সমুট্ঠানসীসকথাৱণ্ণনা

৩২৫-৬. মহেসিনা দ্ৱীসু ৱিভঙ্গেসু পঞ্ঞত্তানি যানি পাৰাজিকাদীনি সিক্খাপদানি উপোসথে উদ্দিসন্তি, তেসং সিক্খাপদানং সমুট্ঠানং ভিক্খূনং পাটৱত্থায ইতো পৰং পৱক্খামি, তং সমাহিতা সুণাথাতি যোজনা.

৩২৭. কাযো চ ৱাচা চ কাযৱাচা চাতি অচিত্তকানি যানি তীণি সমুট্ঠানানি, তানেৱ চিত্তেন পচ্চেকং যোজিতানি সচিত্তকানি তীণি সমুট্ঠানানি হোন্তীতি এৱমেৱ সমুট্ঠানং পুৰিমানং দ্ৱিন্নং ৱসেন একঙ্গিকং, ততিযচতুত্থপঞ্চমানং ৱসেন দ্ৱঙ্গিকং, ছট্ঠস্স ৱসেন তিৱঙ্গিকঞ্চাতি এৱং ছধা সমুট্ঠানৱিধিং ৱদন্তীতি যোজনা. কাযো, ৱাচাতি একঙ্গিকং দ্ৱযং, কাযৱাচা, কাযচিত্তং, ৱাচাচিত্তন্তি দুৱঙ্গিকত্তযং, কাযৱাচাচিত্তন্তি অঙ্গভেদেন তিৱিধম্পি অৱযৱভেদেন সমুট্ঠানভেদৱিধিং ছপ্পকাৰং ৱদন্তীতি অধিপ্পাযো.

৩২৮. তেসু ছসু সমুট্ঠানেসু একেন ৱা সমুট্ঠানেন দ্ৱীহি ৱা তীহি ৱা চতূহি ৱা ছহি ৱা সমুট্ঠানেহি নানা আপত্তিযো জাযৰেতি সম্বন্ধো.

৩২৯. তত্থ তাসু নানাপত্তীসু. পঞ্চ সমুট্ঠানানি এতিস্সাতি পঞ্চসমুট্ঠানা, এৱৰূপা কাচি আপত্তি ন ৱিজ্জতি. একমেকং সমুট্ঠানং যাসন্তি ৱিগ্গহো. পচ্ছিমেহেৱ তীহিপীতি সচিত্তকেহেৱ তীহি সমুট্ঠানেহি, যা আপত্তি একসমুট্ঠানা হোতি, সা সচিত্তকানং তিণ্ণমঞ্ঞতৰেন হোতীতি অধিপ্পাযো.

৩৩০-১. ততিযচ্ছট্ঠতোপি চাতি কাযৱাচতো, কাযৱাচাচিত্ততো চ. চতুত্থচ্ছট্ঠতো চেৱাতি কাযচিত্ততো কাযৱাচাচিত্ততো চ. পঞ্চমচ্ছট্ঠতোপি চাতি ৱাচাচিত্ততো কাযৱাচাচিত্ততো চ. ‘‘কাযতো কাযচিত্ততো’’তি পঠমং দ্ৱিসমুট্ঠানং, ‘‘ৱাচতো ৱাচাচিত্ততো’’তি দুতিযং, ‘‘কাযৱাচতো কাযৱাচাচিত্ততো’’তি ততিযং, ‘‘কাযচিত্ততো কাযৱাচাচিত্ততো’’তি চতুত্থং, ‘‘ৱাচাচিত্ততো কাযৱাচাচিত্ততো’’তি পঞ্চমং দ্ৱিসমুট্ঠানন্তি এৱং পঞ্চধা এৱ ঠিতেহি দ্ৱীহি সমুট্ঠানেহি এসা দ্ৱিসমুট্ঠানাপত্তি জাযতে সমুট্ঠাতি. ন অঞ্ঞতোতি কাযতো ৱাচতোতি একং, ৱাচতো কাযৱাচতোতি একন্তি এৱং যথাৱুত্তক্কমৱিপৰিযাযেন যোজিতেহি অঞ্ঞেহি সমুট্ঠানেহি ন সমুট্ঠাতি.

৩৩২. পঠমেহি চ তীহীতি ‘‘কাযতো, ৱাচতো, কাযৱাচতো’’তি পঠমং নিদ্দিট্ঠেহি তীহি অচিত্তকসমুট্ঠানেহি. পচ্ছিমেহি চাতি ‘‘কাযচিত্ততো, ৱাচাচিত্ততো, কাযৱাচাচিত্ততো’’তি এৱং পচ্ছা ৱুত্তেহি সচিত্তকেহি তীহি সমুট্ঠানেহি. ন অঞ্ঞতোতি ‘‘কাযতো, ৱাচতো, কাযচিত্ততো, ৱাচতো, কাযৱাচতো, কাযচিত্ততো’’তি এৱং ৱুত্তৱিপল্লাসতো অঞ্ঞেহি তীহি সমুট্ঠানেহি ন সমুট্ঠাতি.

৩৩৩-৪. পঠমা ততিযা চেৱ, চতুত্থচ্ছট্ঠতোপি চাতি কাযতো, কাযৱাচতো, কাযচিত্ততো, কাযৱাচাচিত্ততোতি এতেহি চতূহি সমুট্ঠানেহি চেৱ. দুতিযা…পে… চ্ছট্ঠতোপি চাতি ৱাচতো, কাযৱাচতো, ৱাচাচিত্ততো, কাযৱাচাচিত্ততোতি ইমেহি চতূহি চাতি চতুসমুট্ঠানেনাপত্তি.

সা এৱং দ্ৱিধা ঠিতেহি চতূহি সমুট্ঠানেহি জাযতে. ন পনঞ্ঞতোতি ‘‘কাযতো, ৱাচতো, কাযৱাচতো, কাযচিত্ততো’’তি এৱমাদিনা ৱিপল্লাসনযেন যোজিতেহি চতূহি সমুট্ঠানেহি ন সমুট্ঠাতি. ছ সমুট্ঠানানি যস্সা সা ছসমুট্ঠানা. সচিত্তকেহি তীহি, অচিত্তকেহি তীহীতি ছহি এৱ সমুট্ঠানেহি সমুট্ঠাতীতি. পকাৰন্তৰাভাৱা ইধ ‘‘ন অঞ্ঞতো’’তি ন ৱুত্তং.

আহ চ অট্ঠকথাচৰিযো মাতিকট্ঠকথাযং.

৩৩৫. সমুট্ঠাতি এতস্মাতি সমুট্ঠানং, কাযাদি ছব্বিধং, একং সমুট্ঠানং কাৰণং যস্সা সা একসমুট্ঠানা. পকাৰন্তৰাভাৱা তিধা. কথং? সচিত্তকানং তিণ্ণং সমুট্ঠানানং ৱসেন তিৱিধা. দ্ৱীহি সমুট্ঠানেহি সমুট্ঠিতা দ্ৱিসমুট্ঠিতা, দ্ৱিসমুট্ঠানাপত্তীতি অত্থো. পঞ্চধাতি ৱুত্তনযেন পঞ্চপ্পকাৰা. তীণি সমুট্ঠানানি যস্সা সা তিসমুট্ঠানা, চত্তাৰি সমুট্ঠানানি যস্সা সা চতুৰুট্ঠানা, তিসমুট্ঠানা চ চতুৰুট্ঠানা চ তিচতুৰুট্ঠানাতি একদেসসৰূপেকসেসো, তিসমুট্ঠানা দ্ৱিধা ৱিভত্তা, চতুসমুট্ঠানা চ দ্ৱিধা এৱ ৱিভত্তাতি অত্থো. ছহি সমুট্ঠানেহি সমুট্ঠিতা ছসমুট্ঠিতা, ছসমুট্ঠানাতি অত্থো. একধাতি পকাৰন্তৰাভাৱা একধাৱ ঠিতাতি অধিপ্পাযো.

৩৩৬. সব্বা আপত্তিযো সমুট্ঠানৱিসেসতো এৱং তেৰসধা ঠিতানং সমুট্ঠানভেদানং নানত্ততো তেহি সমুট্ঠিতানং পঠমং পঞ্ঞত্তত্তা সীসভূতানং সিক্খাপদানং ৱসেন তেৰসেৱ নামানি লভন্তি, তানি ইতো পৰং ৱক্খামীতি যোজনা.

