আপত্তিসমুট্ঠানকথাৱণ্ণনা

৪০৫. আদিনাতি পঠমেন কাযসঙ্খাতেন সমুট্ঠানেন.

৪০৬-৭. দুক্কটাদযোতি আদি-সদ্দেন থুল্লচ্চযসঙ্ঘাদিসেসা গহিতা. যথাহ – ‘‘পযোগে দুক্কটং. একং পিণ্ডং অনাগতে আপত্তি থুল্লচ্চযস্স. তস্মিং পিণ্ডে আগতে আপত্তি সঙ্ঘাদিসেসস্সা’’তি (পৰি. ২৭৭). ৱিকালে পন পাচিত্তীতি ৱিকালভোজনপাচিত্তি. অঞ্ঞাতিহত্থতোতি অঞ্ঞাতিকায ভিক্খুনিযা অন্তৰঘৰং পৱিট্ঠায হত্থতো. গহেত্ৱাতি খাদনীযং ৱা ভোজনীযং ৱা সহত্থা পটিগ্গহেত্ৱা. ‘‘পঞ্চ ইমা আপত্তিযো’’তি পদচ্ছেদো.

৪০৮. দুতিযেনাতি ৱাচাসঙ্খাতেন সমুট্ঠানেন.

৪০৯-১০. সমাদিসতি কথেতি চে. সব্বথা ৱিপন্নন্তি অদেসিতৱত্থুকতাদিনা সব্বপ্পকাৰেন ৱিপন্নপ্পদেসং. কুটিন্তি সঞ্ঞাচিকায কুটিং. যথাহ পৰিৱাৰে ‘‘তস্স কুটিং কৰোন্তি অদেসিতৱত্থুকং পমাণাতিক্কন্তং সাৰম্ভং অপৰিক্কমন’’ন্তি (পৰি. ২৭৮). পদসোধম্মং মূলং সমুট্ঠানং যস্স পাচিত্তিযস্সাতি তথা ৱুত্তং, তেন পদসোধম্মমূলেন, সহত্থে চেতং কৰণৱচনং.

৪১১. ততিযেন সমুট্ঠানেনাতি কাযৱাচাসঙ্খাতেন সমুট্ঠানেন.

৪১২. সংৱিদহিত্ৱানাতি সদ্ধিং ৱিদহিত্ৱা, ‘‘কুটিং কৰোমা’’তি অঞ্ঞেহি সদ্ধিং মন্তেত্ৱাতি অত্থো.

৪১৩. ৱত্ৱাতি অত্তনো অত্থায ৱিঞ্ঞাপেত্ৱা. ভিক্খুনিন্তি ভিক্খূনং ভুঞ্জনট্ঠানে ঠত্ৱা ‘‘ইধ সূপং দেথ, ইধ ওদনং দেথা’’তি ৱোসাসমানং উপাসকানং ৱত্ৱা দাপেন্তিং ভিক্খুনিং. ন নিৱাৰেত্ৱাতি ‘‘অপসক্ক তাৱ, ভগিনি, যাৱ ভিক্খূ ভুঞ্জন্তী’’তি অনপসাদেত্ৱা ভুঞ্জতোতি যোজনা.

৪১৪. চতুত্থেন কাযচিত্তসমুট্ঠানেন কতি আপত্তিযো সিযুন্তি যোজনা.

৪১৭. পঞ্চমেনাতি ৱাচাচিত্তসমুট্ঠানেন. ৱদন্তি ৱদন্তো সমুদাচৰন্তো.

৪১৮. কুটিন্তি নিদস্সনমত্তং, অদেসিতৱত্থুকং পমাণাতিক্কন্তং সাৰম্ভং অপৰিক্কমনং সেনাসনম্পি গহণং ৱেদিতব্বং.

৪১৯. ৱাচেতি পদসো ধম্মন্তি এত্থ ‘‘অনুপসম্পন্ন’’ন্তি সেসো. যথাহ – ‘‘ভিক্খু অকপ্পিযসঞ্ঞী অনুপসম্পন্নং পদসো ধম্মং ৱাচেতী’’তি (পৰি. ২৮১). দৱকম্যতা ৱদন্তস্সাতি জাতিআদীহি অক্কোসৱত্থূহি কীড়াধিপ্পাযেন ৱদন্তস্স. দৱকম্যতাতি চ ‘‘পটিসঙ্খা যোনিসো’’তিআদীসু (ম. নি. ১.২২, ২৪, ৪২২; অ. নি. ৬.৫৮; ৮.৯; মহানি. ১৯৯, ২০৬; ধ. স. ১৩৫৫; ৱিভ. ৫১৮) ৱিয য-কাৰলোপেন নিদ্দেসো.

৪২০. ছট্ঠেন কাযৱাচাচিত্তসমুট্ঠানেন. সংৱিদহিত্ৱানাতি সংৱিধায, ‘‘ত্ৱঞ্চ অহঞ্চ একতো অৱহৰিস্সামা’’তি সম্মন্তনং কত্ৱা. ভণ্ডং হৰতীতি ‘‘ভাৰিযং ত্ৱং একং পস্সং গণ্হ, অহং ইম’’ন্তি ৱত্ৱা তেন সহ ঠানা চাৱেতি চে.

৪২৩. ইধ ইমস্মিং সাসনে. ৱিমতূপৰমং পৰমন্তি এত্থ ‘‘কপ্পিযং নু খো, অকপ্পিয’’ন্তি ৱা ‘‘আপত্তি নু খো, অনাপত্তী’’তি ৱা ‘‘ধম্মো নু খো, অধম্মো’’তি ৱা এৱমাদিনা নযেন ৱিৱিধেনাকাৰেন পৱত্তা ৱিমতি ৱিচিকিচ্ছা ৱিমতি. ৱিমতিং উপৰমেতি ৱিনাসেতীতি ৱিমতূপৰমং. পৰমং উত্তমং. উত্তৰন্তি ৱিভঙ্গখন্ধকাগতানং নিদানাদিৱিনিচ্ছযানং পঞ্হউত্তৰভাৱেন ঠিতত্তা উত্তৰং. ইমং উত্তৰং নাম পকৰণং যো উত্তৰতি পঞ্ঞায ওগাহেত্ৱা পৰিযোসাপেতি. ইধ ‘‘উত্তৰং উত্তৰ’’ন্তি পদদ্ৱযে একং গুণনিদস্সনং, একং সত্থনিদস্সনন্তি গহেতব্বং. সুনযেন যুতো সো পুগ্গলো ৱিনযং পিটকং উত্তৰতীতি সম্বন্ধো. কিং ৱিসিট্ঠন্তি আহ ‘‘সুনয’’ন্তিআদি. সুট্ঠু চাৰিত্তৱাৰিত্তদড়্হীকৰণসিথিলকৰণভেদা পঞ্ঞত্তিঅনউপঞ্ঞত্তাদিনযা এত্থাতি সুনযো, তং. সুট্ঠু নীযতি ৱিনিচ্ছযো এতেনাতি সুনযো, উত্তৰৱিনিচ্ছযো, তেন. ৱিনিচ্ছযাৱবোধেন সংযুত্তো সমন্নাগতো. দুক্খেন উত্তৰীযতীতি দুত্তৰং. পাতিমোক্খসংৱৰসীলদীপকত্তেন সমাধিপঞ্ঞানিব্বানসঙ্খাতউত্তৰপ্পত্তিযা পতিট্ঠাভাৱতো উত্তৰং উত্তৰতি ওগাহেত্ৱা পৰিযোসানং পাপুণাতীতি অত্থো.

ইধ যো ৱিমতূপৰমং পৰমং উত্তৰং উত্তৰং নাম পকৰণং উত্তৰতি, সুনযেন যুতো সো পুগ্গলো সুনযং দুত্তৰং উত্তৰং ৱিনযং উত্তৰতীতি যোজনা. চ-সদ্দেন সত্থন্তৰসমুচ্চযত্থেন ইমমত্থং দীপেতি. সেয্যথিদং, ইধ যো সুনযং দুত্তৰং উত্তৰং ৱিনযং উত্তৰতি, সুনযেন যুতো সো পুগ্গলো ৱিমতূপৰমং পৰমং উত্তৰং উত্তৰং নাম পকৰণং উত্তৰতীতি. ইমিনা যো উত্তৰং জানাতি, সো ৱিনযং জানাতি. যো ৱিনযং জানাতি, সো উত্তৰং জানাতীতি উত্তৰপকৰণস্স ৱিনযপিটকজাননে অচ্চন্তূপকাৰিতা ৱিভাৱিতাতি দট্ঠব্বং.

ইতি উত্তৰে লীনত্থপকাসনিযা

আপত্তিসমুট্ঠানকথাৱণ্ণনা নিট্ঠিতা.