খন্ধকপুচ্ছাকথাৱণ্ণনা

৩০০. সেসেসূতি অভব্বপুগ্গলপৰিদীপকেসু সব্বপদেসু.

৩০২. ‘‘নস্সন্তু এতে’’তি পদচ্ছেদো. পুৰক্খকাতি এত্থ সামিঅত্থে পচ্চত্তৱচনং, ভেদপুৰেক্খকস্স, ভেদপুৰেক্খকাযাতি অত্থো.

৩০৩. সেসেসূতি অৱসেসেসু অসংৱাসকাদিদীপকেসু পটিক্খেপপদেসু.

৩০৪. একাৱ দুক্কটাপত্তি ৱুত্তাতি ৱস্সং অনুপগমনাদিপচ্চযা জাতিতো একাৱ দুক্কটাপত্তি ৱুত্তা.

৩০৫. উপোসথসমা মতাতি উপোসথক্খন্ধকে ৱুত্তসদিসা জাতা আপত্তিযো মতা অধিপ্পেতা.

৩০৬. চম্মেতি চম্মক্খন্ধকে. ৱচ্ছতৰিং গহেত্ৱা মাৰেন্তানং ছব্বগ্গিযানং পাচিত্তি ৱুত্তাতি সম্বন্ধো. ৱচ্ছতৰিন্তি বলসম্পন্নং তৰুণগাৱিং. সা হি ৱচ্ছকভাৱং তৰিত্ৱা অতিক্কমিত্ৱা ঠিতত্তা ‘‘ৱচ্ছতৰী’’তি ৱুচ্চতি.

৩০৭. অঙ্গজাতং ছুপন্তস্সাতি গাৱীনং অঙ্গজাতং অত্তনো অঙ্গজাতেন বহি ছুপন্তস্স. সেসেসূতি গাৱীনং ৱিসাণাদীসু গহণে, পিট্ঠিঅভিৰুহণে চ. যথাহ ‘‘ছব্বগ্গিযা ভিক্খূ অচিৰৱতিযা নদিযা গাৱীনং তৰন্তীনং ৱিসাণেসুপি গণ্হন্তী’’তিআদি (মহাৱ. ২৫২).

৩০৯. তত্থ ভেসজ্জক্খন্ধকে. সামন্তা দ্ৱঙ্গুলেতি ৱচ্চমগ্গপস্সাৱমগ্গানং সামন্তা দ্ৱঙ্গুলমত্তে পদেসে. সত্থকম্মং কৰোন্তস্স থুল্লচ্চযমুদীৰিতন্তি যোজনা. যথাহ – ‘‘ন, ভিক্খৱে, সম্বাধস্স সামন্তা দ্ৱঙ্গুলে সত্থকম্মং ৱা ৱত্থিকম্মং ৱা কাৰেতব্বং, যো কাৰেয্য, আপত্তি থুল্লচ্চযস্সা’’তি (মহাৱ. ২৭৯). এত্থ চ ‘‘সামন্তা দ্ৱঙ্গুলে’’তি ইদং সত্থকম্মংযেৱ সন্ধায ৱুত্তং. ৱত্থিকম্মং পন সম্বাধেযেৱ পটিক্খিত্তং.

‘‘ন, ভিক্খৱে, অঞ্ঞত্ৰ নিমন্তিতেন অঞ্ঞস্স ভোজ্জযাগু পৰিভুঞ্জিতব্বা, যো পৰিভুঞ্জেয্য, যথাধম্মো কাৰেতব্বো’’তি (মহাৱ. ২৮৩) ৱুত্তত্তা আহ ‘‘ভোজ্জযাগূসু পাচিত্তী’’তি. এত্থ চ ভোজ্জযাগু নাম বহলযাগু. ‘‘পিণ্ডং ৱট্টেত্ৱা পাতব্বযাগূ’’তি গণ্ঠিপদে ৱুত্তং. পাচিত্তীতি পৰম্পৰভোজনপৱাৰণসিক্খাপদেহি পাচিত্তি. সেসেসূতি অন্তোৱুত্থঅন্তোপক্কসযংপক্কপৰিভোগাদীসু. যথাহ ‘‘ন, ভিক্খৱে, অন্তোৱুত্থং অন্তোপক্কং সামংপক্কং পৰিভুঞ্জিতব্বং, যো পৰিভুঞ্জেয্য, আপত্তি দুক্কটস্সা’’তিআদি (মহাৱ. ২৭৪).

৩১০. চীৱৰসংযুত্তেতি চীৱৰক্খন্ধকে.

৩১৩. চম্পেয্যকে চ কোসম্বেতি চম্পেয্যক্খন্ধকে চেৱ কোসম্বকক্খন্ধকে চ. ‘‘কম্মস্মি’’ন্তিআদীসুপি এসেৱ নযো.

৩১৭. ৰোমন্থেতি ভুত্তস্স লহুং পাকত্তায কুচ্ছিগতং মুখং আৰোপেত্ৱা সণ্হকৰণৱসেন অনুচালনে.

৩১৮. সেনাসনস্মিন্তি সেনাসনক্খন্ধকে. গৰুনোতি গৰুভণ্ডস্স.

৩২০. সঙ্ঘভেদেতি সঙ্ঘভেদকক্খন্ধকে.

৩২১. ভেদানুৱত্তকানন্তি সঙ্ঘভেদানুৱত্তকানং. গণভোগেতি গণভোজনে.

৩২২. সাতি এত্থ সব্বৱত্তেসু অনাদৰিযেন হোতীতি সেসো. সেসং উত্তানত্থমেৱ.

ইতি উত্তৰে লীনত্থপকাসনিযা

খন্ধকপুচ্ছাকথাৱণ্ণনা নিট্ঠিতা.