সাধুকং.

লিখাপিতা হিতত্থায, ভিক্খূনং অৰিমদ্দিকে;

এসা সংৱণ্ণনা সুট্ঠু, সন্নিট্ঠানমুপাগতা;

তথেৱ সব্বসত্তানং, সব্বত্থো চ সমিজ্ঝতূতি.