সেদমোচনকথাৱণ্ণনা

৬৭৯. সুণতং সুণন্তানং ভিক্খূনং পটুভাৱকৰা ৱিনযৱিনিচ্ছযে পঞ্ঞাকোসল্লসাধিকা ততোযেৱ ৱৰা উত্তমা. সেদমোচনগাথাযোতি অত্থপচ্চত্থিকানং, সাসনপচ্চত্থিকানঞ্চ ৱিস্সজ্জেতুমসক্কুণেয্যভাৱেন চিন্তযন্তস্স খিন্নসৰীৰা সেদে মোচেন্তীতি সেদমোচনা. অত্থানুগতপঞ্হা উপালিত্থেৰেন ঠপিতা পঞ্হগাথাযো, তপ্পটিবদ্ধা ৱিস্সজ্জনগাথাযো চ ইতো পৰং ৱক্খামীতি যোজনা.

৬৮১. কবন্ধং নাম অসীসং উৰসি জাতঅক্খিমুখসৰীৰং. যথাহ – ‘‘অসীসকং কবন্ধং, যস্স উৰে অক্খীনি চেৱ মুখঞ্চ হোতী’’তি (পৰি. অট্ঠ. ৪৭৯). মুখেন কৰণভূতেন. কত্ৱাতি সেৱিত্ৱা.

৬৮২. তস্স ভিক্খুনো কথং পাৰাজিকো সিযা পাৰাজিকধম্মো কথং সিযা.

৬৮৪. কিঞ্চীতি পাদং ৱা পাদাৰহং ৱা পৰসন্তকং. পৰঞ্চ ন সমাদপেতি ‘‘অমুকস্স ইত্থন্নামং ভণ্ডং অৱহৰাহী’’তি পৰং ন আণাপেয্য.

৬৮৫. পৰস্স কিঞ্চি নাদিযন্তোতি সম্বন্ধো. আণত্তিঞ্চাতি চ-সদ্দেন সংৱিধানং, সঙ্কেতঞ্চ সঙ্গণ্হাতি.

৬৮৬. গৰুকং ভণ্ডন্তি পাদগ্ঘনকভাৱেন গৰুভণ্ডং. ‘‘পৰিক্খাৰ’’ন্তি এতস্স ৱিসেসনং. পৰস্স পৰিক্খাৰন্তি পৰসন্তকং যং কিঞ্চি পৰিক্খাৰং.

৬৯২. মনুস্সুত্তৰিকে ধম্মেতি উত্তৰিমনুস্সধম্মৱিসযে. কতিকং কত্ৱানাতি ‘‘এৱং নিসিন্নে এৱং ঠিতে এৱং গমনে অত্থং আৱিকৰোতী’’তিআদিং কত্ৱা. সম্ভাৱনাধিপ্পাযোতি ‘‘অৰহা’’তি গহেত্ৱা মহাসম্ভাৱনং কৰোতীতি অধিপ্পাযো হুত্ৱা. অতিক্কমতি চেতি তথা কতং কতিকং অতিক্কমতি চে, তথাৰূপং নিসজ্জং ৱা ঠানং ৱা গমনং ৱা কৰোতীতি অত্থো. চুতোতি তথাৰূপং নিসজ্জাদিং দিস্ৱা কেনচি মনুস্সজাতিকেন ‘‘অৰহা’’তি তঙ্খণে ঞাতে সো পুগ্গলো পাৰাজিকং আপজ্জতি.

৬৯৩. একৱত্থুকা কথং ভৱেয্যুন্তি যোজনা.

৬৯৪. ইত্থিযাতি একিস্সা ইত্থিযা. পটিপজ্জন্তোতি একক্খণে অঞ্ঞেন পুৰিসেন ৱুত্তসাসনং ৱত্ৱা, ইমিনা চ ‘‘পটিগ্গণ্হাতি, ৱীমংসতী’’তি অঙ্গদ্ৱযস্স পুৰিমসিদ্ধতং দীপেতি ইমস্স পচ্চাহৰণকতঞ্চ. কাযসংসগ্গং সমাপজ্জিত্ৱা দুট্ঠুল্লং ৱত্ৱা অত্তকামপাৰিচৰিযায ৱণ্ণং ভণন্তো.

৬৯৫. যথাৱুত্তং ৱত্তং অচৰিত্ৱাতি ভগৱতা ৱুত্তং পৰিৱাসাদিৱত্তং অচৰিত্ৱা.

৬৯৬. ভিক্খুনীহি অসাধাৰণসিক্খাপদত্তা আহ ‘‘নত্থি সঙ্ঘাদিসেসতা’’তি.

৬৯৭. যেন কুদ্ধো পসংসিতোতি এত্থ ‘‘নিন্দিতো চা’’তি সেসো.

৬৯৮. তিত্থিযানং ৱণ্ণম্হি ভঞ্ঞমানে যো কুজ্ঝতি, সো আৰাধকোতি যোজনা, পৰিতোসিতো পসংসিতোতি অধিপ্পাযো. তিত্থিযপুব্বো ইমস্মিং সাসনে পব্বজ্জং লভিত্ৱা তিত্থিযানং ৱণ্ণস্মিং ভঞ্ঞমানে সুত্ৱা সচে কুপ্পতি অনত্তমনং কৰোতি, আৰাধকো সঙ্ঘাৰাধকো সঙ্ঘং পৰিতোসেন্তো হোতি, সম্বুদ্ধস্স ৱণ্ণস্মিং ভঞ্ঞমানে যদি কুজ্ঝতি, নিন্দিতোতি যোজনা. এত্থ সম্বুদ্ধস্সাতি উপলক্খণং.

৭০১. গহেত্ৱাতি পটিগ্গহেত্ৱা.

৭৫১. ‘‘ন ৰত্তচিত্তো’’তিআদিনা পুৰিমানং তিণ্ণং পাৰাজিকানং ৱীতিক্কমচিত্তুপ্পাদমত্তস্সাপি অভাৱং দীপেতি. মৰণাযাতি এত্থ ‘‘মনুস্সজাতিকস্সা’’তি ইদং পাৰাজিকপকৰণতোৱ লব্ভতি. তস্সাতি কিঞ্চি দেন্তস্স. তন্তি তথা দীযমানং.

৭৫২. ‘‘পৰাজযো’’তি ইদং অভব্বপুগ্গলেসু সঙ্ঘভেদকস্স অন্তোগধত্তা ৱুত্তং. সলাকগ্গাহেনাপি সঙ্ঘং ভিন্দন্তো সঙ্ঘভেদকোৱ হোতি.

৭৫৩. অদ্ধযোজনে যং তিণ্ণং চীৱৰানং অঞ্ঞতৰং একং চীৱৰং নিক্খিপিত্ৱানাতি যোজনা.

৭৫৪. সুপ্পতিট্ঠিতনিগ্ৰোধসদিসে ৰুক্খমূলকে তিচীৱৰং নিক্খিপিত্ৱা অদ্ধযোজনে অৰুণং উট্ঠাপেন্তস্সাতি যোজনা.

৭৫৫. কাযিকা নানাৱত্থুকাযো সম্বহুলা আপত্তিযো অপুব্বং অচৰিমং একক্খণে কথং ফুসেতি যোজনা.

৭৫৭. ৱাচসিকা ন কাযিকা নানাৱত্থুকাযো সম্বহুলা আপত্তিযো অপুব্বং অচৰিমং একক্খণে কথং ফুসেতি যোজনা.

৭৫৮. ৱিনযনসত্থেতি ৱিনযপিটকে. তস্স ভিক্খুস্স.

৭৫৯. ‘‘ইত্থিযা’’তিআদীসু সহত্থে কৰণৱচনং. ইত্থিযা ৱা পুৰিসেন ৱা পণ্ডকেন ৱা নিমিত্তকে মেথুনং ন সেৱন্তো ন পটিসেৱন্তো মেথুনপচ্চযা চুতোতি যোজনা.

৭৬০. কাযসংসগ্গোযেৱ কাযসংসগ্গতা, তং আপন্না. অট্ঠৱত্থুকং ছেজ্জন্তি এৱংনামকং পাৰাজিকং.

৭৬২. সমযে পিট্ঠিসঞ্ঞিতেতি গিম্হানং পচ্ছিমমাসস্স পঠমদিৱসতো যাৱ হেমন্তস্স পঠমদিৱসো, এত্থন্তৰে সত্তমাসমত্তে পিট্ঠিসঞ্ঞিতে সমযে. ‘‘মাতুযাপি চা’’তি ৱত্তব্বে ‘‘মাতৰম্পি চা’’তি ৱুত্তং. সোযেৱ ৱা পাঠো.

৭৬৪. ‘‘অৱস্সুতহত্থতো হি পিণ্ডং গহেত্ৱা’’তি ইমিনা সঙ্ঘাদিসেসস্স ৱত্থুমাহ, লসুণন্তি পাচিত্তিযস্স ৱত্থুং, মনুস্সমংসন্তি থুল্লচ্চযৱত্থুং, অকপ্পমঞ্ঞন্তি দুক্কটৱত্থুং. অকপ্পমঞ্ঞন্তি এত্থ ‘‘মংস’’ন্তি সেসো. ‘‘সব্বে একতো’’তি পদচ্ছেদো. একতোতি এত্থ ‘‘মদ্দিত্ৱা’’তি সেসো, অকপ্পিযমংসেহি সদ্ধিং একতো মদ্দিত্ৱা খাদতীতি অত্থো. সব্বমেতং ‘‘গহেত্ৱা, মদ্দিত্ৱা, খাদতী’’তি কিৰিযানং কম্মৱচনং. মনুস্সমংসঞ্চাতি এত্থ চ-সদ্দো পচ্চেকং যোজেতব্বো হোতি. তস্সাতি ভিক্খুনিযা. সঙ্ঘাদিসেসপাচিত্তিযদুক্কটপাটিদেসনীযথুল্লচ্চযানি একক্খণে হোন্তি.

৭৬৫. ‘‘পুগ্গলো একো’’তি পদচ্ছেদো. দ্ৱেপি চ পুণ্ণৱস্সাতি পৰিপুণ্ণৱীসতিৱস্সা চ দ্ৱে সামণেৰা. একাৱ তেসং পন কম্মৱাচাতি তেসং উভিন্নং সামণেৰানং একেন আচৰিযেন একাৱ উপসম্পদকম্মৱাচা কতা. একস্সাতি একস্সাপি সামণেৰস্স. কম্মন্তি উপসম্পদকম্মং. ন ৰূহতেতি ন সম্পজ্জতি, কিমেত্থ কাৰণং, ৱদ ভদ্দমুখাতি অধিপ্পাযো.

৭৬৬. মহিদ্ধিকেসূতি দ্ৱীসু সামণেৰেসু. সচে পন একো কেসগ্গমত্তম্পি আকাসগো আকাসট্ঠো হোতি, আকাসগতস্সেৱ কতং তং উপসম্পদকম্মং নেৱ ৰূহতি নেৱ সম্পজ্জতি, ভূমিগতস্স ৰূহতীতি যোজনা.

৭৬৭. ইদ্ধিযা আকাসে ঠিতেন সঙ্ঘেন ভূমিগতস্স সামণেৰস্স উপসম্পদকম্মং ন কাতব্বং. যদি কৰোতি, কুপ্পতীতি যোজনা. ইদঞ্চ সব্বকম্মানং সাধাৰণলক্খণং. যথাহ – ‘‘সঙ্ঘেনাপি আকাসে নিসীদিত্ৱা ভূমিগতস্স কম্মং ন কাতব্বং. সচে কৰোতি, কুপ্পতী’’তি (পৰি. অট্ঠ. ৪৮১).

৭৬৮. ৱত্থং কপ্পকতঞ্চ ন হোতি, ৰত্তঞ্চ ন হোতি, কেসকম্বলাদি অকপ্পিযঞ্চ হোতি, নিৱত্থস্স পনাপত্তি তং পন নিৱত্থস্স ভিক্খুনো আপত্তি হোতি. অনাপত্তি কথং সিযা, ৱদ ভদ্দমুখাতি যোজনা.

৭৬৯. এত্থ এতস্মিং অকপ্পিযৱত্থুধাৰণে তন্নিমিত্তং. অচ্ছিন্নচীৱৰস্স ভিক্খুনো অনাপত্তি সিযাতি যোজনা. ‘‘কিঞ্চিপী’’তিআদিনা ৱুত্তমেৱত্থং সমত্থেতি. অস্স অচ্ছিন্নচীৱৰস্স ভিক্খুস্স অকপ্পিযং নাম কিঞ্চিপি চীৱৰং ন ৱিজ্জতি, তস্মা অনাপত্তীতি অধিপ্পাযো.

৭৭০. কুতোপি চ পুৰিসস্স হত্থতো ভোজনস্স কিঞ্চি ন গণ্হতি, ভোজনতো কিঞ্চিপি সযম্পি কস্সচি পুৰিসস্স ন দেতি, তথাপি গৰুকং ৱজ্জং সঙ্ঘাদিসেসাপত্তিং উপেতি আপজ্জতি, তং কথমাপজ্জতি, ত্ৱং যদি ৱিনযে কুসলো অসি, মে ময্হং ৱদ এতং কাৰণং কথেহীতি যোজনা. হৱেতি নিপাতমত্তং.

৭৭১. যা পন ভিক্খুনী অঞ্ঞায ভিক্খুনিযা ‘‘ইঙ্ঘ, অয্যে, যং তে এসো পুৰিসপুগ্গলো দেতি খাদনীযং ৱা’’তিআদিনা (পাচি. ৭০৫) সঙ্ঘাদিসেসমাতিকায ৱুত্তনযেন উয্যোজিতা অৱস্সুতম্হা পুৰিসপুগ্গলা যং কিঞ্চি ভোজনং আদায পটিগ্গহেত্ৱা সচে ভুঞ্জতি, সা তথা ভুঞ্জন্তী যায উয্যোজিতা ভুঞ্জতি, তস্সা উয্যোজিকায ধীৰা ৱিনযধৰা পণ্ডিতা সঙ্ঘাদিসেসং কথযন্তি তস্সা উয্যোজিতায ভোজনপৰিযোসানে উয্যোজিকায সঙ্ঘাদিসেসং ৱদন্তীতি যোজনা. যথাহ – ‘‘তস্সা হি ভোজনপৰিযোসানে উয্যোজিকায সঙ্ঘাদিসেসো হোতী’’তি (পৰি. অট্ঠ. ৪৮১).

৭৭২. তং কথং যদি বুজ্ঝসি জানাসি, সাধুকং ব্ৰূহি কথেহীতি যোজনা.

৭৭৩. নিসেৱিতেতি তায উয্যোজিতায ভিক্খুনিযা তস্স পুৰিসপুগ্গলস্স হত্থতো পটিগ্গহিতে তস্মিং দন্তপোনে পৰিভুত্তে উয্যোজিকা লহুৱজ্জং আপজ্জতীতি অত্থো.

৭৭৫. ‘‘উক্খিত্তকো’’তি ইমিনা আপত্তিৱজ্জমাহ. যথাহ – ‘‘তেন হি সদ্ধিং ৱিনযকম্মং নত্থি, তস্মা সো সঙ্ঘাদিসেসং আপজ্জিত্ৱা ছাদেন্তো ৱজ্জং ন ফুসতী’’তি.

৭৭৬. সপ্পাণপ্পাণজন্তি সপ্পাণকে চ অপ্পাণকে চ জাতং. নেৱ জঙ্গমন্তি পাদেহি ভূমিযং নেৱ চৰন্তং. ন ৱিহঙ্গমন্তি আকাসে পক্খং পসাৰেত্ৱা ন চৰন্তং. দ্ৱিজন্তি দ্ৱীহি পচ্চযেহি, দ্ৱিক্খত্তুং ৱা জাতত্তা দ্ৱিজং. কন্তন্তি মনোহৰং. অকন্তন্তি অমনোহৰং.

৭৭৭. সপ্পাণজো সদ্দো চিত্তজো ৱুত্তো, অপ্পাণজো উতুজো সদ্দো ৱুত্তো, সো পন দ্ৱীহেৱ পচ্চযেহি জাতত্তা ‘‘দ্ৱিজো’’তি মতোতি যোজনা.

৭৭৮. ‘‘ৱিনযে’’তিআদিগাথা ৱণ্ণিতত্থাযেৱ.

ইতি উত্তৰে লীনত্থপকাসনিযা

সেদমোচনকথাৱণ্ণনা নিট্ঠিতা.