৩৩৭. পঠমন্তিমৱত্থুঞ্চাতি পঠমপাৰাজিকসমুট্ঠানং. দুতিযন্তি অদিন্নাদানসমুট্ঠানং. সঞ্চৰিত্তকন্তি সঞ্চৰিত্তসমুট্ঠানং. সমনুভাসনন্তি সমনুভাসনসমুট্ঠানং. ‘‘কথিনং এড়কলোমক’’ন্তি পদচ্ছেদো, কথিনসমুট্ঠানং এড়কলোমসমুট্ঠানঞ্চ.

৩৩৮. পদসোধম্মন্তি পদসোধম্মসমুট্ঠানং. অদ্ধানং থেয্যসত্থন্তি অদ্ধানসমুট্ঠানং থেয্যসত্থসমুট্ঠানং. দেসনাতি ধম্মদেসনাসমুট্ঠানং. ভূতাৰোচনকন্তি ভূতাৰোচনসমুট্ঠানং. চোৰিৱুট্ঠাপনন্তি চোৰিৱুট্ঠাপনসমুট্ঠানং.

৩৩৯. অননুঞ্ঞাতকঞ্চাতি অননুঞ্ঞাতকসমুট্ঠানঞ্চাতি এতানি তেৰস তেহি সমুট্ঠানেহি সমুট্ঠিতানং তেসং সিক্খাপদানং পঠমং পঠমং নিদ্দিট্ঠানং পঠমপাৰাজিকাদিসিক্খাপদসমুট্ঠানানং ইতৰেসং পুব্বঙ্গমভাৱতো ‘‘সীসানী’’তি ৱুত্তানি. যথাহ পৰিৱাৰট্ঠকথাযং ‘‘পঠমপাৰাজিকং নাম একং সমুট্ঠানসীসং, সেসানি তেন সদিসানী’’তিআদি (পৰি. অট্ঠ. ২৫৮). তেৰসেতে সমুট্ঠাননযাতি এতে সীসৱসেন দস্সিতা তেৰস সমুট্ঠাননযা. ৱিঞ্ঞূহি উপালিত্থেৰাদীহি.

৩৪০. তত্থ তেৰসসু সমুট্ঠানসীসেসু. যাতি যা পন আপত্তি. আদিপাৰাজিকুট্ঠানাতি পঠমপাৰাজিকসমুট্ঠানা.

৩৪১. অদিন্নাদান-সদ্দো পুব্বকো পঠমো এতিস্সা তংসমুট্ঠানাপত্তিযাতি অদিন্নাদানপুব্বকা, অদিন্নাদানসমুট্ঠানাতি উদ্দিট্ঠাতি যোজনা.

৩৪২. জাতূতি একংসেন.

৩৪৩. অযং সমুট্ঠানৱসেন ‘‘সমনুভাসনাসমুট্ঠানা’’তি ৱুত্তাতি যোজনা.

৩৪৪. কথিন-সদ্দো উপপদো যস্সা তংসমুট্ঠানায আপত্তিযা সা কথিনুপপদা, কথিনসমুট্ঠানাতি মতা ঞাতা, অযং সমুট্ঠানৱসেন ‘‘কথিনসমুট্ঠানা’’তি ঞাতাতি অত্থো.

৩৪৫. এড়কলোম-সদ্দো আদি যস্সা তংসমুট্ঠানাপত্তিযা সা এড়কলোমাদিসমুট্ঠানাতি অত্থো.

৩৪৯. এত্থ সমুট্ঠানেসু.

৩৫০. ভূতাৰোচন-সদ্দো পুব্বভাগো এতিস্সা তংসমুট্ঠানায আপত্তিযাতি ভূতাৰোচনপুব্বকা, ভূতাৰোচনসমুট্ঠানাতি অত্থো.

৩৫১. সমুট্ঠানং সমুট্ঠিতং, চোৰিৱুট্ঠাপনং সমুট্ঠিতং যস্সা সা চোৰিৱুট্ঠাপনসমুট্ঠিতা, চোৰিৱুট্ঠাপনসমুট্ঠানাতি অত্থো.

৩৫৩. তত্থাতি তেৰসসমুট্ঠানসীসেসু, ‘‘সমুট্ঠানং সচিত্তক’’ন্তি ইদং ‘‘পঠম’’ন্তিআদীহি পচ্চেকং যোজেতব্বং. পঠমং সমুট্ঠানন্তি পঠমপাৰাজিকসমুট্ঠানং. দুতিযং সমুট্ঠানন্তি অদিন্নাদানসমুট্ঠানং. চতুত্থং সমুট্ঠানন্তি সমনুভাসনসমুট্ঠানং. নৱমং সমুট্ঠানন্তি থেয্যসত্থসমুট্ঠানং. দসমং সমুট্ঠানন্তি ধম্মদেসনাসমুট্ঠানং. দ্ৱাদসমং সমুট্ঠানন্তি চোৰিৱুট্ঠাপনসমুট্ঠানং.

৩৫৪. সমুট্ঠানেতি সমুট্ঠানসীসে. সদিসাতি তেন তেন সমুট্ঠানসীসেন সমুট্ঠানা আপত্তিযো. ইধাতি ইমস্মিং সমুট্ঠানৱিনিচ্ছযে. দিস্সৰেতি দিস্সন্তে, দিস্সন্তীতি অত্থো. অথ ৱা ইধ দিস্সৰেতি ইধ উভতোৱিভঙ্গে এতেসু তেৰসসমুট্ঠানেসু একেকস্মিং অঞ্ঞানিপি সদিসানি সমুট্ঠানানি দিস্সন্তীতি অত্থো. ইদানি তানি সৰূপতো নিদস্সেতুমাহ ‘‘সুক্কঞ্চা’’তিআদি. তত্থ সুক্কন্তি সুক্কৱিস্সট্ঠিসিক্খাপদং. এস নযো ‘‘কাযসংসগ্গো’’তিআদীসুপি. যদেত্থ দুৱিঞ্ঞেয্যং, তং ৱক্খাম.

৩৫৫. পুব্বুপপৰিপাকো চাতি ‘‘জানং পুব্বুপগতং ভিক্খু’’ন্তি (পাচি. ১২০) সিক্খাপদঞ্চ ‘‘ভিক্খুনিপৰিপাচিত’’ন্তি (পাচি. ১৯২, ১৯৪) পিণ্ডপাতসিক্খাপদঞ্চ. ৰহো ভিক্খুনিযাসহাতি ভিক্খুনিযা সদ্ধিং ৰহো নিসজ্জসিক্খাপদঞ্চ. সভোজনে, ৰহো দ্ৱে চাতি সভোজনে কুলে অনুপখজ্জসিক্খাপদঞ্চ দ্ৱে ৰহোনিসজ্জসিক্খাপদানি চ. অঙ্গুলী উদকে হসন্তি অঙ্গুলিপতোদঞ্চ উদকহসধম্মসিক্খাপদঞ্চ.

৩৫৬. পহাৰে উগ্গিৰে চেৱাতি পহাৰদানসিক্খাপদঞ্চ তলসত্তিউগ্গিৰণসিক্খাপদঞ্চ. তেপঞ্ঞাসা চ সেখিযাতি পঞ্চসত্ততিসেখিযাসু ৱক্খমানানি উজ্জগ্ঘিকাদীনি সমনুভাসনসমুট্ঠানানি দস, ছত্তপাণিআদীনি ধম্মদেসনাসমুট্ঠানানি একাদস, থেয্যসত্থসমুট্ঠানং, সূপোদনৱিঞ্ঞত্তিসিক্খাপদঞ্চাতি বাৱীসতি সিক্খাপদানি ঠপেত্ৱা পৰিমণ্ডলনিৱাসনাদীনি ইতৰানি তেপঞ্ঞাস সেখিযসিক্খাপদানি চ. অধক্খকুব্ভজাণুঞ্চাতি ভিক্খুনীনং অধক্খকউব্ভজাণুসিক্খাপদঞ্চ. গামন্তৰমৱস্সুতাতি গামন্তৰগমনং, অৱস্সুতস্স হত্থতো খাদনীযগ্গহণসিক্খাপদঞ্চ.

৩৫৭-৮. তলমট্ঠুদসুদ্ধি চাতি তলঘাতং, জতুমট্ঠং, উদকসুদ্ধিকাদিযনঞ্চ. ৱস্সংৱুত্থাতি ‘‘ৱস্সংৱুত্থা…পে… ছপ্পঞ্চযোজনানী’’তি (পাচি. ৯৭৪) সিক্খাপদঞ্চ. ওৱাদায ন গচ্ছন্তীতি ওৱাদায অগমনসিক্খাপদঞ্চ. নানুবন্ধে পৱত্তিনিন্তি ‘‘ৱুট্ঠাপিতং পৱত্তিনিং দ্ৱে ৱস্সানি নানুবন্ধেয্যা’’তি (পাচি. ১১১২) সিক্খাপদঞ্চাতি উভতোৱিভঙ্গে নিদ্দিট্ঠা ইমে পঞ্চসত্ততি ধম্মা কাযচিত্তসমুট্ঠিতা মেথুনেন সমা একসমুট্ঠানা মতাতি যোজনা.

এত্থ চ পাড়িযং ‘‘ছসত্ততী’’তি গণনপৰিচ্ছেদো সমুট্ঠানসিক্খাপদেন সহ দস্সিতো. ইধ পন তং ৱিনা তংসদিসানমেৱ গণনা দস্সিতা. তেনেৱ পঠমং সমুট্ঠানসীসং পাড়িযং গণনাযপি দস্সিতং, ইধেৱ ন দস্সিতং. উপৰি কত্থচি সমুট্ঠানসীসস্স দস্সনং পনেত্থ ৱক্খমানানং তংসদিসভাৱদস্সনত্থং, গণনায ৱক্খমানায অন্তোগধভাৱদস্সনত্থং. তেনেৱ তত্থপি তং ৱিনা গণনং ৱক্খতি.

পঠমপাৰাজিকসমুট্ঠানৱণ্ণনা.

৩৫৯. ৱিগ্গহন্তি মনুস্সৱিগ্গহসিক্খাপদং. উত্তৰি চেৱাতি উত্তৰিমনুস্সধম্মসিক্খাপদঞ্চ. দুট্ঠুল্লন্তি দুট্ঠুল্লৱাচাসিক্খাপদং. অত্তকামতাতি অত্তকামপাৰিচৰিযসিক্খাপদঞ্চ. দুট্ঠদোসা দুৱে চেৱাতি দ্ৱে দুট্ঠদোসসিক্খাপদানি চ. দুতিযানিযতোপি চাতি দুতিযঅনিযতসিক্খাপদঞ্চ.

৩৬০. অচ্ছিন্দনঞ্চাতি সামং চীৱৰং দত্ৱা অচ্ছিন্দনঞ্চ. পৰিণামোতি সঙ্ঘিকলাভস্স অত্তনো পৰিণামনঞ্চ. মুসাওমসপেসুণাতি মুসাৱাদো চ ওমসৱাদো চ ভিক্খুপেসুঞ্ঞঞ্চ. দুট্ঠুল্লাৰোচনঞ্চেৱাতি দুট্ঠুল্লাপত্তিআৰোচনসিক্খাপদঞ্চ. পথৱীখণনম্পি চাতি পথৱীখণনসিক্খাপদঞ্চ.

৩৬১. ভূতগামঞ্চ ৱাদো চাতি ভূতগামসিক্খাপদং, অঞ্ঞৱাদকসিক্খাপদঞ্চ. উজ্ঝাপনকমেৱ চাতি উজ্ঝাপনকসিক্খাপদঞ্চ. নিক্কড্ঢো সিঞ্চনঞ্চেৱাতি ৱিহাৰতো নিক্কড্ঢনঞ্চ উদকে তিণাদিসিঞ্চনঞ্চ. আমিসহেতু চাতি আমিসহেতু ভিক্খুনিযো ওৱাদসিক্খাপদঞ্চ.

৩৬২. ভুত্তাৱিন্তি ভুত্তাৱিং অনতিৰিত্তেন খাদনীযাদিনা পৱাৰণসিক্খাপদঞ্চ. এহনাদৰিন্তি ‘‘এহাৱুসো, গামং ৱা’’তি (পাচি. ২৭৫) ৱুত্তসিক্খাপদঞ্চ অনাদৰিযসিক্খাপদঞ্চ. ভিংসাপনমেৱ চাতি ভিক্খুভিংসনকঞ্চ. অপনিধেয্যাতি পত্তাদিঅপনিধানসিক্খাপদঞ্চ. সঞ্চিচ্চ পাণন্তি সঞ্চিচ্চ পাণং জীৱিতাৱোৰোপনঞ্চ. সপ্পাণকম্পি চাতি জানং সপ্পাণকউদকসিক্খাপদঞ্চ.

৩৬৩. উক্কোটনঞ্চাতি পুনকম্মায উক্কোটনঞ্চ. ঊনোতি ঊনৱীসতিৱস্সসিক্খাপদঞ্চ. সংৱাসোতি উক্খিত্তকেন সদ্ধিং সংৱাসসিক্খাপদঞ্চ. নাসনে চাতি নাসিতকসামণেৰসম্ভোগসিক্খাপদঞ্চ. সহধম্মিকন্তি সহধম্মিকং ৱুচ্চমানসিক্খাপদঞ্চ. ৱিলেখা চাতি ‘‘ৱিলেখায সংৱত্তন্তী’’তি (পাচি. ৪৩৯) আগতসিক্খাপদঞ্চ. মোহনাতি মোহনসিক্খাপদঞ্চ. অমূলকেন চাতি অমূলকেন সঙ্ঘাদিসেসেন অনুদ্ধংসনসিক্খাপদঞ্চ.

৩৬৪. কুক্কুচ্চং খীযনং দত্ৱাতি কুক্কুচ্চউপ্পাদনঞ্চ ধম্মিকানং কম্মানং ছন্দং দত্ৱা খীযনঞ্চ চীৱৰং দত্ৱা খীযনঞ্চ. পৰিণামেয্য পুগ্গলেতি সঙ্ঘিকং লাভং পুগ্গলস্স পৰিণামনসিক্খাপদঞ্চ. কিং তে, অকালং, অচ্ছিন্দেতি ‘‘কিং তে, অয্যে, এসো পুৰিসপুগ্গলো কৰিস্সতী’’তি (পাচি. ৭০৫) আগতসিক্খাপদঞ্চ অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজনসিক্খাপদঞ্চ ভিক্খুনিযা সদ্ধিং চীৱৰং পৰিৱত্তেত্ৱা অচ্ছিন্দনসিক্খাপদঞ্চ. দুগ্গহনিৰযেন চাতি দুগ্গহিতেন দুপধাৰিতেন পৰং উজ্ঝাপনসিক্খাপদঞ্চ নিৰযেন ৱা ব্ৰহ্মচৰিযেন ৱা অভিসপনসিক্খাপদঞ্চ.

৩৬৫. গণস্স চাতি ‘‘গণস্স চীৱৰলাভং অন্তৰাযং কৰেয্যা’’তি (পাচি. ৯০৮) ৱুত্তসিক্খাপদঞ্চ. ৱিভঙ্গঞ্চাতি ‘‘ধম্মিকং চীৱৰৱিভঙ্গং পটিবাহেয্যা’’তি (পাচি. ৯১২) ৱুত্তসিক্খাপদঞ্চ. দুব্বলাসা তথেৱ চাতি ‘‘দুব্বলচীৱৰপচ্চাসায চীৱৰকালসমযং অতিক্কামেয্যা’’তি (পাচি. ৯২১) ৱুত্তসিক্খাপদঞ্চ. ধম্মিকং কথিনুদ্ধাৰন্তি ‘‘ধম্মিকং কথিনুদ্ধাৰং পটিবাহেয্যা’’তি (পাচি. ৯২৮) ৱুত্তসিক্খাপদঞ্চ. সঞ্চিচ্চাফাসুমেৱ চাতি ‘‘ভিক্খুনিযা সঞ্চিচ্চ অফাসুং কৰেয্যা’’তি (পাচি. ৯৪২) ৱুত্তসিক্খাপদঞ্চ.

৩৬৬. সযং উপস্সযং দত্ৱাতি ‘‘ভিক্খুনিযা উপস্সযং দত্ৱা কুপিতা অনত্তমনা নিক্কড্ঢেয্যা’’তি (পাচি. ৯৫১) ৱুত্তসিক্খাপদঞ্চ. অক্কোসেয্য চাতি ‘‘ভিক্খুং অক্কোসেয্য ৱা পৰিভাসেয্য ৱা’’তি (পাচি. ১০২৯) ৱুত্তসিক্খাপদঞ্চ. চণ্ডিকাতি ‘‘চণ্ডীকতা গণং পৰিভাসেয্যা’’তি (পাচি. ১০৩৪) ৱুত্তসিক্খাপদঞ্চ. কুলমচ্ছৰিনী অস্সাতি ‘‘কুলমচ্ছৰিনী অস্সা’’তি (পাচি. ১০৪৩) ৱুত্তসিক্খাপদঞ্চ. গব্ভিনিং ৱুট্ঠাপেয্য চাতি ‘‘গব্ভিনিং ৱুট্ঠাপেয্যা’’তি (পাচি. ১০৬৮) ৱুত্তসিক্খাপদঞ্চ.

৩৬৭. পাযন্তিন্তি ‘‘পাযন্তিং ৱুট্ঠাপেয্যা’’তি (পাচি. ১০৭৩) ৱুত্তসিক্খাপদঞ্চ. দ্ৱে চ ৱস্সানীতি ‘‘দ্ৱে ৱস্সানি ছসু ধম্মেসু অসিক্খিতসিক্খং সিক্খমানং ৱুট্ঠাপেয্যা’’তি (পাচি. ১০৮০) ৱুত্তসিক্খাপদঞ্চ. সঙ্ঘেনাসম্মতন্তি ‘‘সিক্খিতসিক্খং সিক্খমানং সঙ্ঘেন অসম্মতং ৱুট্ঠাপেয্যা’’তি (পাচি. ১০৮৬) ৱুত্তসিক্খাপদঞ্চ. তিস্সো গিহিগতা ৱুত্তাতি ‘‘ঊনদ্ৱাদসৱস্সং গিহিগতং (পাচি. ১০৯১), পৰিপুণ্ণদ্ৱাদসৱস্সং গিহিগতং দ্ৱে ৱস্সানি ছসু ধম্মেসু অসিক্খিতসিক্খং (পাচি. ১০৯৭), দ্ৱেৱস্সানি সিক্খিতসিক্খং সঙ্ঘেন অসম্মত’’ন্তি (পাচি. ১১০৩) ৱুত্তসিক্খাপদানি চ. তিস্সোযেৱ কুমাৰিকাতি ‘‘ঊনৱীসতিৱস্সং কুমাৰিভূত’’ন্তিআদিনা (পাচি. ১১২০) নযেন ৱুত্তা তিস্সো চ.

৩৬৮. ঊনদ্ৱাদসৱস্সা দ্ৱেতি ‘‘ঊনদ্ৱাদসৱস্সা ৱুট্ঠাপেয্য (পাচি. ১১৩৭), পৰিপুণ্ণদ্ৱাদসৱস্সা সঙ্ঘেন অসম্মতা ৱুট্ঠাপেয্যা’’তি (পাচি. ১১৪২) ৱুত্তানি দ্ৱে সিক্খাপদানি চ. অলং তাৱ তেতি ‘‘অলং তাৱ তে, অয্যে, ৱুট্ঠাপিতেনা’’তি (পাচি. ১১৪৭) ৱুত্তসিক্খাপদঞ্চ. সোকাৱস্সাতি ‘‘চণ্ডিং সোকাৱাসং সিক্খমানং ৱুট্ঠাপেয্যা’’তি (পাচি. ১১৫৯) ৱুত্তসিক্খাপদঞ্চ. পাৰিৱাসিকচ্ছন্দদানতোতি ‘‘পাৰিৱাসিকছন্দদানেন সিক্খমানং ৱুট্ঠাপেয্যা’’তি (পাচি. ১১৬৭) ৱুত্তসিক্খাপদঞ্চ.

৩৬৯. অনুৱস্সং দুৱে চাতি ‘‘অনুৱস্সং ৱুট্ঠাপেয্য (পাচি. ১১৭১), একং ৱস্সং দ্ৱে ৱুট্ঠাপেয্যা’’তি (পাচি. ১১৭৫) ৱুত্তসিক্খাপদানি চাতি একূনসত্ততি সিক্খাপদানি. অদিন্নাদানতুল্যত্তাতি অদিন্নাদানেন সমানসমুট্ঠানত্তা. তিসমুট্ঠানিকা কতাতি সচিত্তকেহি তীহি সমুট্ঠানেহি সমুট্ঠহন্তীতি ৱুত্তা.

দুতিযপাৰাজিকসমুট্ঠানৱণ্ণনা.

৩৭০. সঞ্চৰিকুটিমহল্লকন্তি সঞ্চৰিত্তং, সঞ্ঞাচিকায কুটিকৰণং, মহল্লকৱিহাৰকৰণঞ্চ. ধোৱাপনঞ্চ পটিগ্গহোতি অঞ্ঞাতিকায ভিক্খুনিযা পুৰাণচীৱৰধোৱাপনঞ্চ চীৱৰপটিগ্গহণঞ্চ. চীৱৰস্স চ ৱিঞ্ঞত্তিন্তি অঞ্ঞাতকং গহপতিং ৱা গহপতানিং ৱা চীৱৰৱিঞ্ঞাপনসিক্খাপদঞ্চ. গহণঞ্চ তদুত্তৰিন্তি তদুত্তৰিসাদিযনসিক্খাপদঞ্চ.

৩৭১. উপক্খটদ্ৱযঞ্চেৱাতি ‘‘চীৱৰচেতাপন্নং উপক্খটং হোতী’’তি (পাৰা. ৫২৮) আগতসিক্খাপদদ্ৱযঞ্চ. তথা দূতেন চীৱৰন্তি দূতেনচীৱৰচেতাপন্নপহিতসিক্খাপদঞ্চ. কোসিযন্তি কোসিযমিস্সকসিক্খাপদঞ্চ. সুদ্ধকাড়ানন্তি ‘‘সুদ্ধকাড়কান’’ন্তিআদিসিক্খাপদঞ্চ (পাৰা. ৫৪৮). দ্ৱে ভাগাদানমেৱ চাতি ‘‘দ্ৱে ভাগা আদাতব্বা’’তি (পাৰা. ৫৫৩) ৱুত্তসিক্খাপদঞ্চ.

৩৭২. ছব্বস্সানীতি ছব্বস্সানি ধাৰণসিক্খাপদঞ্চ. পুৰাণস্সাতি ‘‘পুৰাণসন্থতস্সা’’তি (পাৰা. ৫৬৭) ৱুত্তসিক্খাপদঞ্চ. লোমধোৱাপনম্পি চাতি এড়কলোমধোৱাপনসিক্খাপদঞ্চ. ৰূপিযস্স পটিগ্গাহোতি ৰূপিযপটিগ্গহণসিক্খাপদঞ্চ. উভো নানপ্পকাৰকাতি ৰূপিযসংৱোহাৰকযৱিক্কযসিক্খাপদানি চ.

৩৭৩. ঊনবন্ধনপত্তো চাতি ঊনপঞ্চবন্ধনপত্তসিক্খাপদঞ্চ. ৱস্সসাটিকসুত্তকন্তি ৱস্সিকসাটিকসিক্খাপদঞ্চ সুত্তং ৱিঞ্ঞাপেত্ৱা চীৱৰকাৰাপনসিক্খাপদঞ্চ. ৱিকপ্পাপজ্জনন্তি তন্তৱাযে উপসঙ্কমিত্ৱা চীৱৰে ৱিকপ্পাপজ্জনঞ্চ. যাৱ দ্ৱাৰদানঞ্চ সিব্বনন্তি ‘‘যাৱ দ্ৱাৰকোসা অগ্গড়ট্ঠপনাযা’’তি (পাচি. ১৩৫) ৱুত্তসিক্খাপদঞ্চ ‘‘অঞ্ঞাতিকায ভিক্খুনিযা চীৱৰং দদেয্য (পাচি. ১৭১), চীৱৰং সিব্বেয্যা’’তি (পাচি. ১৭৬) ৱুত্তসিক্খাপদদ্ৱযঞ্চ.

৩৭৪. পূৱেহীতি পূৱেহি ৱা মন্থেহি ৱা অভিহট্ঠুং পৱাৰণসিক্খাপদঞ্চ. পচ্চযোতি চতুমাসপচ্চযপৱাৰণসিক্খাপদঞ্চ. জোতীতি জোতিযা সমাদহনসিক্খাপদঞ্চ. ৰতনন্তি ৰতনসিক্খাপদঞ্চ. সূচি…পে… সুগতস্স চাতি সূচিঘৰসিক্খাপদাদীনি সত্ত সিক্খাপদানি চ.

৩৭৫. অঞ্ঞৱিঞ্ঞত্তিসিক্খা চাতি ‘‘অঞ্ঞং ৱিঞ্ঞাপেয্যা’’তি (পাচি. ৭৪৯) ৱুত্তসিক্খাপদঞ্চ. অঞ্ঞং চেতাপনম্পি চাতি ‘‘অঞ্ঞং চেতাপেত্ৱা অঞ্ঞং চেতাপেয্যা’’তি (পাচি. ৭৪৯) ৱুত্তসিক্খাপদঞ্চ. সঙ্ঘিকেন দুৱে ৱুত্তাতি ‘‘সঙ্ঘিকেন অঞ্ঞং চেতাপেয্য (পাচি. ৭৫৯), সঙ্ঘিকেন সঞ্ঞাচিকেন অঞ্ঞং চেতাপেয্যা’’তি (পাচি. ৭৬৪) ৱুত্তানি দ্ৱে সিক্খাপদানি চ. দ্ৱে মহাজনিকেনাতি ‘‘মহাজনিকেন অঞ্ঞং চেতাপেয্য (পাচি. ৭৬৯), মহাজনিকেন সঞ্ঞাচিকেন অঞ্ঞং চেতাপেয্যা’’তি (পাচি. ৭৭৪) ৱুত্তানি দ্ৱে সিক্খাপদানি চ.

৩৭৬. তথা পুগ্গলিকেনেকন্তি ‘‘পুগ্গলিকেন সঞ্ঞাচিকেন অঞ্ঞং চেতাপেয্যা’’তি (পাচি. ৭৭৯) ৱুত্তমেকসিক্খাপদঞ্চ. গৰুপাৱুৰণন্তি গৰুপাৱুৰণচেতাপনসিক্খাপদঞ্চ. লহুন্তি লহুপাৱুৰণচেতাপনসিক্খাপদং. ‘‘ৱিঘাসা উদসাটি চা’’তি পদচ্ছেদো. দ্ৱে ৱিঘাসাতি ‘‘উচ্চাৰং ৱা পস্সাৱং ৱা সঙ্কাৰং ৱা ৱিঘাসং ৱা তিৰোকুট্টে ৱা তিৰোপাকাৰে ৱা ছড্ডেয্য ৱা ছড্ডাপেয্য ৱা (পাচি. ৮২৫), হৰিতে ছড্ডেয্য ৱা ছড্ডাপেয্য ৱা’’তি (পাচি. ৮২৯) এৱং ৱুত্তানি দ্ৱে ৱিঘাসসিক্খাপদানি চ. উদসাটি চাতি উদকসাটিকসিক্খাপদঞ্চ. তথা সমণচীৱৰন্তি তথা ‘‘সমণচীৱৰং দদেয্যা’’তি (পাচি. ৯১৭) ৱুত্তসিক্খাপদঞ্চাতি.

৩৭৭. ইতি এতে একূনপণ্ণাস ধম্মা দুক্খন্তদস্সিনা ভগৱতা ছসমুট্ঠানিকা তেযেৱ সঞ্চৰিত্তসমা সঞ্চৰিত্তসিক্খাপদেন সমা কতা অনুমতা পঞ্ঞত্তাতি যোজনা.

সঞ্চৰিত্তসমুট্ঠানৱণ্ণনা.

৩৭৮. সঙ্ঘভেদোতি সঙ্ঘভেদসিক্খাপদঞ্চ. ভেদানুৱত্তদুব্বচদূসকাতি ভেদানুৱত্তকদুব্বচকুলদূসকসিক্খাপদানি চ. দুট্ঠুল্লচ্ছাদনন্তি দুট্ঠুল্লপটিচ্ছাদনসিক্খাপদঞ্চ. দিট্ঠীতি দিট্ঠিঅপ্পটিনিস্সজ্জনসিক্খাপদঞ্চ. ছন্দউজ্জগ্ঘিকা দুৱেতি ছন্দংঅদত্ৱাগমনসিক্খাপদঞ্চ উজ্জগ্ঘিকায অন্তৰঘৰে গমননিসীদনসিক্খাপদদ্ৱযঞ্চ.

৩৭৯. অপ্পসদ্দা দুৱে ৱুত্তাতি ‘‘অপ্পসদ্দো অন্তৰঘৰে গমিস্সামি, নিসীদিস্সামী’’তি (পাচি. ৫৮৮, ৫৮৯) ৱুত্তানি দ্ৱে সিক্খাপদানি চ. ন ব্যাহৰেতি ‘‘ন সকবড়েন মুখেন ব্যাহৰিস্সামী’’তি (পাচি. ৬১৯) ৱুত্তসিক্খাপদঞ্চ. ছমা, নীচাসনে, ঠানন্তি ‘‘ছমাযং নিসীদিত্ৱা (পাচি. ৬৪৫), নীচে আসনে নিসীদিত্ৱা (পাচি. ৬৪৭), ঠিতো নিসিন্নস্সা’’তি (পাচি. ৬৪৮) ৱুত্তসিক্খাপদঞ্চ. পচ্ছতো উপ্পথেন চাতি ‘‘পচ্ছতো গচ্ছন্তো পুৰতো গচ্ছন্তস্স (পাচি. ৬৪৯), উপ্পথেন গচ্ছন্তো পথেন গচ্ছন্তস্সা’’তি (পাচি. ৬৫০) ৱুত্তসিক্খাপদদ্ৱযঞ্চ.

৩৮০. ৱজ্জচ্ছাদাতি ৱজ্জতো পটিচ্ছাদনসিক্খাপদঞ্চ. অনুৱত্তা চাতি উক্খিত্তানুৱত্তনসিক্খাপদঞ্চ. গহণন্তি ‘‘হত্থগ্গহণং ৱা সাদিযেয্যা’’তি (পাচি. ৬৭৫) ৱুত্তসিক্খাপদঞ্চ. ওসাৰেয্য চাতি ‘‘অনপলোকেত্ৱা কাৰকসঙ্ঘং অনঞ্ঞায গণস্স ছন্দং ওসাৰেয্যা’’তি (পাচি. ৬৯৫) ৱুত্তসিক্খাপদঞ্চ. পচ্চক্খামীতি সিক্খা চাতি ‘‘বুদ্ধং পচ্চাচিক্খামী’’তি (পাচি. ৭১০) ৱুত্তসিক্খাপদঞ্চ. তথা কিস্মিঞ্চিদেৱ চাতি ‘‘কিস্মিঞ্চিদেৱ অধিকৰণে পচ্চাকতা’’তি (পাচি. ৭১৬) ৱুত্তসিক্খাপদঞ্চ.

৩৮১. সংসট্ঠা দ্ৱে চাতি ‘‘ভিক্খুনিযো পনেৱ সংসট্ঠা ৱিহৰন্তী’’তি (পাচি. ৭২২) চ ‘‘যা পন ভিক্খুনী এৱং ৱদেয্য সংসট্ঠাৱ, অয্যে, তুম্হে ৱিহৰথা’’তিআদিৱচনং (পাচি. ৭২৮) পটিচ্চ ৱুত্তসিক্খাপদদ্ৱযঞ্চ. ৱধিত্ৱা চাতি ‘‘অত্তানং ৱধিত্ৱা ৱধিত্ৱা ৰোদেয্যা’’তি (পাচি. ৮৮০) ৱুত্তসিক্খাপদঞ্চ. ৱিসিব্বেত্ৱা চাতি ‘‘ভিক্খুনিযা চীৱৰং ৱিসিব্বেত্ৱা ৱা ৱিসিব্বাপেত্ৱা ৱা’’তি (পাচি. ৮৯৩) ৱুত্তসিক্খাপদঞ্চ. দুক্খিতন্তি ‘‘দুক্খিতং সহজীৱিনি’’ন্তি (পাচি. ৯৪৭) ৱুত্তসিক্খাপদঞ্চ. পুনদেৱ চ সংসট্ঠাতি ‘‘সংসট্ঠা ৱিহৰেয্য গহপতিনা ৱা গহপতিপুত্তেন ৱা’’তি (পাচি. ৯৫৬) এৱং পুন ৱুত্তসংসট্ঠসিক্খাপদঞ্চ. নেৱ ৱূপসমেয্য চাতি ‘‘‘এহায্যে, ইমং অধিকৰণং ৱূপসমেহী’তি (পাচি. ৯৯৫) ৱুচ্চমানা ‘সাধূ’তি পটিস্সুণিত্ৱা সা পচ্ছা অনন্তৰাযিকিনী নেৱ ৱূপসমেয্যা’’তি ৱুত্তসিক্খাপদঞ্চ.

৩৮২. জানং সভিক্খুকাৰামন্তি ‘‘জানং সভিক্খুকং আৰামং অনাপুচ্ছা পৱিসেয্যা’’তি (পাচি. ১০২৪) ৱুত্তসিক্খাপদঞ্চ. তথেৱ ন পৱাৰযেতি ‘‘উভতোসঙ্ঘে তীহি ঠানেহি ন পৱাৰেয্যা’’তি (পাচি. ১০৫১) ৱুত্তসিক্খাপদঞ্চ. তথা অন্ৱদ্ধমাসঞ্চাতি ‘‘অন্ৱদ্ধমাসং ভিক্খুনিযা ভিক্খুসঙ্ঘতো দ্ৱে ধম্মা পচ্চাসীসিতব্বা’’তি (পাচি. ১০৫৯) ৱুত্তসিক্খাপদঞ্চ. সহজীৱিনিযো দুৱেতি ‘‘সহজীৱিনিং ৱুট্ঠাপেত্ৱা দ্ৱে ৱস্সানি নেৱ অনুগ্গণ্হেয্য (পাচি. ১১০৮), সহজীৱিনিং ৱুট্ঠাপেত্ৱা নেৱ ৱূপকাসেয্যা’’তি (পাচি. ১১১৬) ৱুত্তসিক্খাপদদ্ৱযঞ্চ.

৩৮৩-৪. সচে মে চীৱৰং অয্যেতি ‘‘সচে মে ত্ৱং, অয্যে, চীৱৰং দস্সসি, এৱাহং তং ৱুট্ঠাপেস্সামী’’তি (পাচি. ১১৫১) ৱুত্তসিক্খাপদঞ্চ. অনুবন্ধিস্সসীতি ‘‘সচে মং ত্ৱং, অয্যে, দ্ৱে ৱস্সানি অনুবন্ধিস্সসি, এৱাহং তং ৱুট্ঠাপেস্সামী’’তি (পাচি. ১১৫৫) ৱুত্তসিক্খাপদঞ্চ. অসমেন সম্বুদ্ধেন পকাসিতা ইমে সত্ততিংস ধম্মা সব্বে কাযৱাচাদিতো কাযৱাচাচিত্ততো একসমুট্ঠানা কতা সমনুভাসনা সিযুং সমুট্ঠানতো সমনুভাসনসিক্খাপদেন সদিসা সিযুন্তি যোজনা.

সমনুভাসনসমুট্ঠানৱণ্ণনা.

৩৮৫. কথিনানি চ তীণীতি ‘‘নিট্ঠিতচীৱৰস্মিং ভিক্খুনা উব্ভতস্মিং কথিনে’’তি (পাৰা. ৪৬২) ৱুত্তানি আদিতো তীণি সিক্খাপদানি. পত্তোতি ‘‘দসাহপৰমং অতিৰেকপত্তো’’তি (পাৰা. ৬০১) ৱুত্তসিক্খাপদঞ্চ. ভেসজ্জমেৱ চাতি ‘‘পটিসাযনীযানি ভেসজ্জানী’’তি (পাৰা. ৬২২) ৱুত্তসিক্খাপদঞ্চ. অচ্চেকম্পি চাতি অচ্চেকসিক্খাপদঞ্চ. সাসঙ্কন্তি তদনন্তৰমেৱ সাসঙ্কসিক্খাপদঞ্চ. পক্কমন্তদ্ৱযম্পি চাতি ‘‘তং পক্কমন্তো নেৱ উদ্ধৰেয্যা’’তি (পাচি. ১০৯, ১১৫) ভূতগামৱগ্গে ৱুত্তসিক্খাপদদ্ৱযঞ্চ.

৩৮৬. তথা উপস্সযং গন্ত্ৱাতি ‘‘ভিক্খুনুপস্সযং উপসঙ্কমিত্ৱা ভিক্খুনিযো ওৱদেয্যা’’তি (পাচি. ১৫৮) ৱুত্তসিক্খাপদঞ্চ. পৰম্পৰং ভোজনন্তি ‘‘পৰম্পৰভোজনে পাচিত্তিয’’ন্তি (পাচি. ২২১) ৱুত্তসিক্খাপদঞ্চ. অনতিৰিত্তন্তি ‘‘অনতিৰিত্তং খাদনীযং ৱা ভোজনীযং ৱা’’তি (পাচি. ২৩৮) ৱুত্তসিক্খাপদঞ্চ. সভত্তোতি ‘‘নিমন্তিতো সভত্তো সমানো’’তি (পাচি. ২৯৯) ৱুত্তসিক্খাপদঞ্চ. ৱিকপ্পেত্ৱা তথেৱ চাতি ‘‘চীৱৰং ৱিকপ্পেত্ৱা’’তি (পাচি. ৩৭৩) ৱুত্তসিক্খাপদঞ্চ.

৩৮৭. ৰঞ্ঞোতি ‘‘ৰঞ্ঞো খত্তিযস্সা’’তি (পাচি. ৪৯৮) ৱুত্তসিক্খাপদঞ্চ. ৱিকালেতি ‘‘ৱিকালে গামং পৱিসেয্যা’’তি (পাচি. ৫০৯-৫১২) ৱুত্তসিক্খাপদঞ্চ. ৱোসাসাতি ‘‘ৱোসাসমানৰূপা ঠিতা’’তি (পাচি. ৫৫৮) ৱুত্তসিক্খাপদঞ্চ. ‘‘আৰঞ্ঞকে উস্সযৱাদিকা’’তি পদচ্ছেদো. আৰঞ্ঞকেতি ‘‘তথাৰূপেসু আৰঞ্ঞকেসু সেনাসনেসু পুব্বে অপ্পটিসংৱিদিত’’ন্তি (পাচি. ৫৭০) ৱুত্তসিক্খাপদঞ্চ. উস্সযৱাদিকাতি ‘‘উস্সযৱাদিকা ৱিহৰেয্যা’’তি (পাচি. ৬৭৯) ৱুত্তসিক্খাপদঞ্চ. পত্তসন্নিচযঞ্চেৱাতি ‘‘পত্তসন্নিচযং কৰেয্যা’’তি (পাচি. ৭৩৪) ৱুত্তসিক্খাপদঞ্চ. পুৰে, পচ্ছা, ৱিকালকেতি ‘‘যা পন ভিক্খুনী পুৰেভত্তং কুলানি উপসঙ্কমিত্ৱা’’তি (পাচি. ৮৫৫) চ ‘‘পচ্ছাভত্তং কুলানি উপসঙ্কমিত্ৱা’’তি (পাচি. ৮৬০) চ ‘‘ৱিকালে কুলানি উপসঙ্কমিত্ৱা’’তি (পাচি. ৮৬৫) চ ৱুত্তসিক্খাপদত্তযঞ্চ.

৩৮৮-৯. পঞ্চাহিকন্তি ‘‘পঞ্চাহিকং সঙ্ঘাটিচাৰং অতিক্কমেয্যা’’তি (পাচি. ৮৯৮) ৱুত্তসিক্খাপদঞ্চ. সঙ্কমনিন্তি ‘‘চীৱৰসঙ্কমনীযং ধাৰেয্যা’’তি (পাচি. ৯০৩) ৱুত্তসিক্খাপদঞ্চ. তথা আৱসথদ্ৱযন্তি ‘‘আৱসথচীৱৰং অনিস্সজ্জিত্ৱা পৰিভুঞ্জেয্য (পাচি. ১০০৪), আৱসথং অনিস্সজ্জিত্ৱা চাৰিকং পক্কমেয্যা’’তি (পাচি. ১০০৯) এৱং আৱসথেন সদ্ধিং ৱুত্তসিক্খাপদদ্ৱযঞ্চ. পসাখেতি ‘‘পসাখে জাতং গণ্ডং ৱা’’তি (পাচি. ১০৬৩) ৱুত্তসিক্খাপদঞ্চ. আসনে চাতি ‘‘ভিক্খুস্স পুৰতো অনাপুচ্ছা আসনে নিসীদেয্যা’’তি (পাচি. ১২১৫) ৱুত্তসিক্খাপদঞ্চাতি ইমে পন একূনতিংস ধম্মা কাযৱাচতো, কাযৱাচাচিত্ততো চ সমুট্ঠানতো সব্বে দ্ৱিসমুট্ঠানিকা, ততোযেৱ কথিনসম্ভৱা কথিনসমুট্ঠানা হোন্তীতি যোজনা.

কথিনসমুট্ঠানৱণ্ণনা.

৩৯০. দ্ৱে সেয্যাতি দ্ৱে সহসেয্যসিক্খাপদানি চ. আহচ্চপাদো চাতি আহচ্চপাদকসিক্খাপদঞ্চ. পিণ্ডঞ্চাতি আৱসথপিণ্ডভোজনসিক্খাপদঞ্চ. গণভোজনন্তি গণভোজনসিক্খাপদঞ্চ. ৱিকালেতি ৱিকালভোজনসিক্খাপদঞ্চ. সন্নিধিঞ্চেৱাতি সন্নিধিকাৰকসিক্খাপদঞ্চ. দন্তপোনন্তি দন্তপোনসিক্খাপদঞ্চ. অচেলকন্তি অচেলকসিক্খাপদঞ্চ.

৩৯১. উয্যুত্তঞ্চাতি ‘‘উয্যুত্তং সেনং দস্সনায গচ্ছেয্যা’’তি (পাচি. ৩১১) ৱুত্তসিক্খাপদঞ্চ. ‘‘ৱসে উয্যোধি’’ন্তি পদচ্ছেদো. ৱসেতি ‘‘সেনায ৱসেয্যা’’তি (পাচি. ৩১৮) ৱুত্তসিক্খাপদঞ্চ. উয্যোধিন্তি ‘‘উয্যোধিকং ৱা…পে… অনীকদস্সনং ৱা গচ্ছেয্যা’’তি (পাচি. ৩২৩) ৱুত্তসিক্খাপদঞ্চ. সুৰাতি সুৰাপানসিক্খাপদঞ্চ. ওৰেন ন্হাযনন্তি ওৰেনদ্ধমাসনহাযনসিক্খাপদঞ্চ. দুব্বণ্ণকৰণঞ্চেৱাতি ‘‘তিণ্ণং দুব্বণ্ণকৰণান’’ন্তি (পাচি. ৩৬৮) ৱুত্তসিক্খাপদঞ্চ. পাটিদেসনীযদ্ৱযন্তি ৱুত্তাৱসেসং পাটিদেসনীযদ্ৱযঞ্চ.

৩৯২. লসুণন্তি লসুণসিক্খাপদঞ্চ. উপতিট্ঠেয্যাতি ‘‘ভিক্খুস্স ভুঞ্জন্তস্স পানীযেন ৱা ৱিধূপনেন ৱা উপতিট্ঠেয্যা’’তি (পাচি. ৮১৬) ৱুত্তসিক্খাপদঞ্চ. নচ্চদস্সনমেৱ চাতি ‘‘নচ্চং ৱা গীতং ৱা ৱাদিতং ৱা দস্সনায গচ্ছেয্যা’’তি (পাচি. ৮৩৪) ৱুত্তসিক্খাপদঞ্চ. নগ্গন্তি ‘‘নগ্গা নহাযেয্যা’’তি (পাচি. ৮৮৪) ৱুত্তসিক্খাপদঞ্চ. অত্থৰণন্তি ‘‘একত্থৰণপাৱুৰণা তুৱট্টেয্যু’’ন্তি (পাচি. ৯৩৭) ৱুত্তসিক্খাপদঞ্চ. মঞ্চেতি ‘‘একমঞ্চে তুৱট্টেয্যু’’ন্তি (পাচি. ৯৩৩) ৱুত্তসিক্খাপদঞ্চ. অন্তোৰট্ঠেতি ‘‘অন্তোৰট্ঠে সাসঙ্কসম্মতে’’তি (পাচি. ৯৬২) ৱুত্তসিক্খাপদঞ্চ. তথা বহীতি ‘‘তিৰোৰট্ঠে সাসঙ্কসম্মতে’’তি (পাচি. ৯৬৬) ৱুত্তসিক্খাপদঞ্চ.

৩৯৩. অন্তোৱস্সন্তি ‘‘অন্তোৱস্সং চাৰিকং চৰেয্যা’’তি (পাচি. ৯৭০) ৱুত্তসিক্খাপদঞ্চ. অগাৰঞ্চাতি ‘‘ৰাজাগাৰং ৱা চিত্তাগাৰং ৱা…পে… পোক্খৰণিং ৱা দস্সনায গচ্ছেয্যা’’তি (পাচি. ৯৭৮) ৱুত্তসিক্খাপদঞ্চ. আসন্দিন্তি ‘‘আসন্দিং ৱা পল্লঙ্কং ৱা পৰিভুঞ্জেয্যা’’তি (পাচি. ৯৮৩) ৱুত্তসিক্খাপদঞ্চ. সুত্তকন্তনন্তি ‘‘সুত্তং কন্তেয্যা’’তি (পাচি. ৯৮৭) ৱুত্তসিক্খাপদঞ্চ. ৱেয্যাৱচ্চন্তি ‘‘গিহিৱেয্যাৱচ্চং কৰেয্যা’’তি (পাচি. ৯৯১) ৱুত্তসিক্খাপদঞ্চ. সহত্থা চাতি ‘‘অগাৰিকস্স ৱা পৰিব্বাজকস্স ৱা পৰিব্বাজিকায ৱা সহত্থা খাদনীযং ৱা ভোজনীযং ৱা দদেয্যা’’তি (পাচি. ১০০০) ৱুত্তসিক্খাপদঞ্চ. আৱাসে চ অভিক্খুকেতি ‘‘অভিক্খুকে আৱাসে ৱস্সং ৱসেয্যা’’তি (পাচি. ১০৪৭) ৱুত্তসিক্খাপদঞ্চ.

৩৯৪. ছত্তন্তি ‘‘ছত্তুপাহনং ধাৰেয্যা’’তি (পাচি. ১১৭৮) ৱুত্তসিক্খাপদঞ্চ. যানঞ্চাতি ‘‘যানেন যাযেয্যা’’তি (পাচি. ১১৮৬) ৱুত্তসিক্খাপদঞ্চ. সঙ্ঘাণিন্তি ‘‘সঙ্ঘাণিং ধাৰেয্যা’’তি (পাচি. ১১৯১) ৱুত্তসিক্খাপদঞ্চ. অলঙ্কাৰন্তি ‘‘ইত্থালঙ্কাৰং ধাৰেয্যা’’তি (পাচি. ১১৯৫) ৱুত্তসিক্খাপদঞ্চ. গন্ধৱাসিতন্তি ‘‘গন্ধৱণ্ণকেন নহাযেয্য (পাচি. ১১৯৯), ৱাসিতকেন পিঞ্ঞাকেন নহাযেয্যা’’তি (পাচি. ১২০৩) ৱুত্তসিক্খাপদদ্ৱযঞ্চ. ‘‘ভিক্খুনী…পে… গিহিনিযা’’তি এতেন ‘‘ভিক্খুনিযা উম্মদ্দাপেয্যা’’তিআদীনি (পাচি. ১২০৭) চত্তাৰি সিক্খাপদানি ৱুত্তানি.

৩৯৫. তথাসংকচ্চিকাতি ‘‘অসংকচ্চিকা গামং পৱিসেয্যা’’তি (পাচি. ১২২৫) এৱং ৱুত্তসিক্খাপদঞ্চ. ইমে পন তেচত্তালীস ধম্মা সব্বে কাযচিত্তৱসেন দ্ৱিসমুট্ঠানিকা. এড়কলোমেন সমুট্ঠানতো সমা হোন্তীতি যোজনা.

এড়কলোমসমুট্ঠানৱণ্ণনা.

৩৯৬-৭. অঞ্ঞত্ৰাতি ‘‘মাতুগামস্স উত্তৰিছপ্পঞ্চৱাচাহি ধম্মং দেসেয্য অঞ্ঞত্ৰ ৱিঞ্ঞুনা পুৰিসৱিগ্গহেনা’’তি (পাচি. ৬৩) ৱুত্তসিক্খাপদঞ্চ. অসম্মতো চেৱাতি ‘‘অসম্মতো ভিক্খুনিযো ওৱদেয্যা’’তি (পাচি. ১৪৬) ৱুত্তসিক্খাপদঞ্চ. তথা অত্থঙ্গতেন চাতি ‘‘অত্থঙ্গতে সূৰিযে ভিক্খুনিযো ওৱদেয্যা’’তি (পাচি. ১৫৪) ৱুত্তসিক্খাপদঞ্চ. তিৰচ্ছানৱিজ্জা দ্ৱে ৱুত্তাতি ‘‘তিৰচ্ছানৱিজ্জং পৰিযাপুণেয্য, ৱাচেয্যা’’তি (পাচি. ১০১৪, ১০১৮) এৱং ৱুত্তানি দ্ৱে সিক্খাপদানি চ. অনোকাসকতম্পি চাতি ‘‘অনোকাসকতং ভিক্খুং পঞ্হং পুচ্ছেয্যা’’তি (পাচি. ১২২০) ৱুত্তসিক্খাপদঞ্চাতি ইমে পন সব্বে ছ ধম্মা ৱাচতো, ৱাচাচিত্ততো চাতি ইমেহি দ্ৱীহি সমুট্ঠানেহি সমুট্ঠানিকা হোন্তি. পদসোধম্মতুল্যতা অযমেতেসং পদসোধম্মেন সদিসভাৱোতি যোজনা.

পদসোধম্মসমুট্ঠানৱণ্ণনা.

৩৯৮-৯. একন্তি ‘‘ভিক্খুনিযা সদ্ধিং সংৱিধায একদ্ধানমগ্গং পটিপজ্জেয্যা’’তি (পাচি. ১৮০) ৱুত্তসিক্খাপদঞ্চ. নাৱন্তি ‘‘একনাৱং অভিৰুহেয্যা’’তি (পাচি. ১৮৮) ৱুত্তসিক্খাপদঞ্চ. পণীতঞ্চাতি ‘‘পণীতভোজনানি অগিলানো অত্তনো অত্থায ৱিঞ্ঞাপেত্ৱাভুঞ্জেয্যা’’তি (পাচি. ২৫৯) ৱুত্তসিক্খাপদঞ্চ. সংৱিধানঞ্চাতি মাতুগামেন সদ্ধিং সংৱিধায গমনসিক্খাপদঞ্চ. সংহৰেতি ‘‘সম্বাধে লোমং সংহৰাপেয্যা’’তি (পাচি. ৭৯৯) ৱুত্তসিক্খাপদঞ্চ. ধঞ্ঞন্তি ‘‘আমকধঞ্ঞং ৱিঞ্ঞত্ৱা ৱা’’তি (পাচি. ৮২১) ৱুত্তসিক্খাপদঞ্চ. নিমন্তিতা চেৱাতি ‘‘নিমন্তিতা ৱা পৱাৰিতা ৱা খাদনীযং ৱা ভোজনীযং ৱা খাদেয্য ৱা ভুঞ্জেয্য ৱা’’তি (পাচি. ১০৩৮) ৱুত্তসিক্খাপদঞ্চ. পাটিদেসনিযট্ঠকন্তি ভিক্খুনীনং ৱুত্তা অট্ঠ পাটিদেসনীযা চেতি বুদ্ধসেট্ঠেন পঞ্ঞত্তা এতা চুদ্দস সিক্খা চতুসমুট্ঠানা কাযতো, কাযৱাচতো, কাযচিত্ততো, ৱাচাচিত্ততো চাতি চতূহি সমুট্ঠানেহি সমুট্ঠহন্তি. সমুট্ঠানতো অদ্ধানেন অদ্ধানসিক্খাপদেন সমা হোন্তীতি মতাতি যোজনা.

অদ্ধানসমুট্ঠানৱণ্ণনা.

৪০০-১. সুতিন্তি উপস্সুতিতিট্ঠনসিক্খাপদঞ্চ. সূপাদিৱিঞ্ঞত্তিন্তি সূপোদনৱিঞ্ঞত্তিসিক্খাপদঞ্চ. অন্ধকাৰেতি ‘‘ৰত্তন্ধকাৰে অপ্পদীপে’’তি (পাচি. ৮৩৯) ৱুত্তসিক্খাপদঞ্চ. তথেৱ চ পটিচ্ছন্নেতি ‘‘পটিচ্ছন্নে ওকাসে’’তি (পাচি. ৮৪৩) ৱুত্তসিক্খাপদঞ্চ. ওকাসেতি ‘‘অজ্ঝোকাসে পুৰিসেন সদ্ধি’’ন্তি (পাচি. ৮৪৭) এৱং ৱুত্তসিক্খাপদঞ্চ. ব্যূহে চাতি তদনন্তৰমেৱ ‘‘ৰথিকায ৱা ব্যূহে ৱা সিঙ্ঘাটকে ৱা পুৰিসেন সদ্ধি’’ন্তি (পাচি. ৮৫১) আগতসিক্খাপদঞ্চাতি ইমে সব্বেপি আদিচ্চবন্ধুনা দেসিতা ছ ধম্মা চতুত্থচ্ছট্ঠতো কাযচিত্ততো, কাযৱাচাচিত্ততো চ সমুট্ঠহন্তা থেয্যসত্থসমুট্ঠানা থেয্যসত্থসিক্খাপদেন সমানসমুট্ঠানা সিযুন্তি যোজনা.

থেয্যসত্থসমুট্ঠানৱণ্ণনা.

৪০২. ছত্ত, দণ্ডকৰস্সাপীতি ‘‘ন ছত্তপাণিস্স দণ্ডপাণিস্সা’’তি (পাচি. ৬৩৫) ৱুত্তসিক্খাপদদ্ৱযঞ্চ. সত্থাৱুধকৰস্সাপীতি ‘‘ন সত্থপাণিস্স (পাচি. ৬৩৬), ন আৱুধপাণিস্সা’’তি (পাচি. ৬৩৭) ৱুত্তসিক্খাপদদ্ৱযঞ্চ. পাদুকূপাহনা, যানন্তি ‘‘ন পাদুকাৰুড়্হস্স (পাচি. ৬৩৮), ন উপাহনাৰুড়্হস্স (পাচি. ৬৩৯), ন যানগতস্সা’’তি (পাচি. ৬৪০) ৱুত্তসিক্খাপদত্তযঞ্চ. সেয্যা, পল্লত্থিকায চাতি ‘‘ন সযনগতস্স (পাচি. ৬৪১), ন পল্লত্থিকায নিসিন্নস্সা’’তি (পাচি. ৬৪২) ৱুত্তসিক্খাপদদ্ৱযঞ্চ.

৪০৩. ৱেঠিতোগুণ্ঠিতো চাতি ‘‘ন ৱেঠিতসীসস্স (পাচি. ৬৪৩), ন ওগুণ্ঠিতসীসস্সা’’তি (পাচি. ৬৪৪) ৱুত্তসিক্খাপদদ্ৱযঞ্চাতি নিদস্সিতা সব্বে একাদস ধম্মা ৱাচাচিত্তসঙ্খাতেন একেন সমুট্ঠানেন সমুট্ঠিতা ধম্মদেসনসমুট্ঠানাতি সঞ্ঞিতা সল্লক্খিতাতি যোজনা.

ধম্মদেসনসমুট্ঠানৱণ্ণনা.

৪০৪. এৱং তাৱ সম্ভিন্নসমুট্ঠানং ৱেদিতব্বং, নিযতসমুট্ঠানং তিৱিধং, তং একস্সেৱ সিক্খাপদস্স হোতীতি ৱিসুংযেৱ দস্সেতুমাহ ‘‘ভূতাৰোচনকঞ্চেৱা’’তিআদি. ভূতাৰোচনকঞ্চেৱাতি তীহি অচিত্তকসমুট্ঠানেহি সমুট্ঠিতং ভূতাৰোচনসিক্খাপদঞ্চ. চোৰিৱুট্ঠাপনম্পি চাতি ৱাচাচিত্ততো, কাযৱাচাচিত্ততো চাতি দ্ৱীহি সমুট্ঠিতং চোৰিৱুট্ঠাপনসিক্খাপদঞ্চ. অননুঞ্ঞাতমেৱ অননুঞ্ঞাতমত্তং. অননুঞ্ঞাতমত্তন্তি ৱাচতো, কাযৱাচতো, ৱাচাচিত্ততো, কাযৱাচাচিত্ততো চাতি চতূহি সমুট্ঠিতং অননুঞ্ঞাতসিক্খাপদঞ্চাতি. ইদং তযন্তি ইদং সিক্খাপদত্তযং. অসম্ভিন্নন্তি কেনচি অঞ্ঞেন সিক্খাপদেন অসম্মিস্সসমুট্ঠানং.

ইতি উত্তৰে লীনত্থপকাসনিযা

সমুট্ঠানসীসকথাৱণ্ণনা নিট্ঠিতা